Ol Yangfala We Oli Lavem Trutok

“MI MI yangfala nomo. ?Bambae mi save mekem laef blong mi i klin olsem wanem?” Hemia kwestin we Hibru man blong raetem Sam i askem plante taosen yia bifo. (Ol Sam 119:9) Tede i stret yet blong askem wan kwestin olsem, from we ol yangfala oli fesem plante trabol long wol. Fasin blong slip olbaot i mekem se plante yangfala oli kasem AIDS, mo haf long olgeta we oli kasem rabis sik ya oli gat bitwin 15 mo 24 yia nomo. Fasin blong tekem drag tu i wan bigfala problem, mo plante yangfala oli ded from. Rabis miusik, ol sinema, film long televisin, mo video kaset we oli soem raf fasin mo seks, mo ol rabis pija we oli kamaot long Internet, olgeta samting ya oli gat paoa long ol yangfala blong spolem olgeta. Taswe, kwestin ya we man blong raetem Sam i bin askem i wan wari blong plante papa mama mo plante yangfala tede.

Man blong raetem Sam i ansa long prapa kwestin blong hem i se: “Mi mi mas obei long ol tok blong yu.” Yes, long Tok blong God, i gat plante gudfala advaes we oli save lidim ol yangfala, mo taem oli folem ol advaes ya plante oli save haremgud long laef blong olgeta. (Ol Sam 119:105) I gud yumi luk eksampol blong sam yangfala we oli lavem God mo oli traehad blong stap strong long saed blong spirit, long wol ya we i stap ronem ol samting blong haremgud wetem ol samting blong bodi nomo.

Oli Tangkiu From Tijing Blong Papa Mama

Jacob Emmanuel i bin wan fultaem paenia blong sam yia bifo we hem i go wok long branj ofis blong ol Witnes blong Jeova long Meksiko. Hem i gat tangkiu taem hem i tingtingbak long wanem we i bin pulum hem blong mekem wok blong God, i se: “Papa mama blong mi oli stamba man we oli pulum mi blong mekem wok blong Jeova, mo mi frengud wetem sam brata we oli bigman long saed blong spirit mo oli wok plante yia finis olsem paenia, mo olgeta tu oli halpem mi. Oli pulum mi blong mi lavem wok blong prij. Sloslo, oli lidim mi long gudfala rod; Mi neva harem olsem se oli fosem mi blong folem rod ya.”

David i spenem plante yia finis long fultaem wok blong prij, mo hem i rimemba olsem wanem eksampol blong papa mama blong hem i gat paoa long hem. Papa mama blong hem, tufala i kam spesel paenia taem David mo brata blong hem tufala i smol yet. Taem papa blong hem i ded, mama blong hem i gohed long wok blong spesel paenia. Mama blong David i lukaotgud long tufala boe blong hem, mo long sem taem hem i talemaot gud nius. David i talem se: “Oli neva fosem mi blong kam wan paenia, be famle blong mifala i harem gud tumas long fultaem wok blong prij, mekem se fasin blong frengud mo stap oltaem wetem olgeta we oli laekem prij i pulum mi blong kam wan paenia tu.” David i makemaot se i impoten we ol papa mama oli lidimgud ol pikinini mo oli lukaotgud long olgeta, hem i talem se: “Evri naet, mama blong mi i stap ridim sam stori long mi mo brata blong mi, long buk ya From Paradise Lost to Paradise Regained. * Mama i gat wan fasin blong ridim ol stori we i halpem mitufala blong laekem tekem ol kakae long saed blong spirit.”

Tangkiu From Ol Miting

Sam yangfala oli faenem i had blong laekem ol Kristin miting. Oli go nomo from we papa mama blong olgeta i go. Nating se i olsem, sipos oli gohed blong go long ol miting, maet biaen olgeta tu bambae oli laekem ol miting ya. Tingbaot Alfredo, we i stat  paenia taem hem i gat 11 yia blong hem. Hem i talem se taem hem i gat samting olsem faef yia blong hem, hem i no moa wantem go long ol miting, from we ol miting oli mekem hem i wantem slip be papa mama blong hem oli no letem hem i slip. Hem i tingtingbak se: “Taem mi stap gruap, sloslo mi stat blong intres moa long ol miting, speseli taem mi lanem olsem wanem blong rid mo raet, from we stat long taem ya mi ansa wetem prapa tok blong mi.”

Cintia i gat 17 yia blong hem mo hem i wan fultaem paenia. Hem i eksplenem olsem wanem ol gudfala fren oli gat paoa long fasin blong hem blong lavem wok blong God, hem i se: “Mi frengud wetem ol brata sista mo mi stap go long miting oltaem, nao samting ya i blokem ol kaen tingting olsem se mi mestem ol fren blong mi long wol, mo mi mestem ol pleplei we ol yangfala oli laekem tumas olsem go long naetklab. Mi stap lesin long ol ansa mo ol ekspiriens long ol miting, mo samting ya i pulum tingting blong mi blong wantem givim evri samting we mi gat i go long Jeova, mo mi harem se beswan samting we mi save givim hemia yangtaem blong mi. Taswe mi tekem disisen blong yusum yangtaem blong mi blong mekem wok blong God.”

Be Cintia i talem se: “I bin gat taem, hemia bifo we mi baptaes, we mi stap mestem ol miting, mi faenem sam eskius olsem se mi gat tumas homwok blong mekem no narafala samting we skul i askem mi blong mekem. Mi mestem plante miting, nao samting ya i stat gat paoa long mi. Mi stat fren wetem wan boe we i no stadi long Baebol. Laki se Jeova i halpem mi mo mi save stretem problem ya long stret taem.”

Prapa Disisen Blong Yu

Pablo tu i wan fultaem paenia. Taem oli askem long hem wanem stamba samting i save pulum wan yangfala blong laekem moa trutok blong Baebol, Pablo i ansa se: “Ating i gat tu samting: yu mas stadi oltaem long Baebol, mo yu mas wokem strong tingting blong talemaot gud nius. Mi tangkiu tumas long papa mama blong mi from we tufala i bin tijim mi long trutok long saed blong Jeova, mo mi harem olsem se tijing ya i beswan samting we tufala i save givim long mi. Be tu, mi wan mi mas sua fulwan se from wanem mi lavem Jeova. Blong mekem olsem, i impoten tumas blong save se trutok blong Baebol ‘i bigwan olsem wanem mo i dip olsem wanem.’ Long rod ya nomo yumi save laekem tumas Tok blong God, nao i olsem we ‘wan faea’ i laet insaed long yumi, i pulum yumi blong talemaot trutok ya long ol narafala. Sipos yumi gat strong tingting ya long wok blong prij, bambae yumi gat bigfala tangkiu oltaem long trutok.”—Efesas 3:18; Jeremaea 20:9.

Jacob Emmanuel, we yumi tokbaot finis, hem tu i rimemba we i impoten tumas we evri man wanwan i tekem prapa disisen blong hem blong mekem wok blong God. Hem i talem se papa mama blong hem, tufala i neva fosem hem blong tekem baptaes. Hem i se: “Taem mi luk gudfala frut we i kamaot biaen, mi luksave se i gud we papa mama blong mi, tufala i neva fosem mi. Eksampol, sam yangfala we mi mi frengud wetem olgeta oli bin tekem disisen se bambae oli tekem baptaes tugeta, long semfala asembli. Hemia wan gudfala disisen, be mi luksave se sam long olgeta oli no tingting dip fastaem, filing nomo i pusum olgeta blong oli tekem baptaes, mo smoltaem afta we oli baptaes, oli no moa wok strong blong talemaot Kingdom. Papa  mama blong mi, tufala i neva fosem mi blong givim laef blong mi i go long Jeova. Mi wan nomo mi tekem disisen ya.”

Kongregesen i Givhan Tu

Sam yangfala oli lanem trutok blong Baebol olgeta wan, we papa mama blong olgeta i no halpem olgeta. Long taem olsem, i no isi nating long wan yangfala blong lanem samting we i stret blong mekem, mo gohed blong mekem samting ya.

Noé i rimemba olsem wanem trutok i givhan bigwan long hem. Taem hem i yang yet, oltaem hem i kros mo i wantem faet. Taem hem i gat 14 yia, hem i stat stadi long Baebol, mo fasin blong hem i stat kam moagud. Long taem ya papa mama blong hem oli no intres long Baebol, be oli tangkiu tumas from ol jenis we Baebol i mekem long fasin blong Noé. Noé i gohed gud long saed blong spirit, mo i wantem yusum ful laef blong hem long wok blong God. Naoia, hem i wan fultaem paenia.

I sem mak wetem Alejandro. Hem i intres long trutok taem hem i yang yet, nating se papa mama blong hem oli no intres. Hem i talemaot tangkiu we hem i gat from trutok ya i se: “Mi gruap long wan famle we oli Katolik. Be mi stat intres long tingting blong ol Komunis we oli no bilif long God, from we jos blong mi i no save ansa long ol kwestin we oli mekem tingting blong mi i trabol taem mi yang yet. Ogenaesesen blong Jeova i halpem mi blong kasem save blong God. Hem i rili sevem laef blong mi, from we sipos mi no bin stadi long Baebol, ating mi joen wetem olgeta we oli stap slip olbaot, oli drong, no oli tekem drag. No maet mi joenem ol grup blong rebel we oli girap agensem gavman, mo maet mi kasem ol nogud frut blong fasin rebel ya.”

?Olsem wanem wan yangfala i save gohedgud blong stadi Baebol mo holem strong long ol samting we hem i lanem, sipos papa mama i no sapotem hem? I klia we ol elda mo sam narafala memba blong kongregesen tu oli save givhan bigwan long wan yangfala olsem. Noé i tingtingbak se: “Mi neva harem se mi stap mi wan, from we oltaem Jeova i stap klosap long mi. Mo tu, plante gudfala brata sista oli sapotem mi, oli kam olsem ol papa, ol mama, no ol brata blong mi long saed blong spirit.” Naoia Noé i wok long Betel mo i yusum taem blong hem blong mekem wok blong God. Alejandro tu i talem se: “Oltaem bambae mi gat tangkiu from samting ya se: mi gat bigfala janis blong stap long wan kongregesen we ol elda blong hem oli keagud long mi. Mi rili tangkiu tumas long fasin ya blong olgeta from we, taem mi stat stadi long Baebol mi gat 16 yia blong mi, mo olsem ol narafala yangfala mi no save stap kwaet, tingting blong mi i olbaot oltaem. Ol famle long kongregesen oli neva lego mi. Oltaem, i gat wan famle we i welkamem mi long haos blong hem, oli serem haos, oli serem kakae wetem mi, mo antap moa, oli serem lav blong olgeta wetem mi.” Alejandro i spenem 13 yia finis long fultaem sevis.

Sam man oli ting se skul i gud blong ol olfala nomo. Be, plante yangfala oli bin lanem trutok blong Baebol taem oli yang yet, mo oli lan blong lavem Jeova mo oli stap tru long hem. Ol tok blong King Deved long Ol Sam 110:3 (NW ) oli laenap stret wetem ol yangfala ya, hem i talem se: “Long dei we bambae ol ami blong yu oli rere blong faet, bambae ol man blong yu oli kam joen, oli glad blong mekem wok. Taem i jes brok delaet, bambae yu yu gat kampani blong ol yangfala blong yu, oli kam long yu long fasin we i klingud, i tabu, we olgeta oli olsem ol drop blong wota blong naet.”

I no isi long ol yangfala blong lanem trutok mo fasgud long hem oltaem. Be yumi glad tumas blong luk we plante yangfala oli stap klosap long ogenaesesen blong Jeova, oli go long ol miting oltaem, mo oli stadi gud long Baebol. !Taem oli mekem olsem, oli lanem blong lavem Tok blong God mo wok blong hem!—Ol Sam 119:15, 16.

[Futnot]