‘Yufala i Mas Fofogivim Yufala’

?YU YU bilif se God i bin fogivim ol sin blong yu? Long Yunaeted Stet, i luk olsem se bighaf blong ol man mo woman oli gat tingting ya. Dr. Loren Toussaint i bin lidim wan stadi long Yunivesiti blong Michigan Institute for Social Research, we i askem kwestin long 1,423 man Amerika. Stadi ya i ripotem se, 80 pesen blong olgeta ya, we oli gat bitim 45 yia, oli ansa se yes, God i bin fogivim ol sin blong olgeta.

Nating se i olsem, yumi intres blong luk se long ol man we oli ansa long kwestin ya, i gat 57 pesen nomo blong olgeta we oli talem se oli stap fogivim ol narafala tu. Ripot ya i mekem yumi tingbaot Bigfala Toktok blong Jisas antap long Hil, taem hem i se: “Sipos yufala i stap fogivim ol man we oli stap mekem i nogud long yufala, Papa blong yufala long heven bambae i fogivim yufala tu. Be sipos yufala i no fogivim ol man we oli mekem i nogud long yufala, bambae Papa blong yufala i no save fogivim yufala from ol sin blong yufala.” (Matiu 6:14, 15) Yes, bambae God i save fogivim ol sin blong yumi sipos yumi tu yumi rere blong fogivim narafala man.

Aposol Pol i mekem ol Kristin long Kolosi oli tingbaot samting ya. Hem i talem long olgeta se: “Yufala i mas givgivhan long yufala, mo taem wan long yufala i gat sam poen agens long narawan, tufala ya i mas fofogivim tufala. Yufala i mas fofogivim yufala, long sem fasin ya we Masta blong yumi i fogivim yumi.” (Kolosi 3:13) Tru ya, i no isi oltaem blong mekem samting ya. Eksampol, sipos wan man i talem sam samting nogud no sam tok we oli stikim yu, ating bambae i no isi blong fogivim man ya.

Nating se i had, be man we i fogivim narafala i save kasem plante blesing from. Dr. David R. Williams, wan man we i stadi long laef blong ol man, i talem se: “Mifala i faenem se ol man Amerika we oli bitim 40 yia mo oli stap fogivim narafala, oli haremgud long saed blong tingting.” Hemia i laenap wetem ol tok we waes King Solomon i raetem samwe long 3,000 yia bifo se: “Sipos tingting blong man i stap kwaet oltaem, hemia bambae i mekem bodi blong hem i stap gud.” (Ol Proveb 14:30) Man ya we i stap fogivim narafala i gat fasin frengud wetem God mo wetem ol man raonabaot long hem, taswe yumi gat gudfala risen blong fofogivim yumi long olgeta tingting blong yumi.—Matiu 18:35.