Laef Stori

Wan Mesej We i Jenisim Laef Blong Mi

IRENE HOCHSTENBACH I TALEM STORI YA

Hem i Tusde naet, long 1972. Mi gat 16 yia blong mi mo mi go wetem papa mama blong mi long wan miting blong jos long Eindhoven, wan taon long provins blong Brabant, long Netalan. Mi harem nogud mo mi no wantem nating blong stap long ples ya. Tu yangfala woman oli givim wan pis pepa long mi we i gat mesej ya long hem se: “Dia Irene, mifala i wantem tumas blong givhan long yu.” Mi no luksave yet se mesej ya bambae i jenisim laef blong mi bigwan. Be bifo we mi talem long yufala wanem i hapen biaen, mi glad blong storebaot laef blong mi taem mi smol.

MI MI bon long aelan ya Belitung, long Indonesia. Mi rimemba sam long ol noes blong aelan ya we i hot lelebet—noes blong ol pam tri long win, naesfala noes blong wan reva, ol pikinini we oli laf taem oli pleplei raon long haos, mo saon blong miusik insaed long haos blong mifala. Long 1960, taem mi gat fo yia blong mi, famle blong mifala i lego Indonesia blong muv i go long Netalan. Mifala i mekem longfala trip ya long wan sip, mo i gat wan noes we mi rimembagud, hemia noes blong wan doli blong mi we mi laekem tumas, wan smol fani doli we i stap kilkilim plante tamtam. Taem mi gat seven yia blong mi, mi kasem wan sik we i mekem sora blong mi i fas, mo stat long taem ya mi neva harem wan noes bakegen. Mi rimemba ol noes, be mi no moa save harem olgeta.

Mi Gruap We Sora Blong Mi i Fas

Papa mama blong mi oli lavem mi mo oli kea long mi, taswe fastaem mi no rili luksave se laef i had olsem wanem taem sora i fas. Taem mi wan pikinini yet, oli putum wan samting long sora blong mi we i blong traem halpem mi blong  harem ol noes, be samting ya i no givhan plante. Nating se i olsem, mi no harem nogud. Long lukluk blong mi, ol samting ya oli fani nomo. Taem ol pikinini oli wantem toktok wetem mi, oli yusum jok blong raetem evri samting we oli wantem talem long rod, ale mi toktok i gobak long olgeta, nating se mi no harem prapa voes blong mi.

Taem mi gruap, mi luksave se mi defren long ol man raonabaot long mi. Mo tu mi stat luk se sam man oli laf long mi, mo sam narafala oli no wantem joen wetem mi from we sora blong mi i fas. Mi harem se mi stap mi wan nomo mo mi no gat fren. Long taem ya nao, mi stat luk se laef i had olsem wanem taem sora blong man i fas, mo taem mi stap gruap, mi fraet moa long ol man raonabaot long mi we sora blong olgeta i no fas.

Papa mama blong mi, tufala i wantem we mi mi go long wan spesel skul blong ol pikinini we sora blong olgeta i fas. Taswe ful famle i muv, mifala i lego smol vilej we mifala i stap long hem long provins blong Limburg, blong go long taon ya Eindhoven. Long ples ya papa i lukaot wan wok, mo ol brata sista blong mi oli go long wan niufala skul. Mi tangkiu long olgeta from we oli jenisim plante samting long laef blong olgeta blong givhan long mi. Long skul, oli lanem mi blong yusumgud voes blong mi mo toktok klia. Mo nating se ol tija oli no yusum saen lanwis, be ol yangfala we oli skul wetem mi oli tijim mi long lanwis ya.

Mi Laef Long Prapa Wol Blong Mi

Taem mi gruap, papa mama blong mi, tufala i traehad blong toktok wetem mi, be i gat plante samting we mi no kasem save. Eksampol, mi no kasem se papa mama blong mi oli stap stadi long Baebol wetem ol Witnes blong Jeova. Be mi rimemba se wan dei, famle blong mifala i go long wan ples we i gat plante man oli stap sidaon long ol jea. Olgeta evriwan oli stap lukluk i go long fored, samtaem oli klaphan, mo wanwan taem oli stanap—be mi no kasem se from wanem nao ol man ya oli stap mekem olsem. Longtaem biaen nomo, mi kasem save se mi bin go long wan asembli blong ol Witnes blong Jeova. Mo tu papa mama blong mi oli stap tekem mi mi go plante taem long wan haos long taon blong Eindhoven. Mi haremgud long ples ya from we ol man oli kaengud mo mi luk se famle blong mi i hapi, be wan samting nomo, mi no save from wanem oltaem mifala i go long haos ya. Naoia mi save se smol haos ya hem i wan Haos Kingdom blong ol Witnes blong Jeova.

Sore tumas, long ol miting ya i no gat man we i save tanem ol tok i go long saen lanwis blong mi kasem save long hem. Naoia mi luksave se ol man we oli stap long ol miting ya, oli bin wantem halpem mi, be oli no save olsem wanem blong mekem from we sora blong mi i fas. Long ol miting ya mi harem se mi stap mi wan nomo mo mi stap tingting se, ‘i moagud mi stap long skul i bitim ples ya.’ Mi gat olkaen tingting olsem taem tufala yangfala woman we mi tokbaot olgeta fastaem, oli raetem wan smol tok long wan pis pepa mo oli givim long mi. Hemia mesej ya we mi tokbaot hem antap. Long taem ya mi no save se smol mesej ya bambae i statem wan nambawan fasin fren we bambae i givhan long mi blong mi aot long smol wol blong mi.

Mifala i Kam Gudfala Fren

Colette mo Hermine, tufala ya we i givim mesej long mi, tufala i gat samwe long 20 yia. Biaen, mi lanem se tufala i kam joen long kongregesen blong ol Witnes blong Jeova long ples blong mifala, blong mekem wok olsem fultaem paenia. Nating se Colette mo Hermine tufala i no rili save saen lanwis, be mi naf blong ridim ol tok long maot blong tufala taem tufala i toktok long mi, mekem se mifala i save storiangud tugeta.

Papa mama blong mi oli glad taem Colette mo Hermine i askem sipos tufala i save stadi long Baebol wetem mi. Be tufala ya i no mekem hemia nomo. Long ol miting long Haos Kingdom, tufala i traehad blong tanem ol tok blong mi kasem save  long olgeta, mo tu oli traehad blong pulum mi blong mi kampani wetem ol narafala memba blong kongregesen. Oli trenem mi blong mi yusum Baebol long wok blong prij mo tu oli givhan long mi blong mi save givim ol tok long Tiokratik Ministri Skul. !Traem tingbaot, naoia tingting blong mi i strong naf, mi save givim wan tok long fored blong plante man we sora blong olgeta i no fas!

Antap long samting ya, Colette mo Hermine i mekem evri samting blong mi harem se mi save trastem tufala. Tufala i gat longfala tingting mo tufala i lesingud long mi. Plante taem mifala i laf from ol mastik blong mi, be tufala i neva laf blong jikim mi; mo tufala i no sem blong stap wetem mi. Tufala i traehad blong kasem save ol filing blong mi, mo fasin we tufala i mekem long mi i sem mak long fasin we oli mekem wetem ol narafala. Tufala gel ya oli givim wan nambawan presen long mi—hemia lav mo fasin fren blong tufala.

Colette mo Hermine i tijim mi long wan samting we i impoten moa, se mi mas save God blong yumi, Jeova, we hem i wan fren we man i save trastem. Tufala i eksplenem long mi se Jeova i luk mi taem mi sidaon long Haos Kingdom mo hem i haremsave ol filing blong mi from we sora blong mi i fas. !Mi tangkiu tumas from we lav we mitrifala i gat long Jeova i mekem se mitrifala i frengud! Jeova i kea long mi mo fasin ya i tajem hat blong mi, taswe long Julae 1975, wetem ful hat blong mi, mi givim laef blong mi i go long Jeova mo mi tekem baptaes.

Mi Joen Wetem Wan Spesel Fren

Long ol yia we i kam biaen, mi save plante moa Kristin brata sista. Wan brata i kam wan spesel fren blong mi. Mitufala i mared long 1980. Smoltaem biaen, mi statem wok blong paenia mo long 1994, mi wetem hasban blong mi, Harry, mitufala i go wok olsem spesel paenia long teritori blong ol man Netalan we oli toktok saen lanwis. Long nekis yia blong hem, mi fesem wan bigfala wok. Hasban blong mi, we sora blong hem i no fas, i stat visitim ol defdefren kongregesen long wok blong seket elda, mo mi mas go wetem hem.

?Mi mekem olsem wanem taem mifala i visitim ol kongregesen?. Sipos hem i fastaem we mitufala i visitim wan kongregesen, kwiktaem nomo mi go luk plante brata sista blong talem se mi mi hu. Mi talem long olgeta se sora blong mi i fas mo mi askem long olgeta sipos oli save lukluk mi mo toktok slo taem oli toktok wetem mi. Kwiktaem nomo mi traem blong givim wan ansa long miting. Mo tu mi askem sipos i gat wan man we i save tanem ol tok taem mifala i go long ol miting mo long wok blong prij long wik ya.

Fasin ya i wokgud tumas, mekem se samtaem, ol brata sista oli foget se sora blong mi i fas, mo sam fani samting i hapen. Eksampol, ol brata sista oli talem long mi se taem oli luk mi mi wokbaot  long taon, oli bibip long trak blong olgeta blong singaot mi, be mi no save ansa from we mi no harem wan samting. Mi tu samtaem mi foget se sora blong mi i fas—olsem long taem ya we mi wantem talem wan sikret long sora blong man blong mi. Taem mi luk se hem i sem, nao mi kasem save se voes blong mi i laod tumas taem mi talem sikret ya.

Mi mi sapraes long help we i kamaot long ol pikinini. Long wan kongregesen we i fastaem blong mitufala i visitim, i gat wan smol boe we i gat naen yia blong hem. Hem i luk se long Haos Kingdom, sam brata sista oli fraet lelebet blong kam storian wetem mi ale, smol boe ya i tekem aksin. Hem i wokbaot i kam long mi, i holem han blong mi, i tekem mi mi go long medel blong Haos Kingdom, nao i talem wetem bigfala voes se: “!Ei yufala, nem blong sista ya hem i Irene—sora blong hem i fas!” Ale, olgeta brata sista we oli stap, oli kam luk mi, mo oli talem se oli hu.

Taem mi go wetem man blong mi long wok blong seket, namba blong ol fren blong mi i kam bigwan moa. !Tede laef blong mi i defren olgeta long laef we mi gat taem mi harem se mi no gat fren mo mi stap mi wan nomo! Stat long naet ya we Colette mo Hermine i givim smol mesej ya long mi, mi luk se fasin fren i gat paoa, mo mi mitim plante man we oli kam ol gudfala fren blong mi. Mo samting we i impoten moa hemia se mi save Jeova, beswan Fren we mi save gat. (Rom 8:38, 39) !Yes, smol mesej ya i jenisim laef blong mi bigwan!

[Tok blong pija long pej 24]

Mi rimemba noes blong doli blong mi we mi laekem tumas

[Tok blong pija long pej 25]

Long wok blong prij mo wetem man blong mi, Harry