Ol Traehad We Oli Leftemap Gudfala Fasin

Long en blong yia 2001, olgeta we oli stap lesin long nasnal program blong Radio Mosambik oli harem tok ya we i talem se:

“Presiden blong Ripablik i visitim branj ofis blong ol Witnes blong Jeova long Maputo. Hem i leftemap tingting blong skul ya blong gohed moa long traehad we oli mekem blong leftemap ol gudfala fasin insaed long ol famle, mo long program blong olgeta blong tijim ol man blong rid. Klosap 10,000 man oli bin folem program ya finis. Presiden Chissano i talem se ol program olsem oli nambawan mo oli givhan bigwan long komuniti, from we oli halpem ol man blong winim problem blong edukesen we kantri ya i stap fesem yet.”

Nao radio i plei long wan haf we oli rikodem long tok we presiden i bin mekem, i se: “Mifala i glad tumas blong luk se plante man oli wantem tumas blong save rid. Hemia i soem se plante sitisen bambae oli halpem gavman blong givhan long plante moa man bakegen blong oli save rid. Taswe, mi wantem leftemap tingting blong ol Witnes blong Jeova blong oli gohed moa blong tijim ol man blong rid, long eni lanwis. Samting we i rili impoten, hemia se ol man oli save rid mo oli naf blong toktokgud tugeta, mo long fiuja, bambae oli save tekpat long edukesen.”

Long Mosambik, ol Witnes blong Jeova oli holem ol klas blong rid long 850 ples long ful kantri. Program ya i blong mekem ol man oli naf blong ridim Tok blong God. Antap long samting ya, oli mekem klosap 50,000 fri Baebol stadi long haos blong ol man evri wik. Samting ya i wan haf nomo blong wan bigfala wok blong tijim Baebol long fulwol, we i stap gohed long 235 kantri finis. (Matiu 24:14) Yu tu yu save kasem blesing from program ya. Plis, yu no mas fraet blong storian wetem ol Witnes blong Jeova long ples blong yu.