“Yumi Mas Strong Moa Blong Holem Ol Trutok Ya”

“Yumi mas strong moa blong holem ol trutok ya we yumi harem finis, blong bambae yumi no lusum rod blong yumi.”—HIBRUS 2:1.

1. Soem olsem wanem samting we i pulum ae blong yumi i save mekem bigfala trabol i kamaot.

 EVRI yia long Yunaeted Stet, 37,000 man oli ded long ol akseden long trak. Samfala we oli gat save long bisnes ya, oli talem se sipos ol man blong draevem trak oli stap luklukgud rod blong olgeta, i no save gat plante man we oli ded long ol akseden olsem. Sam man we oli draevem trak, oli letem ol saen mo pija long saed blong rod, oli pulum ae blong olgeta. Sam narafala oli yusum telefon long semtaem we oli stap draev. I gat sam we oli stap kakae long semtaem we oli draev. Ol samting ya oli mekem se oli no stap luklukgud rod, ale akseden i kamaot.

2, 3. ?Pol i givim wanem advaes long ol Hibru Kristin bifo, mo from wanem oli nidim advaes ya?

² Klosap 2,000 yia bifo we ol man oli wokem ol trak, aposol Pol i tokbaot samting we i pulum ae blong ol Hibru Kristin mo i stap mekem trabol long olgeta. Fastaem, Pol i talemaot klia se taem Jisas Kraes i laef bakegen, hem i go sidaon long raet saed blong God. Hemia i min se hem i hae moa long ol enjel. Nao, aposol ya i talem se: “From samting ya, yumi mas strong moa blong holem ol trutok ya we yumi harem finis, blong bambae yumi no lusum rod blong yumi.”—Hibrus 2:1.

³ ?From wanem ol Hibru Kristin ya oli nidim blong ‘strong moa blong holem ol trutok ya we oli harem finis’ long saed blong Jisas? From we i mekem klosap 30 yia finis we Jisas i aot long wol ya blong go long heven. Masta blong olgeta i no moa stap, taswe sam Hibru Kristin oli stat lusum rod, oli stat lego trufala bilif. Wosip we oli bin mekem fastaem, hemia skul blong ol man Jiu, i pulum ae blong olgeta bakegen.

Oli Mas Strong Moa Blong Holem Trutok

4. ?From wanem sam Hibru Kristin oli wantem gobak long skul blong ol man Jiu?

⁴ ?From wanem sam long ol faswan Kristin oli wantem gobak long skul blong ol man Jiu? Tingbaot se, wosip we oli mekem folem Loa, i joen wetem ol samting we oli save luk. Oli save luk ol pris, mo oli save harem smel blong ol sakrefaes we oli stap bonem long faea. Be, Kristin skul i defren. I tru, ol Kristin oli gat wan Hae Pris, hemia Jisas Kraes. Be ol Hibru Kristin ya oli no moa save luk Jisas from we Jisas i aot long wol ya toti yia finis.(Hibrus 4:14) Mo i tru se ol Kristin oli gat wan tempol, be tabu ples blong hem i stap long heven nomo. (Hibrus 9:24) Mo tu, aninit long Loa, oli bin mekem sakomsaes long ol man. Be sakomsaes blong ol Kristin, “hem i samting we Spirit blong God i mekem long hat blong man.” (Rom 2:29) Yes, Kristin skul i stat kam wan samting we i had long ol Hibru Kristin blong holemtaet, from we i no stanap long ol samting we oli save luk.

5. ?Olsem wanem Pol i soemaot se wosip we Jisas i stanemap i gud moa i bitim hemia we oli mekem folem Loa?

 ⁵ Ol Hibru Kristin ya oli nidim blong kasem save long wan samting we i impoten tumas long saed blong wosip we Kraes i stanemap. Wosip ya i stanap long bilif, i no long ol samting we man i save luk. Nating se i olsem, wosip ya i gud moa i winim wosip we oli bin mekem bifo folem Loa blong profet Moses. Pol i raetem se: “Blad blong man nani mo blad blong ol bul mo asis blong ol yang kao we oli bonem long Olta, oli gat wok blong olgeta. Ol pris oli saksakem smosmol i go long ol man we oli no klin long fes blong God. Nao long fasin ya olgeta oli kam klin bakegen. Be blad blong Kraes i save mekem wok we i strong moa, i winim wok blong ol samting ya blong bifo. Kraes i olsem wan anamol we i no gat wan samting nating i rong long bodi blong hem, we oli kilim blong tekemaot sin blong man. Long paoa blong Tabu Spirit ya we i stap oltaem nomo, hem i givim laef blong hem i go long God. Blad ya blong hem i stap mekem tingting blong yumi i klin long ol samting we yumi mekem we i blong ded nomo, blong yumi save mekem ol wok blong God ya we i laef, i stap we i stap.” (Hibrus 9:13, 14) Yes, fogif we ol Kristin oli save kasem tru long bilif long ransom sakrefaes blong Jisas Kraes i moagud olgeta, i winim fogif we oli kasem tru long ol sakrefaes we oli mekem folem Loa.—Hibrus 7:26-28.

6, 7. (a) ?From wanem i impoten we ol Hibru Kristin oli ‘strong moa blong holem ol trutok ya we oli harem finis’? (b) ?Taem Pol i raetem leta i go long ol Hibru Kristin ya, hamas yia i stap bifo we Jerusalem i lus? (Lukluk futnot.)

⁶ I gat wan narafala risen from wanem ol Hibru Kristin oli mas strong blong holem ol trutok we oli lanem finis long saed blong Jisas. Jisas i bin talem se ol ami bambae oli kam spolem Jerusalem, i se: “I gat taem i stap kam we yufala i no save, mo long taem ya, bambae ol enemi blong yufala oli kam hivap raon long yufala. Bambae ol soldia blong olgeta oli digim hol i goraon long taon blong yufala, blong oli blokem yufala, nao yufala i no save aot. Nao bambae olgeta ya oli brebrekemdaon ol haos blong yufala, mo bambae oli smasem yufala evriwan blong ples ya. Long ples blong yufala, bambae olgeta ya oli no save livim wan ston blong haos i stap stanap long ples blong hem, from we yufala i no luksave taem ya we God i kamtru long yufala blong sevem yufala.”—Luk 19:43, 44.

⁷ ?Samting ya bambae i hapen wetaem? Jisas i no talem stret dei mo aoa. Be hem i givim oda ya se: “Taem we yufala i luk ol soldia oli stap kam plante raonabaot long taon ya Jerusalem, blong oli blokem ol man oli stap insaed, yufala i mas save we bambae i no longtaem oli save spolemgud ples ya. Taem yufala i luk samting ya, yufala we i stap long Judia, yufala i mas ronwe blong go haed long ol hil. Mo yufala we i stap insaed long taon ya, yufala i mas aot. Mo yufala we i stap long ol ples raonabaot long taon ya, yufala i no mas go insaed long taon ya bakegen.” (Luk 21:20, 21) Long ol 30 yia afta we Jisas i talem tok ya, sam Kristin long Jerusalem oli stat tingting se taem ya i no moa klosap, ale oli letem sam narafala samting i pulum tingting blong olgeta. I olsem we oli no moa luklukgud rod blong olgeta. Sipos oli no hareap blong jenisim tingting ya blong olgeta, bigfala trabol bambae i kasem olgeta. !Taem blong Jerusalem i lus, hem  i klosap, nating se oli bilivim samting ya no nogat! * Pol i givim advaes ya blong traem wekemap tingting blong ol Kristin ya long Jerusalem we oli stap slip long saed blong spirit.

“Strong Moa Blong Holem Ol Trutok Ya” Tede

8. ?From wanem yumi tu yumi nidim blong kam “strong moa blong holem” ol trutok blong Baebol?

⁸ Olsem ol Kristin long faswan handred yia, yumi tu yumi nidim blong kam “strong moa blong holem” ol trutok blong Baebol. ?From wanem? From we, yumi tu yumi stap fesem wan taem blong bigfala trabol. Trabol ya bambae i no kamaot long wan nesen nomo be bambae i kasem olgeta nesen blong wol. (Revelesen 11:18; 16:14, 16) I tru, yumi no save stret dei mo aoa we Jeova bambae i mekem wok ya. (Matiu 24:36) Be, yumi luk wetem prapa ae blong yumi ol samting we Baebol i talem se i mas kamaot long “ol las dei.” (2 Timoti 3:1-5, NW ) Taswe, yumi mas lukaotgud se i no gat wan samting i pulum tingting blong yumi i go long narafala rod. Yumi mas holemgud ol Tok blong God mo gohed blong wok long fasin we i soemaot se taem i sot. Long rod ya nomo, bambae yumi save “gat paoa blong ronwe long olgeta trabol ya.”—Luk 21:36.

9, 10. (a) ?Olsem wanem yumi save soem se yumi strong blong holem ol samting long saed blong spirit? (b) ?Olsem wanem tok blong God i ‘laet we i stap lidim yumi,’ mo ‘laet we i stap soemaot rod long yumi’?

⁹ ?Long impoten taem ya we i klosap long en blong wol, olsem wanem yumi save soemaot se ‘yumi strong moa blong holem’ ol samting long saed blong spirit? Wan samting se, yumi mas go long olgeta Kristin miting mo asembli. Mo tu, yumi wanwan i mas stadi oltaem long Baebol, blong yumi save kam klosap long Jeova, Man ya we i raetem Baebol. (Jemes 4:8) Sipos yumi save moa Jeova tru long stadi blong yumi wanwan mo ol miting, bambae yumi gat sem tingting olsem man blong raetem Sam, we i talem long God se: “Tok blong yu i olsem laet. Oltaem hem i stap soemaot rod blong mi, mo i stap lidim mi.”—Ol Sam 119:105.

¹⁰ Baebol i olsem ‘laet we i stap lidim yumi,’ from we hem i talemaot ol tingting we God i gat long saed blong fiuja. Mo tu, hem i olsem ‘laet we i stap soemaot rod long yumi.’ Hemia i min se, taem yumi fesem ol traem mo trabol long laef, Baebol i save soemaot long yumi wanem nekiswan step we yumi mas tekem. From samting ya nao, i impoten we yumi “strong moa blong holem” ol tijing we yumi kasem taem yumi joen long ol miting wetem ol narafala man blong bilif, mo taem yumi wanwan i ridim Tok blong God. Ol save we yumi kasem bambae i givhan long yumi blong mekem ol gudfala, waes disisen we Jeova i glad long olgeta mo we oli mekem hat blong hem i haremgud. (Ol Proveb 27:11; Aesea 48:17) Maet yumi lesingud blong smoltaem long miting no stadi gud yumi wan blong smoltaem, nao biaen tingting blong yumi i go long narafala samting. ?Yumi save mekem wanem blong putum tingting blong yumi i stap longtaem long ol save we yumi stap harem long miting no we yumi stap stadi long hem? ?Yumi save mekem wanem blong no mestem wan long ol gudfala samting long saed blong spirit we God i stap givim long yumi?

Strong Moa Blong Lesin Long Ol Miting

11. ?From wanem i no isi blong lesingud long ol Kristin miting?

¹¹ Sam samtaem, i no isi blong lesingud long ol miting. I isi nomo blong letem wan samting i pulum ae no tingting blong yumi, maet wan pikinini i krae no wan man i kam let mo i stap lukaot wan jea. Sipos no, ating yumi taed nomo from we yumi bin wok had blong fuldei. Mo tu, maet brata we i stap givim tok long platfom i no toktok long fasin we i wekemap tingting blong yumi, nao sloslo, yumi stat tingting long narafala samting. !Mowas, maet yumi harem se slip i stap kam! Be yumi mas tingbaot se ol save we i stap kamaot, i impoten tumas. Taswe i gud we yumi traem lanem blong putum tingting blong yumi i stap strong moa long ol save we yumi harem long ol miting blong kongregesen. ?Olsem wanem blong mekem olsemia?

12. ?Wanem i save mekem i isi moa blong lesingud long ol miting?

¹² I moa isi blong lesingud long ol miting sipos yumi reregud fastaem. Taswe, i gud we yumi tekem taem bifo long miting blong tingbaot ol save we bambae i kamaot. I nidim sam menet nomo evri dei blong yumi ridim mo tingting dip long wan smol haf blong Baebol riding blong wik. Sipos yumi mekem wan gudfala plan, yumi save faenem taem tu blong reregud from Buk Stadi mo Wajtaoa Stadi. Nomata wanem plan yumi folem, wan samting i sua: Sipos  yumi reregud from ol miting blong kongregesen, bambae yumi strong moa blong lesin long ol save we i stap kamaot.

13. ?Wanem i save givhan long yumi blong tingting nomo long ol save we i stap kamaot long ol miting?

¹³ Antap long fasin ya blong reregud, samfala oli faenem se oli lesin moa long ol miting taem oli sidaon long ol faswan jea long fored blong Haos Kingdom. Mo tu, blong mekem se yumi no stat tingbaot ol narafala samting, i gud blong lukluk stret long fes blong brata we i stap givim tok, ridim ol vas long Baebol, mo raetem sam smosmol not. Be, samting we i moa impoten i bitim ol narafala samting, i blong rerem hat blong yumi. Yumi mas kasem save from wanem yumi stap joen wanples. Bigfala risen from wanem yumi joen wetem ol Kristin brata mo sista blong yumi, i blong mekem wosip long Jeova. (Ol Sam 26:12; Luk 2:36, 37) Ol miting oli wan impoten rod blong kasem kakae long saed blong spirit. (Matiu 24:45-47) Mo tu, long ol miting yumi gat janis blong “givgivhan long yumi blong mekem yumi strong blong lavem ol man, mo blong mekem ol gudfala fasin.”—Hibrus 10:24, 25.

14. ?Wanem samting i rili mekem se miting i gud?

¹⁴ Maet samfala oli laekem miting nomo sipos ol brata we oli givim ol tok oli tijgud. Maet oli talem se i wan gudfala miting sipos ol brata oli givim ol gudfala tok. Be, sipos oli ting se ol brata oli no bin tijgud, maet oli talem se miting i slak. I tru se olgeta we oli givim ol tok oli mas mekem bes blong olgeta blong tijgud, antap moa, blong kasem hat blong olgeta we oli stap lesin. (1 Timoti 4:16) Be, yumi we i stap lesin yumi no mas traem faenem poen long olgeta we oli givim ol tok. I tru se i impoten blong tijgud, be i no hemia nomo we i mekem wan gudfala miting. Faswan samting we yumi mas tingbaot, i no fasin blong brata blong givim tok, be fasin blong yumi blong lesingud. Taem yumi kam long ol miting mo lesingud long ol save we i stap kamaot, yumi stap mekem wosip long God long fasin we hem i wantem. Hemia nao samting we i mekem se miting i gud. Sipos yumi wantem tumas blong kasem moa save long saed blong God, bambae ol miting oli givhan long yumi, nating se brata we i givim tok i save toktokgud no nogat. (Ol Proveb 2:1-5) From samting ya, yumi mas traem kam “strong moa” blong lesin long ol miting.

 Kasem Plante Gudfala Samting From Stadi Wanwan

15. ?Olsem wanem stadi mo fasin blong tingting dip i save givhan long yumi?

¹⁵ Yumi kasem plante gudfala samting sipos yumi “strong moa blong holem ol trutok” taem yumi stadi wanwan, mo taem yumi tingting dip. Taem yumi ridim Baebol mo ol Kristin buk mo tingting dip long olgeta, hemia i nambawan janis blong yumi planem ol trutok blong Baebol long hat blong yumi. Nao, samting ya bambae i mekem ol tingting mo fasin blong yumi oli jenis bigwan. Yes, bambae hem i givhan long yumi blong haremgud tumas blong mekem ol samting we Jeova i wantem. (Ol Sam 1:2; 40:8) From samting ya, yumi mas lanem blong putum tingting blong yumi i stap longtaem long wan samting. Fasin ya bambae i givhan long yumi taem yumi stadi. !I isi nomo blong letem wan samting i pulum ae no tingting blong yumi! Ol smosmol samting olsem telefon i ring, no wan smol noes, oli save mekem se yumi stat tingbaot defren samting. No maet yumi no gat fasin ya we yumi save tingting longtaem long wan samting. Ale, yumi sidaon blong tekem kakae long saed blong spirit, be smoltaem biaen, yumi faenem se tingting blong yumi i stap tekem ol narafala kakae. ?Olsem wanem blong “strong moa blong holem” tingting blong yumi i stap long ol samting long Baebol we yumi wan i stap stadi long olgeta?

16. (a) ?From wanem i impoten blong putum wan stret taem blong stadi yumi wan? (b) ?Olsem wanem yu wan yu faenem taem blong stadi Baebol?

¹⁶ I gud blong putum wan stret taem, mo jusum wan stret ples blong mekem stadi blong yumi. Bighaf blong yumi i luk se i had blong faenem taem mo wan kwaet ples blong stadi. Maet yumi harem se yumi bisi tumas, yumi olsem wan smol lif we taed i stap karem i godaon long reva. Be, yumi mas mekem olsem we yumi swim agensem taed ya, mo yumi mas traem faenem wan smol aelan we i kwaet gud. Yumi no save wet se taem yumi gat janis nomo, ale yumi stadi. Nogat. Yumi mas bos long laef blong yumi mo putum wan stret taem blong stadi. (Efesas 5:15, 16) Samfala oli tekem smoltaem long moning from we ples i kwaet, i no gat plante wok i stap gohed blong pulum ae blong olgeta. Sam narafala oli faenem se i moa gud blong stadi long naet. Bigfala samting se, yumi nidim tumas ol stret save blong God mo Pikinini blong hem, mo yumi neva mas fogetem samting ya. (Jon 17:3) Taswe, yumi mas putum wan stret taem blong stadi yumi wan, mo holem taem ya.

17. ?Fasin blong tingting dip i olsem wanem, mo fasin ya i save givhan long yumi olsem wanem?

¹⁷ I impoten tumas blong tingting dip tu. Hemia i min se yumi tingtingbak long ol samting we yumi bin lanem long stadi blong yumi. Taem yumi tingting dip, yumi karemaot ol tingting blong God long ol pej blong Baebol, mo yumi putum olgeta i go long hat blong yumi. Mo tu, fasin ya blong tingting dip i givhan long yumi blong luksave olsem wanem blong folem ol advaes blong Baebol. Olsem nao, bambae ‘yumi no stap lesin nomo long ol tok blong God, be yumi mekem ol samting we tok ya i talem.’ (Jemes 1:22-25) Mo tu, fasin blong tingting dip i save pulum yumi i kam klosap moa long Jeova, from we yumi tingbaot ol fasin blong hem mo olsem wanem ol save we yumi bin stadi long hem i makem ol fasin ya.

18. ?I nidim wanem blong yumi save tingting dip?

¹⁸ Blong kasem plante gudfala samting from stadi we yumi mekem mo from fasin blong tingting dip, yumi no mas letem ol narafala samting oli pulum ae mo tingting blong yumi. Yumi mas sakemaot ol narafala tingting, olsem ol wari blong laef, mo mekem wan ples long tingting blong yumi blong putum ol niufala save ya we yumi kasem taem yumi tingting dip. Blong mekem olsem, yumi nidim taem mo wan kwaet ples. !Sipos yumi tekem taem mo faenem wan kwaet ples, bambae yumi haremgud long kakae we yumi tekem long saed blong spirit mo wota blong trutok we yumi dring long Tok blong God!

19. (a) ?Samfala oli mekem wanem blong oli save tingting longtaem moa long samting we oli stap stadi long hem? (b) ?Wanem tingting we yumi mas gat long saed blong stadi, mo wanem gudfala samting i save kamaot from impoten wok ya?

¹⁹ ?Olsem wanem sipos yumi stadi blong smoltaem,  nao tingting blong yumi i stat go olbaot long ol narafala samting? Samfala oli luk se sloslo oli save lanem blong putum tingting blong olgeta i stap longtaem moa long stadi blong olgeta. Oli mekem olsemia: Fastaem oli stadi blong smoltaem nomo, nekis taem oli pulum stadi ya i kam longfala moa, mo evritaem biaen oli pulum i kam longfala moa. Bigfala tingting we yumi mas gat i blong spenem taem blong stadi, i no blong hareap nomo blong finisim. Yumi mas traem intres gud long samting we yumi stap stadi long hem. Mo i gat plante buk blong slef we i stret mo waes, we yumi save yusum blong lukaot moa save long ol defdefren poen. I wan gudfala samting tumas blong stadi dip long “ol tingting blong God we man i no save faenemaot.” (1 Korin 2:10) Taem yumi mekem olsem, yumi kasem moa save long saed blong God, mo yumi kam naf moa blong jusumaot wanem fasin i gud mo wanem fasin i nogud. (Hibrus 5:14) Mo tu, sipos yumi stadi oltaem long Tok blong God, bambae yumi kam “naf blong tijim ol narafala man bakegen long ol tok ya.”—2 Timoti 2:2.

20. ?Olsem wanem yumi save frengud wetem Jeova God mo gohed oltaem blong fren wetem hem?

²⁰ Sipos yumi kam long ol Kristin miting mo stadi yumi wan, samting ya bambae i givhan bigwan long yumi blong frengud wetem Jeova mo gohed oltaem blong fren wetem hem. I klia se hemia nao samting we man blong raetem Sam 119 i mekem. Hem i talem long God se: “Mi mi laekem Loa blong yu tumas, mi stap tingting long hem i stat long moning, gogo kasem sapa.” (Ol Sam 119:97) Taswe, yumi no mas mestem blong kam long olgeta miting mo asembli. Mo yumi mas katem taem we yumi yusum blong mekem ol narafala wok, blong yumi save gat taem blong stadi Baebol mo tingting dip long hem. Olsem nao, bambae yumi kasem bigfala blesing from we yumi “strong moa blong holem ol trutok” blong Baebol.

[Futnot]

?Yu Yu Rimemba?

• ?From wanem sam Hibru Kristin bifo oli stat lusum rod mo lego trufala bilif?

• ?Olsem wanem yumi save lesingud long ol Kristin miting?

• ?Wanem samting bambae i givhan long yumi blong kasem gudfala frut from Baebol stadi blong yumi wanwan, mo from fasin blong tingting dip?

[Kwestin]

[Tok blong pija long pej 11]

Ol Hibru Kristin oli nidim blong wekap mo luksave se taem we Jerusalem bambae i lus, i klosap nomo

[Tok blong pija long pej 13]

Ol papa mama oli save halpem ol pikinini blong olgeta blong kasem gudfala samting from ol miting