Oli Rimemba Ol Witnes Blong Jeova We Oli Ded

LONG Maj 7, 2002, oli putumap wan saen long taon blong Körmend long wes blong Hangari. Saen ya i blong tingbaot wan dei blong 1945 we ol Nasi oli kilim i ded trifala Witnes blong Jeova.

Saen ya, oli hangem long wol blong hedkwota blong faea dipatmen long Hunyadi Road, long ples ya we oli bin kilim i ded trifala Witnes ya. Oli putum saen ya blong rimemba ‘ol Kristin we oli ded long Maj 1945 from we tingting blong olgeta i blokem olgeta blong joen long ami. Antal Hőnisch (1911-1945), Bertalan Szabó (1921-1945), János Zsondor (1923-1945), 2002, trifala Witnes blong Jeova.’

Oli kilim trifala ya i ded, tu manis nomo bifo we Wol Wo Tu i finis. ?From wanem oli kilim i ded ol Kristin ya? Wan niuspepa blong Hangari, Vas Népe i eksplenem se: “Afta we Hitler i kasem paoa long Jemani, i no ol Jiu nomo we oli fesem hadtaem. Ol Witnes blong Jeova we oli stap tru long God, olgeta tu oli harem nogud tumas, ol man oli spolem bodi blong olgeta, oli go long ol rabis kalabus mo oli ded from we oli no wantem lego bilif blong olgeta . . . Long Maj 1945, ol lida long wes blong Hangari oli mekem bigfala trabol i kamaot. . . . Long trabol ya nao oli ronemaot no oli kilim i ded ol Witnes blong Jeova.”

Seremoni we oli mekem blong putumap saen ya i gat tu haf blong hem. Faswan haf i stap long Batthyány Castle. Long ples ya, trifala man ya oli givim tok: Profesa Szabolcs Szita, bos blong Holocaust Documentation Center long Budapest; László Donáth, wan memba blong Parliament’s Committee for Human Rights, Minority and Religious Affairs; mo Kálmán Komjáthy, wan man we i stap long taem ya we ol man oli kilim i ded trifala Witnes ya, mo naoia hem i wan man blong stadi long histri blong taon ya. I gat bitim 500 man we oli krosem taon blong folem namba tu haf blong program ya: hemia taem József Honfi, Mea blong Körmend, i putumap saen.

Long laswan leta blong hem, Brata Ján Žondor (János Zsondor) i leftemap tingting blong ol brata sista blong hem se oli no mas sore tumas long ded blong hem. Hem i raetem se: “Mi rimemba yet ol tok blong Jon long buk blong Revelesen 2:10 i se: ‘Yufala i mas stanap strong gogo yufala i ded.’ . . . Talem long olgeta evriwan long hom se oli no mas sore tumas long mi, from we mi mi ded from trutok mi no ded from we mi brekem loa.”

[Tok blong pija long pej 32]

Bertalan Szabó

[Tok blong pija long pej 32]

Antal Hőnisch

[Tok blong pija long pej 32]

Ján Žondor