Tede Ol Man Oli Intres Long “Ol Tabu Man”

“I gat wan taem bifo we ol man oli bin talem se oli les blong harem tok long saed blong ol bigfala man we oli kasem ona from sam spesel wok we oli bin mekem. Be i luk olsem se tingting ya i jenis, from we 4.2 milian man Amerika oli lukluk funerol blong Mama Teresa long Septemba 13. Mama Teresa i ded long Septemba 5, mo stat long taem ya fulap man oli stap askem long Vatikan blong oli putumap hem olsem wan tabu man. Klosap evri man i sua we bambae Vatikan i agri blong mekem samting ya.”—Sun-Sentinel, Yunaeted Stet, Oktoba 3, 1997.

MAMA Teresa i wan misinari blong Katolik jos, mo hem i mekem wan bigfala wok blong givhan long ol man we oli stap safa mo oli pua. Plante man oli ting se hemia nao ol stamba fasin blong wan trufala tabu man. Long plante skul i gat sam impoten man we ol memba blong ol skul ya oli tinghae long olgeta from sam spesel wok we oli mekem. Be ating oli no leftemap ol man ya long sem fasin we Roman Katolik Jos i mekem blong putumap wan tabu man.

Stat long taem we John Paul II i rul olsem Pop, kam kasem naoia, hem i bin putumap bitim 450 man olsem tabu man. Mo namba ya i bitim namba blong olgeta man we ol narafala pop oli bin putumap olsem tabu man long olgeta yia 1900 evriwan. * ?From wanem fasin ya blong ona long “ol tabu man” i gohed yet, nating se bighaf blong ol Katolik maet oli no save plante long ol tabu man ya?

Lawrence Cunningham i stadi long ol bilif blong jos mo i stap wok long Yunivesiti blong Notre Dame. Hem i eksplenem se: “Ol man oli intres tumas long tingting ya se i gat sam man long wol ya we oli tabu [long lukluk blong God]. Ol tabu man oli olsem pruf se, tede, i gat sam man yet we oli save mekem gudfala wok long ful laef blong olgeta.” Mo tu, ol man oli talem se “ol tabu man” oli stap klosap moa long God, mo oli save toktok long God from olgeta we oli laef. Taem oli faenem sam samting, no wan haf blong ded bodi blong “ol tabu man,” oli wosipim ol samting ya from we oli bilif se wan spesel paoa i stap long olgeta.

Long ol yia 1500, oli wokem buk ya The Catechism of Council of Trent blong talemaot klia mo strong ol bilif blong Katolik jos. Buk ya i talem se: “I stret nomo blong talem se fasin ya blong soem ona long ol tabu man ‘we oli ded long Masta,’ fasin blong singaot olgeta blong oli prea from yumi, mo fasin blong tinghae long olting blong olgeta no ases blong olgeta, ol samting ya i no daonem God blong yumi, be i leftemap hem, mo i mekem bilif blong ol Kristin i laef mo i kam strong moa, mo tu, i pulum ol man blong oli folem gudfala eksampol blong ol tabu man ya.” (The Catechism of the Council of Trent, 1905) Ol trufala Kristin oli wantem tumas blong gat wan laef we i klin mo i stret gud long fes blong God, oli wantem kam klosap long God long wan fasin we i soem respek, mo oli wantem we God i halpem olgeta. (Jemes 4:7, 8) ?Taswe, folem Tok blong God, hu ya ol man we long fes blong God oli rili tabu? ?Mo wanem wok we oli mas mekem?

[Futnot]