Yumi Nidim Ol Kristin Brata Blong Yumi
Yumi Nidim Ol Kristin Brata Blong Yumi
“Yumi evriwan i olsem ol haf blong wan bodi nomo.”—EFESAS 4:25.
1. ?Wan insaeklopedia i talem wanem long saed blong bodi blong yumi?
!BODI blong yumi, hem i wan nambawan wok blong God! The World Book Encyclopedia i talem se: “Samfala oli tokbaot bodi blong yumi se hem i wan mesin—beswan mesin we eniman i bin wokem samtaem. Be yumi save se bodi blong yumi i no wan mesin. Nating se i olsem, i gat plante samting long saed blong bodi we i olsem mesin. Bodi i gat plante haf blong hem, olsem wan mesin. Ol wanwan haf blong bodi oli gat wan spesel wok, olsem ol wanwan haf blong wan mesin. Olgeta haf oli wok tugeta, nao bodi i rongud olsem wan mesin we i rongud.”
2. ?Long wanem fasin, bodi blong yumi i sem mak long Kristin kongregesen?
2 Yes, bodi blong yumi i gat plante haf blong hem. Mo ol wanwan haf ya oli mekem wan wok we bodi i nidim. I no gat wan string, wan masel, no wan narafala haf blong bodi we i no gat prapa wok blong hem. Sem mak long kongregesen. Ol wanwan memba blong Kristin kongregesen oli save givhan blong mekem kongregesen i strong gud mo i naes long saed blong spirit. (1 Korin 12:14-26) Yes, i no mas gat wan man long kongregesen we i harem se i hae moa long narafala, be tu, i no mas gat wan man we i harem se hem i no impoten.—Rom 12:3.
3. ?Olsem wanem Efesas 4:25 i soemaot se ol Kristin wanwan oli nidim ol narafala Kristin?
3 Ol wanwan haf blong bodi oli dipen long ol narafala haf blong bodi. Long sem fasin, ol wanwan Kristin oli nidim ol narafala Kristin. Aposol Pol i talem long ol Kristin we tabu spirit i makemaot olgeta se: “Yufala i mas finis long ol giaman toktok, from we yumi evriwan i olsem ol haf blong wan bodi nomo. Baebol i talem se, ‘Yufala i mas tok tru nomo long yufala.’ ” (Efesas 4:25) Ol man Isrel long saed blong spirit oli “olsem ol haf blong wan bodi nomo,” hemia ‘bodi blong Kraes.’ From samting ya, oli tok tru nomo long olgeta mo oli joengud oltaem blong mekem wok blong olgeta. Yes, olgeta wanwan oli nidim ol narawan, blong oli wok olsem wan bodi nomo. (Efesas 4:11-13) Ol Kristin we oli gat janis blong laef olwe long wol ya, oli joen wetem ol tabu Kristin ya, mo olgeta tu, oli tok tru oltaem, mo oli glad blong wok wanples wetem olgeta.
4. ?Olsem wanem yumi save givhan long olgeta we oli jes stat blong folem trutok?
4 Evri yia, plante taosen man we oli wantem laef long paradaes long wol ya, oli tekem baptaes. Ol narafala long kongregesen oli glad blong givhan long olgeta blong oli “kam bigman long Kraes.” (Hibrus 6:1-3) Maet oli givhan long olgeta blong faenem ansa blong sam kwestin long Baebol, no maet oli halpem olgeta long saed blong wok blong prij. Gudfala eksampol blong yumi blong joen mo givim ansa oltaem long ol Kristin miting i save givhan long ol niuwan ya. Taem wan trabol i kasem olgeta, yumi save talem ol gudfala toktok mo leftemap tingting blong olgeta. (1 Tesalonaeka 5:14, 15) Yumi mas lukaot rod blong givhan long ol narafala blong oli gohed blong ‘folem trutok.’ (3 Jon 4) Nating sipos yumi yangfala no yumi olfala, nating se yumi jes stat blong folem trutok no yumi folem plante yia finis, be yumi save givhan long ol Kristin brata blong yumi blong oli gohed moa long saed blong spirit. Oli rili nidim yumi.
Oli Givhan Long Narafala We i Nidim Help
5. ?Olsem wanem Akwila mo Prisila tufala i bin givhan long Pol?
5 Plante Kristin hasban mo waef oli harem gud blong givhan long ol Kristin brata mo sista blong olgeta. Tingbaot Akwila mo woman blong hem Prisila, we tufala i givhan long Pol. Tufala i tekem Pol i kam long haos blong tufala, tufala i wok wetem hem blong somap haos tapolen, mo tufala i givhan long hem blong mekem niufala kongregesen long Korin i kam strong. (Ol Wok 18:1-4) Tufala i putum laef blong tufala long denja tu blong givhan long Pol. Yumi no save wanem samting tufala i bin mekem, be taem tufala i stap long Rom, Pol i sanem toktok i go long ol Kristin long ples ya se: “Talem halo long Akwila, wetem woman blong hem Prisila, we tufala i joen wetem mi finis long wok blong Jisas Kraes. Mi mi wantem tumas blong talem tangkiu long tufala from we tufala i rere blong lusum laef blong tufala from mi. Be i no mi nomo, long olgeta ples, ol grup blong ol Kristin man we oli no laen blong Isrel, olgeta tu oli glad long tufala.” (Rom 16:3, 4) Sam Kristin tede oli olsem Akwila mo Prisila. Oli mekem plante wok blong givhan long ol Kristin brata sista blong olgeta mo blong mekem kongregesen i strong. Sam long olgeta oli rere blong lusum laef blong olgeta from we oli no wantem putum ol brata blong olgeta long han blong ol man nogud we oli wantem kilim i ded olgeta no mekem raf fasin bitim mak long olgeta.
6. ?Wanem help we Apolos i kasem?
6 Akwila mo Prisila, tufala i givhan long Kristin man ya Apolos tu, we hem i wan gudfala man blong toktok. Apolos i stap tijim ol man Efesas long saed blong Jisas Kraes. Long taem ya, Apolos i save nomo long baptaes we Jon i stap mekem. Jon i stap baptaesem ol man we oli tanem tingting blong olgeta from ol sin we oli mekem agensem kontrak blong Loa. Akwila mo Prisila tufala i luksave se Apolos i nidim smol help, ale “tufala i talemaot Rod blong God i klia moa long hem.” Ating tufala i eksplenem long hem se blong baptaes olsem wan Kristin, man i mas draon fulwan long wota mo i mas kasem tabu spirit. Apolos i lesin mo i kasem save gud. Biaen, long Akaea, “hem i stap givhan gud long olgeta we God i givhan long olgeta finis long gladhat blong hem, nao oli bilif long Jisas. . . . Hem i stap soemaotgud we ol tok blong Baebol i klia, se Jisas i Mesaea. Nao long fes blong olgeta man, hem i stap daonem ol tok blong ol laen blong Isrel.” (Ol Wok 18:24-28) Plante taem, sam tok we wan Kristin brata i talem, i save givhan long yumi blong kasem save moa long Tok blong God. Long saed ya tu, yumi nidim ol Kristin brata blong yumi.
Givim Olting Mo Mane
7. ?Ol Kristin long Filipae oli mekem wanem taem sam narafala Kristin oli sot long sam samting?
7 Olgeta long Kristin kongregesen blong Filipae oli lavem Pol tumas, ale oli sanem sam samting long hem taem hem i stap long Tesalonaeka. (Filipae 4:15, 16) Taem ol brata long Jerusalem oli sot long sam samting, ol brata long Filipae oli glad tumas blong givim mane long olgeta. Oli no givim stret long mak blong mane we oli kasem, be oli bitim mak olgeta. Pol i gat bigfala tangkiu long ol brata mo sista ya long Filipae from nambawan fasin ya blong olgeta. Taswe, hem i tokbaot eksampol blong olgeta long sam narafala Kristin.—2 Korin 8:1-6.
8. ?Wanem fasin we Epafrodaetas i gat?
8 Taem Pol i stap kalabus, ol Kristin long Filipae oli no jes sanem sam samting long hem, be oli sanem Epafrodaetas tu blong givhan long hem. Pol i talem se: “Klosap [Epafrodaetas] i ded long wok blong Kraes, be hem i no fraet blong lusum laef blong hem, nao i gohed blong finisim ol wok blong givhan long mi, we yufala i no gat rod blong mekem.” (Filipae 2:25-30; 4:18) Baebol i no talem sipos Epafrodaetas i wan elda no wan man blong givhan. Nating se i olsem wanem, hem i wan Kristin we i rere blong lego plante samting mo laef blong hem tu blong halpem narafala, mo Pol i rili nidim hem. ?I gat wan long kongregesen blong yufala we i olsem Epafrodaetas?
Oli ‘Mekem Pol i Harem Gud Tumas’
9. ?Aristakas i soem wanem eksampol we yumi save folem?
9 Ol brata mo sista we oli gat lav olsem Akwila, Prisila mo Epafrodaetas, oli givhan bigwan long kongregesen. Sam Kristin brata blong yumi oli olsem Kristin man ya Aristakas long faswan handred yia. Hem wetem sam narafala, oli ‘mekem Pol i harem gud tumas.’ Maet oli bin leftemap tingting blong hem, no mekem ol smosmol wok blong givhan long hem. (Kolosi 4:10, 11) Taem Aristakas i givhan long Pol, hem i soemaot se hem i wan trufala fren blong Pol, antap moa long taem we Pol i rili nidim hem. Hem i olsem man we Ol Proveb 17:17 (NW ) i tokbaot se: “Wan trufala fren i soemaot lav oltaem nomo, mo hem i olsem wan brata we i rere blong givhan long taem blong trabol.” ?Yu ting se yumi evriwan i mas traehad blong ‘mekem ol narafala Kristin oli harem gud’? Yes, antap moa, yumi mas givhan long olgeta we oli stap harem nogud from wan trabol we i kasem olgeta.
10. ?Pita i givim wanem gudfala eksampol we ol Kristin elda oli save folem?
10 Ol Kristin elda, oli mas ol faswan man blong mekem ol Kristin brata mo sista blong olgeta oli harem gud. Kraes i talem long aposol Pita se: “Mekem tingting blong ol brata blong yu i strong.” (Luk 22:32) Pita i naf blong mekem olsemia, from we hem i strong blong mekem ol gudfala fasin, mo samting ya i kamaot moa afta we Jisas i laef bakegen long ded. Ol elda, yufala i mas traehad oltaem blong mekem sem samting ya, wetem gladhat mo kaen fasin. Ol Kristin brata blong yu oli nidim yu.—Ol Wok 20:28-30; 1 Pita 5:2, 3.
11. ?From wanem i gud we yumi tingbaot fasin blong Timoti?
11 Timoti we i mekem plante trip wetem Pol, i wan elda we i wari bigwan long ol narafala Kristin. Timoti i no strong long bodi blong hem, be hem i bilif wetem fulhat blong hem, mo hem i ‘wok [strong] wetem Pol long ol wok blong gud nius blong Kraes.’ Taswe, aposol ya i save talem long olgeta long Filipae se: “I no gat narafala man long ples ya we i gat sem tingting we Timoti i gat, we hem i stap tingbaot yufala tumas.” (Filipae 2:20, 22; 1 Timoti 5:23; 2 Timoti 1:5) Yumi save kam olsem wan bigfala blesing long ol Kristin brata blong yumi sipos yumi soemaot sem fasin olsem Timoti. I tru, yumi wanwan i gat ol defdefren sik mo traem we oli kasem yumi. Be nating, yumi naf yet blong soemaot strong bilif, lav mo kea long ol Kristin brata sista blong yumi, mo yumi mas mekem olsemia. Oltaem yumi mas tingbaot se oli nidim yumi.
Ol Woman We Oli Tingbaot Ol Narafala
12. ?Yumi save lanem wanem long eksampol blong Dokas?
12 Dokas i wan woman we i onagud long God mo i tingbaot ol narafala. Taem hem i ded, ol disaepol oli singaot Pita, mo oli tekem hem i go long wan rum antap long wan haos. Long ples ya, “ol wido oli kam stanap raon long hem, oli stap krae. Mo oli stap soem long Pita, ol klos we Dokas i somap taem hem i stap laef yet.” Pita i mekem Dokas i laef bakegen, mo yumi save se Dokas i gohed blong ‘mekem ol gudfala wok mo givhan long ol puaman.’ Long Kristin kongregesen tede, i gat ol woman olsem Dokas we oli somap klos mo mekem ol narafala gudfala wok blong soem lav long olgeta we oli sot long sam samting. Be, wan gudfala wok we oli joen moa long hem, hemia blong leftemap Kingdom mo pulum ol man oli kam disaepol blong Kraes.—Ol Wok 9:36-42; Matiu 6:33; 28:19, 20.
13. ?Olsem wanem Lidia i soemaot se hem i tingbaot ol narafala Kristin?
13 Lidia tu i wan woman we i onagud long God mo i tingbaot ol narafala. Hem i wan woman Tuatira, be hem i stap long Filipae taem Pol i prij long ples ya long yia 50 K.T. Ating Lidia i lego skul blong hem blong joen long wosip blong ol man Jiu. Maet i no bin gat plante Jiu long Filipae mo maet i no gat wan haos prea tu. Ale, hem wetem sam narafala woman we oli onagud long God, oli joen wanples blong mekem wosip klosap long wan reva. Nao aposol Pol i kam talemaot gud nius long olgeta long ples ya. Baebol i talem se, Jeova i “openem tingting blong [Lidia] blong i bilif long tok blong Pol. Nao hem wetem ol famle blong hem mo ol man blong wok blong hem oli baptaes. Nao hem i talem long mifala se, ‘Sipos yufala i save se mi mi bilif tru long Masta blong yumi, i gud yufala i kam stap long haos blong mi.’ Hem i strong long mifala, nao mifala i go long haos blong hem.” (Ol Wok 16:12-15) Lidia i wantem tumas blong mekem i gud long ol narafala, taswe hem i strong long Pol mo ol fren blong hem blong oli kam stap long haos blong hem. !Tede tu, yumi haremgud tumas long lav mo kaen fasin blong ol narafala Kristin, taem oli singaot yumi blong kam long haos blong olgeta!—Rom 12:13; 1 Pita 4:9.
Yumi Nidim Ol Yangfala Tu
14. ?Jisas Kraes i soem wanem fasin long ol yangfala?
14 Pikinini blong God, Jisas Kraes, we i gat kaen fasin mo lav, hem nao i statem Kristin kongregesen. Ol man oli no fraet blong kam long hem, from we hem i gat lav mo sore. Wan taem, samfala oli karem ol smosmol pikinini blong olgeta oli kam long Jisas, nao ol disaepol blong hem oli traem blokem olgeta. Be Jisas i talem se: “!Yufala i no blokem ol pikinini ya! Yufala i letem olgeta oli kam long mi, from we ol pikinini tu oli gat raet wetem ol man [“long Kingdom blong God,” NW ]. Tru mi talem long yufala. Man we i no glad blong mekem tingting blong hem i stap daon olsem pikinini, bambae hem i no save [“go insaed long Kingdom blong God,” NW ].” (Mak 10:13-15) Blong kasem ol blesing blong Kingdom, yumi mas gat fasin olsem ol pikinini. Olgeta ya oli mekem tingting blong olgeta i stap daon mo oli glad blong letem narafala i tijim olgeta. Jisas i soem se hem i lavem ol pikinini, taem hem i putum han blong hem i goraon long olgeta mo i talem ol gudfala toktok long olgeta. (Mak 10:16) ?Olsem wanem long ol yangfala tede? Ol yangfala, yufala i mas save se ol narafala long kongregesen oli lavem yufala mo oli nidim yufala.
15. ?Luk 2:40-52 i tokbaot wanem samting long saed blong laef blong Jisas, mo wanem eksampol we hem i givim long ol yangfala?
15 Taem Jisas i yangfala, hem i soemaot se hem i lavem God mo Tok blong hem. Taem hem i gat 12 yia, hem i aot long ples blong hem Nasaret, i wokbaot wetem papa blong hem Josef mo mama blong hem Meri, oli go long Jerusalem blong mekem lafet blong Pasova. Taem oli stap wokbaot blong kambak, papa mama blong Jisas tufala i luksave se hem i no stap wetem grup we oli stap wokbaot tugeta. Biaen, tufala i faenem hem i stap sidaon insaed long haos blong God, i stap lesin long ol tija blong ol man Isrel mo i stap askem plante kwestin long olgeta. Jisas i sapraes we Josef mo Meri i no save weples hem i stap, ale hem i askem long tufala se: “?Yutufala i no save se mi mi mas stap long haos blong Papa blong mi?” Nao hem i gohom wetem tufala, i stap ona long tufala, mo i stap gruap long bodi blong hem mo long waes blong hem. (Luk 2:40-52) !Jisas i givim nambawan eksampol long ol yangfala! I gud tumas sipos ol yangfala oli obei long papa mama blong olgeta, mo wantem tumas blong kasem save long ol samting long saed blong spirit.—Dutronome 5:16; Efesas 6:1-3.
16. (a) ?Taem Jisas i stap prij long haos blong God, sam boe oli singaot blong talem wanem? (b) ?Wanem nambawan janis we ol yangfala Kristin oli gat tede?
16 Sipos yu yu wan yangfala, maet yu stap tokbaot Jeova long ol narafala yangfala long skul, mo maet yu go prij long olgeta haos wanwan wetem papa mama blong yu. (Aesea 43:10-12; Ol Wok 20:20, 21) Jes bifo we Jisas i ded, hem i stap long haos blong God, i stap prij mo i stap mekem ol sikman oli kamgud bakegen. Nao sam boe oli singaot long hem se: “Hosana long Laen ya blong King Deved.” Ol jif pris mo tija blong Loa oli kros tumas, oli talem long Jisas se: “!Ei! ?Yu harem tok ya we oli stap talem?” Jisas i ansa se: “Yes, mi mi harem. ?Be ating yufala i no ridim wan tok long Baebol? Long ples ya wan man i presem God, i talem se, ‘Ol pikinini mo ol smosmol pikinini, be yu yu mekem we olgeta oli save presemgud yu.’ ” (Matiu 21:15-17) Ol yangfala long kongregesen, yufala i gat nambawan janis blong presem God mo Pikinini blong hem, olsem ol yangfala ya long taem bifo. Yes, ol narafala long kongregesen oli nidim yufala, mo oli wantem yufala blong wok wetem olgeta blong talemaot Kingdom.
Taem i Gat Trabol
17, 18. (a) ?From wanem Pol i askem sam kongregesen blong sakem smol mane blong givhan long ol Kristin long Judia? (b) ?Presen mane we i go long ol Kristin long Judia i mekem wanem fasin i kamaot bitwin ol Kristin we oli Jiu mo ol Kristin blong ol narafala laen?
17 Nomata wanem kaen laef we yumi gat, lav i mas pulum yumi blong givhan long ol Kristin brata sista blong yumi taem oli gat nid. (Jon 13:34, 35; Jemes 2:14-17) Lav nao i pulum Pol blong askem ol kongregesen long Akaea, Galesia, Masedonia mo distrik blong Esia, blong oli sakem smol mane blong givhan long ol Kristin brata sista long Judia. Ol disaepol long Jerusalem oli kasem trabol taem ol narafala oli agensem olgeta, taem politik long kantri ya i kam strong, mo taem oli sot long kakae. Maet hemia nao samting we Pol i stap tokbaot taem hem i talem se, ‘i gat plante samting we i stap mekem olgeta oli harem nogud,’ mo, “ol man oli stap mekem i nogud long olgeta,” mo, ‘ol man oli tekemaot olting blong olgeta.’ (Hibrus 10:32-34; Ol Wok 11:27 kasem 12:1) Taswe, hem i askem ol narafala Kristin blong oli sakem smol mane blong givhan long ol Kristin ya long Judia we oli sot long plante samting.—1 Korin 16:1-3; 2 Korin 8:1-4, 13-15; 9:1, 2, 7.
18 Smol presen mane ya we oli givim blong halpem ol tabu man long Judia i soemaot se, ol Jiu mo ol man blong ol narafala laen we oli wosipim Jeova oli lavlavem olgeta olsem wan famle nomo. Mo tu, taem ol Kristin blong ol narafala laen oli karem presen mane ya i go long ol brata blong olgeta long Judia, hemia i givim janis long olgeta blong soem tangkiu from ol rij samting long saed blong spirit we ol brata ya oli bin givim long olgeta. Long rod ya, olgeta evriwan oli givgivhan long olgeta, samfala oli givhan long saed blong mane, samfala oli givhan long saed blong spirit. (Rom 15:26, 27) Tede tu, ol Kristin brata we oli givim presen mane blong halpem ol Kristin we oli gat nid, oli givim wetem gladhat nomo. Lav nao i pusum olgeta blong givim. (Mak 12:28-31) Long saed ya tu, yumi nidim ol Kristin brata blong yumi. Yumi serem olting blong yumi, nao ‘olgeta we oli gat smol nomo, oli no sot.’—2 Korin 8:15.
19, 20. Talem sam eksampol blong soemaot olsem wanem ol man blong Jeova oli givgivhan long olgeta taem wan disasta i kamaot.
19 From we yumi save se ol Kristin wanwan oli nidim ol narafala Kristin, yumi kwik blong givhan long ol Kristin brata mo sista blong yumi. Tingbaot samting we i hapen long El Salvado long yia 2001. Graon i seksek bigwan nao ol hil oli brobrok, oli glis i kamdaon mo oli spolemgud ples. Wan ripot i talem se: “Ol brata long olgeta ples blong El Salvado oli joen blong givhan long olgeta we oli kasem trabol ya. Plante grup blong ol brata blong Guatemala, Yunaeted Stet mo Kanada, oli kam blong givhan. . . . Kwiktaem nomo, bitim 500 niufala haos mo 3 naesfala Haos Kingdom oli stanap. Hadwok blong ol brata ya we oli rere blong lego plante samting blong givhan long narafala, i givim wan bigfala witnes long ol man raonabaot.”
20 Wan ripot we i kam long Saot Afrika i talem se: “Bigfala wota we i ron long plante ples long Mosambik, i spolemgud plante samting blong ol Kristin brata blong yumi. Hed ofis blong ol Witnes long Mosambik i wokem wan plan blong givim klosap olgeta samting we ol brata oli nidim. Be, oli askem long mifala blong sanem sam gudfala klos long ol brata we oli nidim. Ale mifala i hivimap naf klos blong fulumap wan rum we i bigwan olsem 12 meta, nao mifala i sanem ol klos ya oli go long ol brata long Mosambik.” Yes, long saed ya tu, yumi nidim ol Kristin brata blong yumi.
21. ?Nekis stadi bambae i tokbaot wanem?
21 Olsem yumi luk finis, olgeta haf blong bodi blong yumi oli impoten. Samting ya i tru long saed blong Kristin kongregesen tu. Yumi nidim olgeta evriwan long kongregesen. Mo yumi mas gohed blong joengud blong mekem wosip tugeta. Nekis stadi bambae i tokbaot sam samting we oli save givhan long yumi blong mekem olsem.
?Bambae Yu Yu Ansa Olsem Wanem?
• ?Long wanem fasin, bodi blong yumi i sem mak long Kristin kongregesen?
• ?Ol faswan Kristin oli mekem wanem taem ol Kristin brata blong olgeta oli sot long sam samting?
• ?Wanem sam stori long Baebol we oli soemaot se ol Kristin wanwan oli nidim ol narafala Kristin mo oli givgivhan long olgeta?
[Kwestin]
[Tok blong pija long pej 10]
Akwila mo Prisila, tufala i tingbaot ol narafala
[Tok blong pija long pej 12]
Taem trabol i kamaot, ol man blong Jeova oli givgivhan long olgeta mo ol narafala