“Mi Faenem Olgeta Samting We Mi Nidim”

WAN ripot blong World Health Organization i talem se long fulwol, bitim 120 milian man oli safa from sik blong wari. Evri yia, wan milian man oli kilim olgeta wan i ded mo bitwin 10 mo 20 milian man oli traem kilim olgeta wan i ded. ?Wanem i save givhan long olgeta ya we oli safa from sik blong wari? Ol meresin oli save givhan smol, mo i impoten tumas we sam man oli sapotem olgeta ya taem oli trabol long filing. Be, antap long samting ya, samfala we oli gat sik blong wari oli faenem help long ol buk long saed blong Baebol, we ol Witnes Blong Jeova oli wokem. Leta ya we i kam long Franis i soemaot samting ya.

“Sam taem bifo, mi harem se mi no moa wantem laef. Mi prea long God blong i letem mi mi ded. Insaed long mi, mi harem olsem we mi ded finis. Mi stap lukaot help, taswe mi prea dip long Jeova. Mo tu mi tekem disisen blong ridim buk ya 2002 Yearbook of Jehovah’s Witnesses mo mi flatem hem long tri dei. Mi mas talem we buk ya i leftemap tingting blong mi bigwan mo i mekem bilif blong mi i kam strong moa.

“!Mi lukaot moa save long ol Wajtaoa mo ol Wekap!, mo mi sapraes tumas long ol samting we mi faenem! Mi bin ridim ol magasin ya blong 15 yia finis, be mi neva luksave we ol haf ya oli rili save leftemap tingting mo givim paoa. Ol magasin ya oli fulap long lav—wan fasin we i stap lus tede. Yes, mi faenem olgeta samting we mi nidim.”

Baebol i talem se: “[Jeova] i stap klosap long ol man we tingting blong olgeta i kam nogud, i stap sevem ol man we tingting blong olgeta i foldaon olgeta.” (Ol Sam 34:18) Yumi sua we olgeta ya we “tingting blong olgeta i kam nogud” no “i foldaon olgeta” oli save haremgud moa mo oli save faenem wan hop long fiuja insaed long Baebol. Ol Witnes Blong Jeova oli stap seremaot ol buk we oli stanap long Baebol blong givhan long olgeta we oli gat nid, blong oli save haremgud from ol gudfala tok we oli kamaot long God.