!Yumi Mas Wekap Moa Naoia i Bitim Olgeta Taem Bifo!

“I no stret blong yumi stap slip olsem ol narafala man. I stret blong yumi wekap, we hed blong yumi i klia gud.”—1 TESALONAEKA 5:6.

1, 2. (a) ?Tufala taon ya Pompeii mo Herculaneum, oli wanem kaen taon? (b) ?Wanem woning we plante man long Pompeii mo Herculaneum oli no luksave, mo wanem i kamaot from?

 LONG faswan handred yia, i gat tu taon blong ol man Rom we tufala i stap klosap long hil ya Vesuvius. Tufala taon ya, Pompeii mo Herculaneum, oli rij, taswe ol man Rom we oli rij oli stap go spel long tufala ples ya. Ol bigfala stadium blong tufala oli naf blong bitim taosen man oli save hivap long olgeta. Long Pompeii, i gat wan stadium we i gat naf jea blong holem olgeta man long taon ya. Ol man we oli digim graon blong faenem ol samting blong bifo, oli kaontem 118 ba mo hotel long taon ya. Sam long olgeta ya oli haos we ol man oli go blong plei laki no haos we ol woman blong rod oli mekem bisnes blong olgeta. Ol olfala pija mo sam narafala samting we oli faenem, oli soemaot se fasin slip olbaot mo fasin blong ronem ol sas samting i fulap long taon ya.

² Long Ogis 24, 79 K.T., * bigfala hil ya Vesuvius, we hem i wan volkeno, i bosta. Ol man we oli gat save long saed blong ol volkeno oli ting se long faswan taem we volkeno ya i bosta, ol ston mo asis we hem i sakem long tufala taon ya oli no plante tumas. Ating ol man oli save ronwe yet. I luk olsem we plante man oli ronwe, be plante narafala oli no ting se oli stap long denja, mo oli no tinghevi long ol saen we oli kamaot olsem woning, ale oli no ronwe. Nao, long medel naet, faea blong volkeno, hot gas, mo ston i ron olsem wan reva go kasem Herculaneum, mo ol man we oli stap long taon ya oli no moa save pulum win, ale oli ded. Long nekis moning, sem samting i hapen long narafala taon ya Pompeii. !Sore tumas long ol man we oli no luksave ol saen we oli givim woning!

En Blong Fasin Blong Laef Blong Ol Man Jiu

3. ?Wanem samting we i sem mak long saed blong Jerusalem we i lus mo tufala taon ya Pompeii mo Herculaneum?

³ Naen yia bifo we volkeno ya i spolemgud tufala taon ya Pompeii mo Herculaneum, wan trabol we i bigwan moa i spolem taon ya Jerusalem. Be ol man nomo oli mekem trabol ya. Wan buk i talem se: “Taem ol ami oli raonem taon ya mo ol man oli no moa save ronwe, ol samting we i hapen i nogud moa i bitim ol narafala taem long histri blong man we ol ami oli raonem wan taon.” Bitim wan milian Jiu oli ded long taem ya. Be, olsem ol man long Pompeii mo Herculaneum, ol man Jerusalem tu oli kasem woning fastaem.

4. ?Wanem profet tok we Jisas i talem blong givim woning long ol man blong hem se en blong fasin blong laef long taem ya i klosap, mo olsem wanem tok blong hem i kamtru long faswan handred yia?

⁴ Jisas Kraes i bin talemaot finis we Jerusalem bambae i lus, mo hem i talemaot ol samting we bambae i kamaot bifo we taon ya i lus tu—olsem faet, hadtaem blong kasem kakae, graon i seksek, mo ol man bambae oli brekem loa. Bambae i gat ol giaman profet, be ol man blong God bambae oli gohed blong talemaot gud nius blong Kingdom blong God long olgeta ples blong wol. (Matiu 24:4-7, 11-14) Ol tok ya blong Jisas we i stap kamtru fulwan tede, i bin kamtru long smol fasin long taem blong ol man Jiu. Ol buk blong histri oli tokbaot wan taem we ol man Judia oli no gat kakae. (Ol Wok 11:28) Man Jiu ya Josephus we i raetem histri, i tokbaot we graon i seksek bigwan long Jerusalem, i no longtaem bifo we taon ya i lus. Klosap moa long taem we Jerusalem i lus, i gat ol raorao mo faet bitwin ol defdefren pati blong politik blong ol man Jiu. Long sam taon we ol man Jiu oli stap wanples wetem ol narafala laen, oli stap kilkilim olgeta i ded. Nating se ol trabol ya i stap kamaot, be ol man blong God oli  gohed blong talemaot gud nius blong Kingdom “long olgeta man long wol.”—Kolosi 1:23.

5, 6. (a) ?Wanem profet tok blong Jisas we i kamtru long yia 66 K.T.? (b) ?From wanem fulap man i ded taem ol ami oli winim Jerusalem long yia 70 K.T.?

⁵ Long 66 K.T., ol man Jiu oli girap agensem gavman blong Rom. Taem Cestius Gallus wetem ol ami blong hem oli raonem Jerusalem, ol man blong Jisas oli tingbaot tok blong Jisas se: “Taem we yufala i luk ol soldia oli stap kam plante raonabaot long taon ya Jerusalem, blong oli blokem ol man oli stap insaed, yufala i mas save we bambae i no longtaem oli save spolemgud ples ya. Taem yufala i luk samting ya, yufala we i stap long Judia, yufala i mas ronwe blong go haed long ol hil. Mo yufala we i stap insaed long taon ya, yufala i mas aot. Mo yufala we i stap long ol ples raonabaot long taon ya, yufala i no mas go insaed long taon ya bakegen.” (Luk 21:20, 21) Yes, hemia nao stret taem blong oli aot long Jerusalem—?Be olsem wanem bambae oli aot? Gallus i mekem samting we ol man oli no tingbaot. Hem i givim oda long ol ami blong hem blong oli gobak. Naoia, rod i open blong ol Kristin long Jerusalem mo Judia oli save obei long tok blong Jisas mo ronwe i go long ol hil.—Matiu 24:15, 16.

⁶ Fo yia biaen, long taem blong Pasova, ol ami blong Rom we Jenerol Titus i lidim, oli kambak bakegen. Oli gat strong tingting blong finisim rebelian blong ol man Jiu. Ale, ol ami ya oli hivap raon long Jerusalem, “oli tekem ol stik we oli katem en blong olgeta blong mekem oli sap, nao oli wokem wan strong fenis i goraon long taon ya.” Naoia, ol man long Jerusalem oli no moa save aot long taon ya. (Luk 19:43, 44, NW) Fulap man Jiu long ol taon we Rom i rul long olgeta oli bin kam long Jerusalem blong mekem lafet blong Pasova, nating we i luk olsem se bambae faet i kamaot. Be naoia, oli no moa save gobak. Josephus i talem se olgeta ya oli bighaf blong ol man we oli ded taem ol ami blong Rom oli kam. * Taem ol ami oli winim Jerusalem fulwan, samwe wan long evri seven Jiu long ol taon we Rom i rul long olgeta, oli lus. Taem oli spolem Jerusalem mo haos prea blong hem, fasin blong laef blong ol man Jiu fastaem i lus, wetem skul blong olgeta we i stanap long Loa blong Moses. *—Mak 13:1, 2.

7. ?Taem Jerusalem i lus, from wanem ol gudfala Kristin oli no ded?

⁷ Histri i soemaot se long 70 K.T., ol Kristin we oli man Jiu, oli obei long woning we Jisas i bin givim 37 yia bifo. Ale, oli aot long taon ya mo oli no gobak insaed long hem. Sipos oli no bin mekem olsem, bambae olgeta tu oli ded no oli kam slef olsem ol narafala man long Jerusalem.

Woning We Ol Aposol i Givim

8. ?Pita i luksave se ol Kristin oli nidim blong mekem wanem, mo ating hem i stap tingbaot wanem tok blong Jisas?

⁸ Tede, wan trabol we i bigwan moa i stap kam. Trabol ya bambae i spolem rabis fasin long ful wol ya. Sikis yia bifo we Jerusalem i lus, aposol Pita i givim wan strong advaes we i stret long taem bifo, be i stret moa long ol Kristin tede: !Lukaotgud! Pita i luksave se ol Kristin oli nidim blong wekap ‘mo mekem tingting blong olgeta i stret.’ Olsem nao, bambae oli obei long ‘tok blong Masta blong yumi,’ Jisas Kraes. (2 Pita 3:1, 2) Taem Pita i talem long ol Kristin  blong wekap, ating hem i stap tingbaot tok we Jisas i talem long ol aposol bifo we hem i ded, i se: “Yufala i mas lukaot gud, mo oltaem yufala i mas rere, from we yufala i no save taem ya we bambae olgeta samting ya oli kamtru.”—Mak 13:33.

9. (a) ?Samfala oli gat wanem tingting we i denja? (b) ?From wanem tingting we i hafhaf i denja?

⁹ Tede, samfala oli tok jik se: “?Olsem wanem nao? ?Hem i promes finis blong kam, be hem i stap wea?” (2 Pita 3:3, 4) I klia se ol man ya oli ting se ol samting i no stap jenis, i stap gohed nomo olsem ol yia bifo, stat long taem we God i wokem wol. Tingting ya we i no soemaot bilif, hem i wan denja. Taem tingting blong yumi i hafhaf, i save mekem we yumi no moa ting se en i klosap, ale yumi save stat blong ronem ol samting we yumi nomo i wantem. (Luk 21:34) Mo tu, Pita i soemaot se ol man ya we oli tok jik, oli fogetem se Bigfala Wota i bin ron long taem blong Noa, i bin spolem ol rabis man long fulwol mo fasin blong laef blong olgeta. !Long taem ya, wol i rili jenis bigwan!—Jenesis 6:13, 17; 2 Pita 3:5, 6.

10. ?Pita i talem wanem blong leftemap tingting blong olgeta we maet oli taed blong wet?

¹⁰ Leta blong Pita i givhan long ol man blong oli gat longfala tingting. Hem i pulum olgeta blong tingbaot se plante taem God i no tekem aksin kwiktaem. ?From wanem? Fastaem, Pita i talem se: “Long fes blong [Jeova], wan dei, mo wan taosen yia, be tufala i sem mak nomo.” (2 Pita 3:8) Jeova bambae i laef gogo i no save finis, taswe hem i save tingbaot olgeta samting we i joen wetem bisnes ya, mo i save jusum beswan taem blong tekem aksin. Biaen, Pita i talem se Jeova i wantem we olgeta man oli tanem tingting blong olgeta from sin. Longfala tingting blong God i givim janis long plante moa man blong oli kasem laef. Sipos hem i hareap blong tekem aksin, olgeta ya bambae oli lus. (1 Timoti 2:3, 4; 2 Pita 3:9) Be, longfala tingting i no minim se bambae Jeova i neva tekem aksin, nogat. Pita i talem se: “Dei blong [Jeova] bambae i kam olsem we man blong stil i kam.”—2 Pita 3:10.

11. ?Wanem bambae i givhan long yumi blong stap wekap long saed blong spirit, mo olsem wanem samting ya bambae i mekem dei blong Jeova i “kamtru kwik”?

¹¹ I gud blong tingbaot pijatok ya blong Pita. I no isi blong kasem wan man we i kam blong stil. Ating wan gad we i stap wekap fulnaet i save luk mo holem wan stilman, be ating wan gad we ae blong hem i  hevi mo i stap slip smosmol, bambae i no save mekemgud wok ya. ?Oraet, olsem wanem wan gad i save stap wekap? I moagud we hem i wokbaot fulnaet i bitim we hem i sidaon. Olsemia, bambae hem i lukaotgud. Sem mak long ol Kristin. Sipos yumi wok strong long saed blong spirit, samting ya bambae i givhan long yumi blong stap wekap. Taswe, Pita i talem long yumi blong stap bisi long ol wok we oli ‘tabu, mo ol fasin we God i wantem.’ (2 Pita 3:11) Ol wok olsem bambae i givhan long yumi blong ‘no fogetem dei blong Jeova.’ Grik tok we oli tanem i kam ‘no fogetem’ long ples ya, i rili minim “wok blong mekem Dei ya i kamtru kwik.” (2 Pita 3:12) Tru ya, yumi no save jenisim program blong Jeova. Dei blong hem bambae i kam long stret taem we hem i makemaot finis. Be, bambae yumi luk se taem we i stap yet go kasem dei ya bambae i pas kwik sipos yumi bisi long ol wok blong God.—1 Korin 15:58.

12. ?Olsem wanem yumi wanwan i save yusumgud taem ya we Jeova i letem i pas from longfala tingting blong hem?

¹² Taswe, eniman we i harem se Jeova i stap tektaem blong mekem dei blong hem i kamtru, i mas lesin long advaes blong Pita. Hem i mas wet wetem longfala tingting go kasem stret taem we Jeova i makemaot finis. Yes, taem ya we God i stap letem i pas from longfala tingting blong hem, yumi save yusum long waes fasin. Wan samting se, yumi save gohed blong wokem ol gudfala Kristin fasin we yumi nidim. Mo yumi save talemaot gud nius long plante moa man. Sipos Jeova i hareap, bambae yumi no gat taem blong mekem ol samting ya. Nao taem en blong rabis fasin blong wol ya i kamtru, sipos yumi stap wekapgud, bambae Jeova i faenem we ‘laef blong yumi i klin gud, mo we i no gat wan samting i rong long laef blong yumi.’ (2 Pita 3:14, 15) !Bambae hemia wan nambawan blesing!

13. ?Wanem tok we Pol i raetem long ol Kristin long Tesalonaeka we i stret moa long yumi tede?

¹³ Long faswan leta we Pol i raetem long ol Kristin long Tesalonaeka, hem tu i tokbaot se oli mas wekapgud. Hem i givim advaes ya se: “I no stret blong yumi stap slip olsem ol narafala man. I stret blong yumi wekap, we hed blong yumi i klia gud.” (1 Tesalonaeka 5:2, 6) !Tede, yumi mas mekem samting ya, from we klosap nao rabis fasin blong ful wol ya bambae i lus! Wol ya we ol man blong Jeova oli stap long hem, i fulap long ol fasin mo tingting we i save pulum yumi blong no moa kea long ol samting long saed blong spirit. Taswe, Pol i givim advaes ya se: “Hed blong yumi, i mas klia gud. Yumi mas holem fasin blong bilif mo blong lavem narafala man. Hemia i olsem klos blong faet we oli wokem long aean, blong ara i no save kasem yumi. Mo yumi mas putum tingting blong yumi long God blong hem i sevem yumi. Hemia i olsem hat blong faet blong yumi.” (1 Tesalonaeka 5:8) Sipos yumi stadi oltaem long Tok blong God mo joen wetem ol Kristin brata mo sista blong yumi long ol miting, samting ya bambae i givhan long yumi blong folem advaes blong Pol mo holem tingting ya se en i klosap.—Matiu 16:1-3.

Plante Milian Man Oli Stap Lukaotgud

14. ?Wanem ol namba we oli soemaot se plante man tede oli stap folem advaes blong Pita blong wekapgud?

¹⁴ ?Olsem wanem? ?I gat plante man tede we oli stap lesin long tok ya blong God se oli mas lukaotgud? Yes i gat. Long 2002 sevis yia, yumi kasem bigfala namba blong 6,304,645 pablisa, hemia 3.1-pesen antap long namba blong yia 2001. Olgeta ya oli soemaot se oli stap wekapgud long saed blong spirit taem oli pasem 1,202,381,302 aoa blong talemaot Kingdom blong God long ol narafala. Oli no tingbaot wok ya olsem wan samting we i no impoten tumas, nogat. Wok ya i bigfala samting long laef blong olgeta. Tingting blong plante long olgeta i sem mak long tingting blong Eduardo mo Noemi, we tufala i blong El Salvado.

15. ?Wanem eksampol long El Salvado i soemaot se plante oli stap wekap long saed blong spirit?

¹⁵ Sam yia i pas finis, Eduardo mo Noemi i tingting dip long tok blong Pol se: “Fasin blong wol ya i stap jenis.” (1 Korin 7:31, NW) Ale, tufala i mekem se laef blong tufala i no moa fasfas, nao tufala i stat long wok blong fultaem paenia. Biaen, tufala i kasem plante blesing, mo tufala i mekem wok blong visitim ol kongregesen long ol seket mo distrik tu. Nating se Eduardo mo Noemi i kasem sam bigfala traem, tufala i sua se tufala i bin tekem stret disisen taem tufala i lego ol sas samting mo isi laef, blong stat long wok blong Jeova fultaem. Plante long ol 29,269 pablisa—wetem ol 2,454 paenia—long El Salvado, ol bin soemaot semfala fasin ya blong lego sam samting we olgeta oli save haremgud long hem. Hemia nao from wanem namba blong ol pablisa long kantri ya las yia i 2-pesen antap.

16. ?Wan yangfala brata long Aevori Kos i soemaot wanem tingting?

 ¹⁶ Long Aevori Kos, wan yangfala Kristin man i soemaot semfala tingting ya long wan leta we hem i raetem i go long hed ofis blong ol Witnes long kantri ya. Hem i se: “Mi mi stap wok olsem wan man blong givhan long kongregesen. Be mi no save talem long ol brata se i gud we oli paenia sipos mi wan mi no stap putum wan eksampol blong olgeta. Taswe, mi livim wok blong mi we mi bin kasem bigfala mane long hem, mo naoia mi stap mekem wan smol wok blong mi wan nomo we i givim moa taem long mi blong mekem wok blong prij.” Naoia, yangfala man ya i wan long ol 983 paenia long Aevori Kos. Las yia, i gat 6,701 pablisa tu long kantri ya, hemia 5 pesen antap.

17. ?Olsem wanem wan yangfala Witnes gel long Beljiom i soemaot se hem i no fraet long ol man we oli stap jajem ol Witnes?

¹⁷ Long Beljiom, ol 24,961 man blong talemaot Kingdom oli stap kasem trabol from ol man we oli agensem olgeta, oli jajem olgeta, mo oli daonem olgeta. Nating se i olsem, ol Witnes long kantri ya oli stap wok strong mo oli no fraet. Wan yangfala Witnes gel we i gat 16 yia, i stap long klas blong hem long skul, mo oli stap stadi long ol gudfala rul long saed blong wanem i stret mo wanem i no stret. Nao hem i harem samfala oli talem se ol Witnes blong Jeova i wan krangke skul we i folem man nomo. Nao gel ya i askem long tija sipos hem i save eksplenem bilif mo tijing blong ol Witnes blong Jeova. Blong soemaot se ol Witnes blong Jeova oli olsem wanem, hem i yusum video kaset ya Jehovah’s Witnesses—The Organization Behind the Name wetem smol buk ya Jehovah’s Witnesses—Who Are They? Ol yangfala long klas oli laekem tumas ol save ya. Long wik we i kam, tija i givim wan tes long klas we olgeta kwestin blong hem oli long saed blong Kristin skul blong ol Witnes blong Jeova.

18. ?Wanem samting i soemaot se trabol long saed blong mane i no blokem ol pablisa long Ajentina mo Mosambik blong oli no moa mekem wok blong Jeova?

¹⁸ Bighaf long ol Kristin oli stap kasem ol bigfala trabol long ol las dei ya. Nating se i olsem, oli traehad blong no letem trabol ya i pulumaot olgeta long rod we oli stap folem. Long Ajentina, i gat bigfala trabol long saed blong mane. Be, las yia, namba blong ol Witnes long ples ya i go antap kasem 126,709. Long Mosambik, ol man oli pua tumas. Nating se i olsem, ripot i soem se 37,563 i stap joen long wok blong prij, mo namba ya i 4 pesen antap. Long Albania, laef i had. Be namba blong ol pablisa i kam antap 12 pesen, mekem se naoia i gat 2,708 pablisa long kantri ya. I klia se, taem ol man blong Jeova oli putum Kingdom i stap fasples long laef blong olgeta, ol trabol mo hadtaem i no save blokem tabu spirit blong Hem.—Matiu 6:33.

19. (a) ?Wanem samting i soemaot se i gat plante man yet we fasin blong olgeta i olsem sipsip mo oli hanggri from trutok blong Baebol? (b) ?Wanem sam narafala samting long ripot blong yia we i soemaot se ol man blong Jeova oli stap wekap long saed blong spirit? (Lukluk lis long pej 12-15.)

¹⁹ Las yia, long fulwol, i gat 5,309,289 Baebol stadi. Samting ya i soemaot se i gat plante man yet we fasin blong olgeta i olsem sipsip, mo oli hanggri from trutok blong Baebol. Las yia, namba blong ol man we oli kam long Memoriol i go antap kasem 15,597,746. Bighaf blong olgeta ya oli no stap mekem wok blong Jeova yet. Oli mas gohed blong kasem save, mo blong laekem moa Jeova mo ol Kristin brata mo sista blong olgeta. Yumi glad tumas blong luk se “bigfala hip” blong “ol narafala sipsip” oli gohed blong karem frut taem oli joen wetem ol tabu brata blong olgeta blong mekem wok “long dei mo long naet, insaed long haos” blong Man we i Wokem olgeta.—Revelesen 7:9, 15; Jon 10:16.

Lanem Lesen From Lot

20. ?Yumi lanem wanem from Lot mo woman blong hem?

²⁰ I tru, ol gudfala man blong God tu oli save kam slak blong smoltaem mo oli save ting se en i no moa klosap. Tingbaot Lot, boe blong brata blong Ebraham. Tufala enjel i kam luk Lot, mo tufala i talem  long hem se God bambae i spolem Sodom mo Gomora. Ating Lot i no sapraes long nius ya, from we hem “i stap harem nogud tumas from ol fasin nogud we ol rabis man long ples ya oli stap mekem.” (2 Pita 2:7) Be, taem tufala enjel ya i kam blong lidim Lot i goaot long Sodom, hem i “stap tektaem.” Klosap tufala enjel ya i mas pulum hem mo famle blong hem oli aot long taon ya. Biaen, woman blong Lot i no obei long woning we tufala enjel i givim, hem i luklukbak. Hem i lusum laef blong hem from we hem i no lukaotgud. (Jenesis 19:14-17, 26) Jisas i givim woning ya se: “Yufala i mas tingbaot woman blong Lot.”—Luk 17:32.

21. ?From wanem i impoten blong wekap moa naoia i bitim olgeta taem bifo?

²¹ Bigfala trabol we i spolem Pompeii mo Herculaneum, ol samting we i hapen taem Jerusalem i lus, Bigfala wota we i ron long taem blong Noa, mo stori blong Lot, oli soemaot se yumi mas lesin mo obei long ol woning. Yumi ol man blong Jeova, yumi luksave ol saen we oli soemaot se yumi stap long taem blong en. (Matiu 24:3) Yumi kamaot finis long ol giaman skul. (Revelesen 18:4) Olsem ol faswan Kristin, yumi ‘no mas fogetem dei blong Jeova.’ (2 Pita 3:12) !Yes, yumi mas wekap moa naoia i bitim olgeta taem bifo! ?Ale, wanem samting we yumi wanwan i save mekem, mo wanem ol fasin we yumi save wokem blong givhan long yumi blong stap wekap? Nekis stadi bambae i tokbaot samting ya.

[Ol Futnot]

?Bambae Yu Yu Ansa Olsem Wanem?

• ?Wanem samting i hapen we i givim janis long ol Kristin long Jerusalem blong ronwe bifo we taon ya i lus?

• ?Olsem wanem advaes long ol leta blong aposol Pita mo Pol i givhan long yumi blong stap wekap?

• ?Hu ol man tede we oli stap soemaot se oli wekapgud?

• ?Wanem lesen we yumi lanem from stori blong Lot mo woman blong hem?

[Kwestin]

 [Ripot 2002 pej 12-15]

RIPOT BLONG OL WITNES BLONG JEOVA LONG FULWOL LONG SEVIS YIA 2002

(Lukluk niuspepa)

[Tok blong pija long pej 9]

Long 66 K.T., ol Kristin long Jerusalem oli obei long woning blong Jisas

[Tok blong pija long pej 10]

Sipos ol Kristin oli stap bisi, samting ya i save givhan long olgeta blong wekapgud