Mekem Han Blong Yu i Strong

BAEBOL * i tokbaot han bitim 1,800 taem. Hem i yusum ol pijatok long saed blong han blong eksplenem plante defren samting. Eksampol, han we i klin i wan pijatok blong minim se wan man i no gat rong. (2 Samuel 22:21; Ol Sam 24:3, 4) Fasin blong openem han i min se man i givim samting long gladhat blong hem. (Dutronome 15:11; Ol Sam 145:16) Taem man i putum laef blong hem long denja, i olsem we laef blong man ya i stap long han blong hem. (1 Samuel 19:5) Man we i slakem han blong hem, hemia i min se tingting blong hem i foldaon. (2 Kronikel 15:7) Mo mekem han blong wan man i strong, i min se yu givim paoa long man ya blong i mekem wan wok.—1 Samuel 23:16.

Tede, i impoten tumas we yumi mekem han blong yumi i strong. Yumi stap long wan taem we ‘laef long wol ya i strong tumas.’ (2 Timoti 3:1) Taem tingting blong yumi i foldaon, i isi tumas blong slakem han blong yumi, min se yumi lego evri samting. Plante taem, yumi luk we ol yangfala oli lego skul, ol hasban oli livim famle blong olgeta, mo ol mama oli lego ol pikinini blong olgeta. Yumi ol Kristin, yumi mas mekem han blong yumi i strong, blong yumi stanap strong taem yumi fesem ol traem long wok blong God. (Matiu 24:13) Sipos yumi mekem olsem, bambae yumi mekem Jeova i glad we i glad.—Ol Proveb 27:11.

Olsem Wanem Blong Mekem Han i Strong

Long taem blong Esra, ol man Jiu oli mas mekem han blong olgeta i strong blong finisim wok blong bildim tempol blong Jeova long Jerusalem. ?Olsem wanem oli mekem han blong olgeta i strong? Baebol i talem se: “Long ol seven dei blong Lafet ya we oli Kakae Bred we i No Gat Is long hem, olgeta oli glad tumas. Oli glad from we Hae God i mekem we king blong Pesia we narafala nem blong hem king blong Asiria, hem i glad long olgeta, i givhan long olgeta [no “i mekem han blong olgeta i strong,” NW ] blong oli wokem haos ya blong God ya we i God blong yumi i gud bakegen.” (Esra 6:22) Yes, tabu spirit blong Jeova i pulum “king blong Asiria” blong i letem ol man blong God oli gobak long Jerusalem, mo i pulum tingting blong ol man blong hem tu blong oli finisimgud wok we oli statem finis.

Biaen, taem oli mas mekem stonwol blong Jerusalem i gud bakegen, Nehemaea i mekem ol han blong ol brata blong hem oli strong blong mekem wok ya. Yumi ridim se: “Mi talemaot long olgeta olsem wanem we [“han blong,” NW ] God i stap wetem mi, mo we i bin givhan long mi, mo we king i toktok long mi olsem wanem. Nao olgeta oli talem se, ‘Yes, yumi mas statem wok ya. Yumi mas wokem stonwol ya i gud bakegen.’ Nao oli go [“mekem han blong olgeta i strong,” NW ] blong mekemrere blong statem wok ya.” !Naoia, han blong Nehemaea mo ol narafala man Jiu i strong mo oli rere blong bildim bakegen ol stonwol blong Jerusalem long 52 dei!—Nehemaea 2:18; 6:9, 15.

Long sem fasin, Jeova i mekem han blong yumi i strong blong talemaot gud nius blong Kingdom. (Matiu 24:14) Hem i stap ‘givim evri gudfala samting long yumi blong yumi wokem ol samting we hem i wantem.’ (Hibrus 13:21) Hem i givim ol beswan  tul long yumi. Yumi gat Baebol, wetem ol buk, ol magasin, ol buklet, ol traket, ol kaset mo ol video we oli stanap long Baebol. Yumi save yusum olgeta samting ya blong talemaot gud nius long olgeta man raon long wol. Ol buk blong yumi oli stap long 380 lanwis. Antap long samting ya, Jeova i stap yusum ol miting blong kongregesen wetem ol asembli blong tijim yumi olsem wanem blong yusumgud ol gudfala tul ya long wok blong prij.

Nating se Jeova i yusum ol defren rod blong mekem han blong yumi i strong, be hem i wantem tu se yumi traehad. Tingbaot ol tok blong profet Elaeja taem hem i toktok wetem King Jehoas, we i kam luk hem blong askem sam help blong faet agensem ol man Siria. Elaeja i talem long king se hem i mas tekem sam ara, mo i mas kilkilim graon long hem. Baebol i talem se: “Hem i tekem ol ara ya, i kilim graon long hem tri taem, nao i finis. Be samting ya i mekem profet i kros, nao i talem long hem se, ‘Sipos yu kilim graon ya faef taem no sikis taem, bambae yu save winimgud olgeta, be naoia, bambae yu winim olgeta tri taem nomo.’ ” (2 King 13:18, 19) From we Jehoas i no gat strong tingting, hem i jes winim sam faet nomo agensem ol man Siria.

I sem mak long yumi tede. Sipos yumi wantem mekem wok we Jeova i givim long yumi blong mekem, i nogud yumi wari long ol traem we yumi save fesem mo yumi no mas tingting oltaem se teritori blong yumi i had olsem wanem. I moa gud yumi wok strong wetem fulhat blong yumi long wok we Jeova i givim long yumi. Yumi mas mekem han blong yumi i strong mo yumi mas lukluk i go long Jeova blong i givhan long yumi.—Aesea 35:3, 4.

Bambae Jeova i Mekem Han Blong Yumi i Strong

Yes, bambae Jeova i mekem han blong yumi i strong blong yumi save mekem samting we hem i wantem. Bambae Jeova i no mekem ol merikel, mo i no mekem evri samting blong yumi. Hem i wantem we yumi mas mekem wok blong yumi—yumi mas ridim Baebol evri dei, mekemrere mo go long ol miting oltaem, joen plante long wok blong prij, mo prea long hem oltaem. Sipos yumi gat bilif mo yumi givim bes blong yumi blong mekem wok blong yumi taem yumi gat janis yet, bambae Jeova i givim paoa long yumi blong yumi naf blong mekem samting we hem i wantem.—Filipae 4:13.

Traem tingbaot stori blong wan Kristin brata we i lusum waef mo mama blong hem, we tufala i ded long sem yia nomo. Hem i stap harem soa yet taem waef blong boe blong hem i lego boe ya mo trutok. Brata ya i talem se: “Mi lanem se yumi no save jusum ol traem blong yumi, wetaem bambae oli kam, mo hamas taem we bambae oli kasem yumi.” ?Wanem i givim paoa long brata ya blong i save gohed? Hem i ansa se: “Mi prea mo mi stadi mi wan, mo samting ya i sevem laef blong mi olsem we laefjaket i sevem man long solwota we i raf. Ol brata sista tu oli sapotem mi, mo mi haremgud tumas from. Antap long samting ya, mi luksave we i impoten tumas blong frengud wetem Jeova bifo we yumi kasem ol traem.”

Nating se laef blong yu i had olsem wanem, yu mas gat strong tingting blong trastem Jeova fulwan mo yusumgud olgeta samting we hem i rerem finis blong mekem han blong yu i strong. Sipos yu mekem olsem bambae yu givim bes blong yu long wok blong Jeova mo yu presem mo givim ona long haefala nem blong hem.—Hibrus 13:15.

[Futnot]

[Tok blong pija long pej 31]

From we Jehoas i no gat strong tingting, hem i jes winim sam faet nomo agensem ol man Siria