?Wanem Tingting Blong Yumi Long Ol Traem?

!OL TRAEM! Yumi evriwan i mas fesem traem. Maet ol traem ya oli kamaot from ol rao bitwin ol man, ol trabol long mane, ol sik, strong filing blong wantem mekem samting nogud, ol rabis fren, fasin agens, ol traehad blong no joenem ami mo no wosipim ol aedol, mo plante narafala samting bakegen. Nomata wanem kaen traem we yumi fesem, oltaem ol traem ya oli mas mekem yumi harem nogud tumas. ?Olsem wanem yumi save winim ol traem? ?Yumi save kasem blesing from ol traem ya?

Wan Nambawan Help

King Deved blong bifo i fesem fulap traem long laef blong hem be hem i stap tru long God go kasem taem we hem i ded. ?Hu i halpem hem blong stanap strong? Hem i soemaot stamba blong paoa blong hem taem hem i talem se: “Hae God i stap lukaot gud long mi olsem we mi mi sipsip blong hem, nao mi no save sot long wan samting.” Nao hem i gohed i se: “Nating we mi pas long ples we i tudak olgeta i ples blong ded, be mi mi no save fraet long wan samting, from we yu yu stap wetem mi. Yu stap blokemgud mi long nalnal blong yu mo long wokingstik blong yu, nao mi mi stap sef.” (Ol Sam 23:1, 4) Yes, Jeova i wan nambawan help long yumi. Taem Deved i fesem hadtaem, Jeova i lidim hem olsem man blong lukaot sipsip i lidim ol sipsip blong hem. Long sem fasin, taem yumi nidim help, God i rere blong lidim yumi.

?Olsem wanem yumi save kasem help blong Jeova? Baebol i soem rod long yumi i se: “Traem trastem Jeova, nao bambae yu luk se hem i gud.” (Ol Sam 34:8, NW ) ?Hemia wan naesfala tok, be wanem mining blong hem? Tok ya i pulum yumi blong mekem wok blong Jeova mo blong mekem ful laef blong yumi i laenap wetem wanem we hem i wantem. Hemia i min se yumi mas rere blong lego sam samting we yumi nomo i wantem. Taem yumi mekem olsem, samtaem yumi save kasem traem—maet narafala i agensem yumi mo yumi safa. Nating se i olsem, ol man we, long fulhat blong olgeta, oli agri blong mekem olsem we Jeova i talem, neva bambae oli sore from. Bambae Jeova i kaengud long olgeta. Bambae i lidim olgeta mo i lukaotgud long olgeta long saed blong spirit. Jeova bambae i sapotem olgeta blong oli fesem ol traem, i givhan long olgeta wetem Tok blong hem, tabu spirit blong hem, mo Kristin kongregesen. Mo biaen, bambae hem i blesem olgeta taem hem i givim laef ya we i no save finis long olgeta.—Ol Sam 23:6; 25:9; Aesea 30:21; Rom 15:5.

Ol man we oli mekem disisen blong oli jenisim laef blong olgeta blong mekem wok blong Jeova, mo oli stap tru long disisen ya, bambae oli luk se Jeova i holem ol promes blong hem. Hemia wan samting we ol man Isrel oli luksave taem oli folem Josua i go long Promes Lan. Oli krosem Jodan reva finis, nao oli mas winim ol traem, oli mas faet agensem ol  nesen, mo oli mas lanem sam lesen we i had tumas. Be ol man Isrel oli stap tru long God, oli no folem eksampol blong ol bubu blong olgeta we oli aot long Ijip mo oli ded long drae ples. Taswe Jeova i givhan long ol man ya we oli stap tru long hem. Taem Josua i kasem en blong laef blong hem, Baebol i tokbaot ol blesing we ol man Isrel ya oli kasem i se: “Hae God i mekem we olgeta oli gat pis, mo oli stap gud oltaem long olgeta ples ya we oli stap long hem, olsem we hem i promes long ol bubu blong olgeta bifo. . . . Hem i holem olgeta promes ya we i mekem long ol bubu blong olgeta bifo, se bambae i mekem i gud long olgeta. I no gat wan long olgeta i foldaon, olgeta evriwan i kamtru.” (Josua 21:44, 45) Yumi tu yumi save luk ol promes blong God i kamtru sipos yumi trastem Jeova fulwan taem yumi fesem ol traem, mo long ol narafala taem tu.

?Wanem samting i save mekem we yumi no moa trastem Jeova fulwan? Jisas i tokbaot wan risen i se: “I no gat man we i save wok blong tu masta wantaem. . . . Yufala i no save mekem we God i bos blong yufala, be long semtaem nomo, mane tu i bos blong yufala.” (Matiu 6:24) Sipos yumi trastem Jeova bambae yumi no traem faenem sefples long ol samting blong bodi, olsem bighaf blong ol man long wol oli stap mekem tede. Jisas i givim advaes ya long ol man blong hem se: “Taswe, yufala i mas gohed blong lukaot kingdom mo stret fasin blong hem fastaem. Nao bambae hem i givim olgeta narafala samting ya [we man i rili nidim long saed blong bodi] tu long yufala.” (Matiu 6:33, NW ) Wan Kristin we i gat stret tingting long ol samting blong bodi mo i stap lukaot Kingdom blong God fastaem long laef blong hem, hem i waes. (Prija 7:12, NW ) I tru se samtaem i no isi. Maet hem i mas lego sam samting long saed blong bodi. Be bambae hem i kasem plante blesing. Mo Jeova bambae i givhan long hem.—Aesea 48:17, 18.

Lesen We Yumi Lanem Long Ol Traem

Taem yumi jusum blong ‘trastem Jeova mo yumi luk se hem i gud,’ samting ya i no min se hem i blokem ol trabol long laef blong oli no kasem yumi, mo tu i no min se bambae hem i protektem yumi long ol trik blong Setan mo ol man blong hem. (Prija 9:11) Taswe, ol traem oli save soemaot sipos wan Kristin i holemstrong long bilif blong hem no nogat. ?From wanem Jeova i letem ol man we oli wosipim hem oli fesem ol traem olsem? Aposol Pita i givim wan risen taem hem i raetem se: “Yufala i save harem gud from ol samting ya. Nating we naoia yufala i mas harem nogud from plante samting we oli stap kam blong traem yufala. Ol samting ya oli stap kam blong soemaot we fasin blong bilif blong yufala i tru. Gol i wan gudfala samting be i wan samting we i save lus tu. Be oli stap traem hem long faea blong luksave hem. Oraet, long sem fasin, bilif blong yufala we long fes blong God i gud moa long gol, be hem tu i gat ol samting blong traem hem. Nao long Dei ya we bambae Jisas Kraes i kamtru, God bambae i save presem yufala, i save leftemap nem blong yufala, i save ona long yufala.” (1 Pita 1:6, 7, Nyutesteman wetem Ol Sam long Bislama) Yes, ol traem oli givim janis long yumi blong soemaot se bilif mo lav blong yumi long Jeova i strong olsem wanem. Mo tu, taem yumi stap tru nomata long ol traem ya, Jeova i yusum fasin ya blong yumi blong givim wan ansa long Devel Setan.—Ol Proveb 27:11; Revelesen 12:10.

Ol traem oli halpem yumi blong wokem sam gudfala Kristin fasin tu. Traem tingbaot tok ya blong man we i raetem Sam, hem i talem se: ‘God i stap lukaot gud long ol man we tingting blong olgeta i stap daon. Be ol praod man oli no save haed long fes blong hem.’ (Ol Sam 138:6) Plante long yumi, yumi no bon wetem fasin ya blong gat tingting daon. Nating se i olsem ol traem oli save halpem yumi blong wokem gudfala fasin ya. Ating yu rimemba long taem blong Moses, taem ol man Isrel oli les blong kakae mana oltaem. Nating se mana ya i wan merikel blong Jeova, i luk olsem se hem i wan traem blong ol man Isrel. ?Traem ya i blong mekem wanem long olgeta? Moses i talem long olgeta se: “Long draeples ya, [“Jeova,” NW ] i givim kakae ya mana long yumi blong yumi kakae. . . . Hem i mekem we yumi gat hadtaem, from we i wantem traem yumi [“i wantem se yumi gat tingting daon,” NW ].”—Dutronome 8:16.

 I gat sam samting we oli save traem tingting daon blong yumi tu. ?Samting ya i save hapen olsem wanem? Traem tingbaot: ?Yumi mekem wanem taem ol jenis oli kamaot insaed long ogenaesesen? (Aesea 60:17) ?Yumi sapotem wok blong prij wetem fulhat blong yumi? (Matiu 24:14; 28:19, 20) ?Yumi glad tumas blong akseptem ol save blong Baebol we i kamaot long “slef we i stret mo waes”? (Matiu 24:45-47, NW; Ol Proveb 4:18) ?Yumi strong blong agensem ol traem we oli pulum yumi blong kasem ol niufala kaen pleplei, ol niufala stael, no ol niufala trak? Wan man we i gat tingting daon, bambae hem i ansa se “Yes” long ol kwestin olsem.—1 Pita 1:14-16; 2 Pita 3:11.

Ol traem oli halpem yumi blong wokem wan narafala gudfala fasin—hemia fasin blong stanap strong. Disaepol Jemes i talem se: “Ol brata blong mi, taem yufala i kasem sam traem, yufala i tingbaot olgeta olsem samting blong glad from. From we yufala i save se samting ya we i traem bilif blong yufala, hemia i givhan long yufala blong yufala i stap stanap strong.” (Jemes 1:2, 3, NW ) Taem yumi stanap strong agensem evri traem we yumi kasem mo yumi stap trastem Jeova fulwan, yumi wokem fasin blong stap tru long Jeova mo yumi holemstrong long bilif blong yumi. Nao yumi gat moa paoa, mo yumi naf blong fesem ol trik blong Setan, god blong wol ya we i kros tumas.—1 Pita 5:8-10; 1 Jon 5:19; Revelesen 12:12.

Stret Tingting Long Saed Blong Ol Traem

Jisas Kraes, Pikinini blong God we i stret gud olgeta i fesem plante traem long wol ya, mo hem i kasem nambawan blesing from we hem i stanap strong. Pol i talem se Jisas “i lanem mining blong fasin ya blong obei long God, long ol samting we oli mekem hem i harem nogud long bodi blong hem.” (Hibrus 5:8) From we hem i stap tru long God gogo hem i ded, hem i presem nem blong Jeova mo hem i naf blong givim laef blong hem, we i stretgud olgeta, olsem wan ransom blong pemaot ol man. Hemia i openem rod long ol man we oli soem bilif long sakrefaes blong Jisas, blong oli gat laef we i no save finis. (Jon 3:16) From we Jisas i holemstrong long God nomata long ol traem, naoia hem i Hae Pris mo King blong yumi.—Hibrus 7:26-28; 12:2, NW.

?Yumi tu yumi save kasem blesing? Yes, olsem Jisas, sipos yumi stanap strong agensem ol traem bambae God i blesem yumi. Baebol i tokbaot olgeta we oli gat hop blong laef long heven i se: “Taem ol samting oli kam blong traem bilif blong man, be hem i stap stanap strong, hem i save harem gud, from we taem hem i winim ol samting ya we oli kam blong traem hem, God bambae i flasem hem olsem we oli flasem man we i win long faet. Mo praes we God bambae i givim long hem, hemia laef ya we hem i promes finis blong givim long olgeta we oli lavem hem.” (Jemes 1:12) God i promes long ol man we oli gat hop blong laef long wol ya, se sipos oli stanap strong go kasem en, bambae oli kasem laef we i no save finis long wan wol we i paradaes. (Revelesen 21:3-6) Mo antap long samting ya, fasin blong olgeta blong stanap strong i presem nem blong Jeova.

Sipos yumi biaen long Jisas, yumi sua se bambae yumi naf blong winim enikaen traem we yumi fesem long wol naoia. (1 Korin 10:13; 1 Pita 2:21) ?From wanem yumi naf? From we yumi trastem Jeova, man ya we i givim “paoa ya we i bigwan tumas” long olgeta man we oli stap trastem hem. (2 Korin 4:7) Yumi mas gat strong tingting olsem man ya Job. Nating se hem i stap fesem ol traem we i had tumas, be hem i talem wetem strong tingting se: “Sipos hem i traem blong faenemaot fasin blong mi, bambae hem i luk we laef blong mi i klin gud.”—Job 23:10.

[Tok blong pija long pej 31]

Fasin blong Jisas blong stap tru long God long taem blong traem, i presem Jeova. Yumi save mekem sem mak