Yusumgud Janis We Yu Gat Taem Laef Blong Yu i Jenis

Pum, Jan, Dries mo Otto. Ol fofala Kristin elda ya oli laef long Netalan, mo i gat plante samting long saed blong olgeta we i sem mak. Oli mared mo oli gat pikinini. Mo tu, sam yia bifo, oli bin wok fultaem mo oli laef long ol naesfala haos. Nating se i olsem, oli stopem wok blong olgeta mo oli stat blong spenem ful taem mo paoa blong olgeta long ol wok blong Kingdom. ?Olsem wanem fofala ya i naf blong mekem ol jenis ya? Taem laef blong olgeta i jenis, oli yusumgud janis ya blong mekem samting we i moa impoten.

LAEF blong yumi evriwan i save jenis. Plante taem, ol jenis oli givim plante moa responsabiliti, olsem taem yumi mared, yumi gat pikinini, no yumi lukaot long olfala papa mama blong yumi. Be samtaem, taem laef i jenis, yumi naf blong mekem plante moa long wok blong God. (Matiu 9:37, 38) Eksampol, maet ol pikinini blong yumi oli bigman finis mo oli aot long haos, no maet yumi ritae long wok blong yumi.

I tru we laef blong yumi i save jenis enitaem, nating se yumi wantem no yumi no wantem. Be, antap long ol jenis we oli kamaot olsem nomo, sam Kristin oli mekem we laef blong olgeta i jenis from we oli wantem spenem plante moa taem long wok blong God. Hemia nao samting we Pum, Jan, Dries mo Otto oli bin mekem. ?Oli mekem samting ya olsem wanem?

Taem Ol Pikinini Oli Lego Haos

Pum i bin wok olsem man blong lukaot ol buk blong kaon long wan bigfala kampani we i salem ol meresin. Plante taem, Pum wetem waef blong hem, Anny, tufala i haftaem paenia wetem tufala gel blong tufala. Mo tufala i tektaem blong spel wetem ol gel blong tufala mo sam narafala paenia tu. Pum mo Anny oli talem se “hemia i givhan blong blokem ol problem we oli save kamaot sipos ol pikinini oli fren wetem sam man we oli no gat gudfala fasin.” Tufala gel blong Pum mo Anny oli glad tumas long eksampol blong papa mama blong tufala, taswe taem tufala i finisim haeskul, tufala i joen long fultaem wok blong prij.

Taem tufala gel i kam bigwan mo tufala i lego haos, Pum mo Anny i luksave we jenis ya we i kamaot long laef blong tufala i mekem se bambae tufala i gat plante moa taem mo mane i stap. Tufala i save yusum taem mo mane ya blong go visitim sam naesfala ples mo spelgud. I no tabu blong mekem samting ya, be Pum mo Anny i tekem disisen blong yusumgud taem blong tufala blong mekem moa long wok blong Jeova. Taswe Pum i askem long bos blong hem, sipos hem i save karem wan dei evri wik, we hem i no wok. Biaen, Pum i stretem sam samting blong hem blong mekem se hem i save statem wok blong hem long 7 klok long moning, mo finis long 2 klok long aftenun. From we hem i no wok plante olsem bifo, i minim tu we hem i no kasem bigfala pei olsem bifo. Nating se i olsem, tufala i lan blong laef wetem smol pei nomo. Nao long 1991, Pum i joen wetem waef blong hem long fultaem wok blong prij.

Biaen, ol brata oli askem Pum blong i lukaot long wan Haos Asembli Blong Ol Witnes Blong Jeova. Be wok ya i min se tufala i mas lego haos blong tufala, we tufala i bin laef long hem blong 30 yia, mo tufala i mas muv i go long wan smol  haos klosap long Haos Asembli. Tufala i muv i go long smol haos ya. ?Olsem wanem? ?Tufala i faenem i had blong lego haos blong tufala? Anny i talem se taem hem i sore long haos blong hem bifo, hem i stap askem kwestin ya long hem wan se, ‘?Mi mi olsem waef blong Lot?’ Anny i no wantem ‘lukbak long ol samting blong bifo.’—Jenesis 19:26; Luk 17:32.

Pum mo Anny, tufala i harem se disisen blong tufala i karem plante blesing. Sam long ol blesing ya se tufala i haremgud long wok we tufala i mekem long Haos Asembli, taem tufala i rerem evri samting blong ol distrik asembli, mo tufala i fren wetem ol seket elda we oli kam givim tok long haos asembli ya. Sam samtaem, tufala i gat janis blong visitim sam defren kongregesen taem Pum i tekem ples blong sam seket elda we oli no save mekem wok ya blong smoltaem.

?From wanem Pum mo Anny oli karem gudfala frut taem oli wok moa blong Jeova? Pum i talem se: “Taem laef blong yu i jenis olgeta, yu mas gat strong tingting blong yusumgud taem blong yu.”

Gat Wan Laef We i No Fasfas Wetem Tumas Samting

Jan mo waef blong hem, Woth, tufala i gat tri pikinini. Olsem Pum mo famle blong hem, Jan i yusumgud janis we hem i gat taem laef blong hem i jenis. Blong plante yia, Jan i holem wan haefala posisen long wan bang, hem i kasem bigfala pei, mo hem mo famle blong hem oli gat wan gudfala laef. Nating se i olsem, Jan i harem se hem i wantem mekem moa long wok blong God. Hem i eksplenem se: “Taem ol yia oli pas, fasin tangkiu we mi gat long trutok i kam bigwan moa, mo lav we mi gat long Jeova i gru.” Taswe long 1986, Jan i jenisim laef blong hem. Hem i talem se: “Mi tekem janis ya se oli stap jenisim sam samting long wok blong mifala, ale mi stat katemaot sam aoa long wok blong mi. Ol man we oli wok wetem mi oli sapraes tumas mo oli givim smol nem ya long mi se Diwodo, from we mi mi stap wok long dinsdag [Tasde], long woensdag [Wenesde], mo long donderdag [Tusde] nomo. Mi lusum 40 pesen blong pei blong mi. Mi salem haos blong mifala mo mi pem wan smol bot we mifala i save laef long hem, ale mifala i save go prij long ol ples we i gat nid. Biaen, mi tekem janis blong ritae bifo we mi kasem ol yia blong mi blong ritae; mi lusum 20 pesen long pei blong mi bakegen, be long 1993, mi naf blong joen long wok blong fultaem paenia.”

Tede, Jan i wan memba blong Hospital Liaison Committee mo plante taem hem i bin lukaot long ol asembli. Nating se Woth i stap siksik plante naoia, be hem i mekem wok blong haftaem paenia sam samtaem. Trifala pikinini blong tufala oli mared finis, mo oli wok strong blong talemaot Kingdom wetem ol hasban mo waef blong olgeta.

 ?Olsem wanem Jan mo Woth, tufala i lan blong laef be i no moa gat plante mane olsem bifo? Jan i ansa se: “Taem mifala i gat plante mane, mifala i lukaot blong no laekem tumas ol sas samting blong bodi. Tede, taem ol man oli wantem wan samting, oli no laekem blong wet. Be long saed blong mifala, ol blesing mo ol wok we Jeova i givim oli mekem se mifala i no harem nogud taem mifala i no gat ol samting blong bodi we maet mifala i wantem.”

Dries mo waef blong hem Jenny, tufala tu i mekem olsem Jan mo Woth. Tufala i tekem disisen blong no mekem we laef blong tufala i fasfas wetem plante samting nao tufala i save spenem moa taem long ol wok blong Kingdom. Dries mo Jenny i bin paenia go kasem taem we tufala i gat wan pikinini. Ale, Dries i mas wok blong lukaot long famle blong hem. Hem i wok olsem man we i lukaot long bisnes long wan bigfala kampani. Ol bos blong hem oli glad long wok blong hem, taswe oli wantem givim wan hae posisen long hem. Be Dries i no wantem tekem posisen ya, from we hem i save se biaen, wok ya i save blokem hem blong no spenem plante taem long wok blong God olsem bifo.

Tufala i mas lukaot long pikinini—mo tu tufala i mas lukaot long mama blong Jenny we i sik—mo samting ya i tekem plante taem mo paoa blong tufala. Nating se i olsem, tufala i stap putum tingting blong tufala long wok blong paenia. ?Wanem i givhan long tufala blong holem wan tingting olsem? Jenny i eksplenem se: “Mifala i tekem sam paenia oli kam laef wetem mifala long haos, mifala i stap singaot ol paenia blong oli kam kakae long haos, mo mifala i welkamem ol seket elda oli kam long haos.” Dries i ademap se: “Mifala i mekem we laef blong mifala i no fasfas wetem tumas samting, mo mifala i traehad blong no gat ol bigfala kaon olbaot. Mifala i tekem disisen se bambae mifala i neva mekem bigfala bisnes no pem wan haos. Olsem nao, long fiuja, ol samting ya bambae oli no blokem mifala blong mekem moa.”

Dries mo Jenny tufala i tekem disisen blong gat wan laef we i no fasfas wetem tumas samting. Olsem nao tufala i save spenem plante moa taem long wok blong Kingdom, mo disisen ya i karem nambawan frut. Tufala boe blong tufala oli wok olsem elda, mo wan long tufala i stap paenia wetem waef blong hem. Dries mo Jenny oli bin wok olsem spesel paenia, mo biaen Jenny i kampani wetem Dries long wok blong seket elda. Naoia tufala i wok long Betel, mo Dries i wan memba blong Branj Komiti.

Ritae Bifo Long Stret Taem

Sem mak olsem Dries mo Jenny, Otto mo waef blong hem Judy, tufala tu i bin paenia bifo we tufala gel blong tufala i bon. Taem Judy i gat bel long fasbon gel blong tufala, Otto i faenem wan wok olsem skul tija.

Taem tufala pikinini i stap gruap, plante taem Otto mo Judy oli singaot ol paenia oli kam long haos, ale tufala gel i luksave we ol paenia oli  haremgud long fultaem wok blong prij. Taem i pas, mo fasbon blong tufala i joen long wok blong paenia. Biaen, hem i go long Gilead Skul, mo hem wetem hasban blong hem, tufala i wok olsem misinari long wan kantri blong Afrika. Lasbon blong tufala i stat paenia long 1987, mo Judy i joen wetem hem long wok blong paenia tu.

Taem sam samting long laef blong Otto mo Judy i jenis, Otto i naf blong katemaot sam aoa long wok blong hem olsem skul tija, mo i yusum taem ya blong mekem wok blong paenia. Biaen, hem i lego wok blong hem. Tede Otto i wan seket elda, mo hem i yusum gudhan we hem i gat olsem tija blong mekem ol kongregesen oli kam strong long saed blong spirit.

?Otto i givim wanem advaes long olgeta we oli ritae bifo long stret taem? Hem i talem se: “Taem yu ritae, i nogud blong ting se bambae yu spel fastaem blong wan no tu yia, from we i isi nomo blong gohed blong ‘spel’ biaen. Sipos yu spel fastaem, bambae yu fogetem wok blong paenia. I moa gud yu statem wok blong Jeova jes afta we yu ritae.”

Yusumgud Ekspiriens Blong Yu

I tru we ol brata olsem Pum, Jan, Dries, mo Otto oli no moa gat paoa mo oli no moa strong olsem bifo, taem oli yang yet. Be naoia oli bigman long saed blong spirit, oli gat ekspiriens, mo oli waes. (Ol Proveb 20:29) Oli save wanem nao ol responsabiliti blong wan papa, mo from we oli bin wok wetem waef blong olgeta, oli luksave wanem wok blong wan mama tu. Wetem waef blong olgeta, oli fesem finis ol trabol we i save kasem wan famle mo oli putum ol mak we ol pikinini blong olgeta oli save kasem long saed blong spirit. Otto i talem se: “Ekspiriens we mi bin kasem taem mi lukaot long famle blong mi, i givhan long mi long wok blong seket elda taem mi mas givim advaes long saed blong famle.” Long sem fasin, ekspiriens blong Dries olsem wan papa i givhan long hem long Betel famle, from we i gat plante yangfala long Betel.

Yes, ekspiriens we ol brata ya oli kasem long laef i givhan long olgeta blong lukaotgud long ol defren nid insaed long kongregesen. Blong tekem wan pijatok, yumi save talem we ekspiriens blong olgeta i bin sapenem gud ol tul we oli yusum. Hemia i min se ekspiriens blong olgeta i mekem se oli save givim advaes we i wokgud. (Prija 10:10) Yes, plante taem, from ekspiriens blong olgeta, oli naf blong mekem sam samting kwiktaem moa i winim ol yangfala we maet oli strong moa be oli no gat plante save.

Ol brata olsem wetem ol waef blong olgeta tu, oli givim wan nambawan eksampol long ol yangfala Witnes blong Jeova. Ol yangfala oli luksave we ol man olsem, wetem waef blong olgeta, oli pastru finis long plante long ol hadtaem mo blesing we yumi tokbaot long ol Kristin buk blong yumi. I gud tumas blong luk ol man mo ol woman we oli rere blong lego olgeta samting we olgeta nomo oli wantem, olsem Keleb we i rere blong mekem wan bigfala wok nating se hem i olfala finis.—Josua 14:10-12.

Folem Eksampol Blong Olgeta

?Olsem wanem? ?Yu save folem eksampol blong ol man mo ol woman we yumi tokbaot long haf ya? Rimembagud poen ya: oli putum trutok i stap fas ples long laef blong olgeta. Oli putum tingting blong paenia long hat blong ol pikinini blong olgeta. Oli mekem samting ya from we, olsem Jan i talem, oli soem se oli “lavem Jeova mo ogenaesesen blong hem, oli jusum ol gudfala brata sista blong kampani wetem ol pikinini blong olgeta, mo oli tijim ol pikinini blong oli naf blong lukaot olgeta wan.” Mo tu oli wok mo pleplei tugeta olsem wan famle. Pum i rimemba se, “long taem blong holide, ful famle i go prij long moning mo i spel tugeta long aftenun.”

Antap long samting ya, ol Kristin ya oli bin mekem plan longtaem bifo, taswe taem wan samting i jenis long laef blong olgeta, oli rere blong yusumgud taem blong olgeta. Oli putum wan mak long laef blong olgeta mo oli mekem ol disisen we i givhan long olgeta blong kasem mak ya. Oli traem faenem rod blong wok haftaem, mo oli rere blong kasem smol mane nomo. (Filipae 1:10) Ol waef oli sapotem gud ol hasban blong olgeta. Ol waef mo hasban tugeta oli gat strong tingting blong pastru long ‘doa we i open long olgeta blong mekem gudfala wok.’ Mo from samting ya, oli kasem ol nambawan blesing we Jeova i givim.—1 Korin 16:9; Ol Proveb 10:22.

?Olsem wanem? ?Yu tu yu wantem mekem moa long wok blong God? Sipos yes, ale, yusumgud janis we yu gat taem laef blong yu i jenis, hemia nao beswan rod blong mekem moa.

[Tok blong pija long pej 20]

Pum mo Anny oli stap lukaot long Haos Asembli

[Tok blong pija long pej 20]

Jan mo Woth long wok blong prij

[Tok blong pija long pej 21]

Dries mo Jenny, tufala i wok long Betel

[Tok blong pija long pej 21]

Otto mo Judy oli stap mekemrere blong go visitim nekis kongregesen