Oltaem Jeova i Stap Tingbaot Yu
Oltaem Jeova i Stap Tingbaot Yu
“Yufala we i stap wari tumas, yufala i mas putum ol trabol blong yufala long han blong [God], from we oltaem hem i stap tingbaot yufala.”—1 PITA 5:7.
1. ?Long wanem bigfala fasin Jeova i defren long Setan?
JEOVA i defren olgeta long Setan. Man we i wantem stap klosap long Jeova, hem i no laekem Setan nating. Tingting ya i stap tu long buk ya, Encyclopædia Britannica (1970). Hem i stap tokbaot wok blong Setan we Baebol i tokbaot long buk blong Job, i se: ‘Setan i stap wokbaot long wol ya blong lukaot ol man no ol wok we hem i save ripotem. Taswe hem i defren long God. God i stap “luklukgud” long olgeta ples blong wol blong faenem ol man we oli gud, blong hem i save yusum paoa blong hem blong givhan long olgeta (2 Kron. 16:9). Setan i no trastem eni man we hat blong hem i pulum hem blong mekem i stret, mo God we i holem olgeta paoa mo i kontrolem olgeta samting, i letem hem i traem ol man go kasem mak we Hem i putum.’ !Tru ya, Jeova i defren long Setan!—Job 1:6-12; 2:1-7.
2, 3. (a) ?Olsem wanem stori blong Job i soemaot gud mining blong tok ya “Devel”? (b) ?Olsem wanem Baebol i soemaot se Setan i stap gohed yet blong faet agensem ol man blong Jeova long wol?
2 Tok ya “Devel” i kamaot long wan Grik tok we i minim “man we i talem ol giaman tok agensem narafala,” no “man we i giaman blong spolem narafala.” Buk blong Job i soemaot se Setan i talem ol giaman tok agensem Job, wan gudfala man blong God. Setan i talem se Job i stap mekem wok blong God blong kasem samting nomo, i se: “Hem i stap mekem wosip long yu from we yu yu stap givhan gud long hem.” (Job 1:9) Be buk blong Job i soemaot se nating we Job i kasem plante trabol mo traem, hem i kam klosap moa long Jeova. (Job 10:9, 12; 12:9, 10; 19:25; 27:5; 28:28) Afta we ol trabol blong hem i finis, hem i talem long God se: “Fastaem, ol narafala man nomo oli stap tokbaot yu long mi, be naoia, mi mi luk yu stret long ae blong mi.”—Job 42:5.
3 ?Olsem wanem? ?Afta long taem blong Job, Setan i no moa talem ol giaman tok agensem ol gudfala man blong God? Si, hem i gohed blong mekem fasin ya. Buk blong Revelesen i soemaot se long taem blong yumi, klosap long en blong wol ya, Setan i stap gohed yet blong faet agensem ol tabu brata blong Kraes mo ol narafala gudfala man we oli wok wetem olgeta. (2 Timoti 3:12; Revelesen 12:10, 17) Taswe, yumi ol trufala Kristin, yumi nidim tumas blong putum yumi i stap daon aninit long han blong Jeova God we i stap tingbaot yumi oltaem. Bigfala lav we yumi gat long hem i mas pusum yumi blong mekem wok blong hem, nao bambae yumi pruvum se Setan i stap giaman nomo. Olsem nao, bambae yumi mekem hat blong Jeova i glad tumas.—Ol Proveb 27:11.
Jeova i Lukaot Rod Oltaem Blong Halpem Yumi
4, 5. (a) ?Jeova we i defren olgeta long Setan, i stap lukaot wanem long ol man? (b) ?Sipos yumi wantem we Jeova i glad long yumi, yumi mas mekem wanem?
4 Setan i stap wokbaot long wol blong lukaot ol man we hem i save agensem olgeta mo spolem olgeta. (Job 1:7, 9; 1 Pita 5:8) Be Jeova i defren. Hem i stap lukaot olgeta we oli nidim paoa, nao hem i halpem olgeta. Profet Hanani i talem long King Asa se: “Oltaem, Hae God i stap luklukgud long olgeta samting long wol ya, blong i save givim paoa long ol man we oli ona long hem long olgeta tingting blong olgeta.” (2 Kronikel 16:9) !Tru ya, fasin blong Setan blong no laekem ol man mo traem faenem rong long olgeta i defren long bigfala lav blong Jeova we i tingbaot yumi oltaem!
5 Jeova i no stap lukluk yumi blong traem faenem evri rong no slak fasin blong yumi. Nogat. Man we i raetem Ol Sam i talem long Jeova se: “?Sipos yu yu stap raetemdaon ol sin blong mifala, hu bambae i save stanap long fes blong yu, we yu yu no save jajem hem?” (Ol Sam 130:3) Yumi save se bambae i no gat wan man i save stanap. (Prija 7:20) Sipos yumi kam klosap long Jeova wetem fulhat blong yumi, bambae hem i no lukluk yumi blong faenem wan poen blong jajem yumi from. Be bambae hem i lukluk ol traehad blong yumi mo bambae hem i ansa long ol prea blong yumi taem yumi askem hem blong halpem mo fogivim yumi. Aposol Pita i raetem se: “Hae God i stap lukluk long ol stret man, mo i stap lesin blong harem ol prea blong olgeta. Be hem i stap agensem olgeta we oli stap mekem ol rabis fasin.”—1 Pita 3:12.
6. ?Olsem wanem stori blong Deved i mekem yumi harem gud be i givim woning long yumi tu?
6 Deved i no stret gud olgeta, hem i mekem bigfala sin. (2 Samuel 12:7-9) Be hem i kam klosap long Jeova long prea, mo hem i talemaot evri samting we i stap long hat blong hem. (Ol Sam 51:1-12, smol stamba tok long stat blong Sam ya) Jeova i harem prea blong Deved mo i fogivim hem, be i no blokem ol nogud frut we Deved i kasem from sin blong hem. (2 Samuel 12:10-14) Samting ya i mekem yumi harem gud be i givim wan woning long yumi tu. Yumi harem gud blong save se Jeova i rere blong fogivim yumi sipos yumi rili tanem tingting blong yumi from sin we yumi mekem. Be yumi mas tingbaot woning ya se yumi save kasem plante nogud frut from sin blong yumi. (Galesia 6:7-9) Sipos yumi wantem kam klosap long Jeova, yumi mas stap longwe long olgeta samting we hem i no laekem.—Ol Sam 97:10.
Jeova i Pulum Ol Man Blong Hem Oli Kam Long Hem
7. ?Jeova i stap lukluk long wanem kaen man, mo olsem wanem hem i pulum ol man ya oli kam long hem?
7 Deved i raetem wan Sam we i talem se: “Nating we yu yu hae olsem, oltaem yu stap lukaot gud long ol man we tingting blong olgeta i stap daon. Be ol praod man oli no save haed long fes blong yu.” (Ol Sam 138:6) Wan narafala Sam i talem samting we i klosap sem mak, i se: “Hae God i God blong yumi, mo i no gat man we i olsem hem. Hem i King, i stap sidaon long bigfala jea blong hem long ples blong hem antap, be hem i glad blong lukluk i kamdaon long skae mo graon. Hem i stap leftemap ol puaman, i stap tekemaot olgeta long ol trabol blong olgeta.” (Ol Sam 113:5-7) Yes, Bigman we i Wokem heven mo wol mo i gat olgeta paoa, i glad blong lukluk i kamdaon long wol ya. Hem i stap lukluk long “ol puaman,” olgeta we oli “trabol,” hemia ol man we “oli stap harem nogud from ol samting nogud ya we ol narafala man ya oli stap mekem.” (Esikel 9:4) Hem i yusum Pikinini blong hem blong pulum ol man ya oli kam long Hem. Taem Jisas i stap long wol, hem i talem se: “I no gat man i save kam long mi, sipos Papa blong mi we i sanem mi mi kam, hem i no pulum hem i kam. . . . I no gat man i save kam long mi, sipos Papa blong mi i no openem rod long hem.”—Jon 6:44, 65.
8, 9. (a) ?From wanem yumi evriwan i mas kam long Jisas? (b) ?From wanem ransom sakrefaes i nambawan tumas?
8 Taem ol man oli bon, oli sinman finis mo oli stap longwe long God. Taswe, oli mas kam long Jisas mo bilif long ransom sakrefaes blong hem. (Jon 3:36) Oli nidim blong fren wetem God. (2 Korin 5:20) God i no wet long ol sinman blong askem long hem blong mekem rod blong oli save gat pis wetem hem. Nogat. Aposol Pol i raetem se: “God i lavem yumi tumas, mo i soemaot samting ya long yumi long fasin ya we Kraes i ded blong sevem yumi, long taem ya we yumi stap mekem i nogud yet. . . . Fastaem yumi ol enemi blong hem, be from we Pikinini blong hem i ded, hem i mekem yumi kam ol fren blong hem. Mo naoia, we yumi kam fren blong hem finis, i klia moa, se from we Kraes i laef, bambae God i sevem yumi.”—Rom 5:8, 10.
9 Aposol Jon i tokbaot nambawan trutok ya se God i stap pulum ol man oli kam fren blong hem, i se: “God i gat wan pikinini nomo blong hem, be hem i sanem hem i kam long wol ya, blong i mekem rod blong yumi, blong yumi kasem laef. Long samting ya nao, God i soemaot fasin blong hem blong lavem yumi. Stamba blong fasin ya i no we yumi lavem God, be we God i lavem yumi, nao i sanem Pikinini blong hem, blong i ded blong mekem rod blong God i tekemaot ol sin blong yumi.” (1 Jon 4:9, 10) God nao i mekem faswan samting, i no ol man. ?Yu yu no harem se yu wantem kam klosap long God ya we i soemaot bigfala lav long ol man “nogud,” taem oli “enemi” blong hem yet?—Jon 3:16.
Yumi Nidim Blong Lukaot Jeova
10, 11. (a) ?Yumi mas mekem wanem blong lukaot Jeova? (b) ?Wanem tingting we yumi mas gat long saed blong wol blong Setan?
10 Yumi save finis se Jeova i no fosem yumi blong kam long hem. Yumi mas lukaot hem, “blong yumi save faenem hem. I olsem we man i stap pusum han blong hem i go olbaot, blong faenem wan samting. Be i tru we God ya i no stap longwe long yumi nating.” (Ol Wok 17:27) Yumi mas luksave se Jeova i gat raet blong talem long yumi blong stap daon aninit long han blong hem. Disaepol Jemes i raetem se: “Yufala i mas putum yufala i stap daon, aninit long han blong God. Yufala i mas blokem Setan, nao hem bambae i ronwe long yufala. Yufala i mas stap klosap long God, nao hem bambae i kam stap klosap long yufala. Yufala i man nogud, yufala i mas wasem han blong yufala. Yufala we i gat tu fes yufala i mas mekem tingting blong yufala i klin.” (Jemes 4:7, 8) Yumi no mas fraet blong stanap strong agensem Setan mo tekem saed blong Jeova.
11 Hemia i min se yumi mas stap longwe long ol rabis fasin blong wol blong Setan. Bakegen Jemes i raetem se: “?Yufala i no save se man we i wantem tumas ol fasin blong wol, hem i kam enemi blong God? Taem yufala i wantem tumas ol fasin blong wol, be semtaem nomo yufala i kam enemi blong God.” (Jemes 4:4) Taswe, sipos yumi wantem kam fren blong Jeova, yumi mas save se wol blong Setan bambae i no laekem yumi.—Jon 15:19; 1 Jon 3:13.
12. (a) ?Deved i raetem wanem tok we i mekem yumi harem gud? (b) ?Jeova i yusum profet Asaria blong givim wanem woning?
12 Taem wol blong Setan i agensem yumi, long taem ya nao yumi nidim moa blong kam klosap long Jeova long prea mo askem hem blong givhan long yumi. Deved i luk we han blong Jeova i sevem hem plante taem, nao hem i raetem tok ya we i mekem yumi harem gud i se: “Oltaem [“Jeova,” NW ] i stap klosap long olgeta we oli stap krae i go long hem, we hemia olgeta ya we oli wantem tru blong hem i givhan long olgeta. Olgeta we oli stap ona long hem, oltaem hem i stap givim ol samting long olgeta we oli sot long hem, oltaem hem i stap harem krae blong olgeta, mo i stap sevem olgeta. Oltaem hem i stap lukaot gud long olgeta, we oli lavem hem, be bambae hem i spolem olgeta we oli stap mekem ol fasin nogud.” (Ol Sam 145:18—20) Vas ya i soemaot se taem yumi wanwan i kasem traem, Jeova i save sevem yumi, mo se bambae Jeova i sevem ol man blong hem olsem wan grup tu, long taem blong “bigfala trabol.” (Revelesen 7:14) Jeova bambae i stap klosap long yumi, sipos yumi stap klosap long hem. “Spirit blong God” i kam long profet Asaria, nao hem i talemaot wan trutok we i stret long yumi evriwan, i se: “Sipos yufala i stap obei long Hae God, hem bambae i save stap wetem yufala oltaem nomo. Sipos yufala i stap lukaot hem, bambae hem i save mekem we yufala i faenem hem, be sipos yufala i gowe long hem, bambae hem i lego yufala tu.”—2 Kronikel 15:1, 2.
Jeova i Mas Wan Trufala Man Long Tingting Blong Yumi
13. ?Olsem wanem yumi save soemaot se yumi tingbaot Jeova olsem wan trufala man?
13 Aposol Pol i tokbaot Moses se hem “i stap gohed olwe nomo, olsem we i stap luk God ya we man i no save luk long ae blong hem.” (Hibrus 11:27) I tru se Moses i neva luk Jeova wetem prapa ae blong hem. (Eksodas 33:20) Be i olsem we Moses i stap luk Jeova, from we Jeova i wan trufala man long tingting blong Moses. Job tu, afta we hem i winim ol traem we oli kasem hem, i olsem we hem i luk Jeova. Bilif i mekem hem i luksave klia se Jeova i save letem ol traem oli kasem ol gudfala man blong hem, be bambae hem i no save lego olgeta. (Job 42:5) Baebol i tokbaot Inok mo Noa tu se tufala i ‘wokbaot wetem God.’ Tufala i mekem olsemia taem tufala i traehad blong mekem God i glad mo obei long hem. (Jenesis 5:22-24, NW; 6:9, 22; Hibrus 11:5, 7) Sipos yumi olsem Inok, Noa, Job mo Moses, we oli tingbaot Jeova olsem wan trufala man, bambae yumi “lesin long hem” oltaem, nao bambae hem i “mekem ol rod blong yu oli stret.”—Ol Proveb 3:5, 6, NW.
14. ?I minim wanem se ‘tingting i mas strong oltaem’ long Jeova?
14 Jes bifo we ol man Isrel oli kasem Promes Lan, Moses i givim advaes ya long olgeta se: “Oltaem bambae yufala i mas biaen long [“Jeova,” NW ] nomo, mo yufala i mas ona long hem, yufala i mas obei long hem, mo yufala i mas holem ol tok blong hem. Yufala i mas mekem wosip long hem, mo tingting blong yufala i mas strong long hem oltaem.” (Dutronome 13:4) Olgeta ya oli mas biaen long Jeova, ona long hem, obei long hem, mo tingting blong olgeta i mas strong long hem oltaem. Wan man blong stadi dip long Baebol i talem se tok ya we oli tanem i kam ‘tingting i mas strong long hem oltaem,’ i minim “stap klosap long hem mo fren gud wetem hem oltaem.” Man blong raetem Sam i tokbaot God se: “Yu yu fren blong olgeta we oli stap obei long yu.” (Ol Sam 25:14) Bambae yumi fren long nambawan fasin wetem Jeova, sipos hem i wan trufala man long tingting blong yumi, mo sipos yumi lavem hem tumas we yumi fraet blong mekem samting we hem i no glad long hem.—Ol Sam 19:9-14.
?Yu Yu Luksave Se Jeova i Stap Tingbaot Yu?
15, 16. (a) ?Olsem wanem Ol Sam 34 i soemaot se Jeova i stap tingbaot yumi oltaem? (b) ?Sipos yumi no save tingbaot sam gudfala samting we Jeova i bin mekem blong yumi, yumi mas mekem wanem?
15 Wan long ol giaman trik blong Setan i blong traem mekem yumi bilif se God blong yumi, Jeova, i no moa stap tingbaot ol gudfala man blong hem. Deved we i king blong Isrel i luksave klia se han blong Jeova i stap blokem gud hem, antap moa, taem hem i fesem bigfala denja. Wan taem, Deved i mas giaman long King Akis long taon ya Gat, i mekem olsem we hed blong hem i kam krangke. Biaen, hem i wokem wan nambawan sing, wan naesfala vas we i soemaot bilif blong hem, i se: “Yufala i kam joen wetem mi, yumi talemaot we Hae God i hae we i hae, yumi leftemap hae nem blong hem. Mi mi prea long hem, nao hem i ansa long mi, i tekemaot mi long ol man we oli stap mekem mi mi fraet. Oltaem enjel blong hem i stap lukaot gud long olgeta we oli ona long hem, mo i stap tekemaot olgeta long trabol. Hae God, hem i gud tumas. Yufala i traem trastem hem. Bambae yufala i faenemaot we hem i tru. Olgeta we oli go long hem blong faenem sefples, oli save harem gud. Hem i stap klosap long ol man we tingting blong olgeta i kam nogud, i stap sevem ol man we tingting blong olgeta i foldaon olgeta. Man we i stret i save harem nogud long plante trabol, be Hae God i save tekemaot hem long olgeta trabol ya.”—Ol Sam 34:3, 4, 7, 8, 18, 19; 1 Samuel 21:10-15.
16 ?Yu yu bilif se Jeova i gat paoa blong sevem yu? ?Yu yu save se ol enjel blong hem oli stap lukaotgud long yu? ?I gat wan taem we yu yu bin trastem Jeova nao yu luk se hem i gud tumas? ?Yu save tingtingbak long laswan taem we yu luksave se Jeova i mekem i gud long yu? Traem tingbaot bakegen. ?Ating hem i mekem olsem long laswan haos we yu bin prij long hem, taem yu yu harem se yu stap long laswan paoa blong yu? Ating long haos ya, yu bin faenem wan man we i laekem trutok mo yu storian gud wetem hem. ?Yu bin tingbaot blong talem tangkiu long Jeova from we hem i givim paoa we yu yu sot long hem mo from blesing we hem i givim long yu? (2 Korin 4:7) Maet yu no save tingbaot wan stret taem we yu bin luk se Jeova i mekem wan gudfala samting long yu. Maet yu mas tingting i gobak wan wik, wan manis, wan yia, no bifo long taem ya. Sipos i olsem, i gud yu traehad moa blong kam klosap long Jeova mo traem luksave olsem wanem hem i stap lidim yu mo soemaot rod long yu. Aposol Pita i talem long ol Kristin se: “God i gat paoa, mo yufala i mas putum yufala i stap daon, aninit long han blong hem. . . . Yufala we i stap wari tumas, yufala i mas putum ol trabol blong yufala long han blong hem, from we oltaem hem i stap tingbaot yufala.” (1 Pita 5:6, 7) !Tru ya, bambae yu sapraes taem yu luk we Jeova i stap tingbaot yu tumas!—Ol Sam 73:28.
Gohed Blong Lukaot Jeova
17. ?Yumi mas mekem wanem blong gohed blong lukaot Jeova?
17 Yumi mas gohed oltaem blong fren wetem Jeova. Jisas i prea long Papa blong hem i se: “Mo laef ya [we i no save finis], hem i min se man i save yu, we yu nomo yu tru God, mo i save mi, se mi, Jisas Kraes, we yu yu sanem mi mi kam.” (Jon 17:3) Blong save Jeova mo Pikinini blong hem, i nidim we yumi traehad oltaem. Yumi nidim blong prea mo yumi nidim tabu spirit blong givhan long yumi blong kasem save long “ol tingting blong God we man i no save faenemaot.” (1 Korin 2:10; Luk 11:13) Mo tu, yumi nidim “slef ya we i stret mo waes” blong lidim yumi mo fulumap tingting blong yumi wetem kakae long saed blong spirit “long stret taem blong hem.” (Matiu 24:45, NW ) Slef ya nao we Jeova i stap yusum blong givim advaes long yumi se yumi mas ridim Tok blong Hem evri dei, yumi mas go long olgeta Kristin miting, mo yumi mas joen wetem fulhat blong yumi long wok blong talemaot “gud nius blong Kingdom.” (Matiu 24:14, NW ) Sipos yumi mekem ol samting ya, bambae yumi gohed blong lukaot God blong yumi, Jeova, we i stap tingbaot yumi oltaem.
18, 19. (a) ?Yumi mas gat strong tingting blong mekem wanem? (b) ?Sipos yumi strong blong agensem Setan mo gohed blong lukaot Jeova, bambae yumi kasem wanem blesing?
18 Setan i stap yusum fulpaoa blong hem mo ol defdefren rod, blong mekem trabol long ol man blong Jeova, mo blong agensem olgeta mo traem olgeta. Hem i stap traehad blong spolem pis blong yumi mo mekem se God i no moa laekem yumi. Hem i no wantem se yumi gohed long wok ya blong faenem ol man we hat blong olgeta i stret, mo givhan long olgeta blong kamaot long rul blong Setan mo kam aninit long rul blong Jeova. Be, yumi mas gat strong tingting blong stap tru long Jeova, mo trastem hem se bambae hem i sevem yumi long han blong rabis man ya Setan. Sipos yumi letem Tok blong God i lidim yumi mo yumi wok strong wetem ogenaesesen blong God long wol ya, yumi save sua se bambae hem i stap olwe blong givhan long yumi.—Aesea 41:8-13.
19 Taswe, yumi evriwan i mas stanap strong agensem Setan mo ol giaman trik blong hem, mo oltaem yumi mas lukaot gudfala God blong yumi Jeova, we hem i sua blong ‘mekem yumi strong mo givim paoa long yumi.’ (1 Pita 5:8-11) Sipos yumi folem rod ya, oltaem bambae ‘yumi save se God i stap lavem yumi, mo oltaem yumi luk long Jisas Kraes, Masta blong yumi, blong hem bambae i gat sore long yumi, mo i givim laef long yumi we i no save finis.’—Jud 21.
?Bambae Yu Yu Ansa Olsem Wanem?
• ?Tok ya “Devel” i minim wanem, mo olsem wanem tok ya i stret long Setan?
• ?Olsem wanem tingting blong Jeova i defren long Setan taem Hem i lukluk ol man blong wol ya?
• ?From wanem man i mas bilif long ransom sipos hem i wantem kam long Jeova?
• ?I minim wanem se ‘tingting i mas strong oltaem’ long Jeova, mo olsem wanem yumi save gohed blong lukaot hem?
[Kwestin]
[Tok blong pija long pej 15]
Nating se plante trabol i traem Job, be hem i luksave se Jeova i stap tingbaot hem
[Tok blong pija long pej 16]
Sipos yumi ridim Baebol evri dei, go long olgeta Kristin miting, mo gohed strong blong prij, ol samting ya bambae oli mekem yumi luksave se Jeova i stap tingbaot yumi