Oli Givim Wanem We Oli No Naf Blong Givim

“BAMBAE mi no kros sipos yu talem se mi mi olsem puaman we i stap asaskem mane olbaot. Mane ya we mi stap asaskem olbaot, hem i blong Jisas.” Ol tok ya blong wan pasta blong Protestan jos, oli soemaot se i gat sam man we oli no glad long fasin blong jos blong askem mane. I luk olsem se ol jos oli no save gohed long wok blong olgeta sipos oli no kasem bigfala mane. Oli nidim mane blong pem ol pasta, blong bildim mo lukaot long ol joshaos, mo blong prijimaot gospel. ?Mane we ol jos oli nidim i kam long weples?

Plante jos oli stap yusum fasin blong mekem taet. * Wan pasta we nem blong hem Norman Robertson, i talem se: “God i yusum fasin ya blong givim taet, blong karem inaf mane blong sapotem Kingdom blong Hem long wol. God i yusum rod ya nao blong mekem se [jos] i save talemaot Gospel.” Pasta ya i no sem blong pusum ol man blong tingbaot se oli mas givim mane long jos. Hem i tok stret se: ‘Fasin blong givim taet i no wan samting we yu mekem from we yu gat inaf mane. Nogat. Fasin obei nao i mas pusum yu blong givim taet. Man we i no givim taet blong hem, hem i go agensem loa blong God stret. I olsem we hem i tekem mane we i no blong hem.’—Tithing—God’s Financial Plan.

Ating yu agri se fasin blong givim presen mane i haf blong Kristin wosip. ?Be, yu yu faenem se tingting blong yu i trabol mo yu harem nogud taem jos i askem mane oltaem? Inácio Strieder, wan man Brasil we i stadi long ol tijing blong jos, i tok agensem ol jos from we oli yusum fasin blong mekem taet blong “winim ol problem we jos i gat.” Mo hem i talem se fasin ya i “agensem loa, i spolem man, mo i no agri wetem tijing blong jos.” From fasin ya, “ol man we oli no gat wok, ol wido woman, ol man we oli stap long ol eria we oli pua, mo olgeta we oli no luksave samting, oli kasem tingting ya se God i lego olgeta mo [jos] i stap fosem olgeta blong givim mane i go long ‘pasta’ gogo oli no moa save pem kakae blong fidim famle blong olgeta.”

Maet yu yu askem se: ‘?Ol jos we oli fosem ol man blong givim taet, oli rili folem tijing blong Baebol? ?No, maet sam jos oli yusum fasin fraet long God olsem rod blong stilim mane blong ol man? ?God i rili wantem we man i givim mane we i bitim wanem we hem i naf blong givim?’

[Futnot]