Haremgud Blong Stadi Yu Wan Long Tok Blong God

“Bambae mi stap tingting gud long olgeta bigbigfala wok ya blong yu.”—OL SAM 77:12.

1, 2. (a) ?From wanem yumi mas tektaem blong tingting dip? (b) ?Wanem mining blong tufala tok ya “tingting dip” mo “putum tingting i stap strong”?

 FROM we yumi ol disaepol blong Jisas Kraes, yumi mas tinghevi long fasin fren blong yumi wetem God mo risen we i pusum yumi blong mekem wok blong hem. Be, tede, bighaf blong ol man oli bisi tumas long ol narafala samting, mo oli no tektaem blong tingting dip. Oli spenem taem blong olgeta blong ronem mane, pem ol sas samting, mo joen long ol pleplei we oli westem taem nomo. ?Olsem wanem yumi save mekem se yumi tu, yumi no westem taem long ol samting long laef we oli blong nating nomo? Yumi mas tektaem evri dei blong tingting dip long ol wok mo fasin blong Jeova, olsem we yumi tektaem evri dei blong kakae mo slip.—Dutronome 8:3; Matiu 4:4.

² ?Sam samtaem, yu yu stap kwaet blong tingting dip? ?Taem yumi tingting dip, yumi mekem wanem? Wan diksonari i eksplenem fasin blong tingting dip se, “putum olgeta tingting blong yumi long wan samting: skelem no putum tingting i stap strong long samting.” Mo tok ya “putum tingting i stap strong” i min se “tingting gud: skelem . . . yusum tingting no tingbaot gud, antap moa, long wan kwaet ples, mo long fasin we yu tinghevi long samting ya, olsem we i impoten tumas.” ?Olsem wanem tok ya i save givhan long yumi?

3. ?Fasin blong gohed gud long saed blong spirit i joen stret wetem wanem?

³ Fastaem, tok ya i mas mekem yumi tingbaot samting we aposol Pol i raetem long Timoti we hem tu i stap mekem wok blong God. Pol i talem se: “Yu mas mekem we wok ya blong ridim Baebol long ol man, mo blong prij, mo blong tijim olgeta long ol trutok, i kam nambawan wok blong yu, gogo kasem taem we mi bambae mi kamtru. . . . Yu mas mekem ol wok ya, mo yu mas putum tingting blong yu i stap strong blong mekem olgeta samting ya, blong bambae olgeta man oli save luk we yu stap gohed gud long laef blong yu mo long wok blong yu.” Yes, yumi mas gohed gud mo kamgud moa. Tok blong Pol i soemaot tu se fasin blong putum tingting i stap strong long ol samting long saed blong spirit i joen stret wetem fasin blong gohed gud. Samting ya i tru yet tede. Blong gohed gud long saed blong spirit, yumi mas ‘putum tingting blong yumi i stap strong’ long olgeta samting we Tok blong God i talem, mo “mekem” olgeta.—1 Timoti 4:13-15.

4. ?Wanem samting we yu save yusum blong givhan long yu blong tingting gud oltaem long Tok blong Jeova?

⁴ Yu nao yu mas jusumaot wanem taem i stret long yu mo i laenap wetem plan blong famle blong yu, blong yu save tingting dip. Plante oli jusum eli moning blong tingting gud long wan vas blong Baebol we oli ridim long smol buk ya Ridimgud Ol Tok Blong Baebol Evri Dei. Bitim 20,000 man mo woman we oli wok long ol haos Betel raon long wol, oli statem dei blong olgeta wetem wan storian blong 15 menet, long saed blong wan vas blong Baebol. Sam nomo long Betel famle oli mekem smol toktok long saed blong vas ya, ol narafala oli tingting gud long ol toktok ya we oli harem mo oli ridim. Sam narafala Witnes oli putum tingting blong olgeta i stap strong long Tok blong Jeova taem oli stap wokbaot i go long wok. Maet oli lesin long ol kaset long saed blong Baebol  mo long saed blong tufala magasin ya Wajtaoa mo Wekap! Plante woman oli lesin long ol kaset ya taem oli stap mekem wok blong olgeta long haos. Olgeta ya oli stap folem fasin blong man ya Asaf we i raetem haf blong Ol Sam. Hem i se: “Hae God. Bambae mi mi stap tingbaot ol bigbigfala wok blong yu, mo ol merikel ya we yu yu mekem bifo. Bambae mi stap tingting gud long olgeta bigbigfala wok ya blong yu.”—Ol Sam 77:11, 12.

Stret Tingting i Karem Gudfala Frut

5. ?From wanem yumi mas tingbaot stadi wanwan olsem samting we i impoten?

⁵ Long taem blong yumi, ol man oli laekem moa blong lukluk televisin, video kaset, mo yusum kompiuta. From samting ya, oli no moa stap ridim plante buk. Be ol Witnes blong Jeova oli mas gat defren fasin. Tru ya, taem yumi ridim Baebol, hemia i olsem wan rop we i joenem yumi long Jeova. Plante taosen yia bifo, Josua i tekem ples blong Moses olsem lida blong Isrel. Blong kasem blesing blong Jeova, Josua i mas ridim Tok blong God hem wan. (Josua 1:8; Ol Sam 1:1, 2) Tede, yumi nidim samting ya yet. Be maet samfala we oli no skulgud, oli faenem i had blong rid no maet oli rid blong smoltaem nao oli les blong go moa. ?Ale, wanem i save mekem se yumi wantem ridim mo stadi long Tok blong God? Ansa blong kwestin ya i stap long tok blong King Solomon long Ol Proveb 2:1-6. Plis, openem Baebol blong yu mo ridim ol vas ya. Bambae yumi tokbaot olgeta tugeta.

6. ?Wanem tingting we yumi mas gat long saed blong save blong God?

⁶ Long vas 1 mo 2, yumi ridim advaes ya: “Pikinini blong mi. Yu mas lanem ol samting ya we mi stap tijim yu long hem, mo yu no mas fogetem ol fasin ya we mi stap talem long yu se yu mas mekem. Yu mas lesin long ol waestok ya, mo yu mas traehad blong haremsave olgeta.” (Ol Proveb 2:1, 2) ?Tufala vas ya oli lanem yumi long wanem samting? Yumi lanem se yumi wanwan i gat wok blong mekem. Makemgud tok ya “yu mas lanem ol samting ya we mi stap tijim yu long hem.” Hemia wan bigfala samting, from we bighaf blong ol man tede oli no wantem save long Tok blong God. Blong kasem glad from stadi we yumi mekem long Tok blong God, yumi mas wantem lanem ol samting we Jeova i stap tijim yumi long hem. Yumi mas luk ol samting ya olsem ol sas samting we yumi wantem holemtaet olwe. Yumi no mas kam bisi tumas long laef, mo letem tingting blong yumi i kam fulap long ol narafala samting, nao yumi no moa ting se Tok blong God i impoten, no maet yumi go moa, we yumi no moa trastem Tok blong God.—Rom 3:3, 4.

7. ?From wanem yumi mas traehad blong kam long olgeta Kristin miting mo blong lesingud?

⁷ ?Taem oli stap eksplenem Tok blong God long ol Kristin miting blong yumi, yu yu stap “lesin” mo tingting gud long ol tok ya? (Efesas 4:20, 21) ?Yu yu stap “traehad” wetem fulhat blong yu, blong haremsave ol tok ya? Maet brata we i stap givim tok i no bin mekem plante tok bifo. Be nating. Taem hem i stap yusum Tok blong God, i stret nomo we yumi lesingud long hem. Mo tu, yumi save finis se, blong lesingud long ol waestok blong Jeova, yumi mas traehad blong kam long olgeta Kristin miting. (Ol Proveb 18:1) !Tingbaot ol man we oli no stap long miting blong Pentekos long 33 K.T., long rum antap long wan haos long Jerusalem! !Oli mas harem nogud ya! I tru, long ol miting blong yumi, i no gat ol bigbigfala merikel i kamaot olsem i kamaot long Jerusalem. Be ol tok we yumi harem long ol miting i kamaot long stamba buk we yumi folem, hemia Baebol. Taswe, evri miting i save givhan long yumi sipos yumi lesingud mo folem ol vas long prapa Baebol blong yumi.—Ol Wok 2:1-4; Hibrus 10:24, 25.

8, 9. (a) ?Wanem fasin mo tingting we yumi mas gat taem yumi stadi wanwan? (b) ?Yu ting se gol i sas no save blong God i sas?

⁸ Waes king ya i gohed blong talem se: “Yes, yu mas askem strong long Hae God, blong i mekem yu yu gat save, mo yu mas askem long hem oltaem, blong yu save haremsave mining blong ol strong samting.” (Ol Proveb 2:3) ?Ol tok ya i soemaot wanem fasin we yumi mas gat? !Yumi mas wantem tumas blong kasem save long Tok blong Jeova! Vas ya i soemaot se yumi mas glad blong stadi from we yumi wantem haremsave mining blong ol strong samting, mo yumi wantem save long ol samting we Jeova i wantem yumi blong mekem. I tru, blong mekem samting ya, yumi mas traehad, olsem nekis tok blong Solomon mo pijatok blong hem i soemaot.—Efesas 5:15-17.

⁹ Hem i talem se: “Oltaem yu mas traehad blong kasem waes ya, olsem we yu save traehad blong faenem silva, no wan narafala samting olsem, we man i bin berem.” (Ol Proveb 2:4) Vas ya i mekem yumi tingbaot ol man long ol handred yia we oli pas finis, we oli bin digim graon blong traem faenem ol sas  ston olsem silva mo gol. Samfala oli bin kilim narafala man i ded blong kasem gol. Samfala oli bin spenem ful laef blong olgeta blong lukaot sas samting ya. ?Be gol i rili sas? Sipos yu stap wokbaot long draeples nao yu lusum rod mo yu tosta gogo klosap yu ded. ?Olsem wanem? ?Bambae yu glad sipos yu faenem wan gol no yu glad moa blong faenem wan klin wota? !Yes, gol i no rili sas, mo tu, praes blong hem i stap jenis oltaem! * Nating se i olsem, plante man oli bin wok strong blong digim graon blong traem faenem gol. ?Taswe, yu no ting se yumi mas wok strong moa blong faenem waes, luksave mining blong ol strong samting, mo kasem save long God mo ol samting we hem i wantem? ?Sipos yumi traehad long rod ya, wanem gudfala samting we yumi save kasem?—Ol Sam 19:7-10; Ol Proveb 3:13-18.

10. ?Sipos yumi stadi long Tok blong God, yumi save kasem wanem gudfala samting?

¹⁰ Solomon i gohed blong talem se: “Sipos yu stap mekem olsem, bambae yu save kasem mining blong tok ya we i talem se, ‘Yu mas tinghevi long Hae God, mo yu mas ona gud long hem.’ Nao bambae yu save fasin blong hem moa, blong yu savegud hem.” (Ol Proveb 2:5) !Tingbaot nambawan samting ya! Yumi ol sinman yumi gat rod blong ‘savegud God’ Jeova, we hem i Haefala King mo Masta blong heven mo wol. (Ol Sam 73:28; Ol Wok 4:24) Ol waes man blong wol ya oli bin traehad blong plante handred yia blong kasem save long ol strong samting long saed blong laef, heven mo wol. Be, oli neva kasem mak ya we oli ‘savegud God.’ ?From wanem? From we, nating se Tok blong God Baebol i stap plante taosen yia finis, be ol man ya oli no wantem save long hem, oli talem se Baebol i isi tumas long olgeta. Taswe, oli neva bilif mo kasem save long Baebol.—1 Korin 1:18-21.

11. ?Wanem sam gudfala samting we yumi kasem taem yumi wanwan i stadi?

¹¹ Solomon i makem wan narafala gudfala samting we yumi save kasem long tok blong God, i se: “Hae God nomo i save mekem man i waes. Fasin blong save mo fasin blong haremsave, tufala i stap kamaot long hem nomo.” (Ol Proveb 2:6) Jeova i glad nomo blong givim plante waes, save mo fasin blong haremsave, long man we i traehad blong faenem ol samting ya. Taswe, i gat gudfala risen blong tinghae long stadi we yumi wanwan i mekem long Tok blong God, nating se yumi mas traehad, yumi mas strong long yumi wan blong mekem, mo yumi mas lego sam samting we yumi nomo i wantem. !Samting we yumi save talem tangkiu from, hemia se yumi gat Baebol finis, mo yumi no nid  blong mekem olsem ol man long taem bifo we oli mas raetem prapa kopi blong olgeta wanwan!—Dutronome 17:18, 19.

Laef We i Stretgud Long Fes Blong Jeova

12. ?Wanem tingting we i mas pulum yumi blong kasem moa save long saed blong God?

¹² ?Wanem tingting we i mas pulum yumi blong stadi wanwan? ?Yumi stadi blong soem se yumi moagud long ol narafala? ?Yumi stadi blong kasem moa save i winim ol narafala? ?Yumi wantem traem kasem mak we yumi save evri samting long Baebol? Nogat. Tingting we yumi mas gat se, yumi wantem gat Kristin fasin oltaem, hemia, taem yumi wokbaot, taem yumi toktok, mo long olgeta wok blong yumi. Mo oltaem yumi wantem stap rere blong givhan long ol narafala, long sem fasin olsem Kraes, we hem i leftemap tingting blong ol man mo mekem olgeta oli haremgud. (Matiu 11:28-30) Aposol Pol i givim woning ya se: ‘Save i stap mekem tingting blong man i go antap, i blong flas nomo. Be fasin ya we man i lavem God mo i lavem ol man, hem i stap leftemap laef blong man.’ (1 Korin 8:1) Taswe, yumi mas mekem olsem Moses, we tingting blong hem i stap daon mo hem i askem long Jeova se: “Plis yu tijim mi long ol fasin blong yu, blong mi save mekem ol wok blong yu, mo blong mi save stap mekem yu yu glad long mi olwe.” (Eksodas 33:13) Yes, yumi mas wantem faenem ol save ya, i no blong mekem ol man oli sapraes long yumi, be blong mekem God i glad. Yumi wantem kam ol man blong God we yumi gat tingting daon, mo we laef blong yumi i stret long fes blong Hem. ?Olsem wanem blong kam olsem?

13. ?Yumi mas mekem wanem sipos yumi wantem se God i glad long yumi?

¹³ Pol i talem long Timoti wanem samting hem i mas mekem blong God i glad long hem, i se: “Yu mas traehad long evri rod, blong yu kam prapa man blong wok we God i stap harem gud long yu we long fes blong hem, yu no gat sem long wok blong yu. Yu yu mas kam wan man we yu stap tijim ol man long trutok blong God long fasin we i stret gud.” (2 Timoti 2:15) Tok ya “tijim ol man . . . long fasin we i stret gud,” i kamaot long wan Grik tok we i minim “katem long stret laen” no ‘katem stret.’ (Kingdom Interlinear) Sam man blong stadi Baebol oli talem se tok ya i givim tingting blong wan woman we i stap katem kaliko folem laen blong wan narafala dres, no wan man blong wokem garen we i stap brekem graon folem wan stret laen. Nomata se i olsem wanem, be taem oli finisim wok ya, hem i mas stretgud, i no olbaot. Taswe, bigfala tingting we Pol i wantem givim long Timoti se, sipos hem i wantem mekem God i glad, hem i mas “traehad long evri rod” blong folemgud ol trutok blong Baebol long ol tijing mo fasin blong hem.—1 Timoti 4:16.

14. ?Olsem wanem stadi blong yumi wanwan i mas gat paoa long samting we yumi mekem mo talem?

¹⁴ Pol i talem sem samting bakegen long ol Kristin long Kolosi, taem hem i talem long olgeta se oli mas ‘mekem laef blong olgeta i kam stret gud olsem we [“Jeova,” NW ] i wantem.’ Olsem nao, ‘bambae oli save mekem ol stret fasin wetem ol gudgudfala wok, mo bambae oli gohed blong save God moa, nao hem bambae i save glad long olgeta.’ (Kolosi 1:10) Long ples ya, Pol i joenem fasin ya blong mekem Jeova i glad wetem “ol stret fasin wetem ol gudgudfala wok,” mo wetem fasin blong “save God moa.” Hemia i min se, i no naf long ae blong Jeova we yumi tinghae nomo long save olsem we i wan sas samting, be yumi mas folemgud Tok blong Hem tu long olgeta samting we yumi mekem mo talem. (Rom 2:21, 22) Taswe, blong mekem God i glad, ol samting we yumi lanem long stadi blong yumi wanwan i mas gat paoa long tingting mo fasin blong yumi.

15. ?Olsem wanem yumi save lukaotgud long tingting blong yumi mo bos long hem?

¹⁵ Tede, Setan i stap traehad fulwan blong spolem yumi long saed blong spirit. Blong kasem mak ya,  hem i traem mekem se oltaem i gat wan faet i stap gohed long tingting blong yumi. (Rom 7:14-25) Taswe, blong mekem God blong yumi, Jeova, i glad long yumi, yumi mas lukaotgud long ol tingting blong yumi, mo yumi mas bos long hem. Tul we yumi save yusum blong mekem samting ya, hemia ‘save blong God.’ Save ya i naf blong “tanem olgeta rabis tingting blong man, blong mekem olgeta oli ona long Kraes.” Taswe, i impoten we yumi stadi Baebol evri dei, nao bambae yumi naf blong sakemaot ol rabis tingting mo no moa tingting tumas long yumi wan nomo.—2 Korin 10:5.

Sam Tul We Oli Givhan Blong Kasem Save

16. ?Olsem wanem yumi givhan long yumi wan bakegen, taem yumi letem Jeova i tijim yumi?

¹⁶ Tijing blong Jeova i givhan long yumi long saed blong spirit mo bodi. Hem i no jes fulumap hed blong yumi wetem ol save we yumi lanem olsem nomo, be i no givhan long laef blong yumi. From samting ya, Jeova i talem se: “Mi mi Hae God, mi God blong yufala. Mi nao mi stap tijim yufala blong givhan long yufala, mo mi stap lidim yufala long ol rod we i stret blong yufala i folem.” (Aesea 48:17) ?Olsem wanem Jeova i lidim yumi long ol rod we oli givhan long yumi? Faswan samting se, yumi gat Tok we i kamaot long hem, Tabu Baebol. Hemia stamba buk we yumi yusum mo folem oltaem. From samting ya, i gud we oltaem yumi openem Baebol long ol Kristin miting mo ridim ol vas we oli kamaot. Yumi luk olsem wanem fasin ya i save givhan long yumi, taem yumi ridim stori blong man Itiopia long Ol Wok japta 8.

17. ?Wanem stori blong man Itiopia, mo stori ya i soemaot wanem?

¹⁷ Man Itiopia ya i joen long skul blong ol man Jiu. Hem i bilif fulwan long God, mo hem i stap stadi long Baebol. Wan dei, hem i stap sidaon long kat we hos i pulum, i stap ridim buk blong Aesea. Nao Filip i ron i go klosap long kat ya, mo i askem long man ya se: “?Olsem wanem? ?Yu yu save mining blong tok ya we yu stap ridim?” ?Wanem ansa blong man Itiopia ya? “ ‘?Bambae mi mi save olsem wanem? I no gat man blong i talemaot mining blong hem long mi.’ Nao hem i talem long Filip blong hem i jam long kat, i go sidaon wetem hem.” Ale, tabu spirit i givhan long Filip blong halpem man Itiopia ya blong save mining blong profet tok blong Aesea. (Ol Wok 8:27-35) ?Stori ya i soemaot wanem? Hem i soemaot se i no naf we yumi ridim Baebol nomo. Jeova i putum tabu spirit blong hem long slef we i stret mo waes, blong hem i naf blong givhan long yumi blong kasem mining blong Tok blong God long stret taem we hem i wantem. ?Olsem wanem hem i mekem samting ya?—Matiu 24:45-47, NW; Luk 12:42.

18. ?Slef we i stret mo waes i mekem wanem samting blong givhan long yumi?

¹⁸ Jisas i tokbaot slef ya se hem i “stret mo waes,” be i no talem se slef ya i no save mestem samtaem. Ol gudfala tabu Kristin we oli mekemap grup ya, oli no stret gud olgeta. Nating se oli traehad fulwan, be oli save mekem mastik, olsem sam tabu man oli bin mekem long faswan handred yia. (Ol Wok 10:9-15; Galesia 2:8, 11-14) Be bigfala samting se, hat mo tingting blong olgeta i klin. Mo Jeova i stap yusum olgeta blong givim ol buk we yumi nidim blong stadi Baebol, blong yumi save gat moa bilif long Tok blong God mo ol promes blong hem. Nambawan buk we slef ya i wokem, blong yumi yusum long stadi blong yumi wanwan, hemia Baebol ya New World  Translation of the Holy Scriptures. Oli tanem ful Baebol ya no haf blong hem, i go long 42 lanwis, mo oli prentem 114 milian kopi blong hem finis. ?Olsem wanem yumi save yusumgud Baebol ya taem yumi stadi wanwan?—2 Timoti 3:14-17.

19. ?Wanem sam samting long Baebol ya New World Translation—With References we oli save givhan long yumi wanwan blong stadi?

¹⁹ Tingbaot Baebol ya New World Translation of the Holy Scriptures—With References. I gat ol refrens we oli lidim yumi i go long ol narafala vas, i gat ol futnot, mo i gat wan smol diksonari biaen we oli raetem “Bible Words Indexed” (Ol Defdefren Wod Long Baebol) mo “Footnote Words Indexed” (Ol Defdefren Wod Long Ol Futnot). Mo tu, i gat haf ya we oli kolem Apendiks, we i givim save long 43 defren samting, wetem ol map mo plan we oli droem. Antap long hemia, i gat “Introduction” (Fastok) we i tokbaot ol hanraet we oli yusum blong wokem Baebol ya. Sipos yu save kasem Baebol ya long wan lanwis we yu yu save long hem, i gud yu yusum ol haf ya we yumi jes tokbaot. Baebol i stamba buk we yumi yusum taem yumi stadi wanwan, mo Baebol ya New World Translation, i makemgud nem blong God mo i leftemap rul blong Kingdom blong God.—Ol Sam 149:1-9; Daniel 2:44; Matiu 6:9, 10.

20. ?Wanem ol kwestin long saed blong stadi blong yumi wanwan we yumi mas faenem ansa blong olgeta?

²⁰ Naoia, maet yumi askem se: ‘?Yumi nidim wanem moa blong kasem mining blong Baebol? ?Olsem wanem yumi wanwan i save faenem taem blong stadi? ?Olsem wanem yumi save mekem se stadi ya i givhan moa long yumi? ?Stadi blong yumi i mas mekem wanem long ol narafala?’ Long nekis stadi, bambae yumi tokbaot ol impoten samting ya we oli givhan long yumi blong gohed gud long Kristin laef blong yumi.

[Futnot]

?Yu Yu Tingbaot?

• ?I minim wanem blong “tingting dip” mo “putum tingting i stap strong” long wan samting?

• ?Wanem tingting we yumi mas gat long saed blong stadi long Tok blong God?

• ?Wanem nao i stret risen blong yumi wanwan i stadi?

• ?Wanem samting we yumi gat blong givhan long yumi blong kasem mining blong Baebol?

[Kwestin]

[Tok blong pija long pej 15]

Ol memba blong Betel famle oli ridim wan vas blong Baebol evri dei mo oli luk se samting ya i givhan long olgeta long saed blong spirit

[Tok blong pija long pej 15]

Sipos yumi lesin long ol kaset blong Baebol taem yumi stap ron long trak, yumi no westem ol gudfala taem ya

[Tok blong pija long pej 16]

Longtaem finis i kam, ol man oli wok strong blong traem faenem gol. ?Yu yu stap traehad blong stadi long Tok blong God oltaem?

[Credit Line]

Courtesy of California State Parks, 2002

[Tok blong pija long pej 17]

Baebol i wan sas samting we i save lidim yumi blong kasem laef we i no save finis