Wan Kwestin

?From wanem Aesea 30:21 (NW ) i tokbaot voes blong Jeova “biaen long yufala,” be vas 20 i givim tingting se Jeova i stap long fored, taem i talem se: “Bambae yufala i luk Bigfala Tija blong yufala”?

Aesea 30:20, 21 (NW ) i talem se: “Bigfala Tija blong yufala bambae i no moa haedem hem wan, mo bambae yufala i luk Bigfala Tija blong yufala. Mo bambae yufala i harem wan tok biaen long yufala i talem se: ‘Hemia rod ya. Yufala olgeta man, yufala i wokbaot long hem, blong yufala i no tanem i go long raet saed no long lef saed.’ ”

Sipos man we i ridim vas ya i tingbaot prapa ae mo sora blong man, bambae hem i kasem save se Bigfala Tija, Jeova, i stap long fored blong hem, be hem i harem voes blong Jeova biaen long hem. Be, vas ya i no stap tokbaot prapa ae mo sora blong man.

Taem yumi ridim vas 20, pija we i kam long tingting blong yumi, hemia blong wan slef we i mekem wok blong masta blong hem. Oltaem hem i rere blong folem tok we masta blong hem i talem. Slef ya i stap wajemgud masta blong hem blong luksave wanem samting we masta i wantem hem blong mekem. Ol man blong Jeova tede oli mekem sem mak. Ae blong olgeta i stap nomo long ol tok blong Baebol we Jeova i stap talem tru long ogenaesesen blong hem long wol. (Ol Sam 123:1, 2) Yes, oli mekem samting we Jeova i talem, mo oli kwik blong luksave samting we Jeova i soemaot tru long “slef ya we i stret mo waes.”—Matiu 24:45-47, NW.

?Olsem wanem long tok we ol man blong God oli harem biaen long olgeta? I stret blong ting se voes ya biaen long olgeta, hemia voes blong God long ol yia bifo. Taem “man blong wok we i gat hed” i eksplenem Baebol, i olsem we God i stap toktok long yumi. (Luk 12:42) Ol man blong God tede oli harem voes blong hem taem oli stadi long Baebol mo taem oli folem ol rul blong hem long laef blong olgeta. Ol buk we “slef ya we i stret mo waes,” no “man blong wok we i gat hed” i wokem, oli givhan long ol man blong God blong mekem olsem. Taem ol man blong God oli lukluk i go long ol tok we Bigfala Tija blong olgeta i talem blong lidim olgeta, i olsem we oli stap luk hem long fored blong olgeta. Mo taem oli stadi long Tok Blong God we ol man oli raetem plante handred yia finis, i olsem we oli lesin long voes blong Bigfala Tija ya biaen long olgeta.—Rom 15:4.