Wan Kwestin

?Folem Baebol, i stret sipos wan Kristin we i stap long kot, i putum han blong hem long Baebol mo i mekem strong promes se bambae i tok tru?

Evri Kristin wanwan i mas tekem prapa disisen blong hem long saed ya. (Galesia 6:5) Be Baebol i no talem se i rong blong mekem wan strong promes blong tok tru taem yu stap long kot.

Fasin blong mekem strong promes i wan fasin we plante man oli stap mekem longtaem finis. Eksampol, long taem blong bifo, ol man Gris oli leftemap wan han i go long heven no oli tajem wan olta taem oli mekem wan strong promes. Taem wan man Rom i mekem wan strong promes long kot, hem i holem wan ston long han blong hem mo i talem se: “Sipos mi giaman, [god ya] Jupiter we i protektem taon mo strong ples blong taon, bambae hem i sakemaot ol gudgudfala samting long laef blong mi, olsem we mi mi sakemaot ston ya.”—Cyclopedia of Biblical, Theological, and Ecclesiastical Literature, blong John McClintock mo James Strong, Buk VII, pej 260.

Ol fasin ya oli soem se ol man oli luksave we i gat wan God i stap, we hem i save lukluk ol man mo ol man oli gat kaon long hem. Stat long taem bifo, ol trufala man blong Jeova oli save finis se Hem i save olgeta samting we oli stap talem mo mekem. (Ol Proveb 5:21; 15:3) Oli mekem strong promes long nem blong God, no oli singaot hem olsem se hem i witnes long promes blong olgeta. Ol man olsem Boas, Deved, Solomon, mo Jedekia, oli mekem promes blong olgeta long nem blong God olsem we hem i witnes blong promes blong olgeta. (Rut 3:13; 2 Samuel 3:35; 1 King 2:23, 24; Jeremaea 38:16) Mo tu, ol man we oli wosipim trufala God oli rere blong mekem wan strong promes olsem, sipos sam narafala man oli askem olgeta blong mekem. Ebraham mo Jisas Kraes oli mekem samting ya.—Jenesis 21:22-24; Matiu 26:63, 64.

Samtaem wan man we i mekem wan strong promes long fes blong Jeova i mekem wan saen wetem han blong hem tu. Ebram (Ebraham) i talem long king blong Sodom se: “Long fes blong Hae God we i hae we i hae, we i mekem skae mo graon, mi [“mi leftemap han blong mi,” NW ] mi mekem wan strong tok finis long nem blong hem.” (Jenesis 14:22) Wan enjel we i stap toktok wetem profet Daniel “i leftemap tufala han blong hem i poen i go long heven, nao i mekem wan strong promes long nem blong God ya we i stap oltaem nomo, gogo i no save finis.” (Daniel 12:7) Baebol i yusum pijatok mo i talem se God tu hem i leftemap han blong hem blong mekem wan strong promes.—Dutronome 32:40, NW ; Aesea 62:8, NW.

Baebol i no talem se i rong blong mekem wan strong promes. Nating se i olsem, wan Kristin i no nid blong mekem wan strong promes blong sapotem evri tok we hem i talem Jisas i talem se: “Sipos yu talem se ‘Yes’, yu mas talem ‘Yes’ nomo. Mo sipos yu talem se ‘No’, yu mas talem ‘No’ nomo.” (Matiu 5:33-37) Disaepol Jemes i makem semfala poen. Taem hem i talem se “yufala i no joenem sam tok long promes blong yufala blong mekem i strong moa,” hem i givim woning long ol Kristin se oli no mas mekem ol strong promes olbaot. (Jemes 5:12) Be Jisas mo Jemes, tufala i no talem se i rong sipos wan Kristin i mekem wan strong promes blong talem trutok taem hem i pas long kot.

?Nao olsem wanem sipos wan Kristin i pas long kot, mo oli askem hem blong mekem strong promes ya se evri samting we bambae hem i talem i tru fulwan? Maet Kristin ya i harem se hem i save mekem strong promes ya. Sipos no, maet oli letem hem i promes nomo se bambae hem i no giaman.—Galesia 1:20.

Sipos rul blong kot i talem se wan man i mas leftemap han no i mas putum han long Baebol taem i mekem promes, maet wan Kristin bambae i jusum blong folem rul ya. Maet hem i tingbaot ol eksampol long Baebol long saed blong ol man ya we oli mekem wan saen taem oli mekem strong promes. Be saen we man i mekem taem hem i mekem wan strong promes i no hemia we i impoten. Nogat. Long lukluk blong wan Kristin, samting we i impoten moa, mo we hem i mas rimemba, hemia se strong promes ya we hem i mekem blong talem trutok, hem i mekem long fes blong God. Wan strong promes olsem i wan impoten bisnes. Sipos wan Kristin i harem se hem i naf mo i mas ansa long wan kwestin we oli askem long hem long kot, hem i mas rimemba we hem i mekem strong promes blong tok tru. Yes, ol Kristin oli mas man blong tok tru oltaem nomo.