?I Stret Blong No Kea Long Eni Samting?

BIGHAF blong ol man maet oli glad sipos narafala i tingbaot olgeta se oli man we oli no kea long samting we ol narafala oli mekem agensem olgeta, oli gat kwaet tingting, oli neva kros, mo oli luk evri samting olsem se i oraet nomo. Nating se i olsem, fasin ya blong no kea, mo no wari long eni samting, i gat wan nogud saed blong hem tu. Baebol i talem se: ‘Ol man we oli no kea, fasin ya blong olgeta bambae i kilim olgeta i ded.’ (Ol Proveb 1:32) ?Wanem mining blong tok ya?

Sam narafala Baebol oli tanem Hibru tok ya i kam “tekem laef olsem se i isi” (American Standard Version), mo “glad nomo long laef we hem i gat” (The New American Bible), mo “no wari long eni samting.” (The New English Bible) Folem ol mining ya, i klia se fasin blong no kea i joen wetem fasin les mo fasin blong no kea nating, taswe hem i joen tu wetem fasin blong no gat hed, mo krangke fasin.

Long faswan handred yia, ol Kristin long kongregesen blong Laodisia oli no kea, no oli no wari nating long ol slak fasin blong olgeta long saed blong spirit. Oli glad nomo long laef blong olgeta, oli harem se ‘oli gat evri samting, oli no sot long wan samting.’ Jisas Kraes i stretem olgeta, i singaot olgeta blong oli wekemap strong tingting we oli bin gat blong mekem ol Kristin wok.—Revelesen 3:14-19.

Ol man long taem blong Noa tu oli gat fasin ya blong no kea. Oli bisi nomo long ol samting long laef evri dei, “oli stap kakae, mo oli stap dring, mo oli stap mekem mared, . . . Mo olgeta ya oli no save se bambae trabol i kam, gogo wota i ron bigwan, i tekemaot olgeta.” Biaen Jisas i ademap se: “Nao long taem ya we mi, mi Pikinini blong Man mi kamtru, bambae i sem mak nomo.”—Matiu 24:37-39.

Ol profet tok blong Baebol we oli kamtru finis oli soem se yumi stap laef naoia long taem we “Pikinini blong Man,” hemia Jisas Kraes, i stap finis. Taswe i gud yumi no kam olsem man we i no wari long eni samting, i no kea, mo i glad nomo long kaen laef we hem i gat. Tru ya fasin blong no kea we i bitim mak olsem, hemia wan nogud fasin.—Luk 21:29-36.