?Ol Trufala Tabu Man Oli Save Halpem Yu Long Wanem?

?GRIK tok ya we long Baebol oli tanem i kam “tabu man” i minim hu? An Expository Dictionary of New Testament Words i talem se: “Oli yusum tok ya [tabu man] blong tokbaot olgeta man blong bilif evriwan, i no jes blong tokbaot sam man nomo olsem se oli holi moa long ol narawan, mo i no blong tokbaot sam man we oli ded finis mo we oli bin mekem plante gudfala wok long laef blong olgeta.”

Taswe, taem aposol Pol i tokbaot ol faswan Kristin, hem i singaot olgeta evriwan se oli tabu man. Eksampol, long faswan handred yia K.T. * hem i raetem wan leta i go “long kongregesen blong God we i stap long Korin, mo long olgeta tabu man we oli stap long Akaea [wan provins blong Rom].” (2 Korin 1:1, NW ) Biaen, Pol i raetem wan leta i go long ‘olgeta long Rom, we God i lavem olgeta, mo i singaot olgeta finis blong olgeta oli kam [“tabu,” NW ] man blong hem.’ (Rom 1:7) I klia se ol tabu man ya oli no ded yet. Mo ol man oli no bin putumap olgeta ya antap long ol narafala man blong bilif from sam gudfala fasin blong olgeta. ?Taswe, wanem stamba samting i mekem se oli tabu?

God i Mekem Oli Tabu

Tok blong God i soem se wan man no wan ogenaesesen i no gat raet blong putumap wan man se i tabu. Baebol i talem se: “God i sevem yumi finis, mo hem i singaot yumi blong yumi tabu, yumi man blong hem. Hem i no mekem olsem long yumi from ol samting we yumi nomo yumi mekem, nogat. Hem i mekem olsem, from we hem nomo i wantem mekem, mo from we hem i glad blong givhan long yumi.” (2 Timoti 1:9) Yes, Jeova nomo i singaot man blong i tabu. Jeova i mekem olsem long gladhat blong hem, mo from we samting ya i laenap wetem stamba tingting blong Hem.

Ol tabu man blong Kristin kongregesen oli joen long wan “niufala kontrak.” Blad blong Jisas Kraes nao i mekem kontrak ya i stanap mo i mekem we, eni man we i joen long kontrak ya, i kam tabu man. (Hibrus 9:15, NW; 10:29; 13:20, 24) Long ae blong God ol man ya oli klingud, oli ‘olsem ol tabu pris blong God, blong mekem sakrefaes long hem. Mo hem i glad blong tekem sakrefaes olsem, from we olgeta oli joen long Jisas Kraes blong mekem.’—1 Pita 2:5, 9.

Askem Ol Tabu Man Blong Givhan Mo Toktok Long God From Yumi

Plante milian man oli bilif se “ol tabu man” oli save givim sam spesel paoa long olgeta, taswe oli stap wosipim olting we bifo i blong ol tabu man ya, no oli stap singaot ol tabu man blong toktok long God from olgeta. ?Baebol i sapotem tijing ya? Long Bigfala Tok antap long Hil, Jisas i tijim ol disaepol blong hem olsem wanem blong kam long God, hem i se: “Taem yufala i prea bambae yufala i prea olsem. ‘Papa blong mifala. Yu yu stap long heven. Nem blong yu i tabu.’ ” (Matiu 6:9) Ol prea blong yumi oli mas go long Jeova God nomo.

 Blong sapotem tijing ya se yumi save prea long “ol tabu man” blong oli toktok long God from yumi, sam man blong stadi long ol bilif blong skul oli yusum vas blong Rom 15:30 we i se: “Ol brata mo sista. From we yumi bilif long Masta blong yumi Jisas Kraes, mo from we Tabu Spirit i mekem we yumi stap lavlavem yumi, mi mi askem strong long yufala, se plis yufala i joen long mi blong prea strong long God from mi.” ?Long vas ya Pol i stap pulum ol man blong bilif se oli mas prea long hem, no oli mas singaot nem blong Pol blong kam klosap long God? Nogat. I tru we Baebol i pulum ol man blong oli prea from olgeta ya we God i mekem oli tabu, be neva God i talem se yumi mas prea long olgeta stret no tru long olgeta ya.—Filipae 1:1, 3, 4.

God i putumap wan Man blong tekem ol prea blong yumi i go long hem. Jisas Kraes i talem se: “Mi nao rod ya, mo mi mi stamba blong trutok, mo mi stamba blong laef. I no gat man i save kam long Papa blong mi, sipos mi mi no tekem hem i kam.” Biaen Jisas i ademap se: “Mi mi Pikinini blong hem, mo sipos yufala i askem samting long nem blong mi, nomata wanem samting, be bambae mi mi mekem, blong ol wok ya blong mi i save leftemap nem blong Papa blong mi. Nao sipos yufala i askem samting long mi long nem blong mi, bambae mi mi save mekem.” (Jon 14:6, 13, 14) Yumi sua we bambae Jeova i lesin long ol prea we yumi mekem long nem blong Jisas. Long saed blong Jisas, Baebol i talem se: “Hem i save sevem olgeta we oli joen long hem blong kam long God, i stat naoia, gogo i no save finis, from we hem bambae i laef oltaem, mo bambae i stanap oltaem long fes blong God, blong prea from olgeta.”—Hibrus 7:25.

?Sipos ol prea blong yumi oli mas pastru long Jisas, from wanem ol man long Krisendom * oli singaot “ol tabu man” blong toktok long God from olgeta? Will Durant, wan man blong raetem histri, i eksplenem stamba blong fasin ya long buk blong hem, The Age of Faith. Nating se ol man oli fraetgud long God we i gat Olgeta Paoa, mo oli harem se i moa isi blong kam klosap long Jisas, Durant i talem se: “Ol man oli sem tumas blong toktok stret long [Jisas] from we oli no folem ol loa we hem i givim long Bigfala Toktok antap long Hil. Oli ting se i moa waes blong singaot wan tabu man we i stap finis long heven mo we Jos i putumap hem se hem i tabu, blong tabu man ya i toktok long Kraes from olgeta.” ?I stret we ol man oli fraet blong prea long God long nem blong Jisas?

Baebol i tijim yumi se taem yumi prea long God long nem blong Jisas “yumi save kam stanap long fes blong God, we yumi no seksek, tingting blong yumi i  strong.” (Efesas 3:11, 12) I no stret blong ting se God we i gat Olgeta Paoa i stap longwe tumas long ol man mo i no save lesin long ol prea blong yumi. Deved i raetem Sam ya i se: “O yu we yu stap harem prea, ol man blong olgeta laen bambae oli kam long yu.” (Ol Sam 65:2, NW ) Jeova i no nid blong pastru long olting no ases blong “ol tabu man” we oli ded finis, blong givim paoa long man long wol ya. God i save sanem tabu spirit blong hem i kam stret long eni man blong bilif we i stap askem paoa ya long hem. Jisas i talem se: “Nating we yufala i man nogud, be yufala i save givim ol gudgudfala samting long ol pikinini blong yufala. Be Papa blong yufala long heven, fasin blong hem i gud moa i winim fasin blong yufala. Mo hem i save givim Tabu Spirit long ol man we oli askem long hem.”—Luk 11:13.

Wok Blong Ol Tabu Man

Ol tabu man we Pol i bin raetem leta i go long olgeta, oli ded plante handred yia finis, mo biaen oli kasem laef long heven we i olsem “praes we oli givim long man we i win long resis.” (Revelesen 2:10) Ol man we oli strong long wosip blong God, oli luksave se fasin ya blong ona long ol trufala tabu man i no stanap long Baebol mo i no save blokem ol sik, ol disasta, ol trabol long mane, fasin blong kam olfala, mo ded. Taswe, maet yu askem se, ‘?Ol man we God i makemaot olgeta se oli tabu, oli rili kea long yumi? ?I stret we yumi ting se bambae oli wok blong givhan long yumi?’

Long wan profet tok, Daniel i tokbaot impoten wok we ol tabu man oli mekem. Long ol yia 500 B.K.T. * Daniel i lukluk wan nambawan vison we i stat kamtru long taem bifo mo i stap gohed yet long taem blong yumi. Hem i luk fo wael anamol oli kamaot long solwota. Ol fofala anamol ya oli pija blong ol gavman blong wol we oli no naf blong givim ol stamba samting we ol man oli nidim. Biaen, profet Daniel i talem se: “Be ol tabu man blong God ya we i Antap Olgeta, bambae oli kasem kingdom, mo bambae oli tekem kingdom i blong olgeta blong olwe, yes, gogo i no save finis.”—Daniel 7:17, 18, NW.

Pol i tokbaot ‘ol gudfala samting we God i promes finis blong givim long ol tabu man blong hem,’ hemia se bambae oli rul wetem Kraes long heven. (Efesas 1:18-21) Blad blong Kraes i openem rod long ol 144,000 tabu man blong oli laef bakegen blong go long heven. Aposol Jon i talem se: “Olgeta ya we God i mekem olgeta oli laef bakegen, oli stap harem gud. God i mekem i gud tumas long olgeta, from we seken ded i no gat paoa long olgeta. Olgeta ya bambae oli pris blong God mo blong Kraes, mo bambae oli joen wetem Kraes we hem i King, nao oli rul wetem hem, gogo wan taosen yia i pas.” (Revelesen 20:4, 6; 14:1, 3) Long vison ya, Jon i harem plante spirit man oli stap singsing long fored blong Jisas oli se: “Long ded blong yu, we blad blong yu i ron, yu yu pemaot ol man, oli blong God. Olgeta ya oli kamaot long olgeta kala, mo long olgeta kantri, mo long olgeta laen, mo long olgeta lanwis. Yu yu King, nao yu mekem olgeta oli kam man blong yu, we oli pris blong mekem wok blong God blong mifala, mo bambae oli king, oli rul long olgeta man long wol.” (Revelesen 5:9, 10) !Samting ya i mekem yumi haremgud tumas! Jeova God hem wan i jusum ol man mo ol woman ya. Antap long samting ya, olgeta ya oli stanap strong long bilif taem oli stap yet long wol, mo oli bin fesem klosap olgeta problem we oli stap traem ol man. (1 Korin 10:13) Taswe yumi sua fulwan se, taem ol tabu man ya oli laef bakegen mo oli rul antap long yumi, bambae oli soem sore mo oli kasem save ol filing blong yumi, from we oli savegud ol slak fasin blong yumi mo ol samting we yumi no naf blong mekem.

Ol Blesing Aninit Long Rul Blong Kingdom

Bambae i no longtaem, Kingdom i tekem aksin blong finisim ol rabis fasin mo fasin safa long wol ya. Long taem ya bambae ol man oli kam klosap moa long God i bitim bifo. Jon i raetem se: “Nao mi harem wan tok we i kamaot long bigfala jea blong God, we i singaot bigwan, i talem se, ‘!Yu luk! Naoia God i mekem ples blong hem wetem ol man. Hem bambae i stap oltaem wetem olgeta, mo olgeta bambae oli man blong hem. God bambae i kampani wetem olgeta, mo hem bambae i God blong olgeta. Hem bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae  from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.’ ”—Revelesen 21:3, 4.

!Hemia wan gudfala taem ya! Maeka 4:3, 4 i tokbaot ol nambawan blesing we bambae i kamaot aninit long rul blong Jisas Kraes mo ol 144,00 tabu man, i se: “[Jeova] bambae i jajem ol trabol blong ol man blong plante ples, mo bambae i stretem ol rao blong ol kantri we oli gat paoa, nating we oli stap klosap no longwe. Long taem ya, ol man bambae oli hamarem ol naef blong faet blong olgeta, gogo oli kam aean blong digim graon. Mo ol spia blong olgeta, bambae oli wokem olgeta oli kam huknaef blong katem gru blong ol grep blong olgeta. Nao olbaot long wol, ol man bambae oli no moa save girap blong go kilim ol narafala man, neva bambae oli save mekemrere bakegen blong go mekem faet. Olgeta man bambae oli stap gud, mo oli gat pis olwe. Bambae oli save stap gud long ol plantesen blong grep blong olgeta, mo oli save sidaon aninit long ol figtri blong olgeta. Bambae i no moa gat man blong mekem olgeta oli fraet. Hae God i gat olgeta paoa, mo hemia tok blong hem.”

Ol tabu man oli stap singaot yumi blong yumi kam blong harem gud long ol blesing ya. Ol tabu man ya oli olsem woman blong Kraes we i stap singaot se: “Yu kam.” Vas i gohed i se: “Mo olgeta evriwan we oli harem tok ya, oli mas talem olsem tu se, ‘Yu kam.’ Yufala we i tosta, yufala i kam. Yufala we i wantem dring, yufala i kam tekem wota ya blong laef, we i olsem presen blong yufala.” (Revelesen 22:17) ?“Wota ya blong laef” i minim wanem? Wan blong ol mining blong hem, hemia stret save blong ol stamba tingting blong God. Jisas i bin prea long God i se: “Laef ya [we i no save finis], hem i min se man i save yu, we yu nomo yu tru God, mo i save mi, se mi, Jisas Kraes, we yu yu sanem mi mi kam.” (Jon 17:3) Sipos yumi stap stadi long Baebol oltaem bambae yumi kasem save ya. !Yumi haremgud tumas se tru long Tok blong God, yumi luksave hu ya ol trufala tabu man, mo olsem wanem bambae God i yusum ol tabu man ya blong blesem ol man blong olwe!

[Ol Futnot]

[Tok blong pija long pej 4]

Pol i raetem sam leta i go long ol trufala tabu man

[Tok blong pija long pej 5]

Ol aposol blong Jisas we oli stanap strong long bilif oli kam ol tabu man

[Tok blong pija long pej 6]

Yumi save prea long God long nem blong Jisas Kraes

[Tok blong pija long pej 7]

Ol tabu man we bambae oli laef bakegen blong rulum fulwol oli gat sore