Yumi Bilif Long Wan God We Maet Yumi No Savegud

TU LONG evri tri man long Jemani oli bilif long God. Nating se i olsem, taem oli askem long bitim wan taosen man blong oli talem se God blong olgeta i wanem kaen God, klosap evri man i givim wan ansa we i defren. Niuspepa ya FOCUS i talem se: “Ol man Jemani oli gat ol defdefren tingting long saed blong God mo evri man i gat prapa tingting blong hem we i defren long tingting blong narawan.” I gud tumas se ol man oli bilif long God, be sore tumas we oli bilif long hem be oli no save se hem i olsem wanem.

Fasin ya blong no gat save long saed blong God mo ol fasin blong hem, i no stap long Jemani nomo. Fasin ya i stap long sam narafala kantri blong Yurop tu. Wan ripot we oli mekem long Ostria, Briten, mo Netalan i soem we plante man oli gat tingting ya se God i “wan paoa we i hae moa no wan tok haed we man i no save eksplenem.” Speseli long tingting blong ol yangfala, i had tumas blong save God, nating se sam long olgeta oli bilif se God i stap.

?Yu Yu Savegud God?

Fasin blong save wan man i defren olgeta long fasin blong savegud hem. Taem yumi save wan man—olsem wan king, wan top man blong spot, wan man we i plei long sinema—i min se yumi save we man ya i stap. Be sipos yumi savegud wan man, hemia i minim plante moa samting. I min se yumi savegud se hem i wanem kaen man, wanem ol fasin, ol filing blong hem, ol samting we hem i laekem mo ol samting we hem i no laekem, mo ol plan blong hem long fiuja. Fasin blong savegud wan man, i openem rod blong yumi kam klosap moa long hem.

Plante taosen man oli luksave se fasin ya blong no savegud God—no fasin blong gat smol save nomo long hem—hemia i no naf. Ale oli traehad gogo oli kam we oli savegud God. ?Olsem wanem? ?Olgeta ya oli harem gud taem oli savegud God? Paul i stap laef long not blong Jemani, mo bifo, hem i save se God i stap, be nao hem i tekem disisen blong savegud God. Paul i eksplenem se: “Blong savegud God, i tektaem mo yumi mas traehad, be ol blesing we oli kamaot biaen oli nambawan. Taem yumi frengud wetem Man we i Wokem yumi, laef blong yumi blong evri dei i kam moa gud.”

?Bambae yumi rili kasem blesing sipos yumi spenem taem mo yumi traehad blong savegud God? Plis, i gud yu ridim haf we i kam biaen.

[Tok blong makem poen pija long pej 3]

Fasin blong save wan man i defren olgeta long fasin blong savegud hem