Ripot Long Wok Blong Kingdom

Eni Man i Save Go Long Haos Kingdom

TAEM Jisas Kraes i stap trenem ol disaepol blong hem long wok blong prij, hem i leftemap tingting blong olgeta blong “singaot bigwan blong talemaot [mesej blong God] long fes blong ol man.” (Matiu 10:27) Yes, oli mas mekem Kristin wok blong prij long open ples, long fored blong olgeta man. Folem advaes ya blong Jisas, ol Witnes blong Jeova oli no haedem wok blong olgeta. Fasin ya i givhan long ol Witnes blong oli winim ol traem we oli fesem mo kasem gudnem.

Eni man i save go long ol miting blong ol Witnes blong Jeova. Nating se i olsem, plante man oli no wantem go long ol Haos Kingdom, from we oli gat rong tingting long ol Witnes. Samting ya i tru long Finlan. Sam narafala man oli sem, nao oli fraet blong go long ol ples we oli no save long hem. Taem ol Witnes oli wokem wan niufala Haos Kingdom, no oli mekem wan we i stap finis i kam niuwan bakegen, plante taem oli singaot ol man blong oli kam visitim haos ya. Oli traehad speseli blong askem ol man we oli stap raonabaot, blong oli kam visitim Haos Kingdom mo kasem moa save long wok blong ol Witnes blong Jeova.

Long wan ples, ol Witnes oli mekem plan blong seremaot magasin long sem dei ya we oli singaot ol man blong kam visitim niufala Haos Kingdom. Tu Witnes i storian wetem wan olfala man we i talem se hem i glad blong ridim Wajtaoa mo Wekap! Tufala brata ya, tufala i tokbaot niufala Haos Kingdom, mo tufala i askem long olfala ya se, sipos hem i wantem visitim haos ya, tufala i save kam karem hem. Man ya i glad blong go. Waef blong hem, we i harem storian blong olgeta, i singaot se, “!Mi tu mi wantem go wetem yufala!”

Taem olfala ya i go insaed long Haos Kingdom, hem i luklukraon mo i talem se: “Ples ya i no blak nating. Man, ples ya i naes mo i klia. !Sam man oli bin talem long mi se Haos Kingdom ya i blak!” Olfala ya wetem waef blong hem, tufala i stap longtaem lelebet, mo tufala i askem sam long ol buk we oli stap.

Wan kongregesen i wantem talemaot long wan lokol niuspepa se bambae oli dediketem Haos Kingdom blong olgeta mo oli openem haos ya long eni man blong oli kam visitim. Taem masta blong ol man blong raetem niuspepa i harem nius ya, hem i ting se maet i gud sipos oli raetem wan smol stori we i tokbaot samting ya. Ol brata oli agri wetem hem, ale smoltaem biaen, stori blong olgeta we i kavremap wan haf pej, i kamaot long niuspepa. Stori ya i tokbaot spesel taem ya, mo i eksplenem wanem wok we lokol kongregesen blong ol Witnes blong Jeova i stap mekem.

Afta we oli prentem stori ya long niuspepa, wan woman we i stap klosap long haos blong wan olfala Witnes i talem long hem se: “!I gat wan nambawan stori long niuspepa tede, we i tokbaot ol Witnes blong Jeova!” Olfala sista ya i prij long woman ya, mo biaen i givim buklet ya long hem Jehovah’s Witnesses in the Twentieth Century.

Ol plan blong singaot ol man oli kam blong visitim no lesin long dedikesen blong wan niufala Haos Kingdom, oli karemaot ol rong tingting we ol man oli gat finis long ol Witnes blong Jeova. Mo tu, ol plan olsem oli leftemap tingting blong ol pablisa, blong oli askem plante moa man oli kam long ol miting. Yes, ol man long plante kantri, wetem Finlan tu, oli savegud se eni man i save go long ol Haos Kingdom blong ol Witnes blong Jeova.