“?Hu i Wokem Wora Blong Naet?”

WAN man blong raetem nyuspepa long ol yia 18 handred, i talem se wora blong naet i wan “wora we i olsem gol jen blong wol, we win nao i wokem.” Man ya we i Wokem Yumi, i askem long olfala Job blong bifo, i se: “?Hu i wokem wora blong naet?” (Job 38:28) God i wantem mekem Job i tingbaot se hem nao i stampa blong nambawan wora ya blong naet.

Wora blong naet i olsem wan naesfala gol jen we i saengud. Plante taem, Baebol i tokbaot wora blong naet blong minim ol blesing, gudfala graon we i givim plante kakae, fasin blong gat fulap samting, mo fasin blong laef longtaem. (Jenesis 27:28; Dutronome 33:13, 28; Sekaraea 8:12) Long hot taem long Isrel, taem ya we i no gat ren, ‘wora blong naet we i kamdaon long Hemon’ i stap mekem ol garen oli gringud oltaem. Long rod ya, ol man tu oli laef. Bigfala hil ya blong Hemon, we i gat ol tri mo sno long hem, i stap gohed yet blong sanem kolkol win i kamdaon blong givim fulap wora blong naet long ol ples raonabaot long hem. Deved, man blong raetem Ol Sam, i talem se gudfala fasin ya blong joengud wetem ol man we oli wosipim Jeova, i olsem wora blong naet we i mekem ol samting oli harem gud.—Ol Sam 133:3.

Ol advaes we profet Moses i givim long Isrel, oli no strong tumas mo oli mekem man i harem gud, olsem wora blong naet. Hem i se: “Tok blong mi bambae i folfoldaon olsem ren, mo bambae i stap long graon ya, olsem wora blong naet. Ol tok ya blong mi bambae i givhan long ol man, i olsem smol ren we i folfoldaon long ol kakae we i jes gru, mo i olsem gudfala ren, we i mekem gras i gru gud.” (Dutronome 32:2) Tede, ol Wetnes blong Jeova oli stap talemaot gud nyus blong Kingdom blong God, long olgeta ples blong wol, blong sevem laef blong ol man. (Matyu 24:14) God i stap singaot plante moa man se: “ ‘Yu kam.’ Mo olgeta evriwan we oli harem tok ya, oli mas talem olsem tu, se ‘Yu kam.’ Yufala we i wantem, yufala i kam tekem wora ya blong laef, we i olsem presen blong yufala.” (Revelesen 22:17) Plante milyan man long olgeta nesen oli stap obei long tok ya blong God we i singaot olgeta blong kam dring wora ya long saed blong speret, we i save givim laef we i no save finis.