Wan Tingting We i Skelgud Long Saed Blong Wok

LONG wol tede, ol bisnes blong winim mane oli givim wok we i hevi tumas long man, ol man oli traehad blong winim moa mane no hae posisen i bitim narafala, mo ol bigbigfala kampani oli wantem nomo blong wokem plante moa samting blong salem. Taswe plante man oli no glad nating blong go long wok evri dei. Nating se i olsem, yumi mas faenem glad long wok blong yumi. ?From wanem? From we God i wokem yumi long pija blong hem—mo God i faenem glad long wok blong hem. Eksampol, Jenesis 1:31 i talem se long en blong namba sikis “dei,” we hemia wan longfala taem, God i luk olgeta wok we hem i bin mekem mo “hem i luk we oli gud we i gud tumas.”

Jeova i laekem blong wok, taswe Baebol i kolem hem se “hapi God.” (1 Timoti 1:11, NW ) Sipos God i hapi long wok blong hem, ating i stret nomo we sipos yumi traehad moa blong folem eksampol blong hem, bambae yumi hapi moa. King Solomon blong Isrel bifo hem i wan nambawan man blong bildim haos mo mekem plan. Hem i raetem se: “I gud yumi evriwan i gohed, yumi stap kakae, mo yumi stap dring, mo yumi stap glad long ol samting ya we yumi stap hadwok long hem, from we ol samting ya oli kam long God nomo.”—Prija 3:13.

Wok i save jenis kwiktaem nomo long wol blong tede, taswe i had blong gat wan tingting we i skelgud long saed blong wok. Be Jeova God i blesem olgeta we oli stap folem ol gudfala loa blong hem. (Ol Sam 119:99, 100) Ol man olsem oli kam gudfala man blong wok we bos i save trastem, taswe plante taem oli no lusum wok blong olgeta. Mo tu, oli tingbaot laef mo wok blong olgeta wetem tingting long saed blong spirit, i no long saed blong bodi nomo. Taswe oli naf blong tekem ol gudfala disisen long laef, mo fasin blong olgeta blong stap glad mo harem sef i no dipen long wok no ekonomi blong wol ya we oli save lus enitaem nomo. (Matiu 6:31-33; 1 Korin 2:14, 15) From samting ya oli gat wan tingting we i skelgud long saed blong wok mo fasin blong wok.

Fasin Blong Wok We God i Laekem

Sam man oli slef long wok blong olgeta, oli putum hem i stap long fasples. Sam narafala oli wantem se dei i finis kwik, blong oli save lego wok mo gobak long haos. ?Wanem fasin we i skelgud? Baebol  i talem se: “Nomata we yumi no gat plante samting, be sipos tingting blong yumi i stap gud, yumi no wari, hemia i winim fasin ya we yumi stap hadwok tumas oltaem, be yumi no winim wan samting nating. Fasin ya i olsem we yumi stap resis olbaot nomo.” (Prija 4:6) I nogud blong spenem olgeta taem mo paoa blong yumi long wok—fasin ya i olsem we yumi “stap resis olbaot nomo.” ?From wanem? From we maet bambae yumi spolemgud stamba samting we i mekem yumi haremgud: olsem fasin joengud wetem famle mo ol fren, fasin blong yumi long saed blong spirit, helt blong yumi, mo tu maet yumi sotem laef blong yumi. (1 Timoti 6:9, 10) Yumi gat tingting we i skelgud sipos yumi stap glad long wanem samting we yumi gat long saed blong bodi mo yumi gat pis long tingting, i bitim we yumi gat plante wok wetem trabol mo wari.

I tru, Baebol i talem se yumi mas gat wan tingting we i skelgud long saed blong wok, be hem i no min se man i mas les. (Ol Proveb 20:4) Fasin les i spolem gud tingting we yumi gat long yumi wan mo respek we ol narafala oli save gat long yumi. Be samting we i moa wos se fasin les i spolem fasin fren blong yumi wetem God. Baebol i talem klia se man we i no wantem wok, i no stret tu we hem i kakae wanem we narafala man i wok had from. (2 Tesalonaeka 3:10) Man olsem i mas jenisim fasin blong hem mo i mas wokhad, blong kasem samting we hem mo famle blong hem oli nidim. Nao from had wok blong hem, maet hem i save givhan tu long ol pua man we oli rili gat nid—hemia wan fasin we Baebol i leftemap.—Ol Proveb 21:25, 26; Efesas 4:28.

Trenem Ol Pikinini Blong Oli Tinghae Long Wok

Fasin blong laekem wok i no kamaot olsem nomo; yumi mas lanem fasin ya taem yumi yang yet. Taswe Baebol i singaot ol papa mama se: “Sipos yu tijimgud pikinini blong yu long fasin we i stret blong hem i folem, taem hem i kam bigman, bambae i no save gowe long hem.” (Ol Proveb 22:6) Ol papa mama we oli waes oli givim eksampol taem oli wok, mo tu oli stat trenem ol pikinini long haos taem oli givim ol smol wok we i stret blong ol pikinini oli mekem. Maet samtaem ol pikinini oli no glad blong mekem sam wok, be sloslo bambae oli harem se oli pat blong wan famle—speseli taem papa mama i talem gudfala tok long olgeta from wan wok we oli bin mekem gud. Sore tumas, sam papa mama oli mekem klosap evri samting blong pikinini blong olgeta, maet oli ting se long rod ya oli mekem i gud long pikinini. Be, i gud we ol papa mama ya oli tingbaot tok blong Ol Proveb 29:21, we i talem se: “Sipos yu stap givim evri samting long man blong wok blong yu, i stat long taem we hem i pikinini, wan dei bambae hem i karemaot olgeta samting we yu yu gat, oli blong hem.”

 Mo tu, ol gudfala papa mama oli mas soem bigfala intres long skul wok blong ol pikinini blong olgeta. Oli mas pulum ol pikinini blong olgeta blong oli lanem plante samting mo blong oli wokhad taem oli stap skul yet. Gudfala fasin ya bambae i givhan long ol pikinini taem oli kam bigman mo oli mas faenem wok.

Yu Mas Waes Taem Yu Jusum Wok Blong Yu

Baebol i no talem wanem kaen wok we yumi mas jusum, be hem i givim ol gudfala advaes we oli save givhan long yumi blong no kam slak long saed blong spirit, gohed long wok blong God, mo no lego ol narafala responsabiliti blong yumi. Eksampol, aposol Pol i raetem se: “Taem we i stap yet i sot nomo. Taswe . . . olgeta we oli stap yusum wol, oli mas kam olsem olgeta we oli no stap yusum tumas wol ya. From we fasin blong wol ya i stap jenis.” (1 Korin 7:29-31, NW ) Long wol blong tede, i no gat wan samting we i save stap blong olwe. Sipos yumi spenem ful taem mo paoa blong yumi long wok blong wol ya, i olsem we yumi yusum mane we yumi bin sevem long ful laef blong yumi blong pem wan haos we i stap long wan graon we man i save finis se long taem blong big ren bambae wota i ron bigfala mo i karemaot haos ya. !Hemia i no waes nating!

Sam narafala Baebol oli tanem sentens ya “oli no stap yusum tumas wol ya” i kam “oli no spenem tumas taem long wol ya” mo “oli no bisi tumas long wol.” (The Jerusalem Bible; Today’s English Version) Yes, man we i waes bambae i neva fogetem se taem blong wol ya “i sot nomo.” Man olsem i save se sipos hem i “spenem tumas taem” no i stap “bisi tumas” long wol ya bambae hem i kasem ol nogud frut nomo mo i sore tumas from.—1 Jon 2:15-17.

‘Bambae God i No Save Lego Yu Samtaem’

God i save gud wanem ol samting we yumi nidim. Mo tu hem i save hamas taem yet i stap bifo we hem i mekem stamba tingting blong hem i kamtru. Taswe hem i talem long yumi bakegen se: “I nogud yufala i laekem mane tumas. Sipos yufala i gat wanem samting, be yufala i mas harem gud long hem, from we God i talem se, ‘Bambae mi mi no save livim yu yu stap yu wan. Bambae mi mi no save lego yu samtaem.’ ” (Hibrus 13:5) !Tok ya i rili mekem man i haremgud! Jisas i folem eksampol blong God, hem i kea mo i gat lav long ol man. Taswe, bighaf blong Bigfala Toktok blong hem antap long Hil i blong tijim ol disaepol blong hem blong gat stret tingting long saed blong wok mo ol samting blong bodi.—Matiu 6:19-33.

Ol Witnes blong Jeova oli traehad blong folem tijing ya. Eksampol, taem wan bos i askem wan Witnes we hem i man blong wokem lektrik, se hem i mas wok sam moa aoa evri dei, Witnes ya i talem se hem i no wantem. ?From wanem? From we hem i no wantem we wok blong hem i kakae taem we hem i spenem wetem famle blong hem mo long wok blong God. Man ya i wan gudfala man blong wok mo evri man i trastem hem, taswe bos blong hem i no fosem hem. Be i tru se samting olsem i no hapen oltaem. Samtaem wan man i mas traem faenem wan narafala wok sipos hem i wantem holem wan fasin blong laef we i skelgud. Be, plante taem olgeta we oli trastem Jeova fulwan oli luk we bos blong olgeta i tinghae long olgeta from we oli gat gudfala fasin mo oli wokgud.—Ol Proveb 3:5, 6.

Bambae Evri Man i Haremgud Long Wok Blong Hem

Long wol blong tede, fasin blong laef blong ol man i no stretgud olgeta, taswe ol man oli no naf  blong blokem ol trabol long wok mo oli no naf blong givim wan wok long evri man. Bambae samting ya i kam moa was yet from we ekonomi blong wol i olbaot nomo mo i save foldaon olgeta. Be hemia i blong smol taem nomo. I no longtaem, bambae evri man i gat wok. Mo tu, wok ya bambae i rili pulum intres blong man mo i mekem man i haremgud. ?Olsem wanem samting ya i save kamtru? ?Wanem bambae i save mekem bigfala jenis ya i kamaot?

Jeova i yusum profet Aesea blong tokbaot wan taem olsem: “Bambae mi mi mekem niufala heven mo niufala wol bakegen. Ol samting ya we i hapen bifo, bambae ol man oli no moa save tingbaot stori blong olgeta, bambae i lus olgeta.” (Aesea 65:17) God i stap tokbaot niufala gavman blong hem, we bambae i rul antap long wan niufala wol we i defren olgeta long wol blong tede.—Daniel 2:44.

Profet tok i gohed i tokbaot fasin blong laef mo wok blong ol man we bambae oli stap long niufala wol ya i se: “Ol man bambae oli wokem ol haos, mo bambae oli save stap long olgeta. Mo bambae oli planem rop ya we oli mekem waen long frut blong hem mo bambae oli kakae frut blong hem. Bambae oli no wokem haos blong narafala man i stap long hem. Mo bambae oli no planem garen blong narafala man i kakae frut blong hem. From we laef blong olgeta bambae i longfala olsem laef blong wan tri. Mo olgeta man ya we mi mi jusumaot, bambae oli yusum gud ol samting ya we han blong olgeta i wokem. Bambae oli no hadwok blong nating nomo, mo bambae oli no karem ol pikinini blong oli kasem trabol. From we oli laen ya blong ol man we Jeova i blesem olgeta, mo ol pikinini blong olgeta tu, oli stap wetem olgeta.”—Aesea 65:21-23, NW.

!Niufala wol we bambae God i wokem i defren we i defren olgeta long wol blong tede! ?Yu yu wantem laef long wan wol we bambae yu “no hadwok blong nating nomo” be yu haremgud fulwan long “frut” blong wok blong yu? Ating yes. Be, makemgud hu bambae i kasem ol blesing ya: “Oli ol laen ya blong ol man we Jeova i blesem olgeta.” Yu tu yu save kam wan long ol man ya we “Jeova i blesem” sipos yu save hu ya Jeova mo wanem ol samting we hem i wantem yumi blong mekem. Jisas i talem se: “Mo laef ya [we i no save finis], hem i min se man i save yu, we yu nomo yu tru God, mo i save mi, se mi, Jisas Kraes, we yu yu sanem mi mi kam.” (Jon 17:3) Ol Witnes blong Jeova bambae oli glad blong stadi Baebol wetem yu, blong halpem yu blong kasem save ya we i givim laef.

[Bokis blong pija long pej 6]

“OLI LUKAOTEM OLGETA”

Baebol i talem se: “Long wanem wok we yufala i mekem, be yufala i mas mekem long gladhat blong yufala, olsem we yufala i stap wok blong Masta blong yumi, yufala i no stap wok blong ol man nomo.” (Kolosi 3:23) Yes, wan man we tingting blong hem long saed blong wok, i laenap wetem advaes ya, hem i wan man we plante bos oli glad blong gat long kampani blong olgeta. Long buk blong hem, How to Be Invisible, J. J. Luna i singaot ol bos we oli lukaotem sam man blong wok se oli mas lukaotem sam memba blong skul we oli wokhad, mo i ademap se: “I tru we plante taem, mifala i jusum ol Witnes [blong Jeova].” Hem i givim sam risen from wanem oli jusum ol Witnes, mo wan long ol risen ya hemia se ol Witnes oli no giaman mo oli no stil. Hemia wan samting we i mekem se “oli lukaotem olgeta [ol Witnes] oltaem” blong mekem enikaen wok.

[Tok blong pija long pej 5]

Fasin blong skelemgud wok wetem ol samting blong spirit mo spel i mekem man i haremgud