Taem Blong Yumi i Nambawan

?TAEM yu fesem sam hadtaem, yu stap sore long laef blong yu bifo, taem we ol samting oli gud moa? Ale, traem tingbaot ol tok blong waes King Solomon we i talem se: “I nogud yu stap talem se, ‘?From wanem we bifo ol samting i gud we i gud, i winim tede?’ Hemia i no tok blong man we i gat hed ya.”—Prija 7:10.

?From wanem Solomon i givim advaes ya? From we hem i luksave se taem wan man i gat stret tingting long saed blong ol samting we oli hapen bifo, hem i naf moa blong dil wetem ol nogud samting we oli stap hapen tede. Olgeta we oli wantem tumas blong laef yet long “gudfala taem blong bifo” oli fogetem se long taem bifo tu, laef i fulap long ol problem mo ol trabol. I neva gat wan taem we laef blong yumi i rili bin gud olgeta. Maet i bin gat sam samting we oli moa gud i winim tede, be bighaf blong ol samting long taem blong bifo oli nogud tu. Yes, Solomon i tok tru nomo taem i talem se i no waes blong toktok tumas long ol samting blong bifo, from we yumi no save gobak long taem ya.

?Sipos yumi sore tumas long ol samting blong bifo, samting ya i save spolem yumi? Yes. Fasin ya i save blokem yumi from we bambae yumi no rere blong jenis mo traem blong laef wetem ol samting we oli stap hapen. Mo fasin ya i save blokem yumi blong no luksave taem we yumi laef long hem naoia, mo nambawan hop blong yumi.

Nating se ol problem oli stap kam antap long fulwol, taem blong yumi i nambawan. ?From wanem? From we yumi laef long taem ya we klosap nao stamba tingting blong God long saed blong wol ya mo ol blesing we oli kamaot from rul blong Kingdom blong God, bambae oli kamtru. Baebol i mekem promes ya se: “Hem bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.” (Revelesen 21:4) Long taem ya, bambae ol samting oli kam gud we oli gud tumas, mo bambae i no moa gat man we i sore long “gudfala taem blong bifo.”