?Wanem i Save Givhan Long Yumi Blong Tijim Trutok Long Fasin We i Stretgud?

WAN DEI, wan man blong raetem ol stori long niuspepa i go luk wan plei long sinema. Wok blong man ya i blong faenem ol poen long ol plei olsem. Hem i no laekem plei ya tumas, ale hem i raetem long niuspepa se: “Sipos yu laekem ol samting we i no gat bigfala mining mo i no pulum intres blong man, i gud yu go luk plei ya.” Biaen, ol man we oli sapotem plei ya, oli yusum tok blong man ya blong traem pulum ol narafala blong oli go luk plei ya. Be, oli tekem haf nomo blong ol tok blong hem, oli talem se: “!I gud yu go luk plei ya!” I tru se man blong niuspepa ya i bin talem olsem, be oli no talem ful toktok blong hem, nao oli jenisim mining blong tok blong hem olgeta.

Stori ya i soemaot se, blong kasem stret mining blong wan stori, i impoten tumas blong tekem ful toktok blong hem, i no haf nomo. Taem yumi tekemaot sam tok nomo, yumi save jenisim mining blong stori ya. Hemia nao samting we Setan i mekem. Hem i jenisim mining blong Baebol, blong traem lidim Jisas i go krangke. (Matiu 4:1-11) Be samting ya i no save hapen sipos yumi tekem olgeta toktok blong wan stori. Olsem nao, bambae yumi kasem stret mining blong stori ya. Taswe, taem yumi stadi long wan vas blong Baebol, i waes blong ridim ol vas raonabaot long hem, blong yumi kasem stret samting we man blong raetem stori ya i wantem talem.

Lukaotgud Long Fasin Blong Tijim Tok Blong God

Wan diksonari i talem se ol tok we i stap raonabaot long wan vas i olsem “ol haf blong wan stori, we oli stap bifo mo afta long wan tok no sam tok we yumi intres long hem. Klosap oltaem ol haf ya oli givhan long yumi blong kasem mining no paoa blong tok ya we yumi intres long hem.” Mo tu, ol tok we i stap raonabaot long wan vas i save minim “ol smosmol haf no ol trufala save long saed blong wan samting we i hapen.” Olsem nao, “ol tok we i stap raonabaot long wan vas” hemia “ol samting we i hapen mo we i joen wetem vas ya.” I impoten tumas blong ridim ol tok we i stap raonabaot long wan vas. ?From wanem? Aposol Pol i raet i go long Timoti i se: “Yu mas traehad long evri rod, blong yu kam prapa man blong wok we God i stap harem gud long yu we long fes blong hem, yu no gat sem long wok blong yu. Yu yu mas kam wan man we yu stap  tijim ol man long trutok blong God long fasin we i stret gud.” (2 Timoti 2:15) Blong tijim Tok blong God long fasin we i stretgud, yumi mas kasem save gud long hem, mo yumi mas eksplenem long fasin we i stret mo i tru. Respek long Jeova we hem i Man blong Raetem Baebol bambae i pulum yumi blong traehad blong tijim tok blong Hem long fasin we i stretgud. Taswe, sipos yumi ridim ol tok raonabaot long wan vas, samting ya i save givhan bigwan long yumi blong tijimgud tok blong Hem.

Ol Samting We i Joen Wetem Seken Timoti

Blong soemaot samting ya, bambae yumi tekem buk blong Seken Timoti long Baebol. * Blong luklukgud long buk ya, fastaem yumi mas faenemaot ol samting we i joen wetem hem. ?Hu i raetem Seken Timoti? ?Wetaem hem i raetem? ?Wanem samting i hapen we i pulum hem blong raetem? Antap long hemia, yumi save askem se: ?Hu ya “Timoti” we buk ya i karem nem blong hem? ?From wanem hem i nidim save we i stap long buk ya? Ansa long ol kwestin ya bambae oli mekem yumi luksave moa we buk ya i gud tumas, mo bambae i givhan long yumi blong luk olsem wanem buk ya i save halpem yumi tede.

Ol faswan vas blong Seken Timoti oli soemaot se buk ya i wan leta we aposol Pol i raetem long Timoti. Sam narafala vas oli soemaot se taem Pol i raetem leta ya, hem i stap harem nogud long kalabus. Oli putum hem long kalabus from we hem i stap talemaot gud nius. Plante man oli lego Pol, mo hem i harem se en blong laef blong hem i klosap. (2 Timoti 1:15, 16; 2:8-10; 4:6-8) From samting ya, yumi kasem save se hem i raetem buk ya long namba tu taem we hem i stap long kalabus long Rom, ating samwe long 65 K.T. I luk olsem we smoltaem biaen, Nero i jajem hem se hem i mas ded.

Hemia nao ol samting we oli joen wetem Seken Timoti. Be, i gud blong makem se Pol i no raet long Timoti blong komplen from ol trabol we hem i gat. Be hem i stap givim woning long Timoti se bambae hem i mas fesem hadtaem, mo i givim advaes long fren blong hem se hem i mas lukaotgud blong no letem wan samting i pulumaot hem long rod we hem i stap folem. Hem i mas stap “strong long paoa,” mo gohed blong talemaot long ol narafala ol tok we Pol i talem long hem. Biaen, olgeta ya tu bambae oli naf blong givhan long sam narafala bakegen. (2 Timoti 2:1-7) !Pol i putum wan nambawan eksampol blong Timoti, olsem wanem blong no tingbaot hem wan long ol hadtaem, be blong tingbaot narafala fastaem! !Hemia nambawan advaes blong yumi tede tu!

Pol i talem long Timoti se: “Yu yu olsem pikinini blong mi stret we mi lavem yu tumas.” (2 Timoti 1:2) Plante taem, Kristin Grik haf blong Baebol i tokbaot yangfala man ya we i holemstrong long wok blong hem wetem Pol. (Ol Wok 16:1-5; Rom 16:21; 1 Korin 4:17) Taem Pol i raetem leta ya, i luk olsem se Timoti i gat bitim 30 yia finis. Be Pol i luk hem olsem wan yangfala yet. (1 Timoti 4:12) Nating se Timoti i no olfala, hem i gat gudnem finis from nambawan wok we hem i bin mekem. Maet hem i bin ‘wok strong wetem Pol’ blong 14 yia finis. (Filipae 2:19-22) Nating se Timoti i no olfala yet, Pol i givim wok long hem blong tok strong long sam elda blong oli “lego fasin ya we oli stap rao from ol toktok we i blong nating nomo.” Timoti i mas talem long olgeta se i moagud we oli yusum taem blong olgeta long ol samting we i moa impoten, olsem blong bildimap fasin blong bilif mo fasin blong stanap strong longtaem. (2 Timoti 2:14) Mo tu, Timoti i kasem raet blong putumap ol elda mo man blong givhan long ol kongregesen. (1 Timoti 5:22) Be, maet hem i fraet lelebet blong yusum paoa we God i givim long hem blong lidim ol narafala.—2 Timoti 1:6, 7.

Yangfala elda ya i bin winim sam bigfala traem. Wan taem, tufala man ya Haemenaeas mo Faelitas “i stap spolem fasin blong bilif blong sam Kristin man.” Tufala i stap tijim se ‘God i mekem ol dedman oli laef bakegen finis.’ (2 Timoti 2:17, 18) I luk olsem we tufala i bilif se i gat wan fasin nomo blong laef bakegen, hemia long saed blong bilif, mo se ol Kristin oli laef bakegen finis long fasin ya. Maet tufala i stap yusum tok blong Pol se, fastaem i olsem we ol Kristin oli ded from we oli bin mekem sin, be biaen, spirit blong God i mekem olgeta oli laef bakegen. Be tufala man ya oli no stap ridim ol tok raonabaot long ol vas ya. (Efesas 2:1-6) Pol i givim woning se ol man ya we oli lego trutok mo tijim ol narafala tok bambae oli kam plante. Hem i se: “I gat taem i stap kam, we ol man bambae oli no moa wantem harem ol trutok. . . . Bambae oli no save lesin long ol trutok, be bambae oli gowe long hem blong go lesin long ol kastom stori ya we oli no tru.” (2 Timoti 4:3, 4) Woning  ya i soem se i impoten we Timoti i lesin long advaes blong aposol Pol.

Buk Ya i Gud Long Yumi Tede

From ol samting ya we yumi tokbaot finis, yumi luk se i gat tri risen from wanem Pol i raetem buk blong Seken Timoti: (1) Hem i save se i no longtaem bambae hem i ded, mo hem i wantem mekem tingting blong Timoti i rere from taem ya we bambae hem i no moa stap blong sapotem hem. (2) Hem i wantem mekem Timoti i rere blong lukaotgud long ol kongregesen we oli stap long han blong hem, blong hem i save blokem giaman tijing blong ol man we oli lego trutok, mo blokem ol narafala samting tu we i save spolem kongregesen. (3) Hem i wantem leftemap tingting blong Timoti se hem i mas stap bisi long wok blong Jeova mo dipen long stret save blong Baebol nomo taem hem i agensem ol giaman tijing.

Taem yumi kasem ol save ya we i joen wetem Seken Timoti, buk ya i gat moa mining long yumi. Tede tu, i gat ol man blong apostasi olsem Haemenaeas mo Faelitas, we oli leftemap prapa tingting blong olgeta mo oli wantem spolem bilif blong yumi. Mo tu, naoia ‘laef long wol ya i kam strong tumas,’ olsem Pol i bin talem. Plante man blong God oli luk se woning ya blong Pol i tru: “Olgeta man we oli wantem joen long Jisas Kraes blong mekem laef blong olgeta i stret long fes blong God, bambae ol man oli save mekem i nogud tumas long olgeta.” (2 Timoti 3:1, 12) ?Olsem wanem yumi save stanap strong? Yumi mas mekem olsem Timoti mo lesin long advaes blong olgeta we oli bin mekem wok blong Jeova blong plante yia. Mo tu, from gladhat blong Jeova, yumi save stap “strong long paoa” sipos yumi gohed blong stadi yumi wan, prea, mo joen oltaem wetem ol narafala Kristin. Mo tu, sipos yumi trastem paoa blong stret save, bambae yumi lesin long tok blong Pol we i talem se: “Yu yu mas holem strong ol tok ya we . . . i stret gud, mo i blong soemaot rod blong yu.”—2 Timoti 1:13.

‘Ol Tok We i Stretgud Mo i Blong Soemaot Rod’

?Wanem ‘ol tok ya we i stretgud’? Pol i stap tokbaot ol trufala Kristin tijing. Long faswan leta we hem i raetem long Timoti, hem i eksplenem se ‘ol tok we i stretgud’ i minim “ol trutok ya we Jisas Kraes Masta blong yumi i talemaot.” (1 Timoti 6:3) Sipos yumi folemgud ol tok ya we i stretgud, bambae yumi gat wan klia tingting, mo bambae yumi strong blong soemaot lav mo tingbaot ol narafala. From we minista wok blong Jisas mo ol tijing blong hem oli laenap wetem ol narafala tijing long Baebol, yumi save talem se ‘ol tok we i stretgud’ i minim olgeta tijing blong Baebol.

Timoti mo ol narafala Kristin elda, oli luksave se ol tok ya we i stretgud i olsem ‘ol gudfala samting we Jisas Kraes i putum long han blong olgeta finis’ mo oli mas lukaotgud long hem. (2 Timoti 1:13, 14) Timoti i mas ‘talemaot tok blong [God]. Nating we ol man oli wantem harem tok ya no oli no wantem harem, be oltaem hem i mas strong blong talemaot. Hem i mas pulum ol man blong oli bilif long hem, mo hem i mas tok strong long ol man we oli rong, mo hem i mas mekem tingting blong ol man oli stanap strong, mo hem i mas mekem tingting blong hem i longfala blong tijimgud olgeta.’ (2 Timoti 4:2) Long taem blong Timoti, i gat plante tijing blong ol man we oli lego trutok, oli stap goraon. Taswe, yumi luksave from wanem Pol i makemgud se i impoten blong tijim ol tok we i stretgud. Yumi kasem save tu se, blong lukaotgud long ol sipsip, Timoti i mas ‘tok strong long ol man we oli rong, mo mekem tingting blong ol man oli stanap strong, mo mekem tingting blong hem i longfala blong tijimgud olgeta.’

?Timoti i mas talemaot tok blong God long hu? Ol tok we oli stap raonabaot long vas ya oli soemaot se Timoti we i wan elda i mas talemaot tok blong God insaed long Kristin kongregesen. Taem sam man oli agensem trutok, Timoti i mas holem stret tingting long saed blong spirit mo i no mas fraet blong talemaot tok blong God. Hem i mas lukaot blong no talemaot ol waes blong man, ol prapa tingting blong hem wan, mo i no mas westem taem  blong traem talemaot wanem samting bambae i kamaot. Tru ya, maet samfala we oli no gat stret fasin bambae oli agensem hem. (2 Timoti 1:6-8; 2:1-3, 23-26; 3:14, 15) Be, sipos Timoti i folem advaes blong Pol, bambae hem i blokem tok blong ol man we oli lego trutok, olsem we Pol i bin mekem.—Ol Wok 20:25-32.

?Taem Pol i talem se Timoti i mas talemaot tok blong God, hem i min se Timoti i mas mekem samting ya afsaed long kongregesen tu? Yes, ol tok raonabaot long vas ya oli soemaot mining ya. Pol i gohed blong talem se: “Oltaem, nomata wanem samting i kamtru long laef blong yu, be tingting blong yu i mas klia gud. Sipos yu stap harem nogud, be yu mas mekem tingting blong yu i strong. Yu mas mekem wok ya blong talemaot gud nius blong Kraes, mo yu mas finisim olgeta wok ya we God i givim long yu blong mekem.” (2 Timoti 4:5) Wok blong talemaot gud nius blong Kraes—talemaot rod blong sevem man long olgeta we oli no bilif—hem i stamba wok blong ol Kristin. (Matiu 24:14; 28:19, 20) Long kongregesen, yumi gohed oltaem blong talemaot tok blong God ‘nomata wanem samting i kamtru.’ Long sem fasin, yumi gohed blong talemaot tok blong hem afsaed long kongregesen nating se i gat hadtaem no trabol.—1 Tesalonaeka 1:6.

Tok we yumi talemaot mo tijim i stanap long Baebol we i kamaot long God. Yumi trastem Baebol fulwan. Pol i talem long Timoti se: “Olgeta tok blong Baebol oli kamaot long God fastaem. Hem i putum long tingting blong ol man ya bifo, nao oli raetem long buk. Ol tok ya i stret gud blong tijim yumi long ol trutok, mo blong blokem ol krangke tok. Mo i stret gud blong stretem ol krangke fasin, mo blong tijim yumi long ol stret fasin.” (2 Timoti 3:16) Plante taem yumi yusum vas ya blong soemaot se Baebol i Tok we i kamaot long God, mo i stret blong yusum olsemia. ?Be wanem bigfala samting we i pusum Pol blong raetem tok ya?

Pol i stap toktok long elda ya Timoti we i gat wok blong ‘tijim ol trutok, blokem ol krangke tok, stretem ol krangke fasin, mo tijim ol stret fasin’ long kongregesen. Taswe, hem i stap talem long Timoti se hem i mas trastem waes blong Baebol, we hem i bin lanem stat long taem we hem i smol pikinini nomo. Ol elda tede oli mas mekem sem wok olsem Timoti blong stretem ol man we oli mekem nogud fasin. Taem oli mekem wok ya, oltaem oli mas dipen long Baebol. From we Baebol i kamaot long God, ol tok blong Baebol we oli yusum blong stretem narafala, hem i kamaot long God. Man we i no wantem harem tok ya blong stretem hem, i stap sakemaot ol advaes we i kamaot long Jeova hem wan, i no advaes blong wan man.

!Tru ya, buk blong Seken Timoti i rij long ol waes blong God! !Mo yumi luksave bigfala mining blong buk ya taem yumi ridim ol vas raonabaot long ol wanwan vas! Long haf ya, yumi tokbaot smol nomo long ol nambawan save long buk ya we i kamaot long God. Be hemia i naf blong soemaot se taem yumi ridim Baebol, i gud we yumi tingbaot ol tok we i stap raonabaot long ol wanwan vas. Samting ya bambae i givhan long yumi blong “tijim ol man long trutok blong God long fasin we i stret gud.”

[Futnot]

[Tok blong pija long pej 27]

Pol i wantem mekem Timoti i rere blong lukaotgud long ol kongregesen

[Tok blong pija long pej 30]

Pol i talem long Timoti blong dipen long waes blong Baebol we i kamaot long God