!“Oltaem, Yufala i Mas Lukaot Gud”!
!“Oltaem, Yufala i Mas Lukaot Gud”!
“Tok ya we mi talem long yufala, mi stap talem long olgeta man se, ‘Oltaem, yufala i mas lukaot gud.’ ”—MAK 13:37.
1, 2. (a) ?Wanem lesen we wan man i lanem long saed blong olting blong hem? (b) ?Olsem wanem pijatok blong Jisas long saed blong wan stilman i tijim yumi se yumi mas wekapgud?
WAN MAN, nem blong hem Juan, i putumgud ol sas samting blong hem long haos blong hem. Hem i haedem olgeta aninit long bed, wan ples we hem i stap talem se i moa sef i bitim ol narafala ples long haos. Be, wan naet, taem hem mo woman blong hem i stap slip, wan stilman i kam insaed long haos blong tufala. I klia se stilman ya i save stret ples blong faenem ol sas samting ya. Long kwaet fasin, hem i tekemaot evri sas samting we i stap aninit long bed, wetem sam mane we Juan i bin putum long kabod klosap long bed. Long nekis moning, Juan i faenemaot ol wok blong stilman ya. Hem i lanem wan bigfala lesen long naet ya we i no save fogetem, hemia se: Wan man we i stap slip i no save gad long olting blong hem.
2 I sem mak long saed blong spirit. Sipos yumi stap slip, yumi no save lukaotgud long bilif blong yumi mo putum tingting blong yumi i stap strong long ol gudfala promes blong fiuja. Taswe, Pol i talem tok ya se: “I no stret blong yumi stap slip olsem ol narafala man. I stret blong yumi wekap, we hed blong yumi i klia gud.” (1 Tesalonaeka 5:6) Blong soem se i impoten blong stap wekap, Jisas i talem wan pijatok long saed blong wan stilman. Hem i stap tokbaot ol samting we oli mas hapen bifo we hem i kamtru olsem Jaj, nao hem i givim woning ya se: “Yufala i mas lukaot gud, from we yufala i no save wanem dei, mi, mi Masta blong yufala, bambae mi kamtru long hem. Mo yufala i mas save se sipos man i save wanem taem long naet man blong stil bambae i kam long haos blong hem blong i stil, bambae hem i no save slip. Bambae hem i stap gad long haos blong hem, blong man ya i no save brekem haos blong hem blong i stil. Nao from samting ya, oltaem yufala i mas rere, from we mi, mi Pikinini blong Man, bambae mi kamtru long taem we yufala i no tingbaot.” (Matiu 24:42-44) Wan stilman i no stap talemaot stret taem we bambae hem i kam. Hem i wantem kamtru long wan taem we man i no tingbaot. Jisas i talem se bambae i sem mak long en blong rabis fasin blong wol ya, en ya bambae i kam ‘long taem we yumi no tingbaot.’
‘No Slip Mo Stanap Strong Long Bilif’
3. ?Olsem wanem parabol blong ol man we oli stap wet long masta blong olgeta, i soemaot se i impoten we yumi stap wekapgud?
3 Long Gospel blong Luk, Jisas i talem se ol Kristin oli olsem ol man blong wok we oli stap wet long masta blong olgeta, blong i aot long lafet blong mared, i kamhom. Oli mas lukaotgud se oli no stap slip taem hem i kamtru, oli mas rere blong welkamem hem. Jisas i tokbaot samting we i sem mak i se: “Mi, mi Pikinini blong Man, bambae mi kamtru long taem we yufala i no tingbaot.” (Luk 12:40) Samfala we oli bin mekem wok blong Jeova blong plante yia, oli save letem tingting blong olgeta i kam slak mo maet oli no moa ting se taem ya we yumi stap long hem i impoten. Maet oli no moa ting se en i klosap tu. Be tingting ya i save mekem se yumi no moa tinghae long ol samting long saed blong spirit, i save mekem se yumi ronem moa ol sas samting. Ol samting ya oli save pulum tingting blong yumi, gogo yumi slip long saed blong spirit.—Luk 8:14; 21:34, 35.
4. ?Wanem bilif we bambae i givhan long yumi blong lukaotgud, mo olsem wanem Jisas i soemaot samting ya?
4 Parabol ya blong Jisas i tijim yumi long wan narafala samting tu. I tru se ol man blong wok oli no save wanem aoa stret we masta blong olgeta bambae i kamtru. Be i luk olsem se oli save wanem naet bambae hem i kamtru. Sipos oli bin ting se maet masta blong olgeta i kam long wan narafala naet, bambae i had long olgeta blong stap wekap blong ful naet ya. Be i no olsem, olgeta oli save wanem naet bambae hem i kamtru, mo samting ya i mekem tingting blong olgeta i strong blong stap wekap. Long sem fasin, ol profet tok blong Baebol oli soemaot klia se yumi stap long taem blong en. Be oli no talem wanem dei no aoa stret we en ya bambae i kam. (Matiu 24:36) Bilif blong yumi se en bambae i mas kam, i save givhan long yumi blong stap wekap. Be sipos yumi bilif se dei blong Jeova i klosap tumas, bambae tingting blong yumi i strong moa blong lukaotgud.—Sefanaea 1:14.
5. ?Olsem wanem yumi save folem tok blong Pol blong ‘lukaot gud mo no slip’?
5 Taem Pol i raetem leta i go long ol man Korin, hem i talem se: “Yufala i mas lukaot gud, yufala i no slip, mo yufala i mas stanap strong long bilif blong yufala.” (1 Korin 16:13) Yes, vas ya i joenem fasin blong lukaotgud wetem fasin blong stanap strong long Kristin bilif. ?Olsem wanem yumi save lukaotgud mo no slip? Yumi mas kasem save we i dip moa long saed blong Tok blong God. (2 Timoti 3:14, 15) Wan gudfala program blong stadi yumi wan mo blong kam long ol miting, bambae i givhan blong mekem bilif blong yumi i strong. Mo wan samting we i impoten tumas long bilif blong yumi, i blong tingbaot dei blong Jeova oltaem. Taswe, sipos sam samtaem yumi stadi bakegen long ol tok blong Baebol we i pruvum se yumi stap klosap long en blong rabis fasin blong wol ya, samting ya bambae i givhan long yumi blong no fogetem ol impoten trutok long saed blong en ya we i stap kam. * I gud tu blong makem olsem wanem ol samting we i hapen long wol i stap laenap wetem ol profet tok blong Baebol. Wan Kristin brata long Jemani i talem se: “Evri taem mi lukluk ol nius blong wol long televisin—ol faet, graon i seksek, raf fasin, mo ol doti we ol man oli stap saksakem olbaot long wol—samting ya i mekem mi mi sua moa se en i klosap.”
6. ?Olsem wanem Jisas i soemaot se i isi blong no moa wekapgud long saed blong spirit taem ol yia oli stap pas?
6 Long Mak japta 13, yumi faenem advaes blong Jisas bakegen, se ol man blong hem oli mas wekapgud. Long japta ya, Jisas i talem se ol man blong hem oli olsem wan man we i stap lukaot long get, i stap wet long masta blong hem we i bin wokbaot i go long narafala kantri, blong i kamhom. Man ya i no save stret aoa we masta blong hem bambae i kambak. Hem i mas lukaotgud nomo. Jisas i tokbaot fo defren taem we masta blong hem i save kamtru. Laswan, hemia tri klok long moning go kasem we san i girap. Long taem ya, man we i lukaot long get bambae i taedgud, mo i isi nomo blong hem i slip. Ol soldia oli talem se wan aoa bifo delaet hemia beswan taem blong mekem enemi i sek mo kasem olgeta. Long sem fasin, ating i hadwok moa blong yumi wekapgud naoia, long las haf blong ol las dei we ol man blong wol raonabaot long yumi oli stap slip long saed blong spirit. (Rom 13:11, 12) From samting ya, Jisas i talem bakegen mo bakegen long parabol blong hem se: “Yufala i mas lukaot gud, mo oltaem yufala i mas rere . . . Yufala tu i mas lukaot gud, . . . Tok ya we mi talem long yufala, mi stap talem long olgeta man se, ‘Oltaem, yufala i mas lukaot gud.’ ”—Mak 13:32-37.
7. ?Wanem bigfala denja i save kasem yumi, mo from samting ya, wanem tok we yumi ridim bakegen mo bakegen long Baebol?
7 Taem Jisas i stap prij mo afta we hem i laef bakegen, plante taem hem i talem se yumi mas lukaotgud. Yes, klosap evri taem we Baebol i tokbaot en blong rabis fasin blong wol ya, i gat woning ya i stap tu se yumi mas wekapgud, mo lukaotgud. * (Luk 12:38, 40; Revelesen 3:2; 16:14-16) I klia se, man we i stat slip long saed blong spirit i stap long bigfala denja. !Yumi evriwan i nidim ol woning ya!—1 Korin 10:12; 1 Tesalonaeka 5:2, 6.
Tri Aposol We Trifala i No Stap Wekap
8. ?Long garen blong Getsemane, trifala aposol blong Jisas oli mekem wanem taem Jisas i talem long trifala blong wekap wetem hem?
8 Blong wekapgud, i no naf we yumi wantem nomo blong wekap. Yumi luk samting ya long stori blong Pita, Jemes, mo Jon. Trifala ya oli bigman long saed blong spirit, trifala i folemgud Jisas mo trifala i lavem hem tumas. Nating se i olsem, long naet blong Nisan 14, 33 K.T., trifala i no moa wekap. Afta we oli mekem lafet blong Pasova long wan rum antap long wan haos, trifala aposol ya oli folem Jisas i go long garen blong Getsemane. Long ples ya, Jisas i talem long trifala se: “Tingting blong mi i hevi tumas, we klosap mi mi ded from. Yufala i stap wet long ples ya, i nogud yufala i slip, yufala i mas wekap wetem mi.” (Matiu 26:38) Jisas i prea wetem fulhat blong hem long Papa blong hem long heven, nao biaen hem i gobak long trifala fren blong hem, be hem i faenem we trifala i stap slip. Namba tu taem, sem samting ya i hapen mo namba tri taem bakegen.—Matiu 26:40, 43, 45.
9. ?Ating ol aposol oli wantem slip from wanem?
9 ?From wanem ol gudfala man blong Jisas oli mekem hem i harem nogud long naet ya? I tru se trifala i taedgud. Mo ating samting ya i hapen afta medel naet, we “ae long trifala i hevi tumas.” (Matiu 26:43) Nating se i olsem, Jisas i talem long trifala se: “Yufala i mas lukaot gud, yufala i mas prea, blong bambae i no gat wan samting i save traem yufala blong mekem yufala i foldaon. Tru, tingting blong yufala i strong, be bodi blong yufala i slak.”—Matiu 26:41.
10, 11. (a) ?Nating se Jisas i taed, wanem i givhan long hem blong wekapgud long garen blong Getsemane? (b) ?Yumi lanem wanem long stori blong trifala aposol we Jisas i talem long trifala blong wekap wetem hem?
10 Long impoten naet ya, i sua se Jisas tu i taed. Be hem i no slip. Hem i yusum ol laswan sas menet we hem i fri, blong i mekem prea wetem fulhat blong hem. Sam dei bifo, hem i bin talem long ol man blong hem se oli mas prea. Hem i se: “Oltaem, yufala i mas rere, mo yufala i mas prea. Sipos yufala i mekem olsem, bambae yufala i gat paoa blong ronwe long olgeta trabol ya, mo bambae yufala i save stanap long fes blong mi, mi Pikinini blong Man we yufala i no sem.” (Luk 21:36; Efesas 6:18) Sipos yumi lesin long advaes blong Jisas mo folem gudfala eksampol we hem i putum long saed blong prea, bambae ol prea blong yumi long Jeova we oli kamaot long hat blong yumi oli save givhan long yumi blong wekapgud long saed blong spirit.
11 I tru se, long taem ya, Jisas i save wan samting we ol disaepol blong hem oli no kasem save long hem, hemia se, i no longtaem, sam man bambae oli kam blong holem hem mo jajem hem se i mas ded. Ol traem ya bambae oli finis wetem bigfala soa taem oli nilim hem long wan pos blong i ded. Jisas i givim woning finis long ol aposol blong hem long saed blong ol samting ya, be oli no kasem save long tok blong hem. Taswe, taem Jisas i stap wekap blong prea, oli letem slip i winim olgeta. (Mak 14:27-31; Luk 22:15-18) Yumi ya, yumi olsem ol aposol ya. Bodi blong yumi i slak, mo i gat sam samting we yumi no kasem save long olgeta yet. Nating se i olsem, sipos yumi no moa ting se en i klosap, yumi save stat blong slip long saed blong spirit. Blong stap wekap, yumi mas lukaotgud.
Tri Fasin We Yumi Nidim
12. ?Wanem trifala fasin we Pol i joenem wetem hed we i kliagud?
12 ?Olsem wanem yumi save holemtaet tingting ya se en i stap klosap? Yumi luk finis se yumi nidim blong prea mo tingbaot dei blong Jeova oltaem. Antap long hemia, Pol i tokbaot tri fasin we yumi nidim. Hem i se: “Be yumi ya i man blong delaet, mo hed blong yumi, i mas klia gud. Yumi mas holem fasin blong bilif mo blong lavem narafala man. Hemia i olsem klos blong faet we oli wokem long aean, blong ara i no save kasem yumi. Mo yumi mas putum tingting blong yumi long God blong hem i sevem yumi. Hemia i olsem hat blong faet blong yumi.” (1 Tesalonaeka 5:8) Naoia, bambae yumi tokbaot blong smoltaem, olsem wanem bilif, lav, mo strong tingting se God i save sevem yumi, bambae oli givhan long yumi blong wekapgud long saed blong spirit.
13. ?Olsem wanem bilif i save givhan long yumi blong wekapgud?
13 Yumi mas bilif strong se Jeova i stap, mo se hem “i stap mekem i gud long olgeta we oli stap traem faenem hem.” (Hibrus 11:6) Long faswan handred yia, profet tok blong Jisas long saed blong en blong wol i kamtru long smol fasin. Samting ya i mas mekem bilif blong yumi i strong moa se bambae i kamtru bakegen long bigfala fasin long taem blong yumi. Mo bilif blong yumi i mas mekem se yumi wet wetem tingting we yumi wantem tumas se dei blong Jeova i kam kwik, from we yumi sua se “[vison we profet i bin luk] bambae hem i kamtru. Hem i no save let.”—Habakuk 2:3, NW.
14. ?Blong wekapgud, from wanem yumi nidim blong putum tingting blong yumi i stap strong long ol nambawan promes long fiuja?
14 Nating se yumi mas wet blong luk ol promes blong God oli kamtru, be sipos tingting blong yumi i strong se ol promes ya oli sua blong kamtru, samting ya “i olsem wan angka blong holem laef blong yumi,” mo i save mekem se yumi stap stanap strong mo winim ol hadtaem we oli kasem yumi. (Hibrus 6:18, 19) Wan sista we tabu spirit i makemaot, nem blong hem Margaret, i gat bitim 90 yia mo hem i baptaes bitim 70 yia finis. Hem i talem se: “Long 1963, jes bifo we man blong mi i ded long kansa, mi mi harem se bambae i gud sipos en i kam hareap. Be naoia mi luksave se mi mi stap tingbaot mi wan nomo. Bifo, yumi no save nating se wok blong yumi bambae i kam bigwan olsem wanem long wol. Tede, i gat plante ples yet we wok ya i jes stat. Taswe, mi mi glad se Jeova i stap soemaot longfala tingting.” Aposol Pol i mekem promes long yumi se: “Taem yumi mekem tingting blong yumi i longfala, God i save glad long yumi. Mo taem hem i glad long yumi, hemia i save mekem tingting blong yumi i stap moa long hem. Mo taem tingting blong yumi i stap strong long hem, yumi no save harem nogud.”—Rom 5:3-5.
15. ?Olsem wanem lav bambae i pusum yumi, nating we i luk olsem se yumi stap wet longtaem?
15 Lav we ol Kristin oli gat, hem i wan nambawan fasin we i stap pusum yumi blong mekem evri samting we yumi mekem. Yumi mekem wok blong Jeova from we yumi lavem hem, nating se yumi no save stret taem we en bambae i kamtru. Lav we yumi gat long ol man raonabaot long yumi i pusum yumi blong talemaot gud nius blong Kingdom long olgeta, nomata se God i wantem yumi blong mekem samting ya go kasem wetaem, mo nomata se yumi mas gobak long ol semfala haos oltaem. Olsem Pol i raetem se: “I gat trifala fasin ya i stap. Man i stap bilif long God, mo man i stap putum tingting blong hem i stap strong long hem, mo man i stap lavem hem mo i stap lavem ol man. Be nambawan long trifala fasin ya, hemia we oltaem, man i stap lavem God mo i stap lavem ol man.” (1 Korin 13:13) Lav i save mekem se yumi stap gohed nomo, mo i save givhan long yumi blong stap wekap. “[Man we i gat lav] i stap putum tingting blong hem i strong long [God]. Maet bigfala trabol i save kasem hem, be tingting blong hem i no save foldaon. Fasin ya we oltaem man i lavem man, bambae i no save finis samtaem.”—1 Korin 13:7, 8.
“Holemgud Ol Samting Ya We Yufala i Kasem Finis”
16. ?Yumi no mas kam slak be yumi mas gat wanem fasin?
16 Yumi stap laef long wan impoten taem. Ol samting we i hapen long wol i soemaot bakegen mo bakegen se yumi stap long las haf blong ol las dei. (2 Timoti 3:1-5) Naoia, i no taem blong kam slak, be hem i taem blong ‘holemgud ol samting we yumi kasem finis.’ (Revelesen 3:11) Sipos yumi stap ‘wekap mo prea,’ mo sipos yumi traehad blong gat bilif, lav, mo putum tingting blong yumi i stap strong long ol promes blong God, bambae yumi rere blong fesem ol traem. (1 Pita 4:7) Yumi gat plante samting blong mekem long wok blong Masta. Sipos yumi bisi long ol gudfala wok we i soemaot se yumi fasgud long God, samting ya bambae i mekem se yumi stap wekapgud.—2 Pita 3:11.
17. (a) ?From wanem yumi no mas letem tingting blong yumi i foldaon taem ol samting oli no kamtru stret olsem we yumi wantem? (Lukluk bokis long pej 21.) (b) ?Olsem wanem yumi save folem fasin blong Jeova, mo ol man we oli mekem olsem bambae oli kasem wanem blesing?
17 Jeremaea i raetem tok ya se: “[Jeova] nomo i stap givim laef long mi, nao from samting ya, mi mi putum tingting blong mi i stap strong long hem bakegen. Hae God i gud tumas long olgeta we oli stap trastem hem, mo we oli wantem tumas blong savegud hem. Taswe yumi mas gat longfala tingting, yumi mas stap kwaet, mo yumi wet long hem blong hem i sevem yumi.” (Ol Krae 3:24-26) Sam long yumi oli bin wet blong smoltaem nomo. Be samfala oli bin wet plante yia finis blong Jeova i sevem olgeta. !Be, longfala taem we oli bin wet i nating nomo taem yumi skelem wetem laef we i no save finis long fiuja! (2 Korin 4:16-18) Mo taem yumi stap wet long stret dei we Jeova i makemaot, yumi save wokem ol fasin we ol Kristin oli nidim, mo yumi save givhan long ol narafala blong oli bilif long trutok, nao long rod ya, oli kasem blesing from longfala tingting blong Jeova. Taswe, yumi evriwan i mas lukaotgud. Yumi mas gat longfala tingting olsem Jeova, mo yumi mas gat tangkiu from nambawan fiuja we hem i promes blong givim long yumi. Mo taem yumi stap lukaotgud, yumi mas holem strong tingting long saed blong laef we i no save finis long fiuja. Olsem nao, ol profet tok ya bambae oli kamtru long yumi se: “[Jeova] bambae hem i ona long yu, i givim graon ya long yu. Bambae yu luk we hem i ronemaot ol man nogud.”—Ol Sam 37:34.
[Ol Futnot]
^ I gud blong luklukbak long ol sikis samting we oli pruvum se yumi stap long “ol las dei,” long pej 12 mo 13 blong Wajtaoa Jenuware 15, 2000.—2 Timoti 3:1, NW.
^ Man we i raetem diksonari, W. E. Vine, i talem se Grik tok we oli tanem i kam “wekapgud,” i rili minim ‘ronemaot slip.’ Mo tu, tok ya “i no minim nomo se man i stap wekap, be i minim tu se man i stap lukaotgud olsem we i stap wajem wan samting.”
?Bambae Yu Yu Ansa Olsem Wanem?
• ?Olsem wanem blong mekem
bilif blong yumi i strong moa se
en blong rabis fasin blong wol ya i klosap?
• ?Yumi save lanem wanem
long stori blong Pita, Jemes mo Jon?
• ?Wanem trifala fasin we bambae oli givhan
long yumi blong stap wekap long saed blong spirit?
• ?From wanem i stret taem naoia blong ‘holemgud ol samting we yumi kasem finis’?
[Kwestin]
[Bokis blong pija long pej 21]
‘Olgeta We Tingting Blong Olgeta i Stap Strong Long God Oli Save Haremgud.’—Daniel 12:12
Tingbaot wan naetgad, we hem i ting se wan stilman i stap mekem plan blong stil long ples we hem i stap gad long hem. Taem tudak i kam, gad ya i stap lesingud blong harem enikaen noes we i save soemaot se stilman ya i stap kam. Ol aoa oli pas, be ae mo sora blong hem i opengud blong harem mo lukluk evri samting. Taem hem i harem wan narafala noes—olsem noes blong win long ol tri no wan puskat we i kafsaedem wan samting—i isi blong hem i ting se hemia nao stilman.—Luk 12:39, 40.
Samting olsem i save hapen long olgeta we oli “stap wet blong God bambae i soemaot Masta blong yumi Jisas Kraes.“ (1 Korin 1:7) Ol aposol oli bin ting se jes afta we Jisas i laef bakegen long ded, bambae hem i “mekem we ol laen blong Isrel oli gat king blong olgeta bakegen.“ (Ol Wok 1:6) Sam yia biaen, ol Kristin long Tesalonaeka oli kasem wan leta we i mekem olgeta oli tingbaot se Jisas i no kambak yet, be bambae hem i kambak long fiuja. (2 Tesalonaeka 2:3, 8) Nating se ol faswan man blong Jisas oli no gat stret tingting long saed blong taem we dei blong Jeova bambae i kamtru, be samting ya i no mekem olgeta oli lego rod blong laef.—Matiu 7:13.
Long taem blong yumi tu, sipos i luk olsem se en blong rabis fasin blong wol ya i stap tektaem, samting ya i no mas mekem we yumi no moa lukaotgud. !Wan naetgad we i stap lukaotgud i save ting se noes we hem i harem i wan stilman, be maet noes ya i wan narafala samting !Nating se i olsem, hem i no save kam slak blong lukaotgud! Hemia wok blong hem. I sem mak long saed blong ol Kristin tede.
[Tok blong pija long pej 18]
?Yu yu bilif fulwan se dei blong Jeova i klosap?
[Tok blong pija long pej 19]
Ol miting, prea, mo wan gudfala program blong stadi, bambae i givhan long yumi blong stap lukaotgud
[Tok blong pija long pej 22]
I gud we yumi olsem Margaret, yumi gat longfala tingting mo yumi stap bisi blong lukaotgud