Long Tebol Blong Kapten

TAEM ol man oli wokbaot long sip, oli laekem tumas blong kakae long tebol blong kapten, from we i gat ol gudgudfala kakae long ples ya, mo tu, oli save storian gud wetem ol man we oli kamaot long ol defdefren ples. Be wan storian we i kamaot long tebol blong Kapten Robert G. Smith long sip blong White Star Line, i givim save long saed blong wan narafala kakae, hemia ol trutok blong Baebol.—Aesea 25:6.

Long 1894, Robert i gat 24 yia blong hem. Long taem ya, hem i kam kapten blong seling sip ya Kinclune of Dundee mo hem i rere blong mekem faswan trip blong hem raon long wol. Biaen, hem i kam kapten blong sam sip blong kampani ya White Star, olsem sip ya Cedric, Cevic, mo Runic. * Long wan long ol sip ya, hem i aot long New York blong krosem solwota blong Atlantik i go long Liverpool, Inglan. Long trip ya, Robert i singaot Charles Taze Russell blong i kam kakae long tebol blong hem. Storian blong Russell long saed blong Baebol i pulum tingting blong Robert. Blong kasem moa save, Robert i karem ol buk ya, Studies in the Scriptures we Russell i givim long hem.

Biaen, Russell i raetem leta i go long Robert, nao intres blong Robert long Baebol i kam bigwan moa. Hem i tokbaot ol niufala save ya long woman blong hem. I no longtaem, tufala tugeta oli kam Baebol Studen, hemia nem blong ol Witnes blong Jeova long taem bifo. Biaen, Robert i gat janis blong givim sam tok long saed blong Baebol, long fored blong ol man. Long Brisbane, Ostrelia, hem i givim wan tok we nem blong hem, “Wan Senta We i Kamaot Long Gilead.” Hem i soemaot se ol save long Tok blong God i olsem “wan meresin we i save winim olgeta trabol blong wol.” Long trip ya, woman blong hem mo ol pikinini blong hem oli no folem hem, oli stap long Inglan nomo. Ale, oli tekem janis blong soemaot ol slaed pija ya “Photo-Drama of Creation,” mo long semtaem, oli mekem gramafon i wok, blong ol man oli harem toktok blong Russell.

Robert i tijim ol pikinini blong hem long trutok blong Kingdom we hem i kasem. Tede, 18 smol bubu we oli kamaot long laen blong Robert oli bisi yet blong talemaot gud nius long ol narafala. Oli glad we kapten ya i bin kasem gudfala kakae blong Baebol long tebol blong hem.

Wok blong ol Witnes blong Jeova blong tijim ol man long Baebol, mo ol buk blong olgeta tu, oli stap givhan long plante man long wol, blong oli lanem ol tok blong Baebol we i bin pulum tingting blong Kapten Smith. Yu tu yu save faenemaot ol save ya we i bin kamaot long tebol blong kapten ya.

[Futnot]

[Tok blong pija long pej 8]

Robert G. Smith

[Tok blong pija long pej 8]

Charles T. Russell