Wan Kwestin

?Sipos yumi pem bilding blong wan narafala skul blong yusum olsem wan Haos Kingdom, hemia i min se yumi joen wetem ol narafala skul?

Ol Witnes blong Jeova oli traem blong no mekem bisnes olsemia wetem ol narafala skul. Be sipos oli mas mekem bisnes, i no min se oli stap joen wetem ol narafala skul. Hem i wan bisnes we oli mekem wan taem nomo. Kongregesen blong ol Witnes blong Jeova i no stap wok wetem ol narafala skul blong bildim wan ples blong wosip, we bambae tufala tugeta i save yusum blong mekem wosip blong hem.

?Wanem samting nao we, long lukluk blong Jeova, i olsem se man blong hem i stap joen wetem ol narafala skul? Traem tingbaot advaes blong aposol Pol. Hem i talem se: “Bambae yufala i no go joen wetem ol man we oli no Kristin, blong mekem wan wok, olsem we man i putum yok long tufala buluk blong mekem tufala i wok wanples. Fasin ya i no save wok. Stret fasin mo rabis fasin, tufala i no save joen nating, mo delaet mo tudak, tufala i no save stap wanples. Mo long sem fasin, Kraes mo Setan, tufala i no save agri samtaem. Man we i bilif mo man we i no bilif, tufala i no save joen long wan tingting. Mo haos blong God i no save gat ples blong ol narafala god insaed long hem. God . . . i talem se, ‘From samting ya, yufala i mas gowe long olgeta, yufala i mas stap yufala nomo, mo olgeta oli mas stap olgeta nomo. Yufala i no save tajem ol samting ya we oli no klin long fes blong mi, nao bambae mi mi glad blong tekem yufala.’ ” (2 Korin 6:14-17) ?Pol i minim wanem taem hem i talem se yumi no mas “joen” mo “stap wanples” wetem olgeta?

Fasin joen we Pol i tokbaot, hem i long saed blong wosip, mo ol wok we oli joen long wosip blong yumi. Wan Kristin i no mas joen wetem ol man we oli wosipim aedol, mo we oli no bilif olsem olgeta. Pol i givim woning ya long ol Kristin long Korin se oli no save “sidaon blong kakae . . . long tebol blong ol devel.” (1 Korin 10:20, 21) Taswe, ol Kristin oli stap joen wetem narafala skul, sipos oli wosip tugeta, no sipos oli joen tugeta long ol semfala wok long wosip blong olgeta. (Eksodas 20:5; 23:13; 34:12) Taem ol Witnes oli pem wan bilding we, bifo, wan narafala skul i bin yusum olsem ples blong wosip, ol Witnes oli pem bilding ya nomo. Bambae oli yusum bilding ya nao olsem Haos Kingdom. Be bifo we oli yusum bilding ya, oli karemaot olgeta samting blong giaman wosip we i stap long hem. Taem haos ya i rere finis, oli dediketem hem i go long Jeova mo bambae oli yusum haos ya blong wosipim Jeova nomo. Trufala wosip i no save joen no meks wetem giaman wosip.

Taem ol Witnes oli toktok wetem ol man blong wan skul we i salem bilding blong hem, oli tokbaot bisnes nomo. Oli no storebaot wan narafala samting. I gud ol memba blong Kristin kongregesen oli stap tingbaot advaes blong Pol se oli no mas “go joen wetem ol man we oli no Kristin, blong mekem wan wok, olsem we man i putum yok long tufala buluk blong mekem tufala i wok wanples.” Yumi no tingting se yumi hae moa i bitim ol narafala skul. Be, yumi no wantem joen blong kampani wetem olgeta no tekpat long wosip blong olgeta. *

?Olsem wanem sipos wan kongregesen i wantem rentem bilding we i blong wan jos? Sipos oli rentem bilding ya, hemia i min se bambae oli mas luk ona blong haos ya plante taem. Mo samting ya i no gud tumas. Nating se kongregesen i wantem rentem bilding ya jes wan taem nomo, be ol elda oli mas tingbaot ol kwestin olsem: ?Bambae i gat sam aedol no ol samting blong jos ya i stap insaed no afsaed long bilding? ?Sipos mifala i yusum bilding ya, bambae ol man blong komuniti oli tingting wanem? ?I gat sam memba blong kongregesen we maet oli save foldaon from samting ya? (Matiu 18:6; 1 Korin 8:7-13) Ol elda oli mas skelemgud ol samting ya, mo biaen oli save tekem wan disisen we i stret. Bifo we oli pem wan bilding olsem blong mekem wan Haos Kingdom, oli mas meksua se tingting blong olgeta mo blong kongregesen tu bambae i no jajem olgeta from.

[Futnot]

[Tok blong pija long pej 27]

Oli pem bilding ya, we i wan haos prea blong ol man jiu bifo, mo oli jenisim blong mekem wan Haos Kingdom