Laef Stori

Nambawan Janis Blong Mekem Wok i Gohed Moa Afta Long Wo

FILIP S. HOFFMANN I TALEM STORI YA

Stori ya i stat long manis Mei 1945, jes afta we Seken Wol Wo i finis. Long manis Disemba blong semfala yia, Nathan H. Knorr we i lukaot long wok blong prij blong ol Witnes blong Jeova long fulwol, hem i kam long Denmak wetem sekretari blong hem, Milton G. Henschel we i gat 25 yia long taem ya. Mifala i rentem wan bigfala haos blong mekem miting long hem. Mifala ol yangfala i harem gud tumas long tok blong Brata Henschel from we hem i yangfala olsem mifala, mo tu from we hem i tokbaot: “Taem yu yangfala yu mas tingbaot Bigman we i Wokem yu.”—Prija 12:1, American Standard Version.

TAEM tufala i stap wetem mifala, mifala i harem nius blong ol nambawan samting we i stap hapen blong mekem wok blong prij i go moa long olgeta ples blong wol. Mo mifala i gat janis tu blong joen long ol bigfala wok ya. (Matiu 24:14) Wan samting se, i gat wan niufala kos long Amerika blong trenem ol yangfala man mo woman blong oli kam misinari. Brata Knorr i talem stret se sipos oli singaot mifala i kam, bambae oli sanem “tiket blong kam nomo” be i no tiket blong gohom bakegen. Mo tu, mifala i no save weples bambae oli sanem mifala i go wok long hem. Nating se i olsem, sam long mifala i putum nem blong mifala blong go long kos ya.

Bifo we mi tokbaot ol samting we i hapen afta long Seken Wol Wo, bambae mi stat long ol samting we oli kamaot afta we mi mi bon long 1919. Sam samting we oli hapen bifo long Seken Wol Wo mo taem faet ya i stap gohed, oli jenisim laef blong mi bigwan.

Kasem Trutok From Wan Famle We i Defren

Taem Mama i gat bel wetem mi we mi fasbon, hem i prea se sipos mi mi wan boe, bambae mi  kam wan misinari. Brata blong hem i wan Baebol Studen, hemia nem blong ol Witnes blong Jeova long taem bifo. Be ol narafala long famle oli ting se brata ya i narakaen. Mifala i stap long wan ples klosap long taon ya Copenhagen, mo taem ol Baebol Studen oli mekem asembli blong olgeta evri yia long taon ya, Mama i stap singaot Angkel Thomas blong i kam stap wetem mifala, from we ples blong hem i longwe tumas. Bigfala save blong hem long Baebol mo klia fasin blong hem blong eksplenem, i mekem se Mama i bilif fulwan, nao long 1930 hem i kam wan Baebol Studen.

Mama i laekem tumas Baebol. Blong obei long tok blong Dutronome 6:7, hem i tijim mi mo sista blong mi taem mifala i ‘stap long haos, stap wokbaot, go blong slip, mo girap bakegen.’ Taem i stap pas, nao mi mi stat blong joen long wok blong prij long olgeta haos wanwan. Mi mi laekem tumas blong tokbaot tijing blong ol skul, olsem sol we i no save ded samtaem mo helfaea. Mi yusum Baebol blong soemaot se ol tijing ya oli no stret.—Ol Sam 146:3, 4; Prija 9:5, 10; Esikel 18:4.

Famle i Joengud

Long 1937, afta long asembli long Copenhagen, oli nidim wan man blong givhan smoltaem long hed ofis blong ol Witnes blong Jeova long Denmak. Bambae man ya i mas mekem wok blong sanemaot ol buk oli go long ol defdefren kongregesen. Mi mi jes finisim skul blong mi long wan kolej we mi lanem ol fasin blong mekem bisnes, mo mi no gat samting blong mekem. Ale mi talem se mi mi glad blong givhan. Taem wok ya i finis, oli askem long mi blong mekem sam narafala wok long ofis. Ale, smoltaem biaen, mi mi aot long famle blong mi, mi go stap long hed ofis long Copenhagen, nating se mi mi no baptaes yet. Taem mi joen evri dei wetem ol man we oli bigman long ol Kristin fasin, mi mi stap gohed gud long saed blong spirit. Long Jenuware 1, 1938, mi tekem baptaes long wota blong soemaot se mi givim laef blong mi i go long Jeova God finis.

Long Septemba 1939, Seken Wol Wo i stat. Long Eprel 9, 1940, ol ami blong Jemani oli kam insaed long Denmak. Oli letem ol manples oli fri blong mekem sam samting, ale mifala i save gohed blong prij.

Long taem ya, wan samting we i gud tumas i hapen. Papa blong mi i kam wan gudfala Witnes we i wok strong. Hemia i mekem se famle blong mifala i glad fulwan. Taswe, taem mi wetem fo narafala brata blong Denmak i kasem leta we i singaot mifala blong joen long namba eit klas blong Gilead Skul, ale ful famle blong mi oli glad. Kos ya blong  faef manis i stat long Septemba 1946, mo mifala i mekem long wan naesfala ples jes afsaed long South Lansing long New York.

Gilead Mo Trening We Mi Kasem Biaen

Long Gilead Skul, mi gat janis blong faenem plante nambawan fren. Wan naet, mi stap wokbaot raon long ples we mifala i stap long hem wetem Harold King blong Inglan. Mitufala i tokbaot weples maet oli sanem mifala i go long hem afta we kos i finis. Harold i talem se: “Mi ting se bambae mi luk ol waet ston blong Dover bakegen samtaem.” Hem i tru, be 17 yia biaen nomo hem i jes luk ol waet ston ya bakegen. !Long ol yia ya, hem i pasem fo yia haf we i stap hem wan nomo long wan rabis kalabus long Jaena! *

Afta we kos i finis, oli sanem mi mi go long Texas, Yunaeted Stet. Long ples ya, mi mekem wok blong seket elda, hemia i min se mi stap visitim ol kongregesen blong ol Witnes blong Jeova blong givhan long olgeta long saed blong spirit. Ol brata mo sista oli welkamem gud mi. Ol brata long Texas oli glad tumas blong joen wetem wan yangfala blong Yurop we i jes finisim kos blong Gilead. Be mi stap seven manis nomo long Texas, nao oli singaot mi blong go long hedkwota blong ol Witnes blong Jeova, long Brooklyn, New York. Long ples ya, Brata Knorr i givim wok long mi long ofis, mo i talem long mi blong lanem olgeta defdefren wok we oli stap mekem long hedkwota ya. Biaen, bambae mi gobak long Denmak, nao mi mas folem ol samting we mi lanem finis mo meksua se oli mekem evri samting longwe long sem fasin we oli mekem long Brooklyn. Tingting i stap se olgeta ofis long wol oli mas folem semfala fasin blong wok, blong mekem se wok i rongud moa. Afta long Denmak, Brata Knorr i talem long mi blong go long Jemani.

Folem Ol Trening We Mi Bin Kasem

Taem mi kasem Wiesbaden, Jemani, long Julae 1949, plante taon blong Jemani we faet i spolem, oli nogud yet. Ol brata we oli stap lidim wok blong prij oli ol man we oli bin kasem bigfala hadtaem aninit long rul blong Hitler we i stat long 1933. !Sam long olgeta ya oli bin stap long ol rabis kalabus blong eit kasem ten yia, samfala oli bin stap longtaem moa! Mi mi wok wetem ol gudfala man ya blong Jeova blong tri yia haf. Nambawan eksampol blong olgeta i mekem mi mi tingbaot tok blong wan woman Jemani we i raetem ol buk blong histri, nem blong woman ya Gabriele Yonan. Hem i se: “Sipos yumi no gat eksampol blong Kristin grup ya we i stanap strong aninit long rabis rul blong ol Nasi Sosialis, ating ol samting we yumi luk long Auschwitz mo ol samting we i kamaot long Holokos, * bambae i mekem we yumi no bilif se i gat wan man we i save folem ol Kristin tijing blong Jisas.”

Wok blong mi long ofis long kantri ya i sem mak long wok we mi bin mekem long Denmak: mi mas statem wan niufala fasin blong wok we i sem mak long fasin we ogenaesesen blong Jeova i stap folem long ol narafala ples blong wol. Taem ol brata long Jemani oli kasem save se ol jenis ya oli no blong daonem wok blong olgeta be i blong mekem se ol ofis mo hedkwota oli wok tugeta moa, ale oli glad mo oli wok wanples blong mekem plan ya i kamtru.

Long 1952, mi kasem wan leta we i kam long ofis blong Brata Knorr. Hem i talem se mi mas go long ofis long Bern, Swiselan. Long Jenuware 1, 1953, mi stat mekem wok blong lukaot long ofis long ples ya.

 Narafala Glad Long Swiselan

I no longtaem afta we mi kam long Swiselan, i gat wan asembli, mo long ples ya mi mitim Esther. Smoltaem biaen, mitufala i mekem plan blong mared. Long Ogis 1954, Brata Knorr i talem long mi blong go long Brooklyn. Long ples ya, hem i talemaot wan niufala plan we i nambawan. Oli mekem plan ya from we ol ofis long wol oli stap kam plante mo oli bigwan moa. Ale, oli seraotem wol i go long ol defdefren haf we oli kolem ol zone, nao ol zone elda bambae oli lukaot long ol wanwan haf ya. Oli givim tu haf long mi blong lukaot long tufala, hemia Yurop mo eria blong Mediterenia.

Afta long smoltaem ya long Brooklyn, mi gobak long Swiselan blong rere from wok blong mi olsem zone elda. Mi maredem Esther, mo hem i joenem mi long ofis long Swiselan. Mi mekem faswan trip blong mi i go long ol haos misinari mo hed ofis long Itali, Gris, Saepras, ol kantri long Medel Is mo klosap long solwota long Not Afrika, wetem Spen mo Potugal. Mi go long 13 kantri evriwan. Mi kambak long Bern blong smoltaem, nao mi aot bakegen blong mekem wan trip i go long ol narafala kantri blong Yurop we oli stap long wes saed blong Aean Keten. Long faswan yia blong mared blong mitufala, mi mi aot blong sikis manis long ol trip ya blong visitim ol Kristin brata.

Laef i Jenis

Long 1957, Esther i faenemaot se hem i gat bel. Hed ofis i no stret ples blong ol papa mama wetem pikinini, ale mitufala i gobak long Denmak. Papa blong mi i tekem mitufala i go stap wetem hem. Esther i lukaot long gel blong mitufala, Rakel, wetem papa blong mi tu. Mi mi givhan wetem wok long niufala ofis long ples ya. Mi tijim wan klas blong ol elda long Kingdom Ministri Skul, mo mi gohed long wok blong zone elda.

Wok blong zone elda i mekem se mi mi go long ol longfala trip, ale mi no spenem plante taem wetem gel blong mitufala. Samting ya i no karem gudfala frut. Mi tingbaot wan taem we mi stap long Paris blong rerem wan smol ples blong prentem ol buk. Ale, Esther mo Rakel tufala i kam long tren blong luk mi. Mi wetem Léopold Jontès we i wok long hed ofis mitufala i go blong mitim tufala long Gare du Nord. !Rakel i kamaot long doa blong tren, i lukluk Léopold i lukluk mi mo i lukluk Léopold bakegen, nao hem i resis i go holem Léopold!

Taem mi mi gat 45 yia, wan narafala bigfala jenis i kamaot long laef blong mi. Long taem ya, mi stop long wok blong prij fultaem mo mi wok blong winim mane blong sapotem famle blong mi. Long olgeta yia we mi mekem wok blong prij fultaem wetem ol Witnes blong Jeova, mi bin lanem plante samting. Taswe, mi mi faenem  wan wok olsem maneja blong wan kampani we i stap sanem ol samting i go long ol narafala kantri. Mi wok long ples ya samwe long naen yia. Long taem ya Rakel i finis long skul, nao mifala i mekemap tingting blong mifala blong muf i go long wan ples we i nidim moa man blong talemaot Kingdom.

Mifala i tingting long ol ples long Nowei, nao mi go long wan ofis we i stap faenem wok blong ol man, blong askem sipos oli save faenem wan wok blong mi long Nowei. Oli no givim gudfala nius long mi. Oli talem se i had blong faenem wok blong wan man we i gat 55 yia finis. Be nating, mi sanem toktok i go long hed ofis blong Oslo mo mi rentem wan haos klosap long taon ya Drøbak. Mi mi gat strong tingting se bambae mi faenem wan wok samples. Mo i tru, mi faenem. Biaen, mifala i pasem wan gudfala taem long wok blong Kingdom long Nowei.

Mifala i laekem tumas taem kongregesen i mekem ol trip i go long not blong wok long ol ples we i no gat kongregesen long olgeta. Mifala i rentem ol smosmol rum long ples blong putum haos tapolen long hem, mo evri dei mifala i go luk ol man we oli stap olbaot long ol plantesin antap long ol naesfala hil ya. Mifala i harem gud tumas blong toktok wetem ol man ya we oli kaen gud mo oli glad blong lesin long tok blong Kingdom blong God. Mifala i givimaot plante buk, be mifala i mas wet kasem nekis yia blong go luk ol man ya bakegen. !Nating se i olsem, oli no fogetem mifala! Esther mo Rakel tufala i tingbaot yet taem ya we mifala i gobak blong luk sam man, mo oli holholem mifala olsem we mifala i stret famle blong olgeta we oli lusum longtaem finis. Afta we mifala i stap tri yia long Nowei, mifala i gobak long Denmak.

Famle We i Givim Bigfala Glad

I no longtaem, Rakel i fren wetem Niels Højer, we hem i wok strong blong prij fultaem olsem wan paenia. Taem Niels mo Rakel i mared finis, tufala i gohed long wok blong paenia gogo tufala i gat pikinini. Niels i wan gudfala hasban mo nambawan papa tu, hem i spenem plante taem wetem famle blong hem. Wan dei long eli moning, hem i girap mo i karem boe blong hem wetem baskel blong hem i godaon long solwota blong lukluk san we i stap kam antap. Wan man we i stap klosap long olgeta i askem long boe ya wanem we tufala i bin mekem long solwota. Boe i ansa se: “Mitufala i prea long Jeova.”

Sam yia biaen, mi mo Esther i lukluk fas mo seken smol bubu blong mitufala, Benjamin mo Nadja i tekem baptaes. Niels i stanap i lukluk tu, nao wantaem nomo hem i kam klosap long mi, i lukluk stret long fes blong mi, mo i talem se: “Ol bigman oli no krae.” Be, smoltaem biaen mitufala i stap holholem mitufala mo mitufala evriwan i stap krae. !I gud tumas we gel blong mi i maredem wan man we mi save laf wetem hem mo krae wetem hem tu!

Mekem Sam Moa Jenis Yet

Mi mo Esther i kasem wan narafala blesing taem oli askem long mitufala blong go wok bakegen long hed ofis blong Denmak. Long taem ya, oli stap mekem plan blong wokem wan niufala ofis we i bigwan moa, long taon ya Holbæk. Mi wetem sam narafala i gat blesing ya blong lukaot long wok blong bildim haos ya. Mo olgeta we oli mekem wok ya oli no kasem pei from. !Nating se ples i kolkol bitim mak, long en blong 1982 wok i finis, mo mifala i glad tumas blong muf i go long haos ya we i bigwan mo i gud tumas!

Kwiktaem nomo mi stat wok long ofis, mo mi harem gud tumas long wok ya. Esther i mekem wok blong ansarem telefon. Be biaen, dokta i mas katem hem blong jenisim wan bun long leg blong hem, mo wan yia haf biaen bakegen oli katem bel blong hem. Nating se ol brata blong hed ofis ya oli kaen tumas long mitufala, be mitufala i ting se i moagud we mitufala i aot. Ale, mitufala i muf i go long kongregesen we gel blong mitufala mo famle blong hem oli stap long hem.

Naoia, bodi blong Esther i no moa strong. Nating se i olsem, mi save talem se long olgeta yia we mitufala i mekem wok blong God tugeta, mo long ol defdefren taem we laef blong mitufala i jenis, hem i bin stap olsem nambawan fren blong mi we i sapotem gud mi. Nating se naoia mitufala i stap siksik, mitufala i stap joen yet long wok blong prij. Taem mi tingtingbak long laef blong mi, mi gat bigfala tangkiu from, mo mi tingbaot tok blong man blong raetem Sam se: “God, i stat long taem we mi mi yangfala, yu yu stap tijim mi.”—Ol Sam 71:17.

[Ol Futnot]

[Tok blong pija long pej 24]

Karemaot ol buk we mifala i kasem long niufala ofis we oli wokem long Jemani long 1949

[Tok blong pija long pej 25]

Mi wok wetem plante Witnes olsem olgeta ya we oli bin stap long ol rabis kalabus

[Tok blong pija long pej 26]

Mi wetem Esther naoia mo long mared blong mitufala long Betel blong Bern, Oktoba 1955