?Fasin Pua Bambae i Finis Samtaem?

WAES King Solomon blong bifo i talem se: “Oli stap spolem olgeta, mo oli stap mekem olgeta oli harem nogud, we oli stap krae from, be i no gat man i save givhan long olgeta.” (Prija 4:1) Ol man ya we Solomon i tokbaot olgeta se oli stap harem nogud, ating plante long olgeta oli puaman tu.

Fasin pua i no wan problem we yu save skelem olsem mane nomo. Wan ripot we i kamaot long World Bank long Jun 2002 i talem se, “long 1998 i gat raonabaot 1.2 bilian man long fulwol we oli laef wetem 1 dola nomo . . . mo 2.8 bilian man oli laef wetem klosap 2 dola nomo evri dei.” Nating se ol namba long ripot ya oli daon moa long ol namba we oli bin ripotem fastaem, be “oli bigwan yet taem yumi tingbaot se hemia namba blong ol man we oli safa from fasin pua.”

?Fasin pua bambae i finis samtaem? Jisas Kraes i talem long ol disaepol blong hem se: “Ol puaman bambae oli stap oltaem wetem yufala.” (Jon 12:8) ?Olsem wanem? ?Tok ya i min se bambae fasin pua wetem ol rabis frut blong hem oli stap blong olwe? Nogat. Jisas i neva promes long ol man we oli stap folem hem se bambae oli kam rij long saed blong bodi, be hem i no minim tu se ol puaman oli no gat hop nating.

Ol man oli traehad be oli no naf blong holem ol promes blong olgeta blong finisim fasin pua. Be Tok Blong God, Baebol, i promes long yumi se i no longtaem bambae i no moa gat man i safa from fasin pua. Jisas i “talemaot gud nius long ol puaman.” (Luk 4:18) Promes blong God blong finisim fasin pua i wan haf blong gud nius ya. Bambae promes ya i kamtru taem Kingdom Blong God i stanemap stret fasin long wol.

!Niufala wol ya bambae i defren olgeta! Jisas Kraes, we i King long heven, “bambae i gat sore long ol puaman, mo long olgeta we oli no strong, mo i stap sevem laef blong olgeta we oli sot long ol samting.” Yes, “olgeta we oli stap harem nogud aninit long han blong narafala man, hem bambae i tekemaot olgeta, i sevem olgeta.”—Ol Sam 72:13, 14.

Maeka 4:4 i tokbaot taem ya i se: “Olgeta man bambae oli stap gud, mo oli gat pis olwe. Bambae oli save stap gud long ol plantesen blong grep blong olgeta, mo oli save sidaon aninit long ol figtri blong olgeta. Bambae i no moa gat man blong mekem olgeta oli fraet. Hae God i gat olgeta paoa, mo hemia tok blong hem.” Bambae Kingdom Blong God i stretem ol problem we oli mekem man i harem nogud, mo tu i finisim ol sik mo ded. Yes, “long taem ya, [Jeova] bambae i mekem we ded bambae i go lus olgeta. Bambae hem i ravemaot wota blong ae blong yufala, mo bambae i tekemaot sem we yufala evriwan i stap kasem.”—Aesea 25:8.

Yu save trastem ol promes ya, from we God hem wan i stamba blong olgeta. ?Yu yu intres blong stadi ol pruf we oli soem we yumi save trastem ol profet tok blong Baebol?

[Foto Credit Line blong pija long pej 32]

FAO photo/M. Marzot