‘Stap Klosap Long God, Nao Hem Bambae i Kam Stap Klosap Long Yu’

Bifo Mo Afta—Laef Blong Hem i Jenis Olgeta

!MATSEPANG i harem nogud mo laef blong hem i no gat mining nating! Hem i wan yangfala gel long Lesoto, wan kantri long medel blong Saot Afrika. Matsepang i gruap olsem wan Katolik. Be skul blong hem i no halpem hem blong stap klosap long God. Defren olgeta, blong plante yia ol sista blong Katolik jos oli spolemgud tingting blong hem, oli givim mane long hem blong pulum hem blong mekem ol rabis samting long saed blong seks wetem olgeta.

Taswe, Matsepang i no moa trastem ol skul mo hem i no save bilif se i gat wan God i stap we God ya i gat lav mo i lukaotgud long ol man we hem i bin wokem. Fasin ya we narafala i no bin kea long Matsepang mo oli bin spolem hem, i mekem tingting blong hem i trabol bigwan, mo hem i harem se hem i nating nomo. Taem Matsepang i gruap hem i kam raf tumas mo i wantem faet oltaem. Fasin ya i pulum hem blong brekem loa.

Matsepang i joen long wan rabis grup blong man we oli stap stil long ol tren. Polis i holem hem, mo oli jajem hem i go kalabus long Saot Afrika. Biaen, oli sanem hem i gobak long kantri blong hem, Lesoto, mo long ples ya hem i gohed long rabis laef blong hem, hem i brekem loa, i stap drong, i raf, mo i slip olbaot.

Wan dei, taem Matsepang i harem nogud bitim mak, hem i prea mo i askem strong long God blong i givhan long hem. Hem i promes se, “God, sipos mi laef i stap, bambae mi traem bes blong mi blong mekem wok blong yu.”

I no longtaem i pas, nao sam misinari blong ol Witnes Blong Jeova oli kam toktok wetem Matsepang. Oli askem long hem sipos hem i wantem stadi long Baebol. Taem Matsepang i stadi Baebol, hem i luksave we God i kea long ol man mo i lukaotgud long olgeta. Yes, hem i luksave se Setan, “we i stamba blong ol giaman toktok,” hem i stap trikim mo twistim tingting blong sam man blong mekem oli harem olsem se oli nating nomo mo se Jeova i no save lavem olgeta samtaem.—Jon 8:44; Efesas 6:11.

!Be Matsepang i haremgud tumas taem hem i lanem se hem i save gat respek long hem wan sipos hem i tanem tingting blong hem from ol sin blong hem, sipos hem i lukaot fasin fogif blong God mo i traehad blong mekem God i glad! Ol Witnes oli halpem Matsepang blong luksave we “God i hae moa long tingting blong yumi” mo tingting blong God i defren long tingting we yumi gat long yumi wan.—1 Jon 3:19, 20.

Matsepang i glad tumas taem hem i ridim ol tok ya blong Deved long Ol Sam se: “[Jeova] i stap klosap long ol man we tingting blong olgeta i kam nogud, i stap sevem ol man we tingting blong olgeta i foldaon olgeta.” (Ol Sam 34:18) Matsepang i wan long ol man ya we “tingting blong olgeta i foldaon olgeta,” taswe hem i luksave we Jeova i no lego ol man blong hem, nating se sam blong olgeta oli harem olsem se oli nating nomo. Hem i haremgud  tumas taem hem i lanem we God i lukaotgud mo i sapotem ol sipsip blong hem taem oli fesem hadtaem. (Ol Sam 55:22; 1 Pita 5:6, 7) I gat wan tok we i rili tajem hat blong hem, hemia se: ‘Stap klosap long God, nao hem bambae i kam stap klosap long yu.’—Jemes 4:8.

Kwiktaem nomo, Tok Blong God, Baebol, i gat paoa long laef blong Matsepang. Hem i stat go long ol Kristin miting oltaem, mo hem i lego ol nogud fasin blong hem we oli agensem Baebol. ?Wanem frut i kamaot? Hem i no moa harem se God i no save lavem hem mo lukaot long hem. Matsepang i tekem baptaes olsem wan Witnes Blong Jeova, mo stat long taem ya hem i bin spenem plante taosen aoa long Kristin wok blong talemaot gud nius blong Kingdom. Nating se tingting blong hem i trabol yet from ol samting blong bifo, be naoia Matsepang i gat wan laef we i hapi mo i gat mining. !Stori blong hem i soemaot klia we Baebol i gat paoa blong jenisim laef blong man mo mekem oli harem gud moa!—Hibrus 4:12.

[Tok blong makem poen pija long pej 9]

“God, sipos mi laef i stap, bambae mi traem bes blong mi blong mekem wok blong yu”

[Bokis blong pija long pej 9]

Ol Rul Blong Baebol We Oli Wok

Plante rul blong Baebol oli bin givhan long ol man we oli safa from we narafala i bin mekem i nogud long olgeta. Hemia sam blong ol rul ya:

“Taem we mi mi wari, mo mi stap tingting tumas, oltaem yu [God] mekem tingting blong mi i kam gud bakegen, yu stap mekem mi mi glad.” (Ol Sam 94:19) Jeova i save mekem tingting blong yumi “i kamgud bakegen” sipos yumi stap ridim Tok Blong Hem, Baebol. Taem yumi tingting dip long ol tok ya mo yumi prea long God, wari blong yumi i godaon mo yumi lan blong trastem God moa, olsem wan Fren we i kasem save filing blong yumi.

“Hem [Jeova] i stap mekem olgeta we oli harem nogud, oli harem gud bakegen, mo i stap fasem ol soa blong olgeta.” (Ol Sam 147:3) Sipos yumi gat tangkiu long fasin sore blong Jeova, mo long rod we hem i yusum blong kavremap ol sin blong yumi tru long ransom sakrefaes blong Jisas, nao bambae yumi no fraet blong kam klosap long God, yumi no moa harem long hat blong yumi se yumi bin mekem wan samting we i rong. Filing ya i save mekem yumi haremgud mo yumi gat pis long tingting.

“I no gat man i save kam long mi [Jisas Kraes], sipos Papa blong mi we i sanem mi mi kam, hem i no pulum hem i kam. Man we Papa blong mi i pulum hem i kam long mi, mi bambae mi mekem hem i laef bakegen long Lasdei.” (Jon 6:44) Tru long tabu spirit blong hem mo long wok blong prij, Jeova hem wan i pulum yumi blong kam klosap long Pikinini blong hem mo i givim hop blong laef we i no save finis long yumi.