‘Yufala i Kam Long Mi, Nao Bambae Mi Mekem We Yufala i Spel’

‘Ol Man Blong Lukaot Long Ol Sipsip Blong God’

“Oltaem yufala i rere blong lesin long mifala mo leftemap tingting blong mifala wetem Tok blong God.”—Pamela.

“Tangkiu long bigfala wok we yufala i stap mekem from mifala evriwan. Yufala i rili givhan long mifala.”—Robert.

PAMELA mo Robert, tufala i tangkiu tumas long wok blong ol elda. Mo samting ya i pusum tufala blong raetem ol tok ya i go long ol elda blong kongregesen blong tufala. Plante narafala man blong God raon long wol oli gat tangkiu tu from ol ‘man blong lukaot long ol sipsip blong God’ we oli stap givhan mo oli stap keagud long olgeta oltaem. (1 Pita 5:2) Yes, ol man blong Jeova oli tangkiu from olgeta samting we ol elda oli stap mekem long gladhat blong olgeta, blong givhan long ol man blong God.

“Plante Wok Blong Mekem”

Ol Kristin elda oli gat plante wok blong mekem. (Luk 12:48) Oli rerem ol tok blong ol miting blong kongregesen, mo oli joen long wok blong talemaot gud nius blong Kingdom. Mo i wok blong olgeta tu, blong visitim ol Kristin brata mo sista. Ol elda oli spenem taem wetem olgeta we oli gat sam spesel nid—olsem ol olfala mo sam narafala bakegen. Be long sem taem, oli lukaotgud long prapa famle blong olgeta blong givim ol samting we oli nidim long saed blong spirit mo bodi. (Job 29:12-15; 1 Timoti 3:4, 5; 5:8) Sam elda oli givhan blong bildim ol Haos Kingdom. Sam elda oli wok long ol Hospital Liaison Committees no oli joen long sam spesel grup we wok blong olgeta i blong visitim ol Witnes we oli stap long hospital. Mo plante long olgeta oli volontia long ol asembli. Yes, ol elda oli “gat plante wok blong mekem long wok blong Masta blong yumi.” (1 Korin 15:58, NW ) !Yumi no sapraes we ol sipsip blong God oli gat tangkiu from hadwok blong ol elda ya!—1 Tesalonaeka 5:12, 13.

Ol elda oli go visitim ol Kristin brata sista long haos blong olgeta no long sam narafala ples, blong mekem oli kam strong moa long spirit. Ol visit olsem oli leftemap tingting blong ol man. Thomas i gruap long wan famle we i no gat papa. Hem i talem se: “Sipos ol elda oli no bin soem lav mo oli no bin leftemap tingting blong mi oltaem, ating tede, bambae mi no stap mekem wok blong Jeova olsem wan fultaem paenia.” Plante yangfala we oli gruap long wan famle we i gat papa no mama nomo long hem, oli agri se from we ol elda oli kea long olgeta, oli lan blong frengud wetem Jeova.

Ol olfala long ol kongregesen tu oli tangkiu from we ol elda oli visitim olgeta. Ol elda oli go visitim wan brata wetem waef blong hem, we tufala i misinari, mo tufala i gat bitim 80 yia finis. Biaen, tufala i raetem se: “Mitufala i wantem talem tangkiu from visit blong yufala. Taem yufala i go, ale mitufala i ridim bakegen ol vas we yufala i bin tokbaot wetem mitufala. Bambae mitufala i no  save fogetem ol nambawan tok blong yufala.” Wan wido woman, we i gat 70 yia blong hem, i raetem leta ya i go long ol elda: “Mi bin prea long Jeova blong i halpem mi, mo Hem i sanem yutufala i kam luk mi long haos. !Visit blong yutufala i wan blesing blong Jeova!” ?Yu tu, yu bin haremgud from we ol elda long kongregesen blong yu oli kam visitim yu? !Yes, yumi evriwan yumi tangkiu long ol elda we oli traehad blong lukaotgud long ol sipsip we God i givim long olgeta!

Ol Man Blong Lukaot Long Sipsip Oli Folem Eksampol Blong God Mo Kraes

Jeova i wan Man blong Lukaot long ol Sipsip wetem lav. (Ol Sam 23:1-4; Jeremaea 31:10; 1 Pita 2:25) Jisas Kraes tu, hem i wan gudfala Man blong Lukaot long Sipsip. Baebol i singaot hem se “gudfala man ya blong lukaot long sipsip,” “bigfala man blong lukaot long sipsip,” mo “Nambawan Man blong Lukaot long Sipsip.” (Jon 10:11; Hibrus 13:20, NW; 1 Pita 5:4) ?Jisas i soem wanem kaen fasin long ol man we oli wantem kam disaepol blong hem? Hem i singaot olgeta wetem lav i se: “Yufala evriwan we yufala i stap hadwok tumas, mo we yufala i stap karem ol hevi samting, yufala i kam long mi, nao mi bambae mi tekemaot ol hevi samting ya, mi mekem we yufala i spel gud.”—Matiu 11:28.

Tede, ol elda oli traehad tu blong halpem mo protektem ol sipsip blong God. Oli “olsem strong sefples we man i save go haed long hem blong ronwe long hariken, no gudfala ples we i drae, we man i save go haed long hem blong ronwe long big ren . . . oli olsem reva we i ron, i pastru long ples we i drae olgeta, no sed blong bigfala ston, we i stanap hem wan long ples we i no gat tri long hem.” (Aesea 32:2) Ol elda we oli protektem mo halpem ol man blong God wetem kaen gud fasin, oli mekem ol sipsip oli haremgud, nao ol sipsip oli respektem olgeta, mo God i glad long wok blong olgeta.—Filipae 2:29; 1 Timoti 5:17.

Ol Waef Oli Sapotem Ol Man Blong Olgeta

Ol man blong God oli tangkiu long ol Kristin elda, mo long ol waef blong olgeta tu we oli stap sapotem olgeta wetem lav. Plante taem, ol woman ya oli mas lego sam samting we olgeta nomo oli wantem, blong sapotem hasban blong olgeta. Samtaem, oli stap long haos, mo man blong olgeta i lukaot long wok blong kongregesen, no i stap visitim olgeta we oli gat nid. Samtaem, oli mas lego ol plan we oli mekem finis tugeta, from we i gat sam problem long kongregesen we man blong olgeta i mas stretem kwiktaem. Michelle i talem se: “Nating se i olsem, taem mi luk man blong mi i bisi blong rerem ol miting no blong visitim olgeta we oli gat nid, oltaem mi ting se hem i stap mekem wok blong Jeova, mo mi traem bes blong mi blong sapotem hem.”

Cheryl tu, we i mared wetem wan elda, i talem se: “Mi save se ol brata sista long kongregesen oli nidim blong toktok wetem ol elda, mo mi wantem we oli harem se oli save kam luk man blong mi enitaem, sipos oli nidim.” Ol gudfala waef, olsem Michelle mo Cheryl, oli rere blong lego ol samting we olgeta nomo oli wantem. Oli sapotem hasban blong olgeta blong oli save lukaotgud long ol sipsip blong God. Yumi tangkiu long ol waef blong ol elda, from we oli sapotemgud ol hasban blong olgeta.

Be wan elda we i bisi i no mas fogetem blong givim ol samting we waef mo ol pikinini blong hem oli nidim long saed blong spirit mo bodi. Wan elda we i mared “i mas man we laef blong hem i stret gud, i no gat rabis poen long hem. Hem i mas gat wan woman blong hem nomo, mo ol pikinini blong hem oli mas bilif long God. I nogud ol pikinini ya, oli stap mekem stronghed, no oli stap mekem nogud, nao ol man oli stap tokbaot olgeta from.” (Taetas 1:6) Hem i mas keagud long famle blong hem, folem ol advaes we Tok blong God i givim long ol Kristin elda.—1 Timoti 3:1-7.

!Wan elda we i bisi, i tinghae tumas long gudfala waef blong hem we i stap sapotem hem! Yes, hemia tingting we ol elda we oli mared oli gat long waef blong olgeta. Hem i laenap wetem tok ya blong Baebol we i talem se: “?Man i faenem gudfala waef finis? Oraet, hem i faenem wan gudfala samting.” (Ol Proveb 18:22, NW ) Ol elda oli soem bigfala tangkiu long waef blong olgeta, i no long toktok nomo be long fasin blong olgeta tu. Oli stap prea tugeta, oli glad blong stadi tugeta, be tu, tufala Kristin ya we i mared, tufala i glad blong spenem taem tugeta blong wokbaot tugeta long solwota, no long ol narafala ples blong spel. Yes, ol elda oli haremgud taem oli keagud long waef blong olgeta.—1 Pita 3:7.

Ol elda we oli lukaot long ol sipsip blong God long gladhat blong olgeta oli mekem ol man blong Jeova oli haremgud. !Yes, ol man ya oli olsem wan “presen,” wan blesing long kongregesen!—Efesas 4:8, 11-13.