Laef Stori

Kantri We Mifala i Misinari Long Hem i Kam Olsem Hom Blong Mifala

DICK WALDRON I TALEM STORI YA

Hem i Sarede aftenun, Septemba 1953. Mifala i stap long Saot-Wes Afrika (we naoia oli kolem Namibia). Ating i no kasem wan wik yet we mifala i stap long kantri ya, mo mifala i stap lidim wan pablik miting long bigfala taon ya Windhoek. ?From wanem mifala i livim Ostrelia blong muv i go long Namibia? Mi wetem waef blong mi, mo tri yangfala woman, mifala i kam long kantri ya olsem misinari blong talemaot gud nius blong Kingdom.—Matiu 24:14.

LAEF blong mi i stat long Ostrelia. Mi mi bon long bigfala yia ya 1914. Mi wan yang man nomo long taem blong Great Depression, hemia taem we ful wol i gat hadtaem long saed blong mane, ale mi tu mi mas wok blong givhan long famle blong mi blong kasem kakae. I no gat wok, be mi faenem wan rod blong kasem ol wael rabet we oli plante long Ostrelia. Taswe, bigfala samting we mi stap karem oltaem long famle blong mi blong oli kakae, hemia mit blong rabet.

Long 1939, taem seken wol wo i stat, mi stap wok long ol pablik transpot long siti blong Melbourne. I gat klosap 700 man oli stap woksift long ol bas, ale oltaem, mi stap mitim wan niufala draeva. Plante taem, mi askem long olgeta se, “?Wanem skul blong yu?” mo mi askem long olgeta blong oli eksplenem ol bilif blong olgeta. I gat wan man nomo we i givim ol gudfala ansa long mi, hem i wan Witnes blong Jeova. Hem i talem long mi mesej ya we i stanap long Baebol, se bambae i gat wan paradaes long wol we olgeta man we oli fraetgud long God bambae oli laef foreva long hem.—Ol Sam 37:29.

Long sem taem, mama blong mi tu hem i stat storian wetem ol Witnes blong Jeova. Plante taem, taem mi gobak hom afta we mi finisim wok wetem  laswan tim, mi faenem kakae blong mi i stap long tebol wetem wan kopi blong magasin ya Consolation (we naoia oli kolem Wekap!). Mi intres tumas long ol samting we mi stap ridim. Mi luksave we hemia i trufala skul ya. Mi stat joenem kongregesen, mo mi tekem baptaes long Mei 1940.

Long Melbourne i gat 25 paenia oli stap laef long wan haos paenia. Mi tu mi go laef wetem olgeta. Evri dei, mi stap lesin long ol nambawan stori blong olgeta long wok blong prij, mo sloslo mi tu mi wantem tumas blong kam wan paenia. Ale, mi fulumap wan pepa blong askem sipos mi save mekem wok blong paenia. Oli agri long pepa blong mi, mo oli singaot mi blong mi go wok long branj ofis blong ol Witnes blong Jeova. Ale, mi kam wan memba blong Betel famle.

Mi Go Kalabus Mo Oli Putum Tabu Long Wok

Wan long ol wok blong mi long Betel, hemia blong lidim wok long wan somel. Long ples ya, mifala i stap katem timba blong mekem jakol blong wokem bensin. Mifala i yusum bensin ya long ol trak blong sosaeti, from we long taem blong wo i hadwok blong kasem bensin. Mifala twelef man i stap wok long ples blong katem wud, mo mifala evriwan i gat yia we inaf blong joen long ami. I no longtaem biaen, oli jajem mifala se mifala i mas kalabus blong sikis manis, from we, folem tijing blong Baebol, mifala i no wantem joen long ami. (Aesea 2:4) Oli sanem mifala i go kalabus blong mekem ol strongfala wok. ?Yufala i save wanem kaen wok oli givim long mifala blong mekem? !Mifala i sapraes se oli talem long mifala blong katem wud, olsem mifala i mekem finis long Betel!

Mifala i wokgud tumas, gogo man we i bos long kalabus i letem mifala i gat wan Baebol wetem ol buk blong mifala we oli tokbaot Baebol, nating se hem i kasem strong oda finis se i tabu blong mifala i kasem ol buk olsem. Hemia long taem ya nao we mi lanem wan nambawan lesen long saed blong fasin fren wetem ol man. Taem mi stap wok long Betel, i gat wan brata we mi mi no save frengud wetem hem. Fasin blong hem wetem fasin blong mi, tufala i defren olgeta. ?Ale yu save hu nao i kalabus wetem mi long semfala rum? Hemia brata ya nao. Long kalabus, mitufala i rili gat taem blong savegud mitufala, mekem se biaen mitufala i kam ol gudfala fren.

Taem i pas, nao oli putum tabu long wok blong ol Witnes blong Jeova long Ostrelia. Oli karemaot mane blong sosaeti, mo ol brata we oli stap wok long Betel oli gat smol mane nomo. Wan dei, wan brata blong Betel i kam luk mi mo i talem se: “Dick, mi wantem go prij long taon, be mi no gat sus, mi gat ol but blong wok nomo.” Mi glad blong givhan long hem, ale hem i go prij long taon wetem ol sus blong mi.

Biaen, mi harem nius se ol polis oli holem hem mo oli putum hem long kalabus, from we hem i stap prij. Mi sanem wan smol leta long hem we i se: “Sore tumas long yu. Mi glad nomo se long taem ya i no mi we mi stap werem sus ya.” Be i no longtaem i pas, oli holem mi tu, mo hemia i namba tu taem we oli sanem mi mi go long kalabus from we mi no wantem joen long ami. Taem mi gofri, ol brata oli givim wok ya long mi se mi mas lukaot long fam we i givim kakae blong Betel famle. Long taem ya, mifala i win long kot, mo oli karemaot tabu we oli bin putum long wok blong ol Witnes blong Jeova.

Mi Maredem Wan Sista We i Wok Strong Blong Prij

Taem mi stap wok long fam, mi stat tingting gud blong mared, mo mi intres long wan yangfala sista we i paenia, nem blong hem Coralie Clogan. Faswan man we i intres long mesej blong Baebol long famle blong Coralie, hemia bubu woman blong hem. Bifo we hem i ded, hem i talem long Vera, mama blong Coralie, se: “Yu mas tijim ol pikinini blong yu blong oli lavem God mo oli mekem wok blong hem, mo wan dei bambae yumi stap tugeta long Paradaes long wol.” Biaen, taem wan paenia i kam long haos blong Vera wetem buklet ya Millions Now Living Will Never Die, Vera i luksave mining blong tok blong mama blong hem. Buklet ya i pruvum se stamba tingting we Jeova i gat long saed blong ol man, hemia se oli haremgud long laef blong olgeta long wan paradaes long wol. (Revelesen 21:4) Hem i tekem baptaes long stat blong ol yia 1930, mo folem advaes blong mama blong hem, hem i halpem ol trifala gel blong hem—Lucy, Jean, mo Coralie—blong trifala i lavem God. Nating se i olsem, papa blong Coralie i agensem strong ol bilif blong famle blong hem. Fasin ya i laenap wetem woning we Jisas i givim se  ol samting olsem bambae oli save hapen insaed long famle.—Matiu 10:34-36.

Long famle Clogan, oli gat gudhan blong plei miusik, mo evri pikinini i save plei long wan instrumen. Coralie i plei vaeolin, mo hem i gat 15 yia blong hem long 1939 taem hem i kasem wan setifiket blong miusik. Taem Wol Wo Tu i stat long 1939, Coralie i tingting gud long fiuja blong hem. Naoia i taem blong hem i tekem wan disisen, se bambae hem i mekem wanem long laef blong hem. Faswan samting, hem i save faenem wan wok long saed blong miusik. Oli invaetem hem finis blong hem i go plei long Melbourne Symphony Orchestra. Seken samting, hem i save spenem taem blong hem long bigfala wok ya blong talemaot mesej blong Kingdom. Coralie wetem tufala sista blong hem, trifala tugeta i tingting dip long ol samting ya. Oli tekem baptaes long 1940, mo oli stat mekem rere blong joen long fultaem wok blong prij.

Coralie i jes tekem disisen se bambae hem i wok fultaem blong Jeova taem Lloyd Barry i kam storian wetem hem. Brata ya i lukaot long wok long branj ofis blong Ostrelia mo biaen i kam wan memba blong Hed Kampani. Brata Barry i jes givim wan tok long Melbourne mo i talem long Coralie se: “Mbae mi gobak long Betel. ?Olsem wanem sipos yu kam wetem mi long tren, mo yu joenem Betel famle?” Coralie i glad tumas mo hem i agri.

Coralie wetem ol narafala sista long Betel famle, oli mekem wan impoten wok blong givim ol buk blong eksplenem Baebol long ol brata long Ostrelia, long taem we oli putum tabu long wok blong ol Witnes. Oli mekem bighaf blong ol wok blong prentem ol buk, mo Brata Malcolm Vale i stap lukaot long wok blong olgeta. Oli prentem mo oli baenem tufala buk ya The New World mo Children, mo oli prentem olgeta Wajtaoa long bitim tu yia we oli putum tabu long wok blong mifala.

Oli mas jenisim ples we oli prentem ol buk long hem 15 taem, blong ronwe long polis. Wan taem, oli stap prentem ol buk blong eksplenem Baebol long wan rum aninit long graon blong wan bilding. Long bilding ya, oli stap prentem sam buk we oli defren olgeta, blong haedem ol wok we i stap gohed aninit long graon. Sipos i gat sam denja, sista we i wok long ofis blong welkam i save pusum wan baten we i ringim wan bel long rum aninit long graon. Ale, ol sista oli gat taem blong haedem ol buk, bifo we ol man oli kam blong lukaotem wan samting.

Wan dei, taem sam polis oli kam blong lukaotem ol buk, sam long ol sista ya oli fraet tumas taem oli luk se i gat wan Wajtaoa i stap antap long tebol, long wan ples we evri man i save luk. Polisman we i kam insaed long rum, i putum basket blong hem stret antap long Wajtaoa, nao hem i go lukaot buk olbaot long bilding ya. !Hem i no faenem wan samting nating, i tekem basket blong hem mo i aot long rum!

Taem oli karemaot tabu long wok blong mifala, mo oli givim branj ofis i gobak long ol brata, plante brata oli gat janis blong go prij olsem spesel paenia. Hemia long taem ya we Coralie i volontia blong go prij long Glen Innes. Mi joenem hem longwe, mo mitufala i mared long Jenuware 1, 1948. Taem mitufala i livim ples ya, i gat wan kongregesen i stap we i gohed gud long saed blong spirit.

Biaen, mitufala i go prij long Rockhampton, be mitufala i no faenem wan haos blong stap long hem. Taswe mitufala i putumap wan tapolen long wan pis graon, long fam blong wan man we i intres long trutok. Mitufala i laef long ples ya blong naen manis. Maet mitufala i save stap longtaem moa long tapolen ya, be long taem blong ren, wan strongfala win i terterem tapolen blong mitufala mo bigfala ren i wasemaot hem. *

 Mitufala i Muv i Go Long Wan Narafala Teritori

Taem mitufala i stap long Rockhampton yet, oli invaetem mitufala blong go long Wajtaoa Baebol Skul blong Gilead, blong mitufala i kasem wan trening olsem misinari. Hemia from wanem long 1952, afta we mitufala i kasem setifiket, oli sanem mitufala i go prij long kantri we long taem ya, oli kolem Saot-Wes Afrika.

Kwiktaem nomo, ol lida blong Krisendom oli soem klia wanem tingting blong olgeta long saed blong wok blong prij blong mifala. Evri Sande, gogo kasem sikis wik, oli mekem ol jos sevis blong givim woning long ol man blong olgeta agensem mifala. Oli talem long ol man se oli no mas openem doa long mifala, mo oli no mas letem mifala i ridim Baebol long olgeta, from we bambae mifala i save mekem olgeta i konfius. Long wan ples, mifala i seremaot plante buk, be wan lida blong jos i stap folem mifala long ol haos wanwan, mo i stap karemaot ol buk we mifala i givim long ol man. Wan dei, mifala i storian long ofis blong man ya, mo mifala i luk se hem i gat plante long ol buk blong mifala.

Kwiktaem nomo, ol haeman blong ples ya tu oli soem se oli wari from wok blong mifala. Ol haeman ya oli ting se mifala i joen wetem ol Komunis, i sua se ol lida blong jos nao oli biaenem tingting ya. Taswe, oli tekem finggapren blong mifala, mo oli askem plante kwestin long sam man we mifala i stap visitim olgeta. Nating se ol man oli agensem wok blong mifala, plante moa man oli kam long ol miting.

Stat long taem we mifala i kam long kantri ya, mifala i wantem tumas blong talemaot gud nius blong Baebol long ol man Ovambo, ol man Herero, mo ol man Nama blong ples ya. Be i no isi nating. Long taem ya, Saot-Wes Afrika i stap aninit long gavman blong Saot Afrika, we i folem loa blong apartheid. * From we mifala i waetman, mifala i no gat raet blong go prij long ol ples we i gat ol blak man long hem. Mifala i mas askem gavman blong givim wan pemit long mifala fastaem. Sam samtaem, mifala i raetem wan leta blong askem pemit ya, be oli no wantem givim long mifala.

Mitufala i stap tu yia long ples ya, nao mitufala i gat wan sapraes. Coralie i gat bel. Dota blong mitufala, Charlotte, i bon long Oktoba 1955. Nating se mitufala i no moa save gohed long wok blong misinari, mi faenem wan haftaem wok mo mi gohed long wok blong paenia blong smoltaem.

God i Ansa Long Ol Prea Blong Mifala

Long 1960, mitufala i fesem wan narafala traem. Coralie i kasem wan leta we i talem se mama blong hem i sik tumas, mo sipos hem i no gobak hom, maet bambae hem i neva luk mama blong hem bakegen. Taswe mifala i plan blong lego Saot-Wes Afrika blong gobak long Ostrelia. Biaen, wan bigfala samting i hapen—stret long wik ya we mifala i mas gobak, mi kasem wan leta blong gavman we i givim raet long mifala blong go prij long Katutura,  ples ya we ol blakman oli laef long hem. ?Bambae mifala i mekem wanem? Mifala i traehad seven yia finis blong traem kasem pemit ya. ?Olsem wanem? ?Bambae mifala i givimbak pemit ya? I isi blong ting se, i oraet nomo, ol narafala bambae oli save mekem wok ya we mifala i statem. ?Be pemit ya, maet hem i wan blesing blong Jeova, wan ansa long ol prea blong mifala?

Kwiktaem nomo mi tekem disisen blong mi. Bambae mi mi stap long kantri, from we sipos mifala evriwan i muv i go long Ostrelia, maet bambae oli karemaot pemit blong mifala blong stap long Afrika. Long nekis dei, mi kanselem tikit blong mi long bot, mo mi sanem Coralie wetem Charlotte tufala i go long Ostrelia, i olsem we tufala i go long wan longfala holide.

Taem tufala i stap longwe, mi mi stat prij long ol eria ya we i gat ol blakman nomo oli stap long hem. Ol man ya oli intres bigwan long trutok. Taem Coralie wetem Charlotte tufala i kambak, plante long ol man blong ol eria ya oli stap kam long ol miting.

Long taem ya, mi gat wan olfala trak we mi stap yusum blong karem olgeta man we oli intres oli go long ol miting. Mi gokam wetem trak ya fo no faef taem blong go long evri miting, we long wan trip mi karem seven, eit, no naen man i kam long trak. Taem laswan man i aot long trak, Coralie i laf mo i askem long mi se: “?I gat hamas man i stap yet aninit long jea?”

Blong mifala i wokgud moa, mifala i harem se i gud sipos ol manples oli gat ol buk long prapa lanwis blong olgeta. Taswe, mi gat bigfala janis ya blong mekemrere evri samting, blong mifala i tanem traket ya Life in a New World i go long ol fofala lanwis ya: Herero, Nama, Ndonga, mo Kwanyama. Ol man we bambae oli tanem tok blong traket ya oli skulgud mo oli stap stadi Baebol wetem mifala. Nating se i olsem, mi mas wok wetem olgeta blong meksua se oli tanemgud evri tok. Long lanwis Nama, i no gat plante wod. Eksampol, mi traem eksplenem poen ya se: “Fastaem, Adam i stretgud olgeta.” Man we i mas tanem tok ya i skrasem hed blong hem, mo i talem se hem i no rimemba wanem tok nao we oli yusum long lanwis Nama blong talem “stretgud olgeta.” Hem i tingting gogo, nao hem i se: “Saye, mi save. Fastaem, Adam i raep gud olsem wan frut.”

Mifala i Glad Blong Laef Long Kantri Ya

Samwe 49 yia i pas finis we mifala i laef long kantri ya, we tede oli kolem Namibia. Mifala i no moa nidim wan pemit blong go prij long ol ples we i gat ol blakman nomo. I gat wan niufala gavman long Namibia, mo konstitusen blong hem i no mekem we man i seraot from kala blong skin. Tede, long Windhoek i gat fo bigfala kongregesen we oli holem ol miting long ol naesfala Haos Kingdom.

Plante taem mitufala i tingbaot tok ya we mitufala i harem long Gilead se: “Kantri we yufala i go prij long hem i mas kam hom blong yufala.” Taem mitufala i luk olsem wanem Jeova i bin lidim evri samting, mitufala i sua fulwan we hem i wantem we mitufala i mas stap long kantri ya. Mifala i lavem tumas ol brata long ples ya, wetem ol defdefren kalja blong olgeta. Mifala i bin laf wetem olgeta taem oli haremgud mo mifala i bin krae wetem olgeta taem oli harem nogud. Sam blong ol niufala ya we bifo oli fulumap trak blong mi blong go long ol miting, tede oli bigman long saed blong spirit mo oli olsem ol pos long kongregesen. Taem mifala i kam long bigfala kantri ya long 1953, namba blong ol manples we oli stap talemaot gud nius i no kasem ten. Namba ya, we fastaem i smol nomo, i gru i kam bigwan gogo kasem tede we i bitim 1,200 pablisa. Olsem Jeova i promes finis, ol samting we mitufala wetem sam narafala i bin ‘planem mo klinim,’ be Jeova i mekem i gru gud.—1 Korin 3:6.

Taem mi mo Coralie, mitufala i luklukbak long ol yia we mitufala i spenem long fultaem wok, fastaem long Ostrelia mo naoia long Namibia, mitufala i haremgud tumas. Mitufala i hop mo i prea long Jeova se bambae hem i givim paoa long mitufala, blong mitufala i save mekem wok blong hem blong olwe, naoia mo long fiuja.

[Ol Futnot]

[Tok blong pija long pej 26]

Mitufala i go wok long Rockhampton, Ostrelia

[Tok blong pija long pej 27]

Long wof bifo we mitufala i go long Gilead Skul

[Tok blong pija long pej 28]

Mitufala i glad tumas blong prij long Namibia