?Lodsapa i Minim Wanem Long Yu?
?Lodsapa i Minim Wanem Long Yu?
“Olgeta man we oli stap kakae bred ya, mo oli stap dring long kap ya blong Masta blong yumi long fasin we i no stret, oli stap mekem i no stret long bodi blong Masta blong yumi, mo long blad blong hem.”—1 KORIN 11:27.
1. ?Wanem lafet we i moa impoten i bitim ol narafala lafet long yia 2003, mo olsem wanem lafet ya i stat?
LAFET we yumi plan blong mekem afta we san i godaon long Eprel 16, i moa impoten i bitim ol narafala lafet long yia 2003. Long dei ya, ol Witnes Blong Jeova bambae oli hivap blong mekem Memoriol blong ded blong Jisas Kraes. Long faswan stadi, yumi bin tokbaot we Jisas mo ol aposol blong hem oli mekem Pasova long Nisan 14, 33 K.T., nao biaen hem i stanemap Memoriol, we narafala nem blong hem se Lodsapa. Bred blong Memoriol we i no gat is long hem, i saen blong bodi blong Kraes we i no gat sin long hem. Red waen i saen blong blad blong Kraes we i ron from ol man. Sakrefaes ya nomo i save sevem ol man long sin mo ded we oli kasem long faswan papa mama blong olgeta.—Rom 5:12; 6:23.
2. ?Wanem woning i stap long 1 Korin 11:27?
2 Olgeta we oli kakae bred mo dring waen long Memoriol, oli mas mekem long fasin we i stret. Aposol Pol i talem samting ya i klia nomo taem hem i raet i go long ol Kristin long Korin bifo. Long ples ya, oli stap mekem Lodsapa long fasin we i no stret. (1 Korin 11:20-22) Pol i raetem se: “Olgeta man we oli stap kakae bred ya, mo oli stap dring long kap ya blong Masta blong yumi long fasin we i no stret, oli stap mekem i no stret long bodi blong Masta blong yumi, mo long blad blong hem.” (1 Korin 11:27) ?Wanem mining blong tok ya?
Samfala Oli Mekem i No Stret
3. ?Plante Kristin long Korin oli mekem wanem long Lodsapa?
3 Plante Kristin long Korin oli tekem bred mo waen blong Memoriol long fasin we i no stret. Oli no stap joengud long wan tingting, mo blong smoltaem, samfala oli karem kakae blong olgeta i kam blong oli kakae bifo long miting no taem miting i stap gohed. Plante taem, oli kakae mo dring bitim mak. Oli no stap wekapgud long tingting blong olgeta mo long saed blong spirit. From samting ya, “oli stap mekem i no stret long bodi blong Masta blong yumi, mo long blad blong hem.” Olgeta we oli no karem kakae wetem olgeta oli hanggri, ale oli no save putum tingting blong olgeta i stap long miting ya. Yes, plante blong olgeta oli no gat respek, oli dring waen mo kakae bred be oli no tinghevi long hem. !Yumi kasem save from wanem oli stap pulum panis i kam long olgeta!—1 Korin 11:27-34.
4, 5. ?From wanem ol man we oli kakae bred mo dring waen long Memoriol oli mas jekemgud olgeta oltaem?
4 Evri yia, bifo long Memoriol, i impoten se ol man we oli stap kakae bred mo dring waen oli jekem olgeta bakegen. Blong joen long kakae ya long fasin we i stret, oli mas strong long saed blong spirit. Sipos wan man i no gat respek long sakrefaes blong Jisas, no i ting nating long hem, maet bambae God ‘i no moa save kaontem hem, se i man blong hem.’ Hemia i sem mak long wan man Isrel we i no klin long ae blong God, be i kakae long sakrefaes we oli serem.—Levitikas 7:20; Hibrus 10:28-31.
5 Pol i talem se Memoriol i olsem sakrefaes we ol man Isrel oli serem. Hem i tokbaot ol man we oli kakae mo dring long Memoriol se oli stap joen wetem Kraes tru long kakae ya, nao biaen, hem i talem se: “Yufala i no save dring long kap blong [“Jeova,” NW], mo bakegen long kap blong ol devel. Mo yufala i no save sidaon blong kakae long tebol blong [“Jeova,” NW], mo bakegen long tebol blong ol devel.” (1 Korin 10:16-21) Sipos wan man we i dring waen mo i kakae bred long Memoriol i mekem wan bigfala sin, hem i mas talemaot sin ya long Jeova mo hem i mas askem ol elda blong kongregesen blong givhan long hem long saed blong spirit. (Ol Proveb 28:13; Jemes 5:13-16) Sipos hem i rili tanem tingting blong hem mo i gat frut blong soemaot samting ya, hem i no stap tekem bred mo waen blong Memoriol long fasin we i no stret.—Luk 3:8.
Ol Man We Oli Lukluk Nomo Wetem Respek
6. ?God i givim raet long hu blong kakae bred mo dring waen blong Lodsapa?
6 ?Olsem wanem long olgeta we oli stap mekem i gud long smolhaf blong ol 144,000 brata blong Kraes we oli stap yet long wol ya? ?Oli mas kakae bred mo dring waen long Lodsapa? (Matiu 25:31-40; Revelesen 14:1) Nogat. God i givim raet ya long ol man nomo we hem i makemaot olgeta wetem tabu spirit blong oli “joen long Kraes.” (Rom 8:14-18; 1 Jon 2:20) ?Ale, olsem wanem long ol man we oli hop se bambae oli kasem laef we i no save finis long paradaes long wol ya aninit long rul blong Kingdom? (Luk 23:43; Revelesen 21:3, 4) From we bambae oli no joen wetem Kraes long heven, oli kam long Memoriol blong lukluk nomo wetem respek.—Rom 6:3-5.
7. ?Olsem wanem ol Kristin long faswan handred yia oli save se oli mas kakae bred mo dring waen blong Memoriol?
7 Ol trufala Kristin long faswan handred yia oli ol man we tabu spirit i makemaot olgeta. Plante long olgeta oli kasem wan presen no sam presen we tabu spirit i givim long olgeta, olsem presen ya blong toktok long narafala lanwis. From samting ya, i no hadwok long ol man ya blong luksave se tabu spirit i makemaot olgeta, mo se oli mas dring waen mo kakae bred blong Memoriol. Be, long taem blong yumi, ol man oli mas luksave samting ya from tok ya blong God se: “Olgeta we Spirit blong God i stap lidim olgeta, oli pikinini blong God. Mo Tabu Spirit ya we God i givim finis long yufala, hem i no blong mekem yufala i olsem ol slef nomo blong God, we yufala i fraet long hem, nogat. Spirit ya i blong mekem yufala i pikinini blong God. Mo long paoa blong Spirit ya, taem yumi prea, yumi stap talem long God se, ‘Papa blong mifala.’ ”—Rom 8:14, 15.
8. ?Hu olgeta we oli olsem “ol gudfala sid” mo “rabis gras” long Matiu japta 13?
8 Long ol handred yia we oli pas finis, ol trufala tabu man oli olsem “ol gudfala sid” we oli gru long medel blong ol “rabis gras,” hemia ol giaman Kristin. (Matiu 13:24-30, 36-43) Afta long yia 1870, i kam isi moa blong luksave “ol gudfala kakae” blong sid ya. Plante yia afta long taem ya, ol tabu Kristin elda oli kasem advaes ya: “Ol elda . . . oli mas eksplenem long ol man we oli hivap [long Memoriol] se oli nidim tu samting, hemia,—(1) bilif long blad [blong Kraes], mo (2) givim laef blong olgeta i go long Masta mo mekem wok blong hem gogo oli ded. Nao biaen, oli mas singaot ol narafala we oli gat sem bilif mo we oli givim laef blong olgeta i go long God, blong olgeta tu oli joen blong tingbaot ded blong Masta bakegen.”—Studies in the Scriptures, Buk 6, The New Creation, pej 473. *
Lukaot “Ol Narafala Sipsip”
9. ?Long 1935, olsem wanem mining blong “bigfala hip blong ol man” i kam klia, mo samfala we oli stap tekem bred mo waen blong Memoriol oli mekem wanem long taem ya?
9 Sloslo, ogenaesesen blong Jeova i stat tingbaot ol narafala we oli no tabu man blong Kraes. Wan impoten samting long saed ya i hapen raonabaot long yia 1935. Bifo long taem ya, ol man blong God oli ting se “bigfala hip blong ol man” long Revelesen 7:9, hemia wan narafala grup blong man we bambae oli joen wetem ol 144,000 tabu man we oli laef bakegen long heven. Narafala grup ya oli olsem ol fren no gel we oli folem woman blong Kraes. (Ol Sam 45:14, 15; Revelesen 7:4; 21:2, 9) Be, long Mei 31, 1935, long asembli blong ol Witnes Blong Jeova long Washington, D.C., Amerika, oli givim wan pablik tok wetem plante vas blong Baebol blong soem se “bigfala hip blong ol man” (“bigfala kampani,” New World Translation) hemia “ol narafala sipsip” we oli stap laef long taem blong en. (Jon 10:16) Afta long asembli ya, samfala we fastaem oli bin kakae bred mo dring waen long Memoriol, oli no moa mekem olsem from we oli luksave se fiuja blong olgeta i blong stap long wol ya, i no blong go long heven.
10. ?Wanem fiuja blong “ol narafala sipsip” mo wok blong olgeta tede?
10 Stat long 1935, wok i kam antap moa blong lukaot ol man long grup ya blong “ol narafala sipsip.” Olgeta ya oli bilif long ransom sakrefaes, oli givim laef blong olgeta i go long God, mo oli sapotem ol tabu man blong “smol kampani” long wok blong talemaot Kingdom. (Luk 12:32, NW) Ol narafala sipsip ya oli sem mak long ol laswan man blong Kingdom blong heven we oli stap yet long wol ya, nomo se oli gat janis blong laef olwe long wol ya i no long heven. Olgeta ya oli olsem ol man blong narafala kantri we oli stap long Isrel bifo, mo oli wosip long Jeova mo obei long Loa. Tede, ol narafala sipsip oli glad blong mekem ol Kristin wok wetem ol man Isrel long saed blong spirit, olsem wok blong talemaot gud nius. (Galesia 6:16) Be long taem bifo, wan man blong narafala kantri i no save kam king no pris long Isrel. Long sem fasin, wan narafala sipsip i no save rul long Kingdom blong heven no mekem wok blong pris.—Dutronome 17:15.
11. ?Olsem wanem yia we man i baptaes i save givhan long hem blong luksave fiuja we bambae hem i kasem?
11 Ale, long ol yia afta 1930, sloslo i kam klia moa se, God i jusumaot finis grup blong man we bambae oli go long heven. Taswe, blong klosap 70 yia nao, wok i gohed blong faenem ol narafala sipsip blong oli laef olwe long wol ya. Sipos wan tabu man i lego Jeova, ating God bambae i singaot wan man we i mekem wok blong Hem longtaem finis olsem wan narafala sipsip, blong hem i tekem ples blong man ya we i aot long grup blong ol 144,000.
?From Wanem Samfala Oli Mestem?
12. ?Wanem samting i save mekem se wan man i mas stop blong tekem bred mo waen blong Memoriol, mo from wanem?
12 Ol tabu Kristin oli suagud se God i singaot olgeta finis blong oli go long heven. ?Be olsem wanem sipos samfala we God i no singaot olgeta blong go long heven, oli stap kakae bred mo dring waen long Memoriol? Taem oli luksave se oli mestem mo se God i no bin singaot olgeta blong go long heven, i sua se tingting blong olgeta bambae i stikim olgeta nao bambae oli no moa tekem bred mo waen. Bambae God i no glad long wan man we i save se tabu spirit i no makemaot hem blong kam wan king mo pris long heven, be hem i mekem olsem we God i singaot hem. (Rom 9:16; Revelesen 20:6) Jeova i kilim i ded man Livae ya Kora, from we hem i gat flas tingting nao hem i wantem kasem wok blong pris we ol laen blong Eron nomo oli gat raet blong kasem. (Eksodas 28:1; Namba 16:4-11, 31-35) Sipos wan Kristin i luksave se hem i mestem taem hem i tekem bred mo waen blong Memoriol, hem i mas stop blong mekem samting ya, mo hem i mas prea wetem tingting daon blong askem Jeova blong fogivim hem.—Ol Sam 19:13.
13, 14. ?From wanem samfala oli mestem, oli ting se God i singaot olgeta blong go long heven?
13 ?From wanem samfala oli mestem ale oli ting se God i singaot olgeta blong oli go long heven? Sipos waef no hasban blong olgeta i ded, no wan narafala nogud samting i kamaot long laef blong olgeta, maet oli no moa wantem laef long wol ya. No maet oli wantem go long heven blong stap olwe wetem wan gudfala Kristin fren blong olgeta we i bilif se tabu spirit i makemaot hem. Be, God i no givim wok long wan man blong jusumaot sam narafala man blong kasem blesing ya. Mo tu, taem hem i makemaot ol man blong Kingdom wetem tabu spirit, hem i no mekem se oli harem wan voes we i talem long olgeta se hem i singaot olgeta.
14 Maet samfala oli ting se God i singaot olgeta, from we oli holem tingting blong ol giaman skul yet se olgeta gudfala man bambae oli go long heven. Taswe, yumi mas lukaot se ol giaman bilif no narafala samting long laef blong yumi bifo, i no moa gat paoa long yumi. Maet yumi save kwestinim yumi wan se: ‘?Mi mi stap tekem wan meresin we i gat paoa long ol filing blong mi? ?Mi mi gat ol strong filing we oli save lidim mi blong tekem wan disisen we i no stret?’
15, 16. ?From wanem samfala oli gat rong tingting ya se oli tabu man?
15 Maet samfala oli askem ol kwestin ya blong skelem olgeta bakegen: ‘?Mi mi wantem soem mi nomo olsem wan man we i impoten? ?Mi mi wantem kasem wan hae ples naoia no hae ples long fiuja olsem wan man blong rul wetem Kraes?’ Ol man we God i jusumaot olgeta long faswan handred yia blong oli rul long Kingdom, sam long olgeta nomo oli gat bigfala wok long kongregesen. Ol man we God i singaot olgeta blong oli go long heven oli no traem kam haeman mo oli no tokflas se tabu spirit i makemaot olgeta. Olgeta ya oli gat tingting daon, olsem ol man we oli “kasem tingting blong Kraes.”—1 Korin 2:16.
16 Maet samfala oli ting se God i singaot olgeta finis blong oli go long heven, from we oli gat plante save blong Baebol. Be taem tabu spirit i makemaot wan man, man ya i no kasem spesel save. Tingbaot we Pol i mas tijim mo stretem samfala we tabu spirit i makemaot olgeta. (1 Korin 3:1-3; Hibrus 5:11-14) God i putumap wan plan blong givimaot kakae long saed blong spirit long ol man blong hem. (Matiu 24:45-47) Taswe, wan man i no mas ting se from we hem i wan tabu Kristin, hem i gat plante moa waes i bitim ol Kristin we bambae oli laef long wol ya long fiuja. I no min se tabu spirit i makemaot wan man, jes from we man ya i gat gudhan blong ansa long ol kwestin long saed blong Baebol, no i gat gudhan long wok blong prij, no i givim ol gudfala pablik tok long saed blong Baebol. Plante Kristin we fiuja blong olgeta i blong laef long wol ya, olgeta tu oli gat gudhan long ol wok ya.
17. ?Blong tabu spirit i makemaot wan man, samting ya i dipen long hu mo long wanem?
17 Sipos wan Kristin brata i ting se tabu spirit i makemaot hem nao i askem kwestin long saed ya, wan elda no wan narafala Kristin we i nafgud i save tokbaot bisnes ya wetem hem. Be wan man i no save tekem disisen ya blong narafala. Wan man we God i rili singaot hem i no nid blong askem narafala sipos fiuja blong hem i blong go long heven no nogat. Hem i save finis. “Tok blong God i laef mo i no save lus samtaem mo tok ya i mekem” ol tabu man oli ‘bon bakegen, oli gat niufala laef we God i Papa blong olgeta, mo hem i no save ded samtaem, i stap oltaem gogo i no save finis.’ (1 Pita 1:23) God i yusum spirit mo Tok blong hem blong putum “laef” long wan man, i min se man ya i kam “wan niufala man” we i save laef long heven long fiuja. (2 Korin 5:17) Jeova nao i jusum fiuja blong olgeta. “Fasin ya [we tabu spirit i makemaot wan man] i no folem ol samting we man i wantem, no we man i mekem long hadwok blong hem, be i folem gudfala fasin blong God.” (Rom 9:16) ?Taswe, olsem wanem wan man i save sua se God i singaot hem blong i go long heven?
?From Wanem Oli Suagud?
18. ?Olsem wanem spirit blong God i joen long tingting blong ol tabu man?
18 Tabu spirit i kam joen long tingting blong ol tabu Kristin nao i mekem olgeta oli sua se fiuja blong olgeta i stap long heven. Pol i raetem se: “[Tabu] Spirit ya i blong mekem yufala i pikinini blong God. Mo long paoa blong Spirit ya, taem yumi prea, yumi stap talem long God se, ‘Papa blong mifala.’ Spirit ya blong God i kam joen long tingting blong yumi, blong talemaot we yumi pikinini blong God. Nao from we yumi pikinini blong hem, bambae yumi save kasem ol gudgudfala samting we hem i putum olgeta oli tabu, se bambae oli blong ol man blong hem. Mo bambae yumi save joen long Kraes blong kasem haf long ol gudgudfala samting we God i putum olgeta oli tabu, se bambae oli blong Kraes. Mo from we yumi joen long Kraes blong harem nogud olsem we hem i harem nogud, be bambae yumi save joen long hem bakegen, blong kasem gudfala laef blong hem long heven.” (Rom 8:15-17) Tabu spirit i wok long tingting no spirit blong ol tabu man blong oli luksave se ol tok blong Baebol long saed blong ol spirit pikinini blong Jeova, i stret long olgeta. (1 Jon 3:2) Spirit blong God i mekem olgeta oli filim se oli pikinini blong God, mo i wokem wan strong tingting long olgeta se oli gat wan spesel fiuja. (Galesia 4:6, 7) I tru, bambae i gud tumas sipos oli laef olwe long wol ya wetem wan bodi we i stretgud mo wetem ol famle mo fren blong olgeta. Be hemia i no laenap wetem fiuja we God i putum long tingting blong olgeta. Hem i yusum spirit blong hem blong wokem wan strong tingting long olgeta se bambae oli go long heven, taswe oli rere blong lego olgeta samting we oli laekem long wol ya wetem janis blong laef olwe long wol ya tu.—2 Korin 5:1-5, 8; 2 Pita 1:13, 14.
19. ?Niufala kontrak i mekem wanem long laef blong wan tabu Kristin?
19 Ol tabu Kristin oli sua long tingting blong olgeta se bambae oli kasem laef long heven. Mo oli suagud se oli stap long niufala kontrak. Jisas i tokbaot samting ya taem hem i stanemap Memoriol, i se: “Kap ya i saen blong niufala promes [“kontrak,” NW] blong God, mo blad blong mi, we bambae i ron from yufala, hem bambae i mekem promes ya i stanap.” (Luk 22:20) Niufala kontrak ya i bitwin God mo ol tabu man. (Jeremaea 31:31-34; Hibrus 12:22-24) Jisas nao i mekem se tufala saed ya i joen long kontrak ya. Blad blong Kraes we i ron i mekem se niufala kontrak ya i wok. Niufala kontrak ya i tekemaot wan grup blong man blong oli holem nem blong Jeova, i no tekemaot olgeta long ol man Jiu nomo be long ol narafala nesen tu. Mo kontrak ya i mekem ol man ya oli kam “ol laen” blong Ebraham. (Galesia 3:26-29; Ol Wok 15:14) ‘Promes ya we bambae i no save foldaon samtaem,’ i mekem rod blong ol man Isrel long saed blong spirit, blong oli save laef bakegen long gudfala laef long heven we i no save kam nogud samtaem.—Hibrus 13:20.
20. ?Ol tabu man oli stap long wanem kontrak wetem Kraes?
20 Ol tabu man oli sua long tingting blong olgeta se bambae oli kasem blesing ya long fiuja. Olgeta ya oli joen long wan narafala kontrak tu, hemia kontrak blong Kingdom. Jisas i tokbaot fasin ya blong joen wetem hem i se: “Yufala ya, oltaem yufala i bin stap wetem mi long olgeta traem we mi mi bin kasem. Mo mi mi mekem wan kontrak wetem yufala, olsem we Papa blong mi i mekem wan kontrak wetem mi, from wan kingdom.” (Luk 22:28-30, NW) Kontrak ya we Kraes i mekem wetem olgeta we bambae oli rul wetem hem olsem king, bambae i gohed blong olwe.—Revelesen 22:5.
Memoriol—Taem Blong Kasem Blesing
21. ?Wanem ol blesing we yumi save kasem long taem blong Memoriol?
21 I gat plante blesing we yumi save kasem long taem blong Memoriol. Yumi save haremgud long Baebol riding we Sosaeti i makemaot blong yumi folem long taem ya. Hem i wan nambawan taem blong prea, mo blong tingting dip long laef blong Jisas long wol ya mo long ded blong hem, mo blong joen long wok blong talemaot Kingdom. (Ol Sam 77:12; Filipae 4:6, 7) Memoriol i mekem yumi tingbaot bigfala lav we God mo Kraes i soemaot, taem Jisas i givim laef blong hem olsem wan ransom sakrefaes. (Matiu 20:28; Jon 3:16) Sakrefaes ya i givim janis long yumi blong kasem wan nambawan fiuja, i mekem yumi haremgud, mo i mekem se yumi wantem traehad moa blong folem rod we Kraes i soemaot. (Eksodas 34:6; Hibrus 12:3) Mo tu, Memoriol i mas mekem yumi strong moa blong holem promes we yumi mekem taem yumi givim laef blong yumi i go long God blong mekem wok blong hem, mo i mas mekem yumi strong moa blong folem gudfala Pikinini blong hem.
22. ?Wanem presen we i bigwan moa we God i givim long ol man, mo olsem wanem yumi save soem tangkiu from?
22 !Tru ya, Jeova i givim ol gudfala presen long yumi! (Jemes 1:17) Yumi gat Tok blong God blong lidim yumi, spirit blong hem blong givhan long yumi, mo janis blong kasem laef we i no save finis long fiuja. Presen we God i givim long yumi we i bigwan moa, hemia sakrefaes blong Jisas we i tekemaot sin blong ol tabu man mo ol narafala man we oli bilif long hem. (1 Jon 2:1, 2) ?Ale, ded blong Jisas i impoten long yu? ?Bambae yu yu stap wetem ol man we oli soem tangkiu from ded blong Jisas, taem oli hivap blong mekem Lodsapa, afta we san i godaon long Eprel 16, 2003?
[Futnot]
^ Ol Witnes Blong Jeova oli wokem buk ya, be naoia oli no moa prentem.
?Wanem Ansa Blong Yu?
• ?Hu ol man we oli gat raet blong kakae bred mo dring waen long Memoriol?
• ?From wanem ol “narafala sipsip” oli joen long Lodsapa blong lukluk nomo wetem respek?
• ?Olsem wanem ol tabu Kristin oli save se oli mas kakae bred mo dring waen long Memoriol blong ded blong Kraes?
• ?Memoriol i wan gudfala taem blong mekem wanem?
[Kwestin]
[Tok blong pija long pej 18]
Namba Blong Ol Man We Oli Kam Long Memoriol
(Lukluk niusepa)
HAMAS MILIAN MAN
15,597,746
15
14
13,147,201
13
12
11
10
9
8
7
6
5
4,925,643
4
3
2
1
878,303
63,146
1935 1955 1975 1995 2002
[Tok blong pija long pej 18]
?Bambae yu yu stap long Lodsapa long yia ya?
[Tok blong pija long pej 21]
Memoriol i wan gudfala taem blong ridim Baebol moa, mo blong joen moa long wok blong talemaot Kingdom