‘Hem i Lidim Mi Long Kwaet Ples We Wota i Ron’

LONG ol hot ples ya we Baebol i tokbaot, ol sipsip oli mas dring evri dei. Taswe i impoten tumas we ol man blong lukaot sipsip oli stap givim wota long ol sipsip blong olgeta. Samtaem ol man blong lukaot sipsip oli karemaot wota long wan wel, nao oli kafsaedem wota long wan baket blong ol anamol oli save dring. (Jenesis 29:1-3) Be long taem blong bigfala ren, ol ples raonabaot long ol reva oli kam olsem “kwaet ples we wota i stap ron smol long hem.”—Ol Sam 23:2.

Wan man we i naf gud blong lukaot sipsip blong hem, hem i mas save weples blong faenem wota mo gudfala gras tu blong fidim ol sipsip blong hem. Sipos hem i save gud wan ples olsem, bambae ol sipsip blong hem oli save stap laef. Blong plante yia, Deved i wok olsem man blong lukaot sipsip long ol hil blong Juda. Taswe, hem i skelem fasin blong God blong lidim ol man long saed blong spirit, wetem fasin blong man blong lukaot sipsip we i stap lidim ol sipsip blong hem long wan gudfala ples, we i gat gras mo wota long hem. Deved i talem se: “Hem i stap lidim mi mi go long kwaet ples we wota i stap ron smol long hem.”—Ol Sam 23:1-3.

Plante yia biaen, Jeova i yusum profet Esikel blong talemaot wan pijatok we i klosap sem mak long hemia. Jeova i mekem promes se bambae hem i tekemaot ol man blong hem oli kamaot long ol narafala kantri, olsem we wan man blong lukaot sipsip i hivimap ol sipsip blong hem. Hem i talem long olgeta se: “Bambae mi lidim olgeta oli kambak long Isrel, nao bambae oli stap gud long ol hil, mo klosap long ol reva, . . . mo bambae mi stap givim gudfala kakae long olgeta.”—Esikel 34:13.

Mo tu, Jeova God i wantem tumas blong givim wota long saed blong spirit long ol man. Buk blong Revelesen i tokbaot ‘wan bigfala reva we i stap ron, mo hem i wota blong laef’ we i stap kamaot long bigfala jea blong God. (Revelesen 22:1) Toktok i goaot blong singaotem olgeta man oli kam blong dring wota ya se: “Yufala we i wantem dring, yufala i kam tekem wota ya blong laef, we i olsem presen blong yufala.”—Revelesen 22:17.

Wota ya i wan pija blong ol rod we God i yusum blong bambae ol man oli kasem laef we i no save finis. Eni man i stat blong dring wota ya taem hem i kasem ‘save tru God, mo man ya we hem i sanem, hemia Jisas Kraes.’—Jon 17:3.