Yumi Evriwan Yumi Nidim Gudfala Tok

HEM i wan naesfala dei blong gel ya. Nating se samtaem bifo, oli nidim blong stretem hem, be tede, hem i rili bin wan gudfala gel we i soem naes fasin. Nomata samting ya, long naet ya, afta we mama blong hem i putum hem i go long bed blong slip, hem i harem smol gel i stap krae. Taem mama i askem long hem from wanem hem i kros, hem i sotwin from krae i se: “?Mi mi no bin wan gudfala gel tede?”

Ansa ya i mekem mama blong hem i harem nogud we i nogud. Oltaem, hem i kwik blong stretem gel blong hem. Tede, hem i luk ol traehad blong smol gel blong hem blong soem ol gudfala fasin. Be nomata ol traehad ya, hem i no kea long samting ya i no talem wan naesfala tok nating blong presem gel blong hem.

I no ol smol gel nomo we oli nidim sam gudfala tok, no sam sapot. Yumi evriwan yumi nidim samting ya—olsem yumi nidim ol advaes, mo fasin stretem tu.

?Yumi harem olsem wanem taem man i givim gudfala tok long yumi? ?Yumi haremgud, mo yumi glad? Yumi harem se yes, i gat man i teknotis long mi, i gat man i kea long mi. Samting ya i sapotem tingting blong yumi se yes, yumi bin mekem wan gudfala samting. Mo tu i leftemap tingting blong yumi, blong yumi save gohed blong wokgud long fiuja. Taswe yumi no sapraes we plante taem, yumi laekem mo yumi wantem stap klosap long man we i presem yumi, i tektaem blong talem wan gudfala tok long yumi.—Ol Proveb 15:23.

Jisas Kraes i kasem save we i impoten blong presem man. Long parabol we i tokbaot ol talen mane, masta (we i pija blong Jisas) i stap presemgud tufala man blong wok we oli stret, i talem long olgeta se: “!Ei, yu yu mekem wan gudfala wok! Yu yu wan gudfala man we yu lukaot gud long ol wok blong mi.” !Tok ya i rili leftemap tingting! Nating se tufala i gat defren gudhan, mo oli finisim defren wok, be masta i presem tufala long sem fasin.—Matiu 25:19-23.

I gud yumi rimemba eksampol blong mama blong smol gel ya. Yumi no mas wet gogo man i krae, bifo yumi talem sam gudfala tok long hem. Defren olgeta, yumi mas traehad blong tekem evri janis blong presem hem. Yes, i stret we yumi presem man evri taem we yumi gat janis.