‘!Yufala i No Fraet, Yufala i Stanap Strong!’
‘!Yufala i No Fraet, Yufala i Stanap Strong!’
“Yufala i no fraet. Mi mi winim paoa blong olgeta samting blong wol ya finis.”—JON 16:33.
1. ?From we ol man Isrel oli mas fesem ol strong enemi long Kenan, oli kasem wanem advaes?
TAEM ol man Isrel oli rere blong krosem Jodan Reva blong go insaed long Promes Lan, Moses i talem long olgeta se: “Tingting blong yufala i mas strong, mo yufala i mas stanap strong oltaem. Bambae yufala i no mas fraet long olgeta. Hem i God blong yumi, mo hem i no save gowe long yufala samtaem.” Nao Moses i singaot Josua we hem bambae i lidim ol man Isrel oli go long Kenan, mo hem i talem bakegen long Josua stret, se hem i no mas fraet. (Dutronome 31:6, 7) Biaen, Jeova hem wan i leftemap tingting blong Josua, i se: “Tingting blong yu i mas strong, mo yu no mas fraet, yu mas stanap strong oltaem, . . . Tingting blong yu i mas strong, mo yu no mas fraet, yu mas stanap strong oltaem.” (Josua 1:6, 7, 9) Ol advaes ya i kam long stret taem. Ol man Isrel oli nidim fasin no fraet, blong fesem ol strong enemi blong olgeta long narasaed long Jodan.
2. ?Yumi stap rere from wanem samting naoia, mo yumi nidim wanem fasin?
2 I no longtaem, ol trufala Kristin tede bambae oli go insaed long niufala wol we God i promes finis blong mekem, taswe, olgeta tu oli nidim blong no fraet olsem Josua. (2 Pita 3:13; Revelesen 7:14) Be, yumi defren lelebet long Josua. Josua i faet wetem naef blong faet mo spia. Yumi faet long saed blong spirit, mo yumi neva yusum ol prapa tul blong faet. (Aesea 2:2-4; Efesas 6:11-17) Afta we Isrel i go insaed long Promes Lan, Josua i mekem plante bigfala faet bakegen. Be bigfala faet blong yumi, hemia naoia—bifo we yumi go insaed long niufala wol. Ale, bambae yumi tokbaot sam samting we yumi fesem long laef blong yumi we yumi nidim fasin no fraet blong winim.
?From Wanem i Hadwok?
3. ?Baebol i talem wanem long saed blong bigfala enemi blong yumi?
3 Aposol Jon i raetem se: “Yumi save we yumi ya, yumi man blong God, be olgeta man blong wol ya oli stap long paoa blong Setan.” (1 Jon 5:19) Tok ya i soemaot wan bigfala samting we i mekem i hadwok long ol Kristin blong holem bilif. Taem wan Kristin i stanap strong tru long hadtaem, i olsem we hem i daonem Setan. Taswe, Setan i olsem “wan laeon we i stap singaot bigwan,” i stap traehad blong mekem ol gudfala Kristin oli fraet mo i stap traehad blong kakae olgeta. (1 Pita 5:8) Yes, hem i stap faet agens long ol tabu Kristin wetem ol fren blong olgeta. (Revelesen 12:17) Blong givhan long hem long faet ya, hem i yusum sam man. Sam long olgeta oli save se Setan i stap yusum olgeta mo sam long olgeta oli no save. Yumi nidim fasin no fraet blong stanap strong agens long Setan mo ol man blong hem.
4. ?Jisas i givim wanem woning, be wanem fasin we ol trufala Kristin oli soemaot?
4 From we Jisas i save se Setan mo ol man blong hem bambae oli agensem gud nius ya wetem ful paoa blong olgeta, Hem i givim woning long ol man blong hem se: “Bambae sam man oli holem yufala, oli mekem i nogud long yufala, gogo oli kilim yufala i ded. Bambae olgeta man oli no laekem yufala nating, oli agens long yufala, from we yufala i holem nem blong mi.” (Matiu 24:9) Ol tok ya oli tru long faswan handred yia, mo oli tru tede tu. Yes, trabol we sam man oli mekem long ol Witnes Blong Jeova tede i strong tumas, olsem oli bin mekem agensem plante narafala man long ol yia we oli pas. Nating se i olsem, ol trufala Kristin oli no fraet taem oli fesem ol trabol ya. Oli save se “fasin ya we man i fraet tumas long ol narafala man, hem i olsem trap nomo,” mo oli no wantem foldaon long trap ya.—Ol Proveb 29:25.
5, 6. (a) ?Wanem sam trabol we i save mekem se yumi nidim fasin no fraet? (b) ?Ol trufala Kristin oli mekem wanem taem wan samting i kamaot we i save mekem olgeta oli fraet?
5 I no ol trabol we ol man oli mekem long yumi nomo we i mekem se yumi nidim fasin no fraet, be i gat ol narafala traem tu. Sam long yumi oli faenem i hadwok blong storian wetem ol strenja long saed blong gud nius. Sam samting long skul tu i save traem fasin no fraet blong ol pikinini. Maet tija i talem long olgeta blong lanem wan sing blong leftemap kantri no talem wan promes blong stap tru long kantri blong olgeta no long flaeg. From we wan sing no promes olsem i klosap sem mak long wan fasin blong wosip, ol Kristin pikinini oli no fraet blong soemaot strong tingting blong olgeta blong mekem samting we God i glad long hem. Yumi harem gud tumas long fasin ya blong olgeta.
6 Mo tu, yumi nidim fasin no fraet taem samfala we oli agensem yumi oli pulum ol man blong niuspepa mo televisin blong talemaot ol nogud ripot long saed blong ol man blong God. No maet samfala oli traem blokem trufala wosip, ale oli “mekem ol loa blong stanemap ol fasin nogud” agens long yumi. (Ol Sam 94:20) ?Taswe, wanem tingting we yumi mas gat taem niuspepa, radio, no televisin i twistim trutok long saed blong ol Witnes Blong Jeova, no maet oli giaman stret? ?Yumi mas sapraes long samting ya? Nogat. Yumi save se bambae i olsem. (Ol Sam 109:2) Mo tu, yumi no sapraes taem samfala oli bilif long ol giaman tok ya no tok we i no stret. Baebol i talem se: “Man we i no gat hed, hem i save bilif long evri samting.” (Ol Proveb 14:15) Nating se ol narafala oli bilif long ol giaman tok ya, be ol trufala Kristin oli no save bilif long ol tok olbaot we i agensem ol Kristin brata blong olgeta. Mo oli no letem ol nogud tok agensem ol Witnes long niuspepa mo televisin i pulum olgeta blong mestem ol Kristin miting, no blong slodaon long wok blong prij, no blong kam slak long saed blong bilif. Defren olgeta, oli ‘stap soemaot we oli man blong wok blong God . . . Sam man oli stap ona long olgeta, mo sam man oli stap mekem olgeta i sem. Sam man oli stap tok nogud long olgeta, mo sam narafala man oli stap leftemap nem blong olgeta. Plante man [we oli agens] oli stap talem se olgeta oli giaman, be oli [rili] stap talem trutok nomo.’—2 Korin 6:4, 8.
7. ?Wanem ol kwestin we yumi save askem blong jekem fasin blong yumi?
7 Pol i raet i go long Timoti, i se: “Spirit ya we God i givim long yumi, hem i no blong mekem yumi fraet, nogat. Spirit ya i blong mekem yumi gat paoa, . . . Nao from samting ya, bambae yu no sem blong tokbaot Masta blong yumi.” (2 Timoti 1:7, 8; Mak 8:38) Naoia we yumi ridim tok ya finis, yumi save askem se: ‘?Mi mi sem long bilif blong mi, no mi mi gat fasin we mi no fraet? ?Long ples blong wok (no long skul), mi mi talemaot long ol narafala se mi mi wan Witnes Blong Jeova, no mi haedem samting ya? ?Mi mi sem blong stap defren long ol narafala man, no mi mi glad blong soemaot se mi defren from we mi mi fren wetem Jeova?’ Sipos wan long yumi i fraet blong talemaot gud nius no i fraet blong tekem wan disisen we ol man oli no agri long hem, man ya i mas tingbaot advaes we Jeova i givim long Josua se: “Tingting blong yu i mas strong, mo yu no mas fraet, yu mas stanap strong oltaem.” Yumi neva mas fogetem se; i no tingting blong ol man long ples blong wok no ol yangfala long skul we i impoten, be tingting blong Jeova mo Jisas Kraes, hemia nao samting we i impoten.—Galesia 1:10.
?Olsem Wanem Blong Gat Fasin No Fraet?
8, 9. (a) ?Wanem wan samting we i bin hapen long ol faswan Kristin blong traem fasin no fraet blong olgeta? (b) ?Pita mo Jon i mekem wanem taem ol man oli tok strong long tufala, mo biaen wanem i hapen long tufala mo ol narafala Kristin brata?
8 ?Olsem wanem yumi save gat fasin blong no fraet, we i naf blong mekem yumi stanap strong tru long hadtaem ya we yumi laef long hem? Blong ansa long kwestin ya, tingbaot: ?Olsem wanem ol faswan Kristin oli kasem fasin no fraet? I gat Pita mo Jon we ol jif pris mo olfala man long Jerusalem oli talem long tufala blong no moa talemaot nem blong Jisas. ?Tufala i mekem wanem? Tufala i no obei long tok ya, ale oli tok strong long tufala mo oli letem tufala i go fri. Nao tufala i joen bakegen wetem ol Kristin brata, mo olgeta oli prea wanples, oli se: “Hae God, naoia plis yu makemgud ol strong tok ya we oli stap mekem agens long mifala. Mifala i man blong wok blong yu. Plis yu givhan long mifala, blong bambae mifala i talemaot ol tok blong yu, we tingting blong mifala i strong.” (Ol Wok 4:13-29) Jeova i ansa long prea ya, i givim tabu spirit long olgeta blong oli gat strong tingting. Taswe, biaen, ol lida blong Isrel oli talem se ol disaepol ya oli ‘mekem we Jerusalem i fulap’ long ol tijing blong olgeta.—Ol Wok 5:28.
9 Naoia, bambae yumi luklukgud long samting ya we i bin hapen long taem bifo. Ol disaepol oli no tingbaot blong stop long wok blong prij, taem ol lida blong Isrel oli tok strong long olgeta, nogat. Long defren fasin, oli prea blong askem long God blong gat strong tingting blong gohed blong prij. Nao oli traehad blong mekem samting we oli prea from, mo Jeova i givim tabu spirit long olgeta blong oli kam strong moa. Samting we i hapen long taem ya i soemaot se tok we Pol i raetem plante yia biaen blong tokbaot wan narafala samting, i stret long ol Kristin tede we oli kasem fasin agens. Pol i talem se: “Mi save mekem evri samting, long paoa blong [“Man ya,” NW ] we i stap mekem mi mi strong.”—Filipae 4:13.
10. ?Olsem wanem samting we i hapen long Jeremaea i save givhan long ol man we oli stap sem?
10 Be, traem tingbaot wan man we i man blong sem stret. ?Taem hem i kasem fasin agens, hem i save mekem wok blong Jeova we hem i no fraet? !Yes! Tingbaot tok blong yangfala Jeremaea taem Jeova i makemaot hem olsem wan profet, hem i se: “Mi mi yangfala nomo.” I klia we Jeremaea i harem se hem i no naf nating. Be Jeova i leftemap tingting blong hem, i talem se: “Yu no talem se yu yu yangfala nomo. Yu mas go long ol man we mi bambae mi sanem yu yu go long olgeta, mo yu mas talemaot olgeta samting we mi bambae mi talem long yu. Yu no mas fraet long olgeta, from we mi bambae mi stap wetem yu blong blokemgud yu.” (Jeremaea 1:6-10) Jeremaea i trastem Jeova, mo from samting ya, hem i winim fraet ya long paoa blong Jeova mo hem i kam wan witnes long Isrel we tingting blong hem i strong bitim mak.
11. ?Wanem i stap givhan long ol Kristin tede blong gat fasin olsem Jeremaea?
11 Ol tabu Kristin tede oli gat wan wok blong mekem we i klosap sem mak long hemia we Jeremaea i mekem. Wetem help blong “wan bigfala hip” blong “ol narafala sipsip,” oli gohed nomo blong talemaot ol stamba tingting blong Jeova, nating se plante man oli no wantem lesin, oli jikim olgeta, mo oli mekem nogud long olgeta. (Revelesen 7:9; Jon 10:16) Tok we Jeova i bin talem long Jeremaea i stap leftemap tingting blong olgeta: “Yu no mas fraet.” Oli neva fogetem se God nao i givim wok ya long olgeta mo tok blong Hem nao we oli stap talemaot.—2 Korin 2:17.
Ol Eksampol We i Gud Blong Folem
12. ?Wanem nambawan eksampol we Jisas i givim long saed blong fasin no fraet, mo olsem wanem hem i leftemap tingting blong ol man blong hem?
12 Sipos yumi tingting dip long eksampol blong samfala olsem Jeremaea we i no fraet, samting ya i save givhan long yumi blong gat fasin no fraet. (Ol Sam 77:12) Olsem nao, taem yumi tingting gud long wok blong prij we Jisas i mekem, yumi laekem tumas fasin blong hem we i no fraet nating taem Setan i traem hem, mo taem ol lida blong Isrel oli agensem hem bigwan. (Luk 4:1-13; 20:19-47) Long paoa blong Jeova, Jisas i stanap strong, i no seksek nating. Smoltaem bifo we hem i ded, hem i talem long ol disaepol blong hem se: “Long wol ya bambae yufala i harem nogud tumas. Be yufala i no fraet. Mi mi winim paoa blong olgeta samting blong wol ya finis.” (Jon 16:33; 17:16) Sipos ol disaepol blong Jisas oli folem fasin blong hem, olgeta tu oli save winim paoa blong wol ya. (1 Jon 2:6; Revelesen 2:7, 11, 17, 26) Be blong mekem olsem, oli nidim fasin “no fraet.”
13. ?Pol i talem wanem blong leftemap tingting blong ol Kristin long Filipae?
13 Sam yia afta we Jisas i ded, samfala we oli agensem Pol mo Saelas long Filipae oli sakem tufala long kalabus. Biaen, Pol i pulum kongregesen blong Filipae blong oli ‘gat wan tingting nomo, stanap strong, wok olsem wan tim nomo blong traehad blong mekem ol man oli bilif long gud nius, mo no seksek nating long ol enemi blong olgeta.’ Blong oli gat strong tingting blong mekem samting ya, Pol i talem se: “Fasin ya [blong mekem i nogud long ol Kristin] i olsem wan saen we God i soem long ol enemi ya blong yufala, se olgeta [we oli agens long ol Kristin] bambae oli mas lus, be hem bambae i mekem yufala i win. Hem bambae i mekem olsem, from we hem i makemaot wan gudfala rod blong yufala finis, i no blong yufala i bilif nomo long Kraes, be blong yufala i kasem hadtaem tu long laef blong yufala, from hem.”—Filipae 1:27-29.
14. ?Wanem i kamaot long Rom from we Pol i no fraet blong prij?
14 Taem Pol i raet i go long kongregesen blong Filipae, hem i stap long kalabus bakegen, be long taem ya hem i kalabus long Rom. Nating se i olsem, hem i no fraet, be hem i gohed nomo blong prij. ?Wanem i kamaot from? Hem i raetem se: “Olgeta soldia we oli stap gad long haos blong Sisa, mo ol narafala man tu long ples ya, oli save finis we mi mi stap long kalabus, from we mi mi man blong wok blong Kraes. Mo from we mi stap long kalabus, bighaf blong ol brata blong yumi oli stap bilif strong moa long Masta blong yumi. Naoia olgeta oli no moa fraet, mo oltaem oli stap mekem tingting blong olgeta i strong moa blong talemaot tok ya blong God.”—Filipae 1:13, 14.
15. ?Hu ya i soemaot gudfala eksampol blong bilif we i save mekem tingting blong yumi i strong blong no fraet?
15 Eksampol blong Pol i save leftemap tingting blong yumi. Mo tu, i gat ol gudfala eksampol blong ol Kristin tede we oli stanap strong nating se oli kasem hadtaem from ol strong rula no ol lida blong jos we oli rul long kantri blong olgeta. Stori blong plante long olgeta i stap long ol Wajtaoa mo Wekap! mo long Yearbook of Jehovah’s Witnesses. Taem yu ridim ol stori ya, tingbaot se ol man ya oli sem mak long yumi; be taem sam man oli agensem olgeta, Jeova i givim paoa long olgeta we i bitim paoa blong man, nao oli stanap strong. Yumi save sua se bambae hem i mekem i sem mak long yumi sipos samfala oli mekem trabol long yumi.
Jeova i Glad Long Fasin No Fraet We i Givim Ona Long Hem
16, 17. ?Tede, olsem wanem yumi save kasem fasin no fraet?
16 Taem wan Kristin i stanap strong long trutok mo stret fasin, samting ya i soemaot se hem i no fraet. Sipos hem i stanap strong nating se hem i seksek, hem i soemaot fasin no fraet we i bigwan moa. Yes, evri Kristin oli naf blong no fraet, sipos oli rili wantem mekem samting we Jeova i wantem, sipos oli gat strong tingting blong stap tru long God, sipos oli dipen oltaem long God, mo sipos oli tingbaot oltaem se Jeova i bin mekem plante man bifo oli stanap strong mo ol man ya oli olsem yumi nomo. Mo tu, taem yumi kasem save se fasin blong no fraet i mekem Jeova i glad mo i givim ona long hem, samting ya i save mekem we yumi wantem moa blong stanap strong. Taem yumi lavem Jeova tumas, yumi stanap strong nating se narafala i jikim yumi no mekem samting we i moa nogud long yumi.—1 Jon 2:5; 4:18.
17 Yumi no mas fogetem se, taem sam narafala oli mekem i nogud long yumi from bilif blong yumi, hemia i no min se yumi bin mekem samting we i rong. (1 Pita 3:17) Oli mekem nogud long yumi from we yumi leftemap hae rul blong Jeova, from we yumi mekem samting we i gud, mo from we yumi no joen long ol fasin blong wol ya. Long saed ya, aposol Pita i talem se: “Sipos yufala i mekem i stret nomo, mo oli givim panis long yufala, nao yufala i mekem tingting blong yufala i longfala blong karem panis ya, God bambae i blesem yufala from.” Mo Pita i talem bakegen se: “Ol man ya we God i letem olgeta oli harem nogud long bodi blong olgeta, oli mas putum laef blong olgeta long han blong hem, from we hem nao i mekem olgeta, mo promes blong hem long olgeta i no save foldaon. Mo oli mas gohed blong mekem ol gudfala fasin.” (1 Pita 2:20; 4:19) Yes, God blong yumi, Jeova, we i lavem yumi, hem i glad taem i luk we yumi gat bilif, mo samting ya i givim ona long hem tu. !Hemia wan gudfala risen blong no fraet!
Toktok Long Ol Haeman
18, 19. ?Taem yumi no fraet blong stanap long fes blong wan jaj, i olsem we yumi stap talem wanem long ol jaj blong wol?
18 Taem Jisas i talem long ol man blong hem se bambae samfala oli agensem olgeta, hem i talem tu se: “Bambae ol man oli save mekem yufala i pas long ol kaonsel blong olgeta, blong ol kaonsel ya oli jajem yufala. Bambae oli save wipim yufala insaed long haos blong prea blong olgeta. Mo from we yufala i man blong mi, bambae oli save pulum yufala i go stanap long fes blong ol haeman blong gavman, mo long fes blong ol king. Be sipos oli mekem olsem, bambae yufala i gat janis blong talemaot gud nius blong mi long fes blong olgeta, mo long fes blong ol hiten man.” (Matiu 10: 17, 18) I nidim fasin no fraet blong stanap fored long wan jaj no wan rula from giaman tok we sam man oli putum agens long yumi. Be, taem yumi no fraet blong prij long ol man olsem, yumi stap jenisim wan hadtaem i kam wan janis blong mekem samting we i impoten tumas. I olsem we yumi stap talem ol tok blong Jeova long Ol Sam 2, long ol man ya we oli jajem yumi: “Ol king. Yufala i mas traehad blong kasem mining blong ol tok ya. Ol jaj blong wol. Yufala i mas letem narafala i stretem yufala. Yufala i mas mekem wok blong Jeova, we yufala i fraet long hem.” (Ol Sam 2:10, 11, NW ) Ol Witnes Blong Jeova we oli pas long kot from giaman tok we sam man oli putum agensem olgeta, oli talem tangkiu long ol jaj we oli folem rul ya se ol man oli fri blong wosip olsem oli wantem. Be sam jaj oli letem ol man blong agens oli gat paoa long olgeta. Baebol i talem long olgeta ya se: “Yufala i mas letem narafala i stretem yufala.”
19 Ol jaj oli mas kasem save se loa we i hae moa, hemia loa blong Jeova God. Oli no mas fogetem se olgeta man, wetem ol jaj tu, oli mas stanap long fes blong Jeova God mo Jisas Kraes, blong tufala i jajem olgeta. (Rom 14:10) Long saed blong yumi, nating se wan jaj long wol ya i jajem yumi long gudfala fasin no i jajem yumi nogud, be yumi no nid blong fraet. Jeova i stap sapotem yumi. Baebol i talem se: “Olgeta man we oli stap go long hem blong hem i lukaot gud long olgeta, oli save harem gud.”—Ol Sam 2:12.
20. ?From wanem yumi save haremgud sipos yumi stanap strong taem ol man oli mekem i nogud long yumi no talem ol giaman tok blong spolem yumi?
20 Long bigfala toktok blong Jisas antap long hil, hem i talem se: “Yufala we ol man oli stap spolem nem blong yufala, mo oli stap mekem i nogud long yufala, mo oli stap giaman, oli stap talem ol rabis tok agens long yufala from we yufala i man blong mi, yufala i save harem gud. Yufala i mas harem gud yufala i glad, from we i gat bigfala pei blong yufala i stap long heven. Ol profet bifo, ol man oli mekem i nogud long olgeta long sem fasin ya nomo.” (Matiu 5:11, 12) I tru, yumi no glad taem ol man oli mekem i nogud long yumi, mo taem ol man blong nius oli talem ol giaman ripot blong spolem yumi. Be sipos yumi stanap strong, yumi save haremgud. Taem yumi stanap strong, yumi mekem Jeova i glad, mo bambae yumi kasem bigfala pei from. Fasin blong yumi blong no fraet i soemaot se bilif blong yumi i tru, mo i mekem yumi sua se God bambae i glad long yumi. Yes, sipos yumi no fraet, yumi soemaot se yumi trastem Jeova fulwan. Nekis stadi bambae i soem se ol Kristin oli nidim fasin ya blong trastem Jeova fulwan.
?Yu Yu Lanem Wanem?
• ?Yumi nidim fasin no fraet blong fesem wanem trabol tede?
• ?Olsem wanem yumi save kasem fasin no fraet?
• ?Hu ya sam gudfala eksampol blong fasin no fraet?
• ?From wanem yumi wantem mekem ol samting long fasin we yumi no fraet?
[Kwestin]
[Tok blong pija long pej 9]
Simone Arnold (naoia hem i karem nem ya Liebster) long Jemani, Widdas Madona long Malawi, Lydia mo Oleksii Kurdas long Yukren, oli agensem Setan, taem oli soem fasin no fraet
[Tok blong pija long pej 10]
Yumi no sem long gud nius
[Tok blong pija long pej 11]
Fasin blong Pol blong no fraet taem hem i kalabus i givhan bigwan blong mekem gud nius i goaot moa
[Tok blong pija long pej 12]
Sipos yumi no fraet blong talemaot tok blong Baebol long wan jaj, yumi stap mekem samting we i impoten tumas