“Karem Plante Frut Long Laef Blong Yufala”

“Taem yufala i karem plante frut long laef blong yufala, . . . long fasin ya yufala i kam man blong mi.”—JON 15:8.

1. (a) ?Jisas i talem wanem samting moa we ol aposol blong hem oli mas mekem blong soemaot se oli disaepol blong hem? (b) ?Wanem kwestin we yumi wanwan i mas ansa long hem?

 LONG naet bifo we Jisas i ded, hem i tektaem blong toktok wetem ol aposol blong hem. Hem i talem ol tok we i kamaot stret long hat blong hem, blong leftemap tingting blong olgeta. Ating i bitim medel naet finis, be Jisas i gohed blong toktok from we hem i lavem ol gudfala fren ya blong hem. Long medel blong storian ya, hem i mekem olgeta oli tingbaot se i gat wan moa samting we oli mas mekem blong stap gohed olsem ol disaepol blong hem. Hem i se: “Taem yufala i karem plante frut long laef blong yufala, samting ya i save leftemap nem blong Papa blong mi, mo long fasin ya yufala i kam man blong mi.” (Jon 15:8) ?Yumi tede, yumi stap mekem samting ya we i soemaot se yumi disaepol blong Kraes? ?I minim wanem blong “karem plante frut”? Blong faenem ansa long kwestin ya, bambae yumi gobak long storian blong Jisas long naet ya.

2. ?Long naet bifo we Jisas i ded, hem i talem wanem pijatok long saed blong frut?

 ² Advaes ya, se yumi mas karem plante frut, i haf blong wan pijatok we Jisas i bin talem long ol aposol blong hem. Hem i se: “Mi nao, mi olsem prapa rop ya grep, mo Papa blong mi, hem i olsem man blong lukaot long rop ya. Evri han blong rop ya we oli no save karem frut, hem i stap katemaot olgeta. Mo evri han we oli stap karem frut, hem i stap klinim olgeta blong bambae oli save karem plante frut moa. Yufala i olsem han blong rop ya, mo mi mi mekem yufala i klin finis long ol tok ya we mi mi talem long yufala. Laef blong yufala i mas joen long laef blong mi, olsem we laef blong mi i joen long laef blong yufala. Olsem we han blong rop i no save karem frut sipos i no joen gud long stamba blong hem, oraet, long sem fasin, yufala i no save karem frut long laef blong yufala, sipos yufala i no joen gud long mi. Mi nao, mi stamba blong rop ya, mo yufala i han blong hem. . . . Taem yufala i karem plante frut long laef blong yufala, samting ya i save leftemap nem blong Papa blong mi, mo long fasin ya yufala i kam man blong mi. Papa blong mi i lavem mi tumas, mo long sem fasin, mi mi lavem yufala. Oltaem yufala i mas joen gud long mi blong mi mi save lavem yufala olwe. Sipos yufala i stap obei long ol tok blong mi, bambae mi mi lavem yufala olwe.”—Jon 15:1-10.

3. ?Ol man blong Jisas oli mas mekem wanem blong karem frut long laef blong olgeta?

³ Long pijatok ya, Man blong lukaot long rop blong grep, hemia Jeova. Rop ya hemia Jisas, mo ol han blong rop ya hemia ol aposol we Jisas i stap storian long olgeta. Sipos ol aposol ya oli traehad blong “joengud oltaem” long Jisas, oli save karem frut long laef blong olgeta. Ale, Jisas i gohed blong eksplenem long olgeta olsem wanem oli save joengud oltaem long hem, i se: “Sipos yufala i stap obei long ol tok blong mi, bambae mi mi lavem yufala olwe.” Biaen, aposol Jon i raetem tok we i klosap sem mak i go long ol Kristin brata blong hem, i se: “Olgeta we oli stap folem ol tok ya blong [“Kraes,” NW ], olgeta oli stap joen gud long [hem].” * (1 Jon 2:24; 3:24) Taswe, sipos ol man blong Kraes oli obei long ol tok blong hem, bambae oli joengud oltaem long hem, nao from samting ya, bambae oli karem plante frut long laef blong olgeta. ?Ale, wanem frut nao we yumi mas karem?

Janis Blong Gru Moa

4. ?Tok ya se Jeova i “stap katemaot” ol han blong rop we oli no karem frut, i stap talem wanem long yumi?

⁴ Long pijatok blong rop ya, Jeova i “stap katemaot” ol han we oli no karem frut. ?Tok ya i stap talem wanem long yumi? Hemia: Olgeta disaepol oli mas karem frut long laef blong olgeta. Be i no hemia nomo. Olgeta evriwan oli naf blong karem frut, nomata se laef blong olgeta i olsem wanem, mo nomata wanem trabol oli gat long laef blong olgeta. Yes, Jeova i lavem yumi, taswe hem i no save talem long ol disaepol blong Kraes blong mekem samting we oli no naf blong mekem, nao biaen, hem i “katemaot” olgeta from we oli no mekem samting ya. Nogat.—Ol Sam 103:14; Kolosi 3:23; 1 Jon 5:3.

5. (a) ?Olsem wanem pijatok blong Jisas i soemaot se yumi save go moa blong karem frut? (b) ?Wanem tufala frut we bambae yumi tokbaot?

⁵ Mo tu, pijatok ya blong Jisas i stap soemaot se, nating we laef blong yumi i olsem wanem, be yumi mas lukaot janis blong gru moa long ol wok blong yumi olsem ol disaepol blong Kraes. Makemgud tok ya blong Jisas: “Evri han blong rop ya we oli no save karem frut, hem i stap katemaot olgeta. Mo evri han we oli stap karem frut, hem i stap klinim olgeta blong bambae oli save karem plante frut moa.” (Jon 15:2) Klosap long en blong pijatok ya tu, Jisas i talem long ol man blong hem blong karem “plante frut.” (Vas 8) ?Samting ya i minim wanem? Hemia i min se, yumi ol disaepol blong Jisas, yumi neva mas kam olsem we yumi no moa kea mo yumi no moa traehad. (Revelesen 3:14, 15, 19) Long defren fasin, yumi mas lukaot ol rod blong karem moa frut. ?Wanem frut nao we yumi mas traehad blong karem plante moa long hem? I gat (1) “frut blong spirit” mo (2) frut blong Kingdom.—Galesia 5:22, 23, NW; Matiu 24:14.

Ol Kristin Fasin We Oli Olsem Frut

6. ?Olsem wanem Jisas Kraes i makemgud se faswan frut blong spirit i impoten?

⁶ Faswan “frut blong spirit,” hemia lav. Tabu spirit blong God i mekem se ol Kristin oli gat lav, from we oli obei long tok we Jisas i talem smoltaem bifo long pijatok ya blong rop blong grep. Hem i talem long ol aposol blong hem se: “Mi mi givim wan niufala loa long yufala se, ‘Yufala i mas lavlavem yufala.’ ” (Jon  13:34) Yes, long storian blong Jisas long laswan naet blong hem long wol ya, hem i talem bakegen mo bakegen long ol aposol blong hem se oli mas gat lav.—Jon 14:15, 21, 23, 24; 15:12, 13, 17.

7. ?Olsem wanem aposol Pita i soemaot se sipos yumi wantem karem frut yumi mas gat ol fasin blong Kraes?

⁷ Pita, we i stap long naet ya, i kasem save se ol trufala disaepol oli mas gat lav olsem Kraes, mo oli mas gat sam narafala fasin blong hem tu. Plante yia biaen, Pita i leftemap tingting blong ol Kristin blong oli traehad blong gat ol fasin olsem bos long tingting, filing long ol brata blong olgeta, mo lav. Hem i talem tu se sipos oli gat ol fasin ya, ‘bambae oli no save stap nating nomo, be bambae laef blong olgeta i save karem frut.’ (2 Pita 1:5-8) Nomata se laef blong yumi i olsem wanem, yumi naf blong gat ol frut blong spirit. Taswe, yumi mas traehad moa blong soemaot lav, kaen fasin, kwaet fasin, mo ol narafala fasin blong Kraes. Yumi no save bitim mak long ol fasin ya, from we ‘i no gat loa blong blokem yumi long ol samting ya.’ (Galesia 5:23) Yes, yumi mas karem ‘plante moa frut.’

Karem Frut Blong Kingdom

8. (a) ?Olsem wanem frut blong spirit i joen wetem frut blong Kingdom? (b) ?Yumi mas tingting gud long wanem kwestin?

⁸ Ol frut we oli gat naesfala kala mo oli tesgud, oli flasem wan tri. Be i no from we ol frut ya oli luk naes nomo we oli gud. Ol frut ya oli gat sid insaed long olgeta blong oli save mekem sam moa tri. Long sem fasin, ol frut blong spirit, oli no flasem Kristin fasin blong yumi nomo. Ol fasin olsem lav mo bilif oli pulum yumi blong sakem moa sid blong Kingdom, no blong talemaot ol tok blong Kingdom we i stap long Baebol. Traem luk olsem wanem aposol Pol i makem impoten poen ya. Hem i se: “Mifala tu i tok, from we mifala i bilif [wan frut blong spirit].” (2 Korin 4:13) Pol i gohed blong talem se, long rod ya, “yumi stap mekem sakrefaes blong givim long [God] . . . taem yumi talemaot nem blong Jisas long fes blong ol man”—Hemia nao namba tu frut we yumi mas karem. (Hibrus 13:15) ?Yu yu gat janis long laef blong yu blong karem moa frut, yes, blong karem “plante frut” olsem ol man blong talemaot Kingdom blong God?

9. ?I stret blong talem se frut we yumi karem hemia ol man we yumi pulum olgeta oli kam disaepol? Eksplenem.

⁹ Blong ansa gud long kwestin ya, fastaem yumi nidim blong kasem save long mining blong frut blong Kingdom. ?I stret blong talem se frut ya hemia ol man we yumi pulum olgeta oli kam disaepol blong Kraes? (Matiu 28:19) ?Frut ya i minim ol man we yumi givhan long olgeta gogo oli tekem baptaes blong kam ol man blong wosipim Jeova? Nogat. ?Sipos i minim olgeta ya, olsem wanem long ol gudfala Witnes we oli bin holemstrong long wok blong talemaot Kingdom blong plante yia, long ol ples we i gat smol man nomo oli lesin? Tingting blong ol Witnes ya bambae i foldaon bigwan. !Yes, sipos Kingdom frut i minim ol niufala disaepol, ol Witnes ya we oli stap wokhad bambae oli olsem ol han blong rop we oli no karem frut, long pijatok blong Jisas! Be i no olsemia. ?Oraet, wanem nao faswan frut blong Kingdom we yumi karem long wok blong prij?

Karem Frut—Sakem Sid Blong Kingdom

10. ?Olsem wanem parabol blong Jisas long saed blong man we i sakem sid long ol defdefren kaen graon i soemaot stret mining blong frut blong Kingdom?

¹⁰ Parabol blong Jisas long saed blong man we i sakem sid long ol defdefren kaen graon i save ansarem  kwestin ya. Ansa ya i save leftemap tingting blong olgeta we oli stap witnes long ol ples we i no gat plante man oli lesin. Jisas i talem se sid ya hemia tok blong Kingdom long Baebol, mo graon, hemia hat blong ol man. Sam sid “oli folfoldaon long gudfala graon, nao oli gru, mo oli gat frut we olgeta wanwan oli karem.” (Luk 8:8) ?Wanem ya frut ya? Taem sid blong wit i gru i kam bigwan, hem i karem frut, be frut ya i no ol narafala gru. Frut ya hemia ol niufala sid. Long sem fasin, frut we ol Kristin oli karem maet i no ol niufala disaepol, be hemia ol niufala sid blong Kingdom.

11. ?Wanem ya frut blong Kingdom?

¹¹ Taswe, frut ya i no minim ol niufala disaepol mo i no minim ol gudfala Kristin fasin. Sid we yumi sakem hemia tok blong Kingdom, ale frut blong hem i mas minim plante moa long ol semfala sid ya. Taswe, yumi karem frut taem yumi talemaot tok blong Kingdom. (Matiu 24:14) ?Olsem wanem? ?Yumi naf blong karem frut ya blong Kingdom—talemaot gud nius blong Kingdom—nomata wanem trabol i stap long laef blong yumi? !Yes! Long semfala parabol, Jisas i eksplenem from wanem i olsem.

Mekem Bes Blong Yumi Blong Leftemap Nem Blong God

12. ?Olgeta Kristin evriwan oli naf blong karem frut blong Kingdom? Eksplenem.

¹² Jisas i tokbaot “sid we i foldaon long gudfala graon” se, “sam i gat handred frut, sam i gat sikisti, mo sam i gat toti.” (Matiu 13:23) Blong kasem plante frut from sid we man i sakem, samting ya i dipen long ol samting we oli kamaot afta we hem i sakem sid ya. Long sem fasin, wok we yumi mekem blong talemaot gud nius, maet i bigfala wok no smol wok. Samting ya i dipen long ol samting long laef blong yumi. Jisas i soemaot se hem i kasem save long samting ya. Samfala oli gat moa janis, bodi blong  samfala i strong moa mo oli gat moa paoa. Taswe, maet yumi save mekem moa wok i bitim narafala, no maet narafala i save mekem moa wok i bitim yumi. Be sipos yumi mekem bes blong yumi, Jeova i glad. (Galesia 6:4) Sipos yumi olfala no yumi sik, ating yumi no save joen plante long wok blong prij. Be, i klia se Papa blong yumi we i gat sore, Jeova, i save luk yumi yet olsem wan man we “i karem plante frut.” ?From wanem? From we yumi stap givim ‘olgeta samting we yumi gat’ i go long hem—hemia se, yumi stap mekem wok blong hem wetem olgeta laef blong yumi. *—Mak 12:43, 44; Luk 10:27.

13. (a) ?Wanem bigfala risen blong ‘gohed’ blong karem ol frut blong Kingdom? (b) ?Wanem samting bambae i givhan long yumi blong gohed blong karem frut long ol ples we plante man oli no wantem lesin long yumi? (Lukluk bokis long pej 21.)

¹³ Nomata hamas frut blong Kingdom we yumi save karem, bambae yumi ‘gohed blong karem frut’ sipos yumi tingbaot oltaem from wanem yumi stap mekem olsem. (Jon 15:16) Jisas i tokbaot bigfala risen blong samting ya, i se: “Taem yufala i karem plante frut long laef blong yufala, samting ya i save leftemap nem blong Papa blong mi.” (Jon 15:8) Yes, taem yumi prij, yumi leftemap nem blong Jeova long fored blong olgeta man. (Ol Sam 109:30) Wan gudfala Witnes we hem i gat samwe 75 yia, nem blong hem Honor, i talem se: “Nating se plante man oli no wantem lesin, be Hae God i givim wan bigfala ona long yumi taem hem i yusum yumi blong talemaot tok blong hem.” Wan narafala we nem blong hem Claudio, i kam wan Witnes long 1974 mo hem i wok strong kam kasem naoia. Ale, oli askem long hem from wanem hem i stap gohed blong prij, nating se smol man nomo oli lesin. Blong ansa, hem i talem tok blong Jon 4:34, we Jisas i talem se: “God i sanem mi mi kam, mo kakae blong mi, i blong mi mekem ol samting we hem i wantem blong mi mi mekem, mo blong mi finisim ol wok we hem i givim long mi.” Nao Claudio i talem se: “Mi wantem mekem olsem Jisas. Mi no wantem statem nomo wok blong mi blong talemaot Kingdom, be mi wantem finisim wok ya tu.” (Jon 17:4) Ol Witnes blong Jeova long fulwol oli agri long tok blong hem.—Lukluk bokis ya “?Olsem Wanem Blong ‘Mekem Tingting i Longfala Mo Gat Frut Long Laef Blong Yu’? ” long pej 21.

Prij Mo Tij

14. (a) ?Wanem tufala wok we Jon Baptaes mo Jisas i mekem? (b) ?Wanem wok we ol Kristin tede oli mas mekem?

¹⁴ Ol Gospel oli tokbaot faswan man blong talemaot Kingdom, hemia Jon Baptaes. (Matiu 3:1, 2; Luk 3:18) Bigfala tingting blong hem i “blong prij,” mo hem i mekem olsem wetem bilif we i kamaot long hat blong hem, mo wetem strong tingting se “olkaen man oli save bilif.” (Jon 1:6, 7, NW ) Yes, samfala we Jon i prij long olgeta, oli kam disaepol blong Kraes. (Jon 1:35-37) Taswe, Jon i wan man blong prij, mo tu, hem i wan man we i pulum ol narafala blong oli kam disaepol. Jisas tu i wan man blong prij mo wan man blong tijim narafala. (Matiu 4:23; 11:1) Ale, yumi luk we Jisas i no talem nomo se ol man blong hem oli mas talemaot Kingdom, be hem i talem tu se oli mas givhan long ol man we oli harem tok ya blong oli kam ol disaepol blong hem. (Matiu 28:19, 20) Tede tu, yumi gat tufala wok ya blong mekem, hemia blong prij mo blong tijim ol narafala.

15. ?Olsem wanem ol man long faswan handred yia K.T. mo ol man tede oli mekem sem samting taem oli harem nius blong Kingdom?

¹⁵ Long ol man we Pol i prij long olgeta mo i tijim olgeta long faswan handred yia K.T., * “sam long olgeta oli harem tok blong hem, nao oli bilif long hem, be sam narafala man oli no save bilif.” (Ol Wok 28:24) Sem mak tede. Sore tumas, bighaf blong ol sid blong Kingdom oli foldaon long graon we i nogud. Nating se i olsem, sam sid oli foldaon long gudfala graon, oli gat rus, mo oli gru, olsem Jisas i bin talem. Long fulwol, bitim 5,000 man oli kam ol trufala disaepol  blong Kraes evri wik. Ol niufala disaepol ya “oli harem tok blong hem, nao oli bilif long hem,” nating se plante narafala man oli no bilif. ?Wanem samting i givhan blong mekem hat blong olgeta i laekem tok blong Kingdom? Plante taem, hemia intres we ol Witnes oli soemaot long ol man ya wanwan, taem oli putum wota long sid we oli jes sakem. (1 Korin 3:6) I gat plante stori we oli soemaot samting ya, be bambae yumi tokbaot tu nomo.

Intres Long Ol Man Wanwan i Save Givhan

16, 17. ?From wanem i impoten blong soem se yumi kea long ol man wanwan taem yumi stap prij?

¹⁶ Wan yangfala Witnes long Beljiom, nem blong hem Karolien, i mitim wan olfala woman we i no wantem harem nius blong Kingdom. Be Karolien i luk we woman ya i fasem han blong hem long kaliko, ale hem mo fren blong hem tufala i askem long woman ya sipos tufala i save mekem wan samting blong givhan long hem. Woman ya i talem se hem i oraet nomo, i no nidim help. Tu dei biaen, tufala Witnes ya i kambak blong luk woman ya bakegen mo tufala i askem long hem sipos han blong hem i oraet. Karolien i talem se: “Taem mitufala i askem samting ya, fasin blong woman ya i jenis. Hem i sapraes blong save se mitufala i rili kea long hem. Hem i singaot mitufala i kam insaed, ale, mitufala i statem wan Baebol stadi wetem hem.”

¹⁷ Sandi, wan Witnes long Yunaeted Stet, hem tu i soemaot intres long ol wanwan man we hem i stap prij long olgeta. Hem i ridim ol mesej long niuspepa long saed blong ol bebi we oli jes bon, nao hem i go luk mama papa blong ol bebi ya blong givim buk ya My Book of Bible Stories long olgeta. * Klosap oltaem ol mama oli stap long haos, mo oli glad blong soemaot niufala bebi blong olgeta long Sandi. Plante taem oli glad blong storian. Sandi i talem se: “Mi storian wetem ol mama papa ya se sipos oli ridim ol buk long ol smosmol pikinini blong olgeta, samting ya i save mekem we oli lavem pikinini ya moa mo pikinini i lavem olgeta moa. Biaen, mi tokbaot olsem wanem i hadwok blong tijimgud wan pikinini tede.” From we sista ya i stap storian olsem wetem ol man, wan mama we i gat sikis pikinini i stat mekem wok blong Jeova, i no longtaem i pas. Yes, sipos yumi tekem faswan step blong storian wetem narafala mo yumi soem se yumi kea long ol man wanwan, maet yumi tu i karem gudfala frut long wok blong prij.

18. (a) ?From wanem yumi evriwan i naf blong folem oda ya blong “karem plante frut”? (b) ?Gospel blong Jon i tokbaot wanem trifala samting we yu yu mas gat strong tingting blong mekem, blong stap olsem wan disaepol blong Kraes?

¹⁸ !Yumi haremgud tumas blong save se yumi naf blong folem oda ya blong “karem plante frut”! Nating se yumi yangfala no yumi olfala, nating se helt blong yumi i gud no i nogud, nating se yumi prij long ol man we oli wantem lesin no oli no wantem lesin, be yumi evriwan i naf blong karem plante frut. ?Olsem wanem yumi save mekem olsem? Taem yumi soemaot moa ol frut blong spirit, mo taem yumi mekem bes blong yumi long wok blong talemaot Kingdom blong God. Long semtaem, yumi traehad blong ‘obei long ol tok blong Jisas’ mo blong ‘lavlavem yumi.’ Yes, taem yumi mekem trifala impoten samting ya we Gospel blong Jon i talem se yumi mas mekem blong stap olsem ol disaepol blong Kraes, yumi soemaot se ‘yumi rili man blong hem.’—Jon 8:31; 13:35.

[Ol Futnot]

Ol Kwestin Blong Tingtingbak

• ?Wanem kaen frut we yumi mas karem moa long hem?

• ?From wanem yumi naf blong “karem plante frut”?

• ?Folem Gospel blong Jon, yumi bin tokbaot wanem trifala impoten samting we yumi mas mekem blong stap olsem ol disaepol blong Kraes?

[Kwestin]

[Bokis blong pija long pej 21]

?OLSEM WANEM BLONG ‘MEKEM TINGTING I LONGFALA MO GAT FRUT LONG LAEF BLONG YU’?

?WANEM i save givhan long yu blong gohed nomo blong talemaot Kingdom long ol man we oli no wantem lesin? Hemia sam ansa long kwestin ya we maet oli givhan long yu.

“From we yumi save se Jisas i stap sapotem yumi fulwan, samting ya i mekem se yumi tingting gud long ol man mo yumi gohed nomo blong talemaot Kingdom, nating se oli laekem no oli no laekem.”—Harry, we i gat 72 yia; mo i baptaes long 1946.

“Oltaem vas ya long 2 Korin 2:17 i leftemap tingting blong mi. Hem i talem se taem yumi prij ‘yumi stap stanap long fes blong God, mo yumi wok wetem Kraes.’ Ale, taem mi mi prij, mi stap kampani wetem ol besfren blong mi.”—Claudio, we i gat 43; yia mo i baptaes long 1974.

“Mi talem stret se, wok blong prij i no isi long mi. Nating se i olsem, mi mi luksave se tok blong Ol Sam 18:29 (NW) i stap kamtru long mi: ‘God i stap mekem mi mi strong, blong mi save klaem antap long ol stonwol.’ ”—Gerard, we i gat 79; yia mo i baptaes long 1955.

“Sipos mi save ridim wan vas blong Baebol nomo long man we mi stap prij long hem, mi haremgud se Baebol i bin lukluk long hat blong man ya.”—Eleanor, we i gat 26 yia; mo i baptaes long 1989.

“Mi traem ol defdefren fastok. I gat plante, mi mi no naf blong yusum evriwan long smolhaf blong laef blong mi we i stap yet.”—Paul, we i gat 79 yia; mo i baptaes long 1940.

“Taem wan man i no wantem lesin, mi no harem se man ya i stap agensem mi. Long ol storian blong mi, mi traem mekem olsem we mi stap toktok wetem ol fren, mi storian mo mi lesin long tingting blong ol man.”—Daniel, we i gat 75; yia mo i baptaes long 1946.

“Mi bin mitim sam man we oli jes tekem baptaes, ale oli talem long mi se wan taem mi bin prij long olgeta, mo samting we mi bin talem long olgeta i bin givhan long olgeta blong oli kam Witnes. Biaen, narafala i mekem Baebol stadi long olgeta mo i givhan long olgeta blong gohed. Mi mi glad blong save se yumi wok olsem wan tim taem yumi prij mo tij.”—Joan, we i gat 66 yia; mo i baptaes long 1954.

?Wanem i stap givhan long yu blong ‘mekem tingting blong yu i longfala mo blong gat frut long laef blong yu’?—Luk 8:15.

[Tok blong pija long pej 20]

Taem yumi soemaot frut blong spirit mo taem yumi talemaot Kingdom, yumi stap karem plante frut

[Tok blong pija long pej 23]

?Jisas i minim wanem taem i talem long ol aposol blong hem se: ‘Yufala i mas karem plante frut long laef blong yufala’?