“Bambae Yu Yu Kam Wan Waes Man”

“Bighaf blong ol man oli yusum ol faswan yia blong laef blong olgeta blong mekem samting we bambae i spolem nomo ol laswan yia blong laef blong olgeta.” Hemia toktok blong Jean de La Bruyère, wan Franis man blong raetem buk we i laef long ol yia 18 handred. Toktok blong hem i tru tumas. Wan yangfala we tingting blong hem i hafhaf mo i les blong tekem wan stret disisen long laef blong hem, biaen bambae hem i save sore bigwan. Be wan yangfala we i stronghed mo i gohed nomo folem wan rod we i no waes nating, hem tu i save spolem ful laef blong hem biaen. Yes, tufala fasin ya i nogud. Fasin les blong tekem disisen no fasin blong tekem disisen we i nogud, tufala fasin ya i save lidim man i go long trabol nomo.

?Wan yangfala i save blokem trabol ya olsem wanem? Tok blong God i stap givim ol gudfala advaes. Hem i givim wan woning long ol yangfala we oli no save tekem wan disisen long laef blong olgeta, i se: “God i mekem yumi, mo naoia we yufala i yangfala yet, oltaem yufala i mas tingbaot hem. I nogud yufala, i stap wet go kasem taem ya we evri dei, ol trabol bambae oli stap kam kasem yufala, mo evri yia, bambae yufala i stap talem se, ‘Mi mi no glad nating long laef ya.’ ” (Prija 12:1) Sipos yu yu wan yangfala, i gud yu tekem ol gudfala disisen naoia blong save gud ‘God ya we i mekem yumi,’ taem yu yang yet.

?Ale, olsem wanem Baebol i halpem ol yangfala blong oli blokem ol fasin we i save spolem yangtaem blong olgeta? Hem i talem se: “Sipos yu stap lesin long ol gudfala tok we ol man oli givim blong givhan long yu, mo yu glad blong lan, bambae yu yu kam wan waes man.” (Ol Proveb 19:20) Mo tu, Baebol i soem klia se man we i sakemaot waes blong God from we hem i les no i stronghed taem hem i yangfala yet, no taem hem i olfala finis, bambae hem i kasem ol rabis frut from. (Ol Proveb 13:18) Defren olgeta, sipos man i stap folem ol rul blong God, bambae hem i ‘no save sot long wan samting long laef blong hem, mo bambae hem i gat longfala laef,’ we i fulap long ol gudfala samting.—Ol Proveb 3:2.