Laef Stori

Mi Fesem Sam Traem We Oli Olsem Faea We i Laet

PERICLES YANNOURIS I TALEM STORI YA

Rum blong kalabus ya i wetwet mo i smel nogud mo mi harem se mi kolkol tumas. Mi stap sidaon mi wan nomo, wan smol blangket i kavremap mi, mo mi rimemba yet strong fes blong yangfala waef blong mi, taem ol soldia oli tekem mi aot long haos blong mi, tu dei bifo. Waef blong mi i stap hem wan nomo long haos wetem tufala bebi blong mitufala we tufala i sik. Biaen, waef blong mi, we i no wan Witnes, i sanem wan pasel long mi wetem wan mesej we i talem se: “Mi sanem ol bred ya i go long yu, mo mi hop se bambae yu sik olsem ol pikinini blong yu.” ?Bambae mi luk famle blong mi bakegen?

HEMIA wan nomo long ol bigfala traem we mi fesem blong holem Kristin bilif blong mi, taem famle i agensem mi, komuniti i putumaot mi, kot i jajem mi, mo ol man oli agensem mi bigwan. ?Be olsem wanem mo from wanem ol man oli putum mi long wan rabis ples olsem, nating se mi mi wan man we i kwaet mo i fraetgud long God? Plis, ridim haf we i kam biaen nao bambae yu kasem save.

Wan Pua Boe We i Gat Wan Naesfala Drim

Taem mi bon long 1909 long Stavromeno, Krit, ol man oli stap harem nogud from we long kantri blong mifala i gat ol faet, ol man oli pua, mo oli sot long kakae. Biaen, mi wetem ol fofala brata sista blong mi klosap mifala i ded from sik ya kof blong Spen. Mi rimemba we wan taem papa mama blong mifala, tufala i blokem mifala insaed long haos blong plante wik blong mifala i no kasem flu ya.

Papa i wan puaman we i wok long fam, mo hem i wan man blong bilif be hem i rere blong lesin long ol niufala tingting. Hem i bin laef long Franis mo long Madagaska, taswe hem i harem finis sam niufala tingting long saed blong skul. Nating se i olsem, famle blong mifala i stap tru long Grik Otodoks Jos,  mifala i stap go long Lames evri Sande, mo evri yia taem bisop i kam visitim mifala, mifala i welkamem hem long haos blong mifala. Mi mi wan boe blong singsing long kwaea blong jos, mo mi wantem tumas blong kam wan pris.

Long 1929, mi joenem polis fos. Mi stap wok long Tesalonaeka, long not blong Gris taem Papa i ded. Mi wantem we narafala i leftemap tingting blong mi, mo mi wantem kasem save long saed blong God, ale mi go wok long polis dipatmen we i stap long Mount Athos, wan komuniti blong ol pris we ol Kristin blong Otodoks Jos oli wosipim hem olsem “tabu hil.” * Mi wok long Mount Athos blong fo yia mo ples ya i beswan ples blong luklukgud fasin blong laef blong ol pris. Fasin blong olgeta i no pulum mi blong kam klosap moa long God. Defren olgeta, mi harem nogud tumas taem mi luk we ol pris oli no sem nating from ol rabis fasin blong olgeta long saed blong seks mo kruked fasin tu. Mi harem nogud bitim mak taem wan bigman blong jos we mi mi respektem hem bifo, man ya i askem mi blong slip wetem hem. Mi luk we trufala laef i defren olgeta long ol drim blong mi, be nating se i olsem mi wantem mekem wok blong God mo kam wan pris yet. Blong mi save rimemba taem ya, mi werem ol klos blong pris blong tekem wan foto blong mi. Biaen, mi muv i gobak long Krit.

“!Hem i Wan Devel Tru!”

Long 1942, mi maredem Frosini, wan naesfala gel we i kamaot long wan famle we olgeta man oli respektem. Olgeta man long famle blong waef blong mi oli man blong skul, taswe taem mi maredem Frosini, tingting blong mi i kam strong moa blong kam wan pris. * Mi gat strong tingting blong go long Atens blong stadi long wan kolej blong kam pris. Long en blong 1943, mi kasem haba blong Iráklion, long Krit, be mi no tekem sip we i mas tekem mi mi go long Atens. Ating mi no tekem sip ya from we, jes bifo, mi faenem wan defren rod blong haremgud long wosip blong God. ?Wanem i bin hapen?

Blong sam yia, Emmanuel Lionoudakis, wan yangfala man we i gat paoa mo i stap prij wetem ol Witnes blong Jeova, hem i bin tijim ol trutok blong Baebol long evri ples blong Krit. * Sam man oli akseptem ol klia tijing blong Baebol we ol Witnes oli stap serem mo oli lego giaman skul. Long taon blong Sitía, i gat wan grup blong Witnes we oli glad blong prij long ples ya. Bisop blong taon ya i kros long olgeta from we hem i bin laef long Yunaeted Stet bifo, mo i savegud we ol Witnes blong Jeova oli mekem wan bigfala wok taem oli prij. Hem i gat strong tingting blong spolemgud ol man ya we oli “agensem bilif blong [Otodoks] jos” long teritori blong hem. Plante taem, hem i pulum ol polisman blong oli sakem ol Witnes i go long kalabus no i pas long kot, from plante defren risen we oli giaman nomo.

Wan long ol Witnes ya i traem eksplenem ol trutok blong Baebol long mi, be hem i ting se mi no intres. Taswe hem i sanem wan narafala brata we i gat moa ekspiriens long wok blong prij, blong brata ya i kam toktok wetem mi. Be mi mi tok strong long namba tu Witnes ya, taswe hem i gobak mo i talem long smol grup se: “Bambae Pericles i no save kam wan Witnes. !Hem i wan devel tru!”

Faswan Traem Blong Mi

Mi glad we God i no ting se mi mi wan devel. Long Februari 1945, brata blong mi, Demosthenes, hem i sua fulwan we ol Witnes blong Jeova oli stap tijim trutok, taswe hem i givim buklet ya long mi Comfort All That Mourn. * Tijing blong buklet ya i tajem hat blong mi. Wan taem nomo mitufala i no moa go long ol miting blong Otodoks Jos, mitufala i joenem smol grup blong ol Witnes long Sitía, mo mitufala i stap tokbaot niufala bilif blong mitufala long ol brata sista blong mitufala. Olgeta evriwan oli akseptem trutok blong Baebol. Stret olsem mi tingbaot, taem mi tekem disisen blong lego giaman skul, waef blong mi wetem famle blong hem, olgeta oli kros long mi mo oli tanem baksaed long mi. Blong sam taem, papa blong waef blong mi i no moa wantem toktok wetem mi. Long haos oltaem i gat ol rao mo ol nogud tingting. Nating se i olsem, long Mei 21, 1945, Brata Minos Kokkinakis * i baptaesem mi mo Demosthenes.

!Yes, naoia mi save mekem drim blong mi i kamtru blong wok olsem wan trufala man blong God!  Mi rimemba yet faswan dei ya we mi bin go prij long ol haos wanwan. Mi gat 35 buklet long basket blong mi, ale mi tekem wan bas blong go prij mi wan nomo long wan vilej. Mi no sua se mi naf blong mekem samting ya, be mi stat prij long ol haos wanwan. Moa mi prij, moa tingting blong mi i kam strong. Taem wan pris we i kros i kam luk mi, mi no fraet blong toktok long hem, mi no lesin long hem taem hem i talem strong se mi mas folem hem go kasem polis stesen. Mi talem long hem se bambae mi no save livim ples ya sipos mi no visitim ful vilej fastaem, mo mi mekem samting we mi talem. Mi glad we mi glad, ale, mi no wet long bas blong gobak hom be mi wokbaot i go kasem haos, we i stap 15 kilometa longwe.

Ol Rabis Man Oli Spolem Mifala

Long Septemba 1945, mi kasem sam moa responsabiliti long niufala kongregesen blong mifala long Sitía. Smoltaem biaen, faet i kamaot long Gris. Ol grup blong man oli faetfaetem olgeta. Bisop blong Sitía i wantem yusum faet we i stap long taem ya  blong ronemaot ol Witnes blong Jeova. Ale hem i singaot wan rabis grup blong man blong faet blong oli faenem enikaen rod blong ronemaot mifala. (Jon 16:2) Taem rabis grup blong man blong faet i tekem wan bas blong kam long vilej blong mifala, wan woman we i stap long bas ya i harem plan blong olgeta we “God i talem long olgeta blong mekem,” nao hem i wonem mifala. Ale mifala i haed, mo wan man long famle blong mifala i givhan long mifala. From samting ya mifala i sef.

Hemia i makem stat blong sam moa trabol we oli mas kam biaen. Oltaem oli stap kilim mo fraetem mifala. Ol man we oli agensem mifala oli wantem fosem mifala blong gobak long jos, baptaesem ol pikinini blong mifala, mo mekem saen blong kros. Wan dei, oli kilim brata blong mi gogo oli ting se hem i ded. Mi harem nogud tumas taem mi luk ol man oli terterem klos blong tufala sista blong mi mo oli kilim tufala. Long taem ya, jos i fosem eit pikinini blong ol Witnes blong Jeova blong oli tekem baptaes.

Long 1949 mama blong mi i ded. Pris i kam from mifala bakegen, i talem se mifala i no folem ol rul blong loa blong kantri blong berem ded bodi. Mi pas long kot, be oli letem mi mi gofri. Kot kes ya i givim wan bigfala witnes, from we ol man oli harem nem blong Jeova long fastok we i openem kes ya. Long ol enemi blong mifala i gat wan rod nomo i stap blong “gudfala tingting i kambak long mifala,” oli mas holem mifala mo putumaot mifala long kantri. Oli mekem samting ya long Eprel 1949.

Wan Traem We i Olsem Faea We i Laet

Oli holem mi wetem tu narafala brata. Waef blong mi i neva kam luk mi long lokol polis stesen. Fastaem, mifala i kalabus long Iráklion. Olsem mi talem finis long fastok blong stori ya, mi stap mi wan nomo mo mi harem nogud bitim mak. Mi livim yangfala waef blong mi we i no wan Witnes, wetem tufala pikinini blong mitufala, oli stap long haos. Mi prea strong long Jeova blong i givhan long mi. Mi rimemba ol tok blong God we oli stap long Hibrus 13:5 i se: “Bambae mi mi no save livim yu yu stap yu wan. Bambae mi mi no save lego yu samtaem.” Mi luksave we i waes blong trastem Jeova fulwan.—Ol Proveb 3:5.

Oli talem long mifala se bambae oli sanem mifala i go kalabus long Makrónisos, wan aelan afsaed long solwota long Attica, Gris. Nem blong aelan ya nomo i naf blong mekem ol man oli fraet tumas, from we long kalabus ya oli spolemgud bodi blong man mo oli fosem olgeta blong wok olsem slef. Long trep we mifala i mekem blong go kasem aelan ya, mifala i stop long Piraeus. Nating se mifala i gat ol hankaf yet, be mifala i haremgud tumas taem sam brata sista oli kam mitim mifala long sip mo oli holem mifala.—Ol Wok 28:14, 15.

Laef long Makrónisos i nogud we i nogud. Stat long moning go kasem naet, oltaem ol soldia oli spolem ol man we oli kalabus. Plante man we oli kalabus longwe mo oli no Witnes, oli kam krangke, sam narafala oli ded, mo plante oli kam handikap. Long naet, mifala i harem ol krae mo ol voes blong ol presina we oli singaot bigwan from soa, from we ol soldia oli stap spolem bodi blong olgeta. Smol blangket blong mi i no naf blong blokem kolkol long naet.

Sloslo, olgeta man long kamp oli stat save hu ya ol Witnes blong Jeova, from we evri moning oli singaot nem ya taem oli stap singaot mifala evriwan. Taswe, mifala i gat plante janis blong givim witnes long ol man. Mo tu, mi gat janis blong baptaesem wan man we i stap long kalabus from politik. Man ya i bin gohed gud long saed blong spirit gogo hem i givim laef blong hem i go long Jeova.

Taem mi kalabus, mi gohed blong raetem leta i go long waef blong mi we mi laekem tumas, be mi no kasem wan ansa from hem. Nating se i olsem, mi gohed blong raet wetem kaen fasin, mi leftemap tingting blong hem, mi talem long hem se bambae mi no save stap oltaem long kalabus mo se taem trabol ya i finis bambae mifala i haremgud bakegen.

Long sem taem, namba blong ol Witnes insaed long kalabus i kam antap bigwan from we plante moa brata oli kam. Mi stap wok long ofis, taswe mi save senia ofisa blong ol soldia we i lukaot long kamp ya. Hem i respektem ol Witnes. Samting ya i mekem tingting blong mi i strong blong askem long hem sipos mifala i save kasem sam buk we oli tokbaot Baebol, we ofis blong ol Witnes long Atens oli save sanem i kam. Hem i talem se: “Nogat. Yu no save mekem olsem. ?Be olsem wanem sipos ol Witnes blong Jeova long Atens oli putum ol buk ya long wan katon, oli raetem nem blong mi long hem, mo oli sanem i kam long mi?” !Mi stanap i stap we  mi sapraes tumas long toktok blong hem! Sam dei biaen, mifala i stap karemaot ol kago long wan sip, wan polisman i salut long senia ofisa mo i talem long hem se: “Masta, katon blong yu i kam finis.” Hem i ansa se: “?Wanem katon ya?” Laki se mi stap klosap mo mi harem toktok blong tufala, ale mi toktok slo mo mi talem long hem se: “Ating katon blong mifala ya, we mifala i raetem nem blong yu long hem, olsem we yu yu talem.” Hemia wan long ol rod we Jeova i yusum blong meksua se mifala i kasem kakae long saed blong spirit.

Wan Nambawan Blesing —Mo Plante Moa Traem

Long en blong 1950, oli letem mi mi gofri. Mi gobak long haos—mi sik, skin blong mi i no moa gat kala, mi bunbun tumas, mo mi no save olsem wanem bambae oli welkamem mi. !Mi glad tumas blong luk waef blong mi wetem ol pikinini bakegen! Be wan samting we i moagud, se mi sapraes blong luk we fasin agens blong Frosini i godaon. Nao mi luk frut we i kamaot from ol leta we mi bin raetem taem mi stap kalabus. Mi stanap strong mo mi gat strong tingting blong gohed, mo tufala fasin ya i tajem hat blong Frosini. Smol taem biaen, mi storian longtaem wetem hem blong mitufala i mekem pis. Frosini i agri blong stadi long Baebol mo hem i stat bilif long Jeova mo ol promes blong Hem. !Wan long ol beswan dei long laef blong mi, hemia long 1952 taem mi baptaesem Frosini we i givim laef blong hem blong mekem wok blong Jeova!

Long 1955 mifala i statem wan kampen blong seremaot buklet ya Christendom or Christianity—Which One Is “the Light of the World”? long olgeta pris. Polis i holem mi mo mi pas long kot, wetem plante narafala Witnes. I gat plante tumas kes agensem ol Witnes blong Jeova, mekem se kot i mas putum wan spesel dei blong lesin long ol kot kes ya. Long dei ya, olgeta hae man blong provins oli kam, mo kot haos i fulap long ol pris. Bisop i wari, i stap wokbaot i go kam insaed long kot haos ya. Wan long ol pris i bin putum mi long kot from we hem i talem se mi traem jenisim bilif blong ol narafala man. Jaj i askem long hem se: “?Olsem wanem? ?Bilif blong yu i slak tumas nao yu fraet we smol buk ya i jenisim bilif blong yu?” Pris i no moa save talem wan samting. Oli letem mi mi gofri, be sam brata oli kalabus blong sikis manis.

Long yia we i kam biaen, polis i stap holem mifala oltaem, mo i gat plante moa kot kes. Ol loea blong mifala oli bisi oltaem blong tekem defens blong mifala. Oli putum mi long kot 17 taem. Nating se ol man oli agensem mifala, be mifala i prij oltaem. Mifala i glad blong fesem trabol ya, mo ol traem ya we oli olsem faea we i laet oli mekem bilif blong mifala i kam strong moa.—Jemes 1:2, 3.

Ol Niufala Wok Blong God Mo Ol Traem

Long 1957, mifala i muv i go long Atens. Long ples ya oli askem mi blong wok long wan niufala kongregesen. Waef blong mi i sapotem mi wetem fulhat blong hem. Laef blong mifala i no dipen long ol samting blong bodi, be mifala i putum ol samting blong spirit fastaem. Taswe mifala i save spenem  bighaf blong taem blong mifala long wok blong prij. Taem ol yia oli pas, oli askem mifala blong muv i go long plante defren kongregesen we i gat nid long olgeta.

Long 1963, boe blong mi i kasem 21 yia blong hem mo hem i mas rejistarem hem long lis blong go long ami. From we ol Witnes oli no joenem ami, ol man oli wipim olgeta, oli laf long olgeta mo oli daonem olgeta. Boe blong mi tu hem i fesem ol samting ya. Ale, smol blangket blong mi we mi bin holem long Makrónisos, mi givim i go long hem olsem wan saen blong leftemap tingting blong hem blong folem eksampol blong olgeta man we oli bin holemstrong bilif blong olgeta. Ol brata oli mas pas long kot blong ami, mo plante taem panis blong olgeta i minim tu kasem fo yia long kalabus. Taem oli aot, ami i singaot olgeta bakegen, ale kot i jajem olgeta mo oli kalabus bakegen. From we mi mi wan man we i wok blong skul, oli letem mi mi visitim ol defren kalabus, mo sam samtaem mi save luk boe blong mi mo sam narafala Witnes we oli stap tru long God. Oli holem boe blong mi i stap long kalabus bitim sikis yia.

Jeova i Sapotem Mifala

Taem gavman blong Gris i stanemap loa we i letem man i fri blong wosip, mi gat janis blong wok olsem wan spesel paenia long aelan blong Rhodes. Biaen, long 1986, i gat nid long Sitía, Krit, long ples we mi statem wok blong mi olsem wan Kristin. Mi glad tumas blong akseptem wok ya mo blong wok bakegen wetem ol gudfala brata sista blong mi we mi save olgeta taem mi yang yet.

Mi mi olfala blong famle blong mi, mo mi glad blong luk we klosap 70 memba blong famle blong mi oli stap tru long wok blong God. Mo namba ya i stap kam antap yet. Sam long olgeta oli wok olsem elda, man blong givhan, paenia, sam oli wok long Betel, mo sam oli mekem wok blong seket elda. Blong bitim 58 yia, bilif blong mi i fesem ol traem we oli olsem faea we i laet. Naoia mi gat 93 yia blong mi, mo taem mi luklukbak, mi glad tumas we mi bin mekem wok blong God. Hem i givim paoa long mi blong mi save ansa long toktok blong hem we i singaot mi se: “Pikinini blong mi. Yu mas lesin gud long mi. Oltaem yu mas glad blong folem fasin blong mi.”—Ol Proveb 23:26.

[Ol Futnot]

[Bokis blong pija long pej 27]

Makrónisos Wan Aelan We i Mekem Man i Fraet

Blong ten yia, stat long 1947 go kasem 1957, aelan ya blong Makrónisos we i drae mo i no gat man i laef long hem, hem i holem bitim 100,000 man long kalabus. Plante long olgeta ya oli ol Witnes we oli holem strong long bilif blong olgeta mo oli kalabus from we oli Kristin mo oli no wantem joen long ami no long politik. Plante taem, ol man blong Grik Otodoks jos oli biaenem samting ya, oli giaman se ol Witnes oli Komunis.

Grik insaeklopedia ya Papyros Larousse Britannica i tokbaot fasin blong ol man long Makrónisos blong “stretem” man, i se: “Ol rod we oli yusum blong spolem bodi blong man oli nogud olgeta, . . . ples mo laef long ples ya i nogud, we i no stret nating long wan nesen we i gat haefala save mo kalja, mo tu, fasin we ol gad oli mekem long ol prisena i rabis tumas . . . olgeta samting ya oli karem bigfala sem long histri blong Gris.”

Oli talem long sam Witnes se bambae oli neva fri sipos oli no lego bilif blong olgeta fastaem. Nating se i olsem, oli no save brekem fasin blong ol Witnes blong stanap strong. Mo antap long samting ya, sam prisena we oli kalabus from ol bisnes blong politik oli toktok wetem ol Witnes nao oli akseptem trutok blong Baebol.

[Tok blong pija long pej 27]

Mikos Kokkinakis (namba tri stat long raetsaed) mo mi (namba fo stat long lefsaed) long kalabus blong aelan blong Makrónisos

[Tok blong pija long pej 29]

Mi wok wetem wan Witnes long Sitía, Krit, wan ples we mi prij long hem taem mi yang yet