Ripot Long Wok Blong Kingdom

Wan Haos Kingdom i Winim Wan Medol

MINISTRI blong Envaeronmen long Finlan i talem se yia 2000 hem i “Yia blong Flasem Garen.” Wan long ol man we oli ogenaesem samting ya i talem se “plan blong yusum stamba tok ya long yia ya, i blong mekem yumi evriwan i rimemba se ol gras mo tri raonabaot long yumi oli impoten tumas long laef blong yumi mo oli mekem yumi haremgud.”

Long Jenuware 12, 2001, branj ofis blong ol Witnes blong Jeova long Finlan i kasem wan leta we Finnish Association of Landscape Industries i sanem. Leta ya i eksplenem we Haos Kingdom blong ol Witnes blong Jeova long Tikkurila i bin winim wan long olgeta medol blong “Yia blong Flasem Garen,” from we garen blong Haos Kingdom ya i naes tumas mo i flas gud. Long leta ya oli talem tu se “yad blong yufala i luk naes oltaem, nating se long hot taem no long kolkol taem, hem i flas gud, i nambawan.”

Oli givim medol ya long ol Witnes blong Jeova long Rosendahl Hotel long Tampere, Finlan, mo i gat 400 man blong flasem garen wetem ol bisnesman we oli stap long taem ya. Finnish Association of Landscape Industries i wokem wan pepa tu blong sanem i go long ol niuspepa, ol radio mo ol televisin, we i talem se: “Long plante defren ples long kantri, klosap evri garen raonabaot long Haos Kingdom blong ol Witnes blong Jeova i naes tumas. Oli lukaotgud long envaeronmen, mo ol man we oli stap wokbaot klosap long ol Haos Kingdom oli luksave samting ya. Haos Kingdom long Tikkurila i wan gudfala eksampol long fasin blong flasem garen. Bilding ya wetem graon we i stap raonabaot long hem, tufala tugeta i naes mo i soemaot se ples ya i kwaet.”

Long Finlan i gat 233 Haos Kingdom, mo plante blong olgeta oli gat naesfala garen. Be samting we i rili mekem se ol ples ya oli naes, i no garen blong olgeta, be hemia from we ol ples ya oli ples blong trufala wosip mo blong kasem tijing blong Baebol. I gat bitim sikis milian Witnes blong Jeova raonabaot long wol we oli laekem tumas ol Haos Kingdom blong olgeta—nating se ol haos ya oli flasem gud no nogat. Oli wantem tumas blong lukaotgud long ol Haos Kingdom ya. !Eni man long komuniti blong yu oli welkam blong kam long ol Haos Kingdom!