Lanem Blong Obei Naoia Taem En i Klosap

“Olgeta man bambae oli obei long [“Silo,” NW ].”—JENESIS 49:10.

1. (a) ?Ol man long taem bifo we oli obei long Jeova oli mas obei long hu? (b) ?Jekob i talem wanem profet tok long saed blong fasin obei?

 BLONG obei long Jeova, yumi mas obei long ol man we Jeova i stap yusum. Long taem bifo, Jeova i yusum ol enjel, hed blong ol wanwan famle, ol jaj, ol pris, ol profet, mo ol king. Mo jea we ol king blong Isrel oli bin sidaon long hem, oli kolem jea blong Jeova. (1 Kronikel 29:23) Be, sore tumas, plante lida blong Isrel oli no obei long God, nao oli pulum bigfala trabol i kam long olgeta wanwan mo long ol man we oli stap aninit long rul blong olgeta. Nating se i olsem, Jeova i no lego ol man we oli stap tru long hem. Hem i givim wan promes blong mekem olgeta oli haremgud, hemia se bambae hem i putumap wan King we i no save kam nogud samtaem, mo ol stret man bambae oli glad tumas blong obei long hem. (Aesea 9:6, 7) Taem we klosap olfala Jekob i ded, hem i talem wan profet tok long saed blong king ya. Hem i se: “Wokingstik blong king bambae i no save aot long Juda, mo wokingstik blong komanda i mas stap bitwin long tufala leg blong hem, gogo Silo i kamtru. Nao olgeta man bambae oli obei long hem.”—Jenesis 49:10, NW.

2. ?Wanem mining blong tok ya “Silo,” mo bambae hem i rul long hu?

² “Silo” i wan Hibru tok we i minim “Hem We i Gat Raet Long Samting Ya,” no “Hem We Samting Ya i Blong Hem.” Yes, Silo bambae i kasem raet blong rul, we wokingstik blong king i saen blong hem. Mo  bambae hem i kasem paoa blong givim oda, we wokingstik blong komanda i saen blong hem. Mo tu, bambae hem i no rul nomo long ol pikinini blong Jekob, be bambae hem i rul long ‘olgeta man.’ Hemia i laenap wetem promes we Jeova i talem long Ebraham se: “Laen ya blong yu bambae i winim ol enemi blong hem, . . . Mo from laen blong yu, olgeta nesen long wol bambae oli blesem olgeta nomo.” (Jenesis 22:17, 18, NW ) Long 29 K.T., Jeova i soemaot hu ya “laen ya,” taem hem i yusum tabu spirit blong makemaot Jisas blong Nasaret.—Luk 3:21-23, 34; Galesia 3:16.

Faswan Kingdom Blong Jisas

3. ?Jisas i kasem wanem kingdom taem hem i go antap long heven?

³ Taem Jisas i go antap long heven, hem i no tekem wokingstik blong king wantaem, blong rul long olgeta man blong wol. (Ol Sam 110:1) Nating se i olsem, hem i kasem wan “kingdom” mo ol man we oli stap aninit long kingdom ya oli obei long hem. Aposol Pol i soemaot wanem kingdom yumi stap tokbaot, i se: ‘God i tekemaot yumi [ol Kristin we tabu spirit i makemaot olgeta] long paoa blong tudak mo i tekem yumi i go insaed long kingdom blong Pikinini blong hem we i lavem hem tumas.’ (Kolosi 1:13, NW ) Hem i stat tekemaot ol man blong hem long Pentekos 33 K.T., taem tabu spirit i kamdaon long ol gudfala man we oli biaen long Jisas.—Ol Wok 2:1-4; 1 Pita 2:9.

4. ?Olsem wanem ol faswan disaepol blong Jisas oli soemaot fasin obei, mo Jisas i singaot ful grup blong olgeta long wanem nem?

⁴ Ol disaepol we tabu spirit i makemaot olgeta oli “man blong karem tok blong Kraes,” taswe oli obei wantaem mo oli stat hivimap ol narafala we olgeta tu oli “gat raet” blong joen long kingdom ya long saed blong spirit. (2 Korin 5:20; Efesas 2:19; Ol Wok 1:8) Mo tu, oli ‘mas joen gud we oli gat wan tingting nomo, mo we fasin blong olgeta i wan nomo.’ Olsem nao, King blong olgeta Jisas Kraes, i save stap glad long olgeta. (1 Korin 1:10) Ol man ya tugeta oli mekemap wan grup we i olsem “slef ya we i stret mo waes,” no man blong wok we i gat hed.—Matiu 24:45, NW; Luk 12:42.

Kasem Blesing From We Oli Obei Long “Slef”

5. ?Stat long taem bifo, olsem wanem Jeova i tijim ol man blong hem?

⁵ Long olgeta yia we oli pas finis, Jeova i putumap sam man blong tijim ol man blong hem. Olsem nao, taem ol man Isrel oli aot long Babilon mo oli kambak long ples blong olgeta, hem i putumap Esra mo sam narafala man we oli nafgud. Olgeta ya oli no jes ridim Loa blong God long ol man, be oli “eksplenem” (NW), mo oli “talemaot mining blong hem blong olgeta man oli save” long tok blong God.—Nehemaea 8:8.

6, 7. ?Olsem wanem grup we i olsem slef i yusum Hed Kampani blong givimaot kakae long saed blong spirit long stret taem, mo from wanem i stret blong obei long grup ya?

⁶ Long taem blong ol faswan Kristin, long 49 K.T., wan rao i kamaot long saed blong sakomsaes. Nao hed kampani blong faswan grup ya we i olsem slef, oli prea mo oli lukaot ansa long kwestin ya gogo oli luksave stret rod we Baebol i soemaot. Nao  oli raetem wan leta blong talemaot disisen blong olgeta, mo olgeta kongregesen oli obei long tok ya we oli talemaot. From samting ya, God i blesem olgeta bigwan. (Ol Wok 15:6-15, 22-29; 16:4, 5) Long taem blong yumi tu, grup ya we i olsem slef i yusum Hed Kampani blong hem blong mekem plante bigfala kwestin i kam klia. Hemia ol kwestin olsem, fasin blong ol Kristin blong no joen long ol faet mo politik, stret tingting long saed blong blad, mo fasin blong no tekem drag mo smok sigaret. (Aesea 2:4; Ol Wok 21:25; 2 Korin 7:1) From we ol man blong Jeova oli obei long Tok blong hem mo tok blong slef ya we i stret, Hem i blesem olgeta bigwan.

⁷ Taem ol man blong God oli obei long grup ya we i olsem slef, oli soem tu se oli glad blong obei long Masta blong olgeta Jisas Kraes. Fasin obei ya i impoten moa long taem blong yumi from we naoia Jisas i gat bigfala paoa bitim bifo, olsem profet tok blong Jekob i talem.

Silo i Kam Man We i Gat Raet Blong Rulum Wol

8. ?Olsem wanem Kraes i kasem moa paoa, mo long wanem yia?

⁸ Profet tok blong Jekob i talem se “olgeta man bambae oli obei” long Silo. Tok ya i soemaot klia se Kraes bambae i no rul nomo long ol man Isrel long saed blong spirit. ?Bambae hem i rul long hu bakegen? Revelesen 11:15 i givim ansa, i se: “Ol kingdom blong wol ya oli kam aninit long paoa blong Hae God blong yumi, wetem Mesaea blong hem. Mo hem i King we bambae i stap rul oltaem gogo i no save finis.” Baebol i soemaot se Jisas i kasem paoa ya blong rul long 1914, long en blong “seven taem” we profet tok i talem, no long en blong ‘rul blong ol man we oli no laen blong Isrel.’ * (Daniel 4:16, 17, NW; Luk 21:24) Long 1914 nao Kraes i “kambak” blong rul olsem Mesaea we i King, mo tu, blong ‘rulum ol enemi blong hem.’—Matiu 24:3; Ol Sam 110:2.

9. ?Jisas i mekem wanem wok taem hem i kasem paoa long Kingdom blong hem, mo wok ya i mekem wanem long ol man wetem ol disaepol blong hem tu?

⁹ Faswan wok we Jisas i mekem afta we hem i kam king, hem i sakemaot Setan we i bigfala man blong no obei, wetem ol rabis enjel blong hem. Jisas i sakemaot olgeta “oli kamdaon long wol.” Stat long taem ya, ol rabis enjel ya oli mekem plante bigfala trabol i kamaot long ol man, mo oli mekem laef i kam strong tumas. Taswe i had long ol man we oli wantem obei long Jeova. (Revelesen 12:7-12; 2 Timoti 3:1-5) Yes, ol man we Setan i wantem blong faetem olgeta moa, hemia ol tabu man blong Jeova, “we oli stap obei long ol tok blong God, mo we oli stap holem ol tok we Jisas i talemaot se i tru.” Mo hem i wantem faet agensem ol fren blong olgeta tu, hemia “ol narafala sipsip.”—Revelesen 12:17; Jon 10:16.

10. ?Wanem profet tok blong Baebol we oli stap kamtru blong pruvum se Setan i no save win long faet blong hem agensem ol trufala Kristin?

¹⁰ Be Setan i no save win. Hemia “dei ya blong Masta blong yumi,” Jisas. I no gat wan samting i save blokem wok blong hem blong “win bakegen.” (Revelesen 1:10; 6:2) Olsem nao, bambae hem i meksua se ol 144,000 man Isrel long saed blong spirit oli gat mak blong God long olgeta. Bambae hem i lukaotgud long ‘bigfala hip blong ol man, we i no gat man i save kaontem olgeta, mo we oli kamaot long olgeta kala, long olgeta kantri, long olgeta laen, mo long olgeta lanwis.’ (Revelesen 7:1-4, 9, 14-16) Olgeta ya bambae oli no stap long heven olsem ol tabu fren  blong olgeta. Bambae oli stap long wol ya, mo bambae oli obei long Jisas we i stap rul long olgeta. (Daniel 7:13, 14) Tede, grup ya i hivap finis long wol ya, mo samting ya i soemaot se Silo i stat rul finis antap long “kingdom blong wol ya.”—Revelesen 11:15.

Naoia i Stret Taem Blong “Obei Long Gud Nius”

11, 12. (a) ?Hu nomo bambae oli stap laef taem en blong rabis wol ya i kamtru? (b) ?‘Spirit we i kamaot long wol’ i save pulum man blong tekem wanem fasin?

¹¹ Olgeta we oli wantem kasem laef we i no save finis, oli mas lanem blong obei, from we Baebol i talem klia se ‘olgeta we oli no save ona long God, mo olgeta we oli no save obei long gud nius blong Jisas, Masta blong yumi,’ bambae oli ded long bigfala dei blong God blong givim panis. (2 Tesalonaeka 1:8) Be, i no isi blong obei long gud nius, from we yumi stap long wan wol we i rabis mo ol man blong hem oli no wantem obei long ol loa mo rul blong Baebol.

¹² Baebol i tokbaot stronghed fasin ya blong agensem God se hem i “spirit blong wol ya.” (1 Korin 2:12, NW ) Aposol Pol i raetem leta i go long ol Kristin long Efesas long faswan handred yia, blong tokbaot stronghed fasin ya. Hem i se: “Bifo, yufala i stap holem ol fasin nogud blong wol ya, yufala i stap obei long Setan, we hem i jif blong ol devel, we oli stap olbaot long wol. Hem nomo i devel ya we i stap mekem wok blong hem long ol man ya we oli no save obei long God. Mo bifo, mifala man Isrel tu i bin mekem ol samting we tingting blong mifala i wantem. Mifala i bin folem tingting nomo blong mifala, blong mekem ol samting we mifala i stap harem gud long hem. From samting ya, mifala i olsem ol narafala man nomo, bambae God i mas jajem mifala tu, se mifala i panis. Fasin blong yumi evriwan i sem mak nomo.”—Efesas 2:2, 3.

13. ?Olsem wanem ol Kristin oli save agensem spirit ya we i kamaot long wol, mo wanem gudfala frut i save kamaot from?

¹³ I gud se ol Kristin long Efesas oli no stap olsem ol slef blong stronghed fasin ya. Defren olgeta, oli kam ol pikinini blong God we oli obei, from we oli letem spirit blong hem i gat paoa long olgeta, nao laef blong olgeta i fulap long gudfala frut. (Galesia 5:22, 23) Tede tu, spirit blong God we i strong moa i bitim ol narafala paoa long heven mo wol, hem i stap givhan long plante milian man blong oli obei long Jeova. From samting ya, oli bilif fulwan se ‘bambae oli save kasem ol samting ya we oli putum tingting blong olgeta i stap strong long hem.’—Hibrus 6:11; Sekaraea 4:6.

14. ?Olsem wanem Jisas i givim woning long ol Kristin we oli laef long ol las dei long saed blong sam samting we bambae oli traem fasin obei blong olgeta?

¹⁴ Yumi no mas fogetem tu se, Silo mo paoa blong hem i stap sapotem yumi. Hem wetem Papa blong hem tufala i no save letem wan enemi, we i man long wol ya no spirit man long heven, i mekem samting we i strong tumas long yumi, blong traem fasin obei blong yumi. (1 Korin 10:13) Yes, blong givhan long yumi long faet we yumi gat long saed blong spirit, Jisas i talem klia sam trabol we bambae oli kasem yumi long ol las dei. Hem i talemaot ol samting ya long seven leta we hem i raetem mo i givim long aposol Jon long wan vison. (Revelesen 1:10, 11) Tru ya, ol leta ya oli fulap long ol nambawan advaes we i go long ol Kristin long taem bifo. Be ol tok blong olgeta i stret moa long “dei ya blong Masta blong yumi” we i stat long 1914. !Taswe i stret we yumi lesingud long ol leta ya! *

Blokem Fasin Les, Slip Olbaot, Ronem Ol Sas Samting

15. ?From wanem yumi mas blokem trabol ya we i kasem kongregesen blong Efesas, mo olsem wanem yumi save mekem olsem? (2 Pita 1:5-8)

¹⁵ Faswan leta we Jisas i raetem, hem i go long kongregesen blong Efesas. Fastaem, hem i talem ol gudfala toktok from fasin blong olgeta blong stanap strong longtaem. Nao biaen hem i se: “Be i gat wan fasin we yufala i mekem we i no stret long fes blong mi. Yufala i no moa lavem mi olsem we yufala i lavem mi fastaem.” (Revelesen 2:1-4) Tede tu, sam Kristin we fastaem oli wok olsem we faea i laet long olgeta, oli no moa lavem God olsem oli lavem hem fastaem. Taem lav i kam slak olsem, i save mekem se yumi no moa fren gud wetem God. Taswe, yumi mas mekem wan samting kwiktaem blong stretem trabol ya. ?Olsem wanem blong mekem lav ya i kam strong bakegen? Oltaem yumi mas stadi Baebol, go long olgeta miting, prea, mo tingting dip. (1 Jon 5:3) I tru se blong mekem olsem, yumi mas “traehad,” be bambae yumi luk se i gat gudfala frut i kamaot from. (2 Pita 1:5-8) Sipos yu jekemgud yu wan nao yu luksave  se yu no moa lavem God olsem fastaem, ale yu mas hareap blong stretem trabol ya. Yu mas obei long tok ya blong Jisas se: “Yufala i mas tingbaot bakegen ples ya we yufala i stap long hem fastaem, taem yufala i no foldaon yet. Mo yufala i mas tanem tingting blong yufala from ol sin blong yufala, mo yufala i mas mekem fasin ya bakegen we yufala i mekem fastaem.”—Revelesen 2:5.

16. ?Wanem nogud fasin i stap insaed long kongregesen blong Pegamam mo Tuatira we i save spolem ol Kristin long saed blong spirit, mo from wanem ol tok blong Jisas i stret long yumi tede?

¹⁶ Jisas i talem ol gudfala tok long ol Kristin long Pegamam mo Tuatira from fasin blong olgeta blong holemstrong long God, stanap strong longtaem, mo wok strong. (Revelesen 2:12, 13, 18, 19) Be, oli letem samfala we oli gat rabis tingting olsem Balam mo Jesebel i pulum olgeta. Tufala ya i spolem plante man Isrel bifo, taem tufala i pulum olgeta blong slip olbaot mo wosip long giaman god ya Bal. (Namba 31:16; 1 King 16:30, 31; Revelesen 2:14, 16, 20-23) ?Be olsem wanem long taem blong yumi, we hemia “dei ya blong Masta blong yumi”? ?I gat samfala we oli traem pulum ol narafala blong joen long ol nogud fasin ya? Yes, bigfala samting we i mekem se ol kongregesen oli mas putumaot sam man blong God, hemia fasin blong slip olbaot. !Taswe, i impoten tumas we yumi no joen wetem ol man we oli save pulum yumi blong mekem rabis fasin, nating se ol man ya oli stap insaed no afsaed long kongregesen! (1 Korin 5:9-11; 15:33) Mo tu, olgeta we oli wantem obei long rul blong Silo bambae oli ronwe long ol sinema mo pleplei we oli soemaot ol nogud fasin, mo ol doti tok mo pija blong seks long ol buk mo long Internet.—Amos 5:15; Matiu 5:28, 29.

17. ?Olgeta long Sadis mo Laodisia oli ting se oli stap olsem wanem long saed blong spirit, we i defren long tingting blong Jisas?

¹⁷ I gat gudfala toktok i go long sam man nomo long kongregesen blong Sadis, be bighaf blong olgeta oli no kasem wan gudfala tok nating. I luk olsem we kongregesen ya i laef i stap, mo “ol man oli stap talem” olsem, be Jisas i luk se oli “ded” from we oli kam les long saed blong spirit. Oli no obei long gud nius wetem fulhat blong olgeta. !Bigfala sem long olgeta we oli kasem ol strong tok olsem! (Revelesen 3:1-3) Kongregesen blong Laodisia i klosap sem mak. Olgeta long kongregesen ya oli stap tok flas se oli gat evri samting, ‘oli rijman.’ Be Kraes i luk se oli ‘puaman we oli trabol gud, ae blong olgeta i blaen, mo oli neked.’—Revelesen 3:14-17.

18. ?Yumi mas mekem wanem blong God i no luk yumi olsem we yumi hafhaf long saed blong spirit?

¹⁸ Tede, sam Kristin we fastaem oli gat bigfala bilif, oli foldaon long semfala fasin ya blong no moa obei. Maet oli letem spirit we i kamaot long wol ya i gat paoa long olgeta, nao oli no moa wok wetem tingting ya se taem i sot. From samting ya, tingting blong olgeta i hafhaf long saed blong stadi we oli mekem  long Baebol, prea, ol Kristin miting, mo wok blong prij. (2 Pita 3:3, 4, 11, 12) !I impoten tumas we ol man olsem oli obei long Kraes mo kam rij long saed blong spirit—yes, “pem gol long [Kraes] we oli bonem finis long faea blong mekem i klin gud”! (Revelesen 3:18) Olsemia nao, bambae oli rili rijman, taem oli ‘mekem ol gudfala wok, gat gladhat blong givhan long ol man, mo seraot ol samting blong olgeta long ol narafala man.’ Sipos yumi mekem ol fasin ya we oli rili sas, ‘yumi stap putumgud plante gudgudfala samting blong yumi, we i olsem fandesen blong laef blong yumi, mo we i save stap strong oltaem. Nao bambae yumi save kasem laef ya we i prapa wan.’—1 Timoti 6:17-19.

Ol Gudfala Tok We Oli Kasem From Fasin Obei

19. ?Jisas i talem wanem advaes mo tok blong leftemap tingting blong ol Kristin long Smana mo Filadelfia?

¹⁹ Tufala kongregesen ya Smana mo Filadelfia oli nambawan eksampol blong fasin obei. Long leta we Jisas i raetem long tufala, i no gat wan tok blong stretem tufala. Hem i talem long olgeta long Smana se: “Mi mi save finis ol trabol blong yufala long Smana. Mi save we yufala i puaman, be yufala i no rili puaman, yufala i rijman ya.” (Revelesen 2:9) !Oli defren long olgeta long kongregesen blong Laodisia we oli tok flas from ol sas samting we oli gat, be oli rili puaman! I tru, Setan i no glad blong luk eni man we i soemaot strong bilif long Kraes mo i obei long hem. Taswe, Jisas i givim woning ya se: “I nogud yufala i stap fraet long ol samting we bambae i kam long yufala. Setan bambae i putum sam long grup blong yufala i go long kalabus blong traem yufala. Nao bambae yufala i gat trabol ten dei. Be yufala i mas stanap strong gogo yufala i ded, nao bambae mi givim niufala laef long yufala, blong ona long yufala, olsem praes we oli givim long man we i win long resis.” (Revelesen 2:10) Jisas i talem ol gudfala tok long kongregesen blong Filadelfia tu, i se: “Yufala i stap folem ol tok blong mi [obei long mi], mo yufala i no lego mi nating. . . . Bambae mi mi kamtru long yufala i no longtaem. Yufala i mas holemgud, ol samting ya we yufala i kasem finis, blong bambae i no gat man i stilim praes we yufala i winim finis.”—Revelesen 3:8, 11.

20. ?Olsem wanem plante milian man tede oli stap folem ol tok blong Jisas, mo oli gohed blong mekem olsemia nating se oli kasem wanem?

²⁰ Long “dei ya blong Masta” we i stat long 1914, i gat wan smol grup blong ol tabu man mo plante milian fren blong olgeta we oli olsem ol narafala sipsip, oli stap folem ol tok blong Jisas. Taswe oli gohed strong long wok blong talemaot gud nius mo oli holemstrong long God. Sam long olgeta ya oli kasem hadtaem from we oli obei long Kraes, olsem ol Kristin brata blong olgeta long faswan handred yia. Samfala oli bin harem nogud long ol presin mo ol rabis kalabus. Sam narafala bakegen we oli folem ol tok blong Jisas oli mekem ‘ae blong olgeta i stap [klia] gud,’ nating se i gat ol sas samting mo griri fasin raonabaot long olgeta. (Matiu 6:22, 23) Yes, nomata weples oli stap long hem no wantem samting i hapen long laef blong olgeta, ol trufala Kristin oli stap obei, mo long rod ya oli mekem hat blong Jeova i glad tumas.—Ol Proveb 27:11.

21. (a) ?Grup we i olsem gudfala slef bambae i gohed blong mekem wanem wok? (b) ?Olsem wanem yumi soemaot se yumi rili wantem obei long Silo?

²¹ Naoia we yumi kam klosap tumas long taem blong bigfala trabol, “slef we i stret mo waes” i gat strong tingting blong no lego fasin blong obei long Masta blong yumi, Kraes. Blong mekem olsemia, oli gohed nomo blong rerem ol gudfala kakae long saed blong spirit mo givim long ol man blong God long stret taem we oli nidim. Taswe, yumi mas gohed blong soemaot tangkiu from nambawan tiokratik ogenaesesen blong Jeova mo ol samting we hem i stap givim. Long rod ya, yumi soemaot se yumi stap aninit long rul blong Silo, we hem bambae i givim presen blong laef we i no save finis long ol man we oli obei long hem.—Matiu 24:45-47, NW; 25:40; Jon 5:22-24.

[Ol Futnot]

?Yu Yu Tingbaot?

• ?Bifo we Jekob i ded, hem i talem wanem profet tok long saed blong Jisas?

• ?Olsem wanem blong soemaot se yumi luksave Jisas olsem Silo, mo yumi mas blokem wanem spirit?

• ?Wanem advaes we i stret long yumi tede, i stap long ol leta we oli go long ol seven kongregesen long Revelesen?

• ?Olsem wanem yumi save folem eksampol blong kongregesen blong Smana mo Filadelfia?

[Kwestin]

[Tok blong pija long pej 18]

Jeova i blesem ol man blong hem from we oli obei long gudfala “man blong wok”

[Tok blong pija long pej 19]

I no isi blong obei long God from we Setan i stap traehad blong pulum yumi

[Tok blong pija long pej 21]

Gudfala fasin fren wetem Jeova bambae i givhan long yumi blong obei long hem