Wan Kwestin

?Yumi save brekem wan strong promes we yumi mekem long God?

Long Baebol, wan strong promes hemia taem man i promes long God se bambae hem i mekem wan samting, givim wan presen, statem wan spesel wok, no i promes blong stap longwe long sam samting we maet oli no agensem loa blong God be hem nomo i jus blong mekem olsem. Baebol i tokbaot sam strong promes we ol man oli talem se bambae oli holem sipos God i mekem wan samting blong olgeta fastaem. Eksampol, Hana, mama blong profet Samuel, “i mekem wan strong promes long Hae God se, ‘Hae God, yu yu gat olgeta paoa. . . . !Plis yu no fogetem mi! Sipos yu letem blong mi mi gat wan pikinini we i boe, mi mi promes se bambae mi givim hem long yu, blong hem bambae i man blong yu oltaem long laef blong hem. Mo blong soemaot we hem i man blong yu, neva bambae oli katem hea blong hem samtaem.’ ” (1 Samuel 1:11) Mo tu, Baebol i soemaot se ol strong promes oli samting we man hem wan nomo i jusum blong mekem. ?Yumi save brekem wan strong promes we yumi mekem long God?

King Solomon blong Isrel bifo i talem se: “Sipos yu mekem wan promes long God, bambae yu mas mekem samting ya we yu promes blong mekem.” Hem i ademap se: “Mo yu mas mekem kwiktaem, . . . I moa gud yu no mekem wan promes nating, i winim we yu mekem promes be yu no holem.” (Prija 5:4, 5) Loa blong Moses we God i givim long ol man Isrel i talem se: “Hae God i God blong yumi, mo sipos yufala i mekem promes long hem, bambae yufala i no mas tektaem blong mekem ol samting ya we yufala i promes blong mekem. Hae God bambae i no save fogetem ol promes blong yufala, mo sipos yufala i letem promes blong yufala i foldaon, hemia i sin ya.” (Dutronome 23:21) I klia se yumi no mas ting nating long strong promes we yumi mekem long God. Sipos yumi mekem wan strong promes, yumi mas gat gudfala risen blong mekem. Mo sipos yumi mekem wan strong promes yumi mas sua tu se bambae yumi naf blong holem promes blong yumi. Sipos yumi no sua, i moa gud yumi no mekem promes nating. ?Be nao, sipos yumi mekem wan strong promes finis, bambae yumi mas holem promes ya nomata wanem samting i hapen?

?Olsem wanem sipos yumi mekem wan strong promes blong mekem wan samting, be biaen yumi luk se samting ya i no laenap wetem samting we God i wantem? ?Olsem wanem sipos strong promes ya i joenem ol rabis fasin wetem trufala wosip? (Dutronome 23:18) I klia we yumi no mas holem wan strong promes olsem. Antap long samting ya, Loa blong Moses i talem se taem wan woman i mekem wan strong promes, papa no hasban blong hem tufala i save blokem woman ya blong i no holem promes ya.—Namba 30:3-15.

Traem tingbaot sipos wan man we i mekem wan strong promes long God se bambae hem i no mared, be naoia i faenem i had blong holem promes ya. Hem i mekem wan strong promes, be naoia hem i harem se hem i no moa naf blong holem promes ya mo maet hem i save sin agensem loa blong God long saed blong seks. ?I waes blong man ya i traehad yet blong holem promes blong hem? Ating i moa gud we hem i no moa holem promes blong hem, mo i no mekem sin long saed blong seks. I moa waes sipos hem i askem Jeova blong i soem sore long hem, mo i fogivim hem from we hem i no moa save holem promes blong hem. Be hemia wan disisen we man ya nomo i save tekem. I no gat narafala i save tekem disisen blong hem.

?Olsem wanem sipos wan man i mekem wan strong promes, be biaen i luk se hem i hareap tumas blong mekem promes ya? ?Bambae hem i mas faenem rod blong holem promes blong hem yet? Tingbaot Jeftaha. I no isi nating blong holem strong promes we hem i mekem long God. Be nating se i olsem, hem i holem promes ya. (Jajes 11:30-40) Sipos  wan man i no holem promes blong hem, God i save “kros” long hem from, mo i save spolem hadwok we man ya i bin mekem. (Prija 5:6) Wan man we i ting nating long promes blong hem mo i no traem holem promes ya, maet bambae God i no moa agri long hem.

Jisas Kraes i talem se: “Sipos yu talem se ‘Yes,’ yu mas talem ‘Yes’ nomo. Mo sipos yu talem se ‘No,’ yu mas talem ‘No’ nomo. Ol narafala tok we yu save talem, hem i kamaot long Setan nomo.” (Matiu 5:37) Wan Kristin i mas lukaot blong holem ol strong promes we hem i mekem long God, be i no hemia nomo. Hem i mas lukaot we ol tok blong hem oli tru oltaem—taem hem i toktok long God, mo long ol man tu. ?Olsem wanem sipos hem i mekem wan kontrak wetem wan narafala man, we fastaem i luk olsem se kontrak ya i gud nomo, be biaen, taem hem i luklukgud, hem i luksave we kontrak ya i krangke nomo? ?Bambae man ya i mas holem kontrak we hem i mekem? Hem i no mas ting nating long bisnes olsem. Be sipos hem i tok stret nomo wetem narafala, maet narafala ya i save tekemaot hem long kontrak ya.—Ol Sam 15:4; Ol Proveb 6:2, 3.

?Wanem stamba samting we yumi mas tingbaot taem yumi mekem ol strong promes mo eni narafala samting? Yumi mas traehad oltaem blong no lusum fasin frengud we yumi gat wetem Jeova.

[Tok blong pija long pej 30]

Hana i no slo blong holem strong promes blong hem

[Tok blong pija long pej 31]

Jeftaha i holem strong promes blong hem, nating se i had