‘Yufala i Kam Long Mi, Nao Bambae Mi Mekem We Yufala i Spel’

Ol Yangfala Olsem Wota Blong Naet Blong Mekem Man i Haremgud

I KLIA we Jisas i stap tingbaot ol yangfala tu taem hem i talem se: ‘Yufala i kam long mi, nao mi bambae mi mekem we yufala i spel.’ (Matiu 11:28) Taem ol man oli stat karem ol yangfala blong olgeta i kam long Jisas, ol disaepol blong hem oli traem stopem olgeta. Be Jisas i talem se: “!Yufala i no blokem ol pikinini ya! Yufala i letem olgeta oli kam long mi.” Jisas “i putum han blong hem i goraon long ol pikinini ya, mo i putum han blong hem long olgeta, i blesem olgeta.” (Mak 10:14-16) Yes, long tingting blong Jisas ol yangfala oli impoten tumas.

Long Baebol i gat plante stori blong ol yangfala man mo woman blong bilif, wetem ol smol pikinini tu, we oli givim wan nambawan eksampol long wok blong God. Buk blong Ol Sam i tokbaot “kampani blong ol yangfala” we oli mekem man i harem gud, olsem wota blong naet. Mo tu hem i tokbaot “ol gel wetem ol boe” we oli stap presem nem blong Jeova.—Ol Sam 110:3, NW; 148:12, 13.

Wan Ples We Ol Yangfala Oli Save Gruap Long Hem

I stret blong yusum pijatok ya blong wota blong naet, from we wota blong naet i laenap wetem ol blesing. (Jenesis 27:28) Wota blong naet i no foldaon strong olsem ren, mo i mekem olgeta laef samting oli harem gud. Long taem blong yumi, we Kraes i stap finis olsem king, plante yangfala Kristin oli glad mo oli wantem tumas blong givim laef blong olgeta i go long God. Olsem gudfala wota blong naet, plante yangfala man mo woman oli stap mekem wok blong God mo oli stap givhan long ol narafala man we oli wosipim Jeova.—Ol Sam 71:17.

Be i no ol narafala nomo we oli haremgud long fasin blong ol yangfala Kristin; ol yangfala tu oli haremgud long wok we olgeta wan oli stap mekem. Ogenaesesen blong God i wan nambawan ples we ol yangfala oli save gruap long hem. From we ol yangfala man mo woman oli stap klin oltaem, oli save fren gud wetem God. (Ol Sam 119:9) Insaed long kongregesen, oli joen long ol gudgudfala wok mo oli faenem ol gudfala fren—samting ya i mekem se oli harem gud, mo laef blong olgeta i gat mining.

‘Kamgud Bakegen Mo Haremgud’

?Ol yangfala Kristin oli harem se oli olsem “wota blong naet”? Tingbaot Tania, wan yangfala woman we i joengud long wok blong kongregesen mo we i glad blong spenem bitim 70 aoa evri manis long wok blong prij. ?Hem i harem olsem wanem long wok blong hem? Hem i talem se: “Mi haremgud mo wok ya i leftemap tingting blong mi. Taem mi faenem Jeova mo mi joen long ogenaesesen blong hem long wol ya, samting ya i mekem mi mi ‘kamgud bakegen mo mi haremgud.’ ”—Ol Proveb 3:8, NW.

Ariel tu hem i wan fultaem paenia, mo hem i glad tumas blong kasem ol kakae blong spirit insaed long kongregesen. Hem i talem se: “Taem mi stap go long ol  Kristin miting mo long ol asembli, mo mi tekem ol kakae long tebol blong Jeova long saed blong spirit, samting ya i rili mekem mi mi haremgud. Mo tu mi save se long fulwol i gat sam narafala we oli stap wok olsem mi, mo samting ya i leftemap tingting blong mi.” Ariel i stap tokbaot stamba man we i mekem hem i haremgud i se: “Jeova i wan fren blong mi, mo samting ya i mekem mi mi glad we mi glad, speseli taem mi luk ol rabis frut we wol ya i karem long laef blong ol man.”—Jemes 2:23.

Abishai i gat 20 yia blong hem, mo hem i wan fultaem paenia mo wan man blong givhan long kongregesen. Hem i tokbaot laef blong hem i se: “Mi haremgud from we mi save olsem wanem blong dil wetem ol problem we ol yangfala oli mas fesem tede. Trutok blong Baebol i halpem mi blong mi stap lukluk i go oltaem long ol stamba samting we mi mas mekem, blong mi gohed blong mekem wok blong Jeova long ful laef blong mi.”

Taem Antoine i yang yet, hem i wan boe we i save faerap kwiktaem nomo. Wan dei, hem i kilim wan studen wetem wan jea, mo i yusum wan pen blong stikim wan narafala studen. !I klia se Antoine i no wan man we i mekem ol narafala oli haremgud! Be tijing blong Baebol i jenisim fasin blong hem. Naoia, hem i gat 19 yia blong hem mo hem i wok olsem man blong givhan mo fultaem paenia long kongregesen. Hem i talem se: “Mi tangkiu long Jeova from we hem i givim janis long mi blong mi save hem, mo i soemaot long mi se mi mas wokem fasin blong bos long tingting blong mi, mo mi mas jenisim raf fasin blong mi. Taem mi folem advaes ya, mi blokem plante trabol.”

Ol narafala man oli luk nambawan fasin blong ol yangfala Kristin. Matteo i wan yangfala Witnes blong Itali. Tija blong hem i mekem disisen se olgeta we oli talem wan tok swea insaed long klasrum, bambae oli mas pem wan smol faen. Samtaem biaen, ol yangfala long klasrum ya oli askem long tija se hem i karemaot rul ya from we oli talem se, “i no gat narafala rod blong toktok sipos yumi no yusum tok swea.” Matteo i eksplenem se: “Tija i talem se samting ya i no tru, mo i yusum mi, we mi Witnes blong Jeova, blong pruvum samting ya. Hem i presem mi long fored blong ol yangfala blong klasrum ya from we oltaem toktok blong mi i klin.”

Long Taelan, long wan klasrum we ol pikinini oli stronghed tumas, tija i singaot Racha we i gat 11 yia blong hem, i mekem hem i stanap long fored blong klasrum mo i presem boe ya from gudfala fasin blong hem. Tija ya i talem long ol pikinini se: “I gud yufala i folem eksampol blong Racha. Hem i wok strong, mo hem i gat gudfala fasin.” Nao tija ya i talem long ol pikinini se: “Ating i gud we yufala i kam ol Witnes blong Jeova, olsem Racha, nao bambae yufala i kam moagud.”

I nambawan tumas blong luk plante taosen yangfala Kristin, we oli stap kasem moa save long saed blong Jeova mo oli stap mekem wok blong hem. Ol naesfala yangfala ya oli soem se oli waes, nating se oli yang yet. God i save givhan long olgeta blong oli haremgud long laef blong olgeta naoia, mo long nambawan fiuja we bambae oli gat long niufala wol. (1 Timoti 4:8) !Long wol ya we i ded long saed blong spirit, mo i fulap long ol yangfala we oli harem nogud nomo, ol yangfala Witnes oli rili mekem man i haremgud!