‘Stap Klosap Long God, Nao Hem Bambae i Kam Stap Klosap Long Yu’

Bifo Mo Afta—Tok Blong God i Stap Wok

SIPOS yu save Tony taem hem i yangfala yet, bambae yu luk we hem i wan boe we i raf olgeta mo i wantem faet nomo. Oltaem hem i stap go long ol rabis ples blong Sydney, Ostrelia. Sam fren blong hem oli joen long ol stronghed grup blong man. Plante taem oli stil, oli faet agensem ol narafala stronghed grup, mo oli faet wetem masket long rod.

Tony i stat smok taem hem i gat naen yia nomo. Taem hem i gat 14 yia, hem i stat tekem mariuana mo i slip olbaot. Taem hem i gat 16 yia blong hem, hem i slef long drag ya heroin, mo fasin ya i pusum hem blong tekem koken, LSD—“yes, eni samting we mi save drong long hem,” olsem Tony i talem. Biaen hem i stat mekem bisnes blong salem drag wetem tu bigfala rabis grup we ol man oli savegud. Evri man we oli wantem drag long is kos blong Ostrelia oli save se Tony hem i beswan man blong salem drag.

Evri dei, Tony i spenem samwe long 22,000 go kasem 44,000 vatu blong pem heroin mo koken blong hem. Be famle blong hem i safa bigwan from samting ya. Tony i talem se: “Plante taem ol man oli fraetem mi mo waef blong mi wetem ol masket no ol naef we oli poenem stret long fes blong mitufala, from we oli kam blong lukaotem drag mo mane we mitufala i gat long haos.” Afta we Tony i go kalabus tri taem, hem i stat tingbaot se laef blong hem bambae i gohed olsem gogo kasem wetaem.

Nating se Tony i go long jos, hem i no harem se hem i save fren wetem wan God we jos i talem se i stap bonem ol sinman long helfaea blong olwe blong panisim olgeta. Be taem tu Witnes blong Jeova i visitim Tony, hem i sapraes tumas blong lanem se God i no gat ol fasin olsem. Mo tu Tony i glad blong save se hem i save jenisim laef blong hem mo kasem ol blesing blong God. Ol tok ya blong Jisas i tajem hat blong Tony se: “God . . . i save mekem olgeta samting.” (Mak 10:27) Wan nambawan tok i rili gat paoa long Tony, se: “Yufala i mas stap klosap long God, nao hem bambae i kam stap klosap long yufala.”—Jemes 4:8.

Naoia Tony i mas fesem wan bigfala traem, hem i mas mekem laef blong hem i laenap wetem ol rul blong Baebol. Tony i talem se: “Fasin blong smok tabak hem i faswan samting we mi lego, wan fasin we, bifo, mi no naf nating blong stopem, nating se mi bin traehad plante taem. Paoa blong Jeova i givhan long mi blong mi lego heroin mo mariuana, ol drag we oli bin bos long mi blong 15 yia finis. Neva bifo mi ting se wan dei bambae mi save blokem ol fasin ya.”

Tony i no moa fraet long wan God we i spolem ol man blong hem blong olwe long helfaea—hemia wan bilif we i no stap nating long Baebol—be hem mo waef blong hem tufala i gat hop blong laef foreva long wan paradaes long wol. (Ol Sam 37:10, 11; Ol Proveb 2:21) Tony i talem se: “I nidim plante taem mo plante traehad blong mekem laef blong mi i laenap wetem ol rul blong God, be Jeova i givhan long mi blong mi winim ol fasin ya.”

Yes, man ya we bifo i slef long drag, i jenisim laef blong hem i kam wan Kristin. Tony mo waef blong  hem, tufala i givim taem mo ol samting we tufala i gat blong spenem plante taosen aoa blong tijim Baebol long ol narafala. Mo tu, tufala i trenemgud tufala pikinini blong tufala blong oli fraetgud long God. Bigfala paoa blong Baebol i jenisim laef blong tufala bigwan. Yes, Pol i talem tru nomo se, “Tok blong God i wan samting we i laef, mo i stap wok.”—Hibrus 4:12.

Nomata long ol nambawan eksampol olsemia, be i gat sam man yet we oli stap talem se wok blong ol Witnes blong Jeova blong tijim Baebol, i spolem ol famle mo i karemaot ol gudfala fasin blong ol yangfala. Stori blong Tony i pruvum se ol tok olsem oli giaman nomo.

Olsem Tony, plante man oli luksave se oli naf blong winim ol rabis fasin we i save kilim olgeta i ded. ?Olsem wanem oli naf blong mekem samting ya? Oli naf from we oli bilif long God, oli trastem hem mo Tok blong hem. Mo tu, oli naf from we ol Kristin brata sista oli halpem mo sapotem olgeta mo oli keagud long olgeta wetem lav. Tony i glad tumas i se: “Mi luk finis we ol rul blong Baebol oli protektem ol pikinini blong mi. Tijing blong Baebol i sevem mared blong mi. Mo ol man we oli laef raonabaot long mifala oli slipgud naoia, from we fasin blong laef blong mi i no moa wan denja long olgeta.”

[Tok blong makem poen long pej 9]

‘Wetem paoa blong Jeova, mi naf blong lego ol drag we oli bin bos long laef blong mi blong 15 yia finis’

[Bokis blong pija long pej 9]

Ol Rul Blong Baebol We Oli Wok

Plante defren rul blong Baebol oli bin givhan long ol man blong oli no moa slef blong drag. Hemia sam blong ol rul ya:

“Olgeta samting long bodi blong yumi mo long tingting blong yumi we oli stap mekem yumi doti long fes blong God, yumi mas sakemaot olgeta evriwan. Mo yumi mas traehad blong mekem fasin blong yumi i klin, i tabu, from we yumi stap ona gud long God, mo yumi man blong hem nomo.” (2 Korin 7:1) Fasin blong tekem drag i agensem loa blong God.

“Sipos man i wantem kam waes, stamba blong hem, hem i mas tinghevi long Hae God, mo i mas ona gud long hem. Hae God i tabu we i tabu, mo fasin blong hem i stret olgeta, mo sipos man i wantem haremsave mining blong ol samting, hem i mas savegud Hae God.” (Ol Proveb 9:10) Fasin fraetgud long Jeova we i stanap long stret save blong hem mo ol fasin blong hem, i halpem plante man blong kam fri long drag.

“I nogud yu ting se save ya blong yu naoia, hem i naf blong givhan long yu. Yu mas trastem Hae God long olgeta tingting blong yu. Long olgeta samting we yu stap mekem, yu mas tingbaot hem oltaem, mo sipos yu stap mekem olsem, hem bambae i soemaot stret rod long yu, blong yu yu folem.” (Ol Proveb 3:5, 6) Ol man oli save sakemaot ol rabis fasin we i spolem olgeta, sipos oli trastem God wetem fulhat blong olgeta mo oli dipen long hem nomo.