“Yufala i Mas Blokem Setan”

“Yufala i mas blokem Setan, nao hem bambae i ronwe long yufala.”—JEMES 4:7.

1. ?Yumi save talem wanem long saed blong wol blong yumi, mo from wanem ol tabu man blong God mo ol fren blong olgeta oli mas stap wekap gud?

 “GOD i lus finis, be Setan i stap yet.” Hemia tok blong wan Franis man we i raetem ol buk, nem blong hem André Malraux. Maet yumi talem se tok ya i tru long saed blong wol blong yumi. I luk olsem we ol man oli foldaon long ol trik blong Setan, bitim we oli mekem samting we God i wantem. Blong lidim ol man oli go krangke, Setan i stap ‘wokem ol naranarafala merikel mo giaman saen mo ol samting blong sapraes. Hem i yusum evrikaen trik we oli no stret, blong i giaman long ol man ya we oli blong lus.’ (2 Tesalonaeka 2:9, 10) Be, long “ol las dei” ya, Setan i wantem moa blong trikim ol man we oli givim laef blong olgeta i go long God finis. Hem i stap faet agensem ol tabu Kristin “we oli stap obei long ol tok blong God, mo we oli stap holem ol tok we Jisas i talemaot se i tru.” (2 Timoti 3:1, NW; Revelesen 12:9, 17) Ol tabu man ya blong God wetem ol fren blong olgeta we bambae oli kasem laef long wol ya, oli mas stap wekap gud.

2. ?Olsem wanem Setan i giaman long Iv, mo aposol Pol i fraet long wanem samting?

² Setan i wan man blong giaman stret. Hem i bin yusum wan snek blong trikim Iv, i givim tingting long Iv se hem i save glad moa sipos i no lesin long God be i folem prapa tingting blong hem. (Jenesis 3:1-6) Klosap fo taosen yia biaen, aposol Pol i talem se hem i fraet we sam tabu Kristin long Korin bambae oli foldaon long ol trik blong Setan. Pol i raetem se: “Mi mi fraet se bambae tingting blong yufala i gorong, nao bambae yufala i foldaon olsem we fas woman ya Iv i foldaon fastaem, we snek i giaman long hem long ol giaman toktok blong hem. Mi fraet se bambae yufala i lego gudfala fasin ya blong yufala, we yufala i stap lavem Kraes tumas long fasin we i stret mo i klin gud.” (2 Korin 11:3) Setan i save mekem tingting blong man i gorong, i no moa stret. Hem i save giaman long ol Kristin olsem we hem i bin giaman long Iv. Hem i save mekem se oli no moa tingting gud mo skelem gud ol samting, nao oli save mekem wan samting we oli ting se bambae i givim glad long olgeta, nating se Jeova mo Pikinini blong hem i agensem samting ya.

3. ?Wanem help we Jeova i stap givim blong blokem Setan?

³ Setan i olsem wan man we i stap putum trap blong kasem ol pijin. Blong no foldaon long ol trap blong Setan, yumi mas stap long “ples haed blong Hae God.” Hemia i minim fasin blong Jeova blong lukaotgud long olgeta we oli agri mo obei long hae rul blong hem, mo we oli soemaot samting ya long ol wok blong olgeta. (Ol Sam 91:1-3, NW ) God i stap yusum Tok blong hem, spirit blong hem, mo ogenaesesen blong hem, blong lukaotgud long yumi.  Yumi nidim help ya, blong ‘bambae yumi save stanap strong taem Setan i stap wokem ol giaman trik blong hem.’ (Efesas 6:11) I tru tumas se Setan i stap yusum plante trik no giaman wok blong traem mekem ol man blong Jeova oli foldaon long ol trap blong hem.

Ol Trap We Setan i Yusum Blong Kasem Ol Faswan Kristin

4. ?Ples we ol faswan Kristin oli stap long hem i olsem wanem?

⁴ Ol Kristin we oli laef long ol yia 100 K.T. kasem 200 K.T., oli stap long wan taem we paoa blong Rom i kasem fulmak blong hem. Pax Romana (Pis blong Rom) i mekem se plante bigfala bisnes oli kam antap. Bigfala mane we ol rula oli gat i mekem se oli gat plante taem blong spel. Mo oli meksua se ol man we oli stap aninit long rul blong olgeta oli pleplei plante, olsem nao bambae oli no save girap agensem gavman. Long sam yia, namba blong ol holide i klosap sem mak long namba blong ol dei we ol man oli wok. Ol lida oli yusum mane blong gavman blong givim bred long ol man, mo blong mekem plante so mo pleplei we ol man oli save wajem. Olsem nao, oli fulumap bel blong olgeta mo tingting blong olgeta tu.

5, 6. (a) ?From wanem i no stret we ol Kristin oli go long ol plei mo ol bigfala stad long Rom? (b) ?Setan i yusum wanem trik long taem bifo, mo ol Kristin oli mas mekem wanem blong oli no foldaon long trik ya?

⁵ ?Ol samting ya i save mekem trabol long ol faswan Kristin? From ol woning we ol man olsem Tertullian oli raetem afta we ol aposol oli ded, i luk olsem se bighaf blong ol pleplei long taem ya oli save spolem bilif blong ol trufala Kristin mo pulum olgeta blong mekem rabis fasin long saed blong seks. Wan samting se, plante lafet mo spot we ol man oli bin joen long olgeta, oli blong ona long ol god blong ol hiten man. (2 Korin 6:14-18) Plante long ol plei, nating se oli soem fasin blong laef blong bifo, be oli fulap long rabis fasin blong seks mo oli raf bitim mak. Sloslo ol man oli no moa laekem ol plei ya we oli soem fasin blong laef blong bifo, ale ol man oli wokem ol niufala plei we oli rabis. Long ol plei ya, ol man oli mekem aksin be oli no toktok. Wan man blong raetem histri, Jérôme Carcopino, i talem long buk blong hem, Daily Life in Ancient Rome se: “Long ol plei ya, oli givim raet long ol woman we oli plei blong tekemaot klos blong olgeta . . . Mo tu, i gat plante raf fasin blong mekem fulap blad i ron. . . . [Ol plei we man i mekem aksin be i no toktok] oli soemaot klia ol doti fasin we oli stap bos long laef blong ol man long bigfala taon ya. Ol man ya oli no harem nogud long ol doti plei ya, from we longtaem finis i kam, oli stap go long ol bigfala stad blong lukluk ol pleplei we oli raf bitim mak mo we fulap blad i ron, nao ol filing blong olgeta oli ded finis, oli no moa haremsave se ol fasin ya oli nogud.”—Matiu 5:27, 28.

⁶ Ol man ya oli bin go long ol bigfala stad blong lukluk ol faet. Maet tu man oli faet gogo wan long tufala i ded, no maet wan man i faetem wael anamol gogo wan long tufala i ded. Long ples ya, oli givim panis blong ded long plante man blong brekem loa, oli sakem olgeta oli go long ol wael anamol blong oli kakae olgeta. Biaen, oli mekem sem fasin long sam Kristin. Nating se ol samting ya i kamaot longtaem bifo, be trik blong Setan long taem ya i blong mekem se ol man oli no moa sek long ol rabis fasin blong seks mo raf fasin, nao sloslo oli save kam we oli laekem mo oli wantem tumas ol fasin ya. Wan rod nomo blong no foldaon long trap ya, i blong no go nating long ol plei mo ol bigfala stad ya.—1 Korin 15:32, 33.

7, 8. (a) ?From wanem wan Kristin long taem bifo i no waes sipos hem i go long ol ples we oli mekem ol resis blong kat mo hos? (b) ?Olsem wanem maet Setan i bin yusum ol ples blong swim long Rom olsem wan trap blong ol Kristin?

 ⁷ Long taem bifo, oli mekem ol resis wetem ol kat we hos i pulum, long ol stad. Ol man oli harem gud blong lukluk ol resis ya. Be plante taem i gat faet i kamaot, taswe i no stret blong ol Kristin oli go long ol ples ya. Wan man blong raetem ol buk long ol yia 200 K.T., i talem se sam man we oli lukluk ol resis ya oli kam kros mo oli faet. Mo tu, Carcopino i talem se, “i gat ol man we oli lukluk sta blong talemaot fiuja mo i gat ol woman blong rod we oli stap mekem bisnes blong olgeta” long ol stad ya. I klia se ples ya i no wan stret ples blong ol Kristin oli kam long hem.—1 Korin 6:9, 10.

⁸ ?Olsem wanem long ol ples blong swim long Rom we ol man long olgeta ples blong wol oli save gud long olgeta? I tru se i no rong blong swim blong mekem bodi i klin. Be ol ples blong swim long Rom oli ol bigbigfala ples, we insaed long olgeta i gat ol defdefren rum olsem rum we man i save go long hem blong oli holem bodi blong hem mo ravem oel long hem, rum blong mekem spot, rum blong plei laki, mo ol ples blong kakae mo dring. Oli putum wan stret taem blong ol woman oli swim mo wan stret taem blong ol man oli swim, be plante taem oli letem ol man mo woman oli swim wanples nomo. Man ya Clement blong Alexandria i raetem se: “Oli openem doa blong ol man mo ol woman tugeta. Olgeta ya oli swim neked nomo blong oli save mekem ol doti fasin mo rabis fasin long saed blong seks.” Yes, Setan i yusum wan ples we i luk olsem wan gudfala ples nomo, olsem wan trap blong kasem ol Kristin. Taswe, ol Kristin we oli waes oli no go long ol ples olsem.

9. ?Ol faswan Kristin oli mas lukaot gud blong no foldaon long wanem trap?

⁹ Taem paoa blong Rom i kasem fulmak blong hem, ol man long ples ya oli laekem tumas blong plei laki. Oli plei laki blong winim mane long ol resis blong kat mo hos. Ol Kristin we oli no wantem se plei laki i pulum olgeta, oli mas stap longwe long ol ples we oli mekem ol resis ya. Mo tu, ol man oli plei laki long ol rum biaen long ol hotel mo ol ples blong kakae. Ol man blong plei oli winim mane taem oli talem hamas smol ston no hamas smol bun blong anamol we narafala man blong plei i haedem long han blong hem. Plei laki i givim glad long ol man, from we oli gat janis blong kasem mane long rod we i isi mo we oli no nid blong wok from. (Efesas 5:5) Plante woman we oli wok long bambae long ol ples olsem, oli woman blong rod. Hemia i mekem se ol man we oli go long ol ples ya oli save foldaon long rabis fasin blong seks. Hemia nao ol trap we Setan i putum blong kasem ol Kristin long ol taon we gavman blong Rom i rul long olgeta. ?Olsem wanem? ?Ol samting i defren tede?

 Ol Trap Blong Setan Tede

10. ?Olsem wanem wol ya tede i sem mak long wol long taem we gavman blong Rom i rul?

¹⁰ Bighaf blong ol trik blong Setan oli no jenis long ol handred yia we oli pas. Blong mekem se ‘Setan i no winim’ ol Kristin we oli stap long rabis taon ya Korin, aposol Pol i givim strong advaes long olgeta, i se: “Yumi savegud ol plan blong Setan.” (2 Korin 2:11) Long plante rij kantri tede, laef blong ol man i sem mak long laef blong ol man bifo, taem Rom i gat bigfala paoa. Naoia ol man oli gat moa taem blong spel i bitim ol yia bifo. Ol tikit blong lotri oli givim janis long ol puaman blong winim mane. I gat plante pleplei mo sinema we oli no sas, blong fulumap tingting blong ol man. Ol stadium blong spot oli fulap gud, oli plei laki long ol ples ya, ol faet oli kamaot, mo ol man blong plei spot tu oli faet. Ol man tede oli stap lesin long ol rabis miusik, mo ol plei mo stori long ol sinema mo televisin, oli fulap long ol doti fasin. Long sam kantri, ol man mo woman tugeta oli swim long ol ples we i gat hot springwota. Long sam ples klosap long solwota, ol man mo woman oli wokbaot neked long sanbij mo swim neked. Yes, tede ol samting i sem mak long ol samting long taem blong ol faswan Kristin. Setan i stap yusum ol pleplei blong wol blong pulum ol man blong God.

11. ?Wanem ol trap we oli joen wetem spel mo pleplei?

¹¹ From we i gat plante wari long laef tede, i stret nomo we yumi harem se yumi mas spel mo pleplei smol. Long Rom bifo, ol samting we oli stap long ol ples blong swim, oli denja long ol faswan Kristin. Tede tu, Setan i stap yusum sam ples blong spel mo sam hotel olsem wan trap blong lidim ol Kristin blong mekem rabis fasin long saed blong seks mo blong dring bitim mak. Pol i raet long ol Kristin long Korin se: “Yufala i no go krangke. Wan man blong bifo i talem se, ‘Ol stret man nomo, be ol fren blong olgeta we oli no stret, oli save spolem fasin blong olgeta.’ Yufala i mas stretem tingting blong yufala, mo yufala i mas lego ol sin blong yufala. I gat sam long yufala we oli no save God nating.”—1 Korin 15:33, 34.

12. ?Wanem sam trik we Setan i stap yusum blong mekem ol man blong Jeova oli foldaon tede?

¹² Yumi luk finis we Setan i giaman long Iv blong mekem tingting blong hem i gorong. (2 Korin 11:3) Tede tu, Setan i yusum semfala trap. Hem i wantem mekem ol Kristin oli ting se sipos oli joen smol long wol, ol narafala man bambae oli no moa ting se oli narakaen, bambae oli ting se ol Witnes blong Jeova oli sem mak long olgeta, ale maet samting ya i pulum olgeta blong bilif long trutok. Be sam Kristin we oli tingting olsemia, oli joen long wol gogo oli bitim mak, nao oli luk se defren frut i kamaot. (Hagae 2:12-14) Wan narafala trik blong Setan i blong pulum sam yangfala mo sam olfala Kristin tu we oli givim laef blong olgeta i go long Jeova finis, blong oli gat fasin tu fes, ale long rod ya oli ‘mekem tabu spirit blong God i harem nogud.’ (Efesas 4:30) Samfala oli foldaon long trap ya taem oli stap lukluk ol rabis samting long Internet.

13. ?Wanem trap we i haed i olsem wan giaman wok blong Setan, mo wanem advaes long Ol Proveb i stret long saed ya?

¹³ Wan narafala trap blong Setan, hemia wok blong ol rabis spirit we i haed. I no gat wan trufala Kristin we bambae i minim blong joen long wok blong Setan mo ol rabis spirit. Be samfala oli no moa lukaotgud, ale oli jusum ol video kaset, ol stori long televisin, ol video gem, wetem ol stori buk mo komik buk blong pikinini, we oli tokbaot mo soem ol raf fasin mo wok blong ol rabis spirit. Yumi mas stap longwe long eni samting we i joen wetem wok blong Setan mo ol rabis spirit, nating se i joen smol nomo. Wan waes proveb i talem se: “Sipos yu wantem laef blong yu i stap gud, yu mas ronwe long ol trap ya long rod, we ol man nogud oli stap foldaon long hem.” (Ol Proveb 22:5) Setan i “rabis god blong wol ya.” Taswe, Setan i save haedem ol trap blong hem long eni samting we ol man blong wol oli laekem tumas.—2 Korin 4:4; 1 Jon 2:15, 16.

Jisas i Agensem Setan

14. ?Olsem wanem Jisas i winim faswan traem blong Setan?

¹⁴ Jisas i givim nambawan eksampol olsem wanem blong agensem Setan blong mekem hem i gowe long yumi. Afta we Jisas i baptaes, hem i no kakae blong 40 dei. Long taem ya nao, Setan i traem hem. (Matiu 4:1-11) From we Jisas i no kakae blong plante dei, hem i hanggri. Setan i yusum filing ya blong hanggri blong traem winim hem. Hem i talem long Jisas blong mekem faswan merikel blong hem, blong kasem samting we hem i wantem long saed blong bodi. Be Jisas i no wantem yusum paoa blong hem blong kasem samting we hem nomo i wantem. Hem i talem tok blong Dutronome 8:3 blong soem long Setan se hem i tinghae moa long kakae long saed blong spirit i bitim prapa kakae blong hem.

15. (a) ?Setan i traem Jisas wetem wanem samting we bodi i nidim? (b) ?Wanem wan bigfala giaman trik we Setan i stap yusum tede agensem ol man blong God, be olsem wanem yumi save blokem?

 ¹⁵ Wan samting we i pulum tingting blong yumi long saed blong traem ya, hemia se Setan i no traem pulum Jisas blong mekem rabis fasin long saed blong seks. Hem i luk se hanggri nao i samting we Jisas i harem moa long taem ya, taswe hem i yusum filing ya blong wantem kakae blong traem hem. ?Setan i stap yusum wanem tede blong pulum ol man blong God? Hem i yusum plante samting, be bigfala giaman trik we hem i stap yusum blong traem mekem ol man oli lego Jeova, hemia ol rabis fasin long saed blong seks. Sipos yumi folem fasin blong Jisas, yumi save blokem Setan mo no foldaon long ol samting we hem i yusum blong traem yumi. Jisas i winim Setan taem hem i tingting long ol vas blong Baebol we oli stret long traem we i kasem hem. Yumi tu, yumi save tingbaot ol vas olsem Jenesis 39:9 mo 1 Korin 6:18, taem rabis fasin blong seks i traem yumi.

16. (a) ?Setan i mekem wanem blong traem Jisas bakegen? (b) ?Setan i save yusum wanem samting blong pulum yumi blong traem Jeova?

¹⁶ Biaen, Setan i talem long Jisas blong stanap antap long stonwol blong haos prea mo jam i godaon. Hem i wantem traem God se bambae hem i yusum ol enjel blong hem blong lukaotgud long Jisas no nogat. Be Jisas i no wantem traem Papa blong hem, ale hem i ansa wetem tok blong Dutronome 6:16. ?Olsem wanem long yumi? Ating Setan i no save talem long yumi blong jamdaon long stonwol blong haos prea, be hem i save pulum yumi blong traem Jeova. ?Yumi stap folem ol fasin blong wol long saed blong klos mo hea, gogo klosap yumi kasem mak we oli mas stretem yumi from? ?Yumi stap joen long ol pleplei mo wajem ol sinema we klosap oli no stret blong wan man blong God i lukluk? Sipos yes, maet yumi stap traem Jeova. Sipos yumi laekem ol samting olsem, Setan bambae i no ronwe long yumi, be bambae i stap raon long yumi oltaem, mo bambae i gohed blong traem pulum yumi i kam long saed blong hem.

17. (a) ?Setan i yusum wanem bakegen blong traem Jisas? (b) ?Olsem wanem Jemes 4:7 i save kamtru long yumi?

¹⁷ Bakegen, Setan i talem long Jisas se bambae hem i givim olgeta kingdom blong wol long hem sipos i bodaon wan taem nomo long hem. Be Jisas i agensem hem bakegen, i talem wan vas blong Baebol blong ansa long hem. Jisas i strong blong gohed blong wosip long Papa blong hem nomo. (Dutronome 5:9; 6:13; 10:20) Maet Setan i no wantem givim ol kingdom blong wol long yumi. Be oltaem hem i stap yusum ol sas samting blong wol blong pulum ae blong yumi, mo maet hem i givim tingting long yumi se yumi save wokem wan smol kingdom blong yumi wan. ?Olsem wanem? ?Yumi mekem sem fasin olsem Jisas mo givim ona i go long Jeova nomo? Sipos yes, samting we i kamaot long Jisas bambae i kamaot long yumi. Matiu i raetem se: “Nao Setan i gowe long Jisas.” (Matiu 4:11) Setan bambae i gowe long yumi sipos yumi stanap strong agensem hem. Yumi mekem olsem taem yumi tingbaot ol rul blong Baebol we oli stret long traem we i kasem yumi mo taem yumi mekem ol rul ya oli wok. Disaepol Jemes i raetem se: “Yufala i mas blokem Setan, nao hem bambae i ronwe long yufala.” (Jemes 4:7) Wan Kristin brata i raet i go long hed ofis blong ol Witnes blong Jeova long Franis, i se: “Setan i rili waes blong trikim man. Nating se mi traehad fulwan, mi faenem se i no isi nating blong bos long ol filing blong mi mo ol samting we mi nomo mi wantem. Be, strong tingting, longfala tingting, mo antap moa, help we Jeova i givim, i mekem se mi mi naf blong holemstrong long Jeova mo no lego trutok.”

Yumi Gat Olgeta Samting Blong Blokem Setan

18. ?Wanem ol klos blong faet long saed blong spirit we yumi gat blong blokem Setan?

¹⁸ Jeova i givim olgeta klos blong faet long saed blong spirit we yumi nidim blong ‘stanap strong taem Setan i wokem ol giaman trik blong hem.’ (Efesas 6:11-18) Sipos yumi lavem trutok, samting ya i  save stap olsem wan strap blong fasem bel, i min se bambae i mekem we yumi rere oltaem blong joen long ol Kristin wok. Strong tingting blong folem ol rul blong Jeova long saed blong stret fasin, hem i save stap olsem wan aean klos we i blokem jes blong yumi, i protektem hat. Sipos gud nius i stap olsem sus blong yumi, bambae ol leg blong yumi oli karem yumi oltaem i go long wok blong prij, mo samting ya bambae i mekem yumi strong mo i lukaot gud long yumi long saed blong spirit. Strong bilif i save stap olsem bigfala sil blong yumi, we i blokem ‘ol ara blong Setan we faea i laet long hem,’ hemia ol trik mo traem we hem i yusum agensem yumi. Taem yumi putum tingting blong yumi i stap strong long ol promes blong Jeova, hemia i olsem wan hat blong faet, we i protektem tingting blong yumi mo i mekem tingting i stap kwaet. (Filipae 4:7) Sipos yumi gat gudhan blong yusum Tok blong God, bambae hem i olsem wan naef blong faet we i save katemaot ol rop we Setan i wokem blong holemtaet ol man long saed blong spirit. Mo tu, yumi save yusum naef ya blong protektem yumi wan, olsem Jisas i mekem taem Setan i traem hem.

19. ?Antap long wok blong “blokem Setan,” yumi mas mekem wanem bakegen?

¹⁹ Sipos yumi “putum olgeta klos blong faet ya we God i givim,” (NW ) mo yumi prea oltaem, yumi save sua se Jeova bambae i lukaotgud long yumi taem Setan i agensem yumi. (Jon 17:15; 1 Korin 10:13) Be Jemes i soemaot se i no naf we yumi “blokem Setan” nomo. Antap long hemia, samting we i moa impoten, se ‘yumi mas putum yumi i stap daon aninit long han blong God ya’ we i stap tingbaot yumi oltaem. (Jemes 4:7, 8) Long nekis stadi, bambae yumi tokbaot olsem wanem yumi save mekem samting ya.

Bambae Yu Yu Ansa Olsem Wanem?

• ?Wanem ol trap blong Setan we ol faswan Kristin oli mas blokem?

• ?Wanem ol giaman trik we Setan i stap yusum tede blong traem mekem ol man blong Jeova oli foldaon long trap?

• ?Taem Setan i traem Jisas, olsem wanem Jisas i blokem hem?

• ?Wanem ol klos blong faet long saed blong spirit we oli save givhan long yumi blong blokem Setan?

[Kwestin]

[Tok blong pija long pej 9]

Jisas i strong blong blokem Setan

[Tok blong pija long pej 10]

Ol Kristin long faswan handred yia oli no joen nating long ol pleplei we oli raf mo we oli doti

[Credit Line]

The Complete Encyclopedia of Illustration/J. G. Heck