?From Wanem Yumi Mas Mekem Lodsapa?

“Tok ya, mi mi kasem long Masta blong yumi, mo mi talemaot long yufala finis.”—1 KORIN 11:23.

1, 2. ?Jisas i mekem wanem long naet blong Pasova long 33 K.T.?

 LONG Tasde naet, Maj 31, 33 K.T., * Pikinini blong Jeova, wan nomo we hem i gat, i joen wetem 11 man we oli bin ‘stap wetem hem long olgeta hadtaem we hem i gotru long hem.’ (Luk 22:28) Ating fulmun i flasem skae blong Jerusalem long naet ya. Jisas Kraes mo ol aposol blong hem oli jes finisim lafet blong Pasova. Jisas i sanemaot giaman fren blong hem, Judas Iskariot. Be i no taem yet blong ol narafala oli aot. ?From wanem? From we Jisas i rere blong mekem wan samting we i impoten tumas. ?Wanem samting ya?

² Matiu i stap long naet ya, taswe bambae yumi letem Gospel blong Matiu i ansa long kwestin ya. Hem i raetem se: “Jisas i tekem bred, i prea blong talem tangkiu long God from. Nao hem i brekem, i givim long ol man blong hem, i talem se, ‘Yufala i tekem, yufala i kakae. Hemia bodi blong mi.’ Mo hem i tekem kap waen, i talem tangkiu long God from, nao i pasem i go long olgeta, i talem se, ‘Yufala evriwan, yufala i dring long hem, from we hemia blad blong mi, we i blong mekem promes blong God i stanap. Blad blong mi bambae i ron blong tekemaot ol sin blong plante man.’ ” (Matiu 26:26-28) ?Hemia wan samting we oli mas mekem wan taem nomo? ?From wanem lafet ya i impoten? ?Hem i minim wanem long yumi tede?

“Evritaem, . . . Yufala i Mas Mekem Olsem”

3. ?From wanem, samting we Jisas i mekem long naet blong Nisan 14, 33 K.T., i impoten?

³ Samting we Jisas Kraes i mekem long naet blong Nisan 14, 33 K.T., i no wan smol samting nomo long laef blong hem. Bitim 20 yia biaen, ol tabu Kristin oli folem fasin ya yet blong mekem Lodsapa. Aposol Pol i tokbaot samting ya taem hem i raet i go long olgeta. Nating se Pol i no stap wetem Jisas mo ol 11 aposol blong hem long 33 K.T., i sua se sam long ol aposol ya oli talem long hem wanem i bin hapen long lafet ya. Mo tu, i klia se God i yusum tabu spirit blong soem sam  samting long Pol long saed blong lafet ya. Pol i talem se: “Tok ya, mi mi kasem long Masta blong yumi, mo mi talemaot long yufala finis. Mi talem se long naet ya we biaen wan man i letem Jisas, Masta blong yumi i go long han blong ol enemi blong hem, Jisas i tekem bred. Nao hem i prea blong talem tangkiu long God from, mo hem i brekem bred ya, i talem se, ‘Hemia bodi blong mi, we bambae mi letem from yufala. Oltaem yufala i mas mekem samting ya blong tingbaot mi bakegen.’ Mo long sem fasin, taem olgeta oli kakae finis, hem i tekem kap, nao i talem se, ‘Kap ya i olsem niufala promes blong God, we blad blong mi bambae i ron blong mekem i stanap. Evritaem, taem yufala i dring long hem, yufala i mas mekem olsem blong tingbaot mi bakegen.’ ”—1 Korin 11:23-25.

4. ?From wanem ol Kristin oli mas mekem Lodsapa?

⁴ Gospel blong Luk i talem se Jisas i givim oda ya: “Oltaem yufala i mas mekem samting ya blong tingbaot mi bakegen.” (Luk 22:19) Wan narafala Baebol i talem se: “Mekem samting ya blong rimemba mi.” (Today’s English Version) mo “Mekem samting ya olsem wan memori blong mi.” (The Jerusalem Bible) Yes, plante taem yumi singaot lafet ya se Memoriol blong ded blong Kraes. Pol i kolem lafet ya se Lodsapa. Nem ya i stret from we Jisas i stanemap lafet ya long naet. (1 Korin 11:20) Ol Kristin oli kasem oda se oli mas mekem Lodsapa. ?Be from wanem Jisas i stanemap lafet ya?

?From Wanem Jisas i Stanemap?

5, 6. (a) ?Wanem wan risen from wanem Jisas i stanemap Memoriol? (b) Talem wan narafala risen from wanem hem i stanemap Lodsapa ya.

⁵ Wan risen from wanem Jisas i stanemap Memoriol i joen wetem risen blong ded blong Hem. Hem i ded olsem wan man we i sapotem fulwan, hae rul blong Papa blong hem long heven. Long rod ya, Kraes i pruvum se Setan i wan man blong giaman, taem hem i talem se ol man oli mekem wok blong God blong kasem ol blesing nomo. (Job 2:1-5) Taem Jisas i stap tru long Jeova gogo kasem ded, hem i pruvum se tok ya blong Setan i giaman, mo hem i mekem hat blong Jeova i glad tumas.—Ol Proveb 27:11.

⁶ Wan narafala risen from wanem Jisas i stanemap Lodsapa, hemia blong mekem yumi tingbaot se ded blong hem olsem wan man we i stretgud olgeta mo i no gat sin, i blong “pem rod blong plante man oli go fri.” (Matiu 20:28) Taem faswan man i mekem sin agens long God, hem i lusum laef we i stretgud olgeta mo ol blesing blong hem. Be, Jisas i talem se: “God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.” (Jon 3:16) Yes, “ol man we oli stap mekem sin, pei blong olgeta, bambae oli ded from, be ol man we oli joen long Jisas Kraes, Masta blong yumi, presen we God i stap givim i go nomo long olgeta, hemia laef ya we i no save finis.” (Rom 6:23) Lodsapa i mekem yumi tingbaot bigfala lav we Jeova mo Pikinini blong hem tugeta i soemaot, taem Jisas i givim laef blong hem olsem wan sakrefaes. !Yumi mas gat bigfala tangkiu from lav ya!

?Mekem Lafet Ya Wetaem?

7. ?Olsem wanem ol tabu Kristin oli dring waen mo kakae bred blong Memoriol “oltaem”?

⁷ Long saed blong Lodsapa, Pol i talem se: “Taem we yufala i kakae bred ya, mo yufala i dring long kap ya, be oltaem yufala i stap soemaot ded blong Masta blong yumi, gogo hem bambae i kambak bakegen.” (1 Korin 11:26) Ol wanwan tabu Kristin oli mas dring waen mo kakae bred blong Memoriol gogo kasem we oli ded. Olsem nao, long fored blong Jeova God mo ol man long wol ya, oli talemaot bakegen mo bakegen se oli bilif fulwan long rod we God i mekem tru long Jisas we i givim laef blong hem olsem wan ransom sakrefaes.

8. ?Grup blong ol tabu Kristin oli mas mekem Lodsapa gogo kasem wetaem?

⁸ ?Gogo kasem wetaem ol tabu Kristin oli mas gohed blong mekem Memoriol blong ded blong Kraes? Pol i talem se “gogo hem bambae i kambak bakegen.” Hemia i min se oli mas mekem Memoriol ya go kasem we Jisas i “kambak bakegen” blong mekem ol tabu man blong hem oli laef bakegen long ded, mo tekem olgeta oli go long heven wetem hem. (1 Tesalonaeka 4:14-17) Samting ya i laenap wetem ol tok we Jisas i talem long 11 gudfala aposol blong hem, i se: “From we mi go blong mekemrere ples blong yufala bambae mi  save kambak blong tekem yufala i kam stap wetem mi, blong bambae yufala i save stap long ples ya we mi bambae mi stap long hem.”—Jon 14:3.

9. ?Ol tok blong Jisas long Mak 14:25 i minim wanem?

⁹ Taem Jisas i stanemap Memoriol, hem i tokbaot kap waen mo i talem long ol gudfala aposol blong hem se: “Bambae mi mi no moa save dring waen ya bakegen, gogo kasem we bambae mi dring niufala waen long [“Kingdom blong God,” NW].” (Mak 14:25) Jisas i no save dring prapa waen long heven. Long vas ya, olsem sam narafala vas long Baebol, waen i olsem pija blong bigfala glad. (Ol Sam 104:15; Prija 10:19) Jisas mo ol man blong hem bambae oli glad tumas blong stap tugeta long Kingdom. Hemia nao samting we oli bin wet longtaem blong kasem.—Rom 8:23; 2 Korin 5:2.

10. ?Yumi mas mekem Memoriol evri manis, evri wik, evri dei, no olsem wanem?

¹⁰ ?Olsem wanem? ?Yumi mas mekem lafet blong ded blong Jisas evri manis, evri wik, no evri dei? Nogat. Jisas i stanemap Lodsapa long dei blong Pasova, mo hem i ded long dei ya tu. Oli mekem lafet blong Pasova “blong tingbaot” dei we Isrel i kamfri long wok slef long Ijip long yia 1513 B.K.T. * (Eksodas 12:14) Oli mekem Pasova wan taem evri yia, long namba 14 dei blong Nisan long kalenda blong ol man Jiu. (Eksodas 12:1-6; Levitikas 23:5) Samting ya i soemaot se yumi no mekem lafet blong ded blong Jisas evri manis, evri wik, no evri dei, be wan taem evri yia nomo, olsem oli mekem long saed blong Pasova.

11, 12. ?Ol man blong raetem histri oli talem wanem long saed blong ol Memoriol bifo?

¹¹ Taswe, i stret blong mekem Memoriol long Nisan 14 evri yia. Wan buk we i tokbaot samting ya i talem se: “Ol man oli singaot ol Kristin long Esia Maena se ol Kwotodesiman [namba 14] from we oli folem kastom blong mekem pascha [Lodsapa] long namba 14 dei blong manis Nisan . . . Maet dei ya i foldaon long Fraede no wan narafala dei blong wik.”—The New Schaff-Herzog Encyclopedia of Religious Knowledge, Buk 4, pej 44.

¹² Wan man blong raetem histri, J. L. von Mosheim, i tokbaot lafet ya blong ol Kristin afta long yia 100 K.T. Hem i talem se ol Kwotodesiman oli mekem Memoriol long Nisan 14 from we, “long tingting blong olgeta, eksampol blong Kraes i olsem wan loa we oli mas folem.” Wan narafala man blong raetem histri i talem se: “Ol Kwotodesiman jos long Esia oli mekem i sem mak olsem jos long Jerusalem. Long ol yia afta 100 K.T., ol jos ya oli mekem Pascha long namba 14 dei blong Nisan blong tingbaot we Kraes i ded blong sevem olgeta.”—Studia Patristica, Buk 5, 1962, pej 8.

Mining Blong Bred

13. ?Jisas i yusum wanem kaen bred long Lodsapa?

¹³ Taem Jisas i stanemap Memoriol, hem “i tekem bred, i prea blong talem tangkiu long God from. Nao hem i brekem, i givim long [ol aposol].” (Mak 14:22) Bred we oli yusum i sem mak long bred we oli jes bin yusum long Pasova. (Eksodas 13:6-10) Bred ya i no gat is long hem, taswe hem i tintin nomo mo i strong, ale oli mas brekem blong oli save givimaot. Taem Jisas i mekem merikel blong givim bred long plante taosen man, hem i brekem bred ya blong givimaot long ol man. Bred ya tu i tintin mo i strong. (Matiu 14:19; 15:36) Taswe, i luk olsem we fasin ya blong brekem bred blong Memoriol, i no wan saen.

14. (a) ?From wanem i stret we bred blong Memoriol i no gat is long hem? (b) ?Yumi save pem no kukum wanem kaen bred blong yusum long Lodsapa?

¹⁴ Long saed blong bred we Jisas i yusum taem hem i stanemap Memoriol, hem i se: “Hemia [“olsem,” NW] bodi blong mi, we bambae mi letem from yufala.” (1 Korin 11:24; Mak 14:22) I stret nomo we bred ya i no gat is long hem. ?From wanem? From we is i wan saen blong soemaot samting we i nogud, rabis fasin, no sin. (1 Korin 5:6-8) Bred ya i saen blong bodi blong Jisas we i stretgud olgeta, i no gat sin. Bodi olsem i stret long wan man we i givim laef blong hem blong pemaot ol narafala man. (Hibrus 7:26; 10:5-10) Ol Witnes Blong Jeova oli tingbaot samting ya mo folem eksampol we Jisas i putum, taem oli yusum bred we i no gat is long hem long Memoriol. Long sam ples, ol Witnes oli yusum bred blong ol man Jiu we oli kolem matzos. Ol man Jiu oli no ademap wan samting, olsem onion no eg, long bred ya. Long sam narafala ples, ol Witnes oli wokem bred we i no gat is long hem. Oli tekem smol flaoa we oli wokem long wit no wan narafala sid (wit i moa gud), oli ademap smol wota long hem mo oli tantanem.  Nao oli rolem flaoa ya i kam tintin, mo oli kukum long wan flat plet we i gat smol oel long hem, gogo bred ya i kam drae mo strong.

Mining Blong Waen

15. ?Wanem i stap long kap we Jisas i yusum blong stanemap Memoriol blong ded blong hem?

¹⁵ Afta we Jisas i pasem bred i go long ol aposol finis, hem i tekem wan kap, “i talem tangkiu long God from, nao i pasem i go long olgeta, mo olgeta oli dring.” Jisas i eksplenem se: “Hemia i [“olsem,” NW] blad blong mi we i blong mekem promes blong God i stanap. Blad blong mi bambae i ron blong sevem plante man.” (Mak 14:23, 24) ?Wanem i stap long kap ya? Waen i stap. Waen ya i no wota blong grep nomo, be hem i wota blong grep we oli livim i stap blong i tanem i kam waen. Taem Baebol i tokbaot waen, hem i no stap tokbaot wota blong grep nomo. Taswe, taem Jisas i tokbaot waen we oli fulumap long “olfala botel we oli wokem long skin blong nani,” nao botel ya i bosta, hem i stap tokbaot prapa waen, i no wota blong grep nomo. Mo tu, ol enemi blong Kraes oli tok agensem hem se hem i “man blong dring waen.” Tok ya bambae i no strong nating sipos waen ya i wota blong grep nomo. (Matiu 9:17; 11:19, NW) Yes, oli dring prapa waen long lafet blong Pasova, mo Kraes i yusum prapa waen bakegen blong stanemap Memoriol blong ded blong hem.

16, 17. ?I stret blong yusum wanem waen long Memoriol, mo from wanem?

¹⁶ Red waen nomo i stret blong yusum, from we samting we i stap long kap ya i saen blong blad blong Jisas we i ron. Hem wan i talem se: “Hemia i [“olsem,” NW] blad blong mi we i blong mekem promes blong God i stanap. Blad blong mi bambae i ron blong sevem plante man.” Mo aposol Pita i raetem se: “Yufala [ol tabu Kristin] i save finis wanem samting we God i yusum blong pemaot yufala, blong tekemaot yufala long rabis laef ya we yufala i kasem long ol olfala blong yufala bifo, blong mekem yufala i fri. Hem i no yusum samting we i save kam nogud, olsem silva no gol. Be blong pemaot yufala, hem i yusum blad blong Kraes we i ron taem hem i ded long [“pos,” NW]. Blad ya i olsem blad blong wan smol sipsip we i no gat wan samting nating i rong long bodi blong hem. Mo long fes blong God, blad ya blong Kraes i gud tumas.”—1 Pita 1:18, 19.

¹⁷ I sua se Jisas i yusum red waen we oli wokem long grep taem hem i stanemap Memoriol. Be sam kaen red waen tede oli no stret blong yusum, from we ol man we oli wokem oli ademap sam narafala samting long hem, olsem alkol, brandi, no ol lif we oli smelgud. Blad blong Jisas i gud finis, i no nidim wan narafala samting blong mekem i gud. Taswe, ol waen olsem port, sherry, mo vermouth oli no stret blong yusum. Long kap blong Memoriol i mas gat red waen we i no swit mo we oli no ademap wan samting long hem. I oraet blong yusum red waen we man nomo i wokem long grep mo i no putum suga long hem, mo i oraet blong yusum ol waen olsem red burgundy mo claret.

18. ?From wanem yumi save se Jisas i no mekem wan merikel blong jenisim bred mo waen blong Memoriol?

¹⁸ Taem Jisas i stanemap lafet ya, hem i no mekem wan merikel blong jenisim bred i kam prapa bodi blong hem mo waen i kam prapa blad blong hem. Nogat. Sipos oli kakae prapa bodi blong Jisas mo dring prapa blad blong hem, i olsem we oli man blong kakae man bakegen. Hemia i agensem loa blong God. (Jenesis 9:3, 4; Levitikas 17:10) Long naet ya, Jisas i stap fored long olgeta yet wetem prapa bodi mo prapa blad blong hem. Long nekis aftenun we i Nisan 14 yet long kalenda blong ol man Jiu, Jisas i givim bodi mo blad ya olsem wan sakrefaes we i stretgud olgeta. Taswe, bred  mo waen blong Memoriol i saen nomo we i minim bodi mo blad blong Kraes. *

Memoriol—Kakae We Oli Serem

19. ?From wanem i oraet blong yusum moa long wan plet mo wan kap long Lodsapa?

¹⁹ Taem Jisas i stanemap Memoriol, hem i singaot ol gudfala aposol blong hem blong dring long semfala kap. Gospel blong Matiu i talem se: “[Jisas] i tekem kap waen, i talem tangkiu long God from, nao i pasem i go long olgeta, i talem se, ‘Yufala evriwan, yufala i dring long hem.’ ” (Matiu 26:27) I no hadwok long olgeta blong yusum ‘wan kap’ nomo i bitim we oli yusum plante kap, from we i luk olsem se 11 man ya oli sidaon evriwan long wan tebol, ale i isi nomo blong oli pasem kap ya i go long olgeta evriwan. Long yia ya, long bitim 94,000 kongregesen blong ol Witnes Blong Jeova long wol, plante milian man bambae oli hivap blong mekem Lodsapa. From we fulap man olsem oli hivap long wan naet, olgeta evriwan ya oli no save yusum wan kap nomo. Long ol bigfala kongregesen oli mas yusum moa long wan kap waen blong folem eksampol blong Jisas, olsem nao, i no tekem longtaem tumas blong oli pasem waen ya i go long olgeta man. Sem mak long saed blong bred, oli save yusum moa long wan plet. Mo tu, i no gat wan samting long Baebol blong talem se yumi mas yusum wan spesel kaen kap. Be, kap mo plet we yumi jusum, oli mas soemaot respek mo soem se yumi tinghae long lafet ya. I waes blong no fulumap kap tumas, olsem nao, ol man oli no save kafsaedem waen ya taem oli pasem i go long narafala.

20, 21. ?From wanem yumi save talem se Memoriol i wan kakae we yumi serem?

²⁰ Nating se yumi save yusum moa long wan plet blong bred mo wan kap blong waen, Memoriol i stap yet olsem wan kakae we ol man oli serem. Long Isrel bifo, man i mekem wan kakae we ol man oli serem taem hem i karem wan anamol i go long olta blong God. Ale, oli kilim anamol ya i ded, nao oli bonem haf long olta, haf i go long pris we i mekem sakrefaes ya, mo haf i go long ol pikinini blong Eron we oli pris. Man we i givim anamol ya mo ol famle blong hem, olgeta tu oli joen long kakae ya. (Levitikas 3:1-16; 7:28-36) Memoriol tu i wan kakae we yumi serem.

²¹ Jeova i Stamba blong plan ya blong Memoriol, taswe yumi save talem se hem tu i joen long kakae ya. Jisas nao hem i sakrefaes, mo ol tabu Kristin oli joen long kakae ya taem oli tekem bred mo waen. Taem oli kakae long tebol blong Jeova, oli soemaot se oli gat pis wetem Hem. Taswe, Pol i raetem se: “Gudfala kap ya we yumi stap talem tangkiu tumas long God from, taem yumi dring long hem, yumi kam wan wetem Kraes long blad blong hem. Mo bred ya we yumi stap brekem, taem yumi kakae, yumi kam wan wetem Kraes long bodi blong hem. Oltaem yumi tekem wan bred nomo, mo yumi evriwan i kakae bred ya, mo from samting ya, nating we yumi plante, be yumi evriwan i olsem wan bodi nomo.”—1 Korin 10:16, 17.

22. ?Wanem ol kwestin long saed blong Memoriol we yumi mas tokbaot yet?

²² Skul blong ol Witnes Blong Jeova i mekem wan spesel selebresen nomo evri yia, hemia Lodsapa. I stret we oli mekem olsem, from we Jisas i givim oda long ol man blong hem se: “Oltaem yufala i mas mekem samting ya blong tingbaot mi bakegen.” Long Memoriol, yumi tingbaot ded blong Jisas, we i leftemap Jeova olsem king we i antap olgeta. Olsem yumi luk finis, long kakae ya we yumi serem, bred i saen blong bodi blong Kraes we hem i givim olsem sakrefaes, mo waen i saen blong blad blong hem we i ron. Be, i no gat plante man we oli kakae bred ya mo dring waen ya. ?From wanem i olsem? ?Olsem wanem long plante milian man we oli no dring waen mo kakae bred long Memoriol? ?Lafet ya i impoten long olgeta tu? ?Lodsapa ya i mas minim wanem long yu?

[Ol Futnot]

?Wanem Ol Ansa Blong Yu?

• ?From wanem Jisas i stanemap Lodsapa?

• ?Yumi mas mekem Memoriol evri manis, evri wik, evri dei, no olsem wanem?

• ?Bred blong Memoriol we i no gat is long hem, hem i saen blong wanem samting?

• ?Waen blong Memoriol, hem i saen blong wanem samting?

[Kwestin]

[Tok blong pija long pej 15]

Jisas i stanemap Lodsapa