I Had Blong Holem Wok Mo Stap Glad Long Hem

UNIVERSAL Declaration of Human Rights we Yunaeted Nesen i bin wokem i talem se “raet blong wok” hem i namba wan raet blong evri man. Nating se i olsem, tok ya i no kamtru oltaem. Ol man oli wantem sua se oli save holem wok blong olgeta, be wok i dipen long plante samting—hem i dipen long ekonomi blong kantri mo long ekonomi blong ful wol tu. Yes, taem ol man oli lusum wok no oli stap long denja blong lusum wok, plante taem oli mekem ol maj, oli mekem bigfala faet long pablik ples, mo oli straek. Klosap evri kantri i fesem problem ya. Wan man blong raetem buk i talem se: “Longtaem finis, tok ya ‘wok’ nomo, be hem i wan tok we i save wekemap ol filing.”

Wok i impoten long yumi from defren risen. Wok i givim mane be tu, wok i halpem yumi blong haremgud long saed blong tingting mo filing. Wok i mekem man i harem gud from we man we i wok i tekpat long laef blong komuniti, mo laef blong hem i gat mining. Mo tu, wok i mekem man i ting gud long hem wan. Taswe, nating se sam man oli gat plante mane finis blong fulumap ol nid blong olgeta, no sam narafala oli olfala naf blong ritae, be oli glad blong gohed blong wok. Yes, wok i impoten tumas, mekem se sipos i no moa gat wok, bigfala trabol i save kamaot long komuniti.

Defren nao, i gat sam man we oli gat wan wok, be wok ya i bigwan tumas mo i hevi long olgeta mekem se oli no moa haremgud. Eksampol, tede ol kampani oli traehad blong kam moa gud mo winim moa mane bitim ol narafala, taswe plante kampani oli katemdaon namba blong ol wokman blong olgeta, blong no spenem tumas mane. Nao olgeta we oli stap yet long kampani oli mas wok plante moa aoa blong mekem wok long ples blong ol man we bos i bin sakem.

Ol man oli ting se ol niufala teknoloji blong wok bambae oli mekem laef i kam isi moa mo wok i kam moagud, be ating ol niufala teknoloji ya oli ademap moa wok mo i mekem wok i kam hevi moa. Eksampol, tede ol man oli yusum ol kompiuta, ol faks mesin, mo Internet, mekem se oli save tekem wok blong olgeta i go long haos taem oli livim ofis long en blong dei. Ale wok blong olgeta i no moa stap long ofis nomo, be i kam insaed long haos tu. Wan man blong wok i harem se pager mo mobael fon we kampani blong hem i givim long hem, oli olsem wan rop we i fasem hem long bos blong hem.

Long wol blong yumi we ekonomi mo wok i save jenis kwiktaem nomo, plante olfala oli wari se bambae ol man oli talem long olgeta se oli no moa naf blong wok, nating se oli no kasem taem blong ritae yet. Chris Sidoti, we i wok  long Human Rights, i talem se: “I luk olsem se plante man oli gat tingting ya se sipos yu gat bitim 40 yia finis, yu no naf blong wok wetem ol kompiuta mo ol niufala tul blong wok.” Taswe, plante man we oli wokhad, mo bifo oli beswan man blong wok blong kampani, naoia ol man oli luk olgeta olsem se oli olfala tumas blong mekem wan gudfala wok. !Tingting ya i nogud we i nogud!

From samting ya, long ol yia we oli jes pas, i klia we fasin blong wokhad i lus mo ol man oli no moa stap tru long kampani blong olgeta. Libération, wan niuspepa blong Franis i talem se: “Taem ol bigfala kampani oli sakem wokman jes from we ekonomi i godaon smol, ol man oli no moa wantem stap tru long wan kampani. Yumi nidim wok, taswe bambae yumi gohed yet blong wok, be bambae yumi wok blong yumi nomo, yumi no moa wok blong kampani.”

Nating se ol problem ya oli kam antap bigwan, be ol man oli nidim wok. ?Taswe, long taem blong yumi we i jenis kwiktaem nomo, olsem wanem yumi save gat wan tingting we i skelgud long saed blong wok, mo long sem taem, holem wok blong yumi mo stap glad long hem?

[Tok blong pija long pej 3]

Niufala teknoloji i ademap moa wok mo i mekem wok i kam hevi moa