Wan Kwestin

?Pol i minim wanem taem hem i talem se: “[“Evri,” NW ] taem we yufala i kakae bred ya, mo yufala i dring long kap ya”?

Pol i tokbaot taem ya we oli stanemap Memoriol blong ded blong Kraes i se: “[“Evri,” NW ] taem we yufala i kakae bred ya, mo yufala i dring long kap ya, be oltaem yufala i stap soemaot ded blong Masta blong yumi, gogo hem bambae i kambak bakegen.” (1 Korin 11:25, 26) Sam man oli ting se tok ya “evri taem” i min se ol man oli mas selebretem ded blong Kraes plante taem. Taswe, oli tingbaot dei ya plante taem long wan yia. ?Pol i rili minim samting ya?

Jisas i stanemap faswan Memoriol blong ded blong hem samwe long 2,000 yia bifo finis. Taswe, nating se yumi selebretem Memoriol wan taem evri yia nomo, be sipos faswan Memoriol i stat long 33 K.T. i min se kam kasem naoia ol man oli selebretem hem plante taem finis. Be long ol vas raonabaot long 1 Korin 11:25, 26, Pol i no talem hamas taem yumi mas selebretem Memoriol ya. Hem i stap eksplenem olsem wanem yumi mas rimemba dei ya. Pol i no yusum Grik tok ya pol·laʹkis, we i min se “plante taem.” Nogat. Pol i yusum tok ya ho·saʹkis we i min se “evri taem,” mo we i klosap sem mak olsem we yumi talem se “long olgeta taem we.” Yes, long vas ya Pol i stap talem se: ‘Long olgeta taem we yu mekem samting ya, yu stap soemaot ded blong Masta blong yumi.’

?Taswe, hamas taem nao yumi mas selebretem Memoriol blong ded blong Kraes? I stret we yumi makem dei ya wan taem nomo long wan yia. Hem i wan memoriol mo ol memoriol oli lafet we man i selebretem wan taem nomo long wan yia. Antap long samting ya, Jisas i ded long dei ya we ol man Jiu oli mekem lafet blong Pasova, wan lafet we oli holem wan taem long wan yia. I stret nomo we Pol i tokbaot Jisas se: “Kraes i olsem smol sipsip blong yumi blong Pasova,” from we taem Jisas i givim laef blong hem olsem wan sakrefaes, hem i openem rod long ol man Isrel long saed blong spirit blong oli kasem laef. Hemia i olsem sakrefaes ya blong faswan Pasova we i sevem laef blong ol fasbon pikinini blong ol man Isrel we oli bon long Ijip, mo i openem rod long neson blong Isrel blong hem i aot long Ijip. (1 Korin 5:7; Galesia 6:16) Pol i joenem Pasova blong ol man Jiu wetem Memoriol blong ded blong Kraes, hemia wan narafala pruf we i soem se yumi mas selebretem Memoriol wan taem nomo long wan yia.

Antap long samting ya, Pol i joenem ded blong Jisas wetem wan narafala lafet we ol man Jiu oli mekem wan taem long wan yia, hemia Dei blong Stretem Sin. Hibrus 9:25, 26, i talem se: “Evri yia [long Dei Blong Stretem sin], hae pris blong ol laen blong Isrel, hem i tekem blad blong anamol, i go insaed long Rum we i Tabu we i Tabu. Be Kraes, hem i no go plante taem blong givim laef blong hem long God . . . Be naoia we bambae i no longtaem, wol ya i finis, hem i kamtru wan taem nomo blong i givim laef blong hem blong tekemaot sin blong ol man.” Sakrefaes blong Kraes i tekem ples blong sakrefaes we ol man Jiu oli mekem long Dei blong Stretem Sin, taswe i stret we yumi selebretem Memoriol blong ded blong Kraes wan taem evri yia. I no gat wan vas long Baebol we i talem se yumi mas mekem lafet ya plante taem long wan yia.

Folem tingting ya, John Laurence von Mosheim, wan man blong stadi long histri i talem se ol Kristin we oli laef long Esia Maena long ol yia wan handred oli stap selebretem Memoriol blong ded blong Jisas “long namba fotin dei blong faswan manis blong ol man Jiu [manis Naesan].” Biaen nomo, Krisendom i stat blong selebretem dei ya plante taem long wan yia.